Nikutoieba Matsuda (中環)

近日接二連三見到不同媒體介紹奈良名店「肉といえば松田」（Nikutoieba Matsuda）於香港首設海外分店，為食兵團當然係要打鐵襯熱，盡快一試啦！第一次以短訊查詢時知悉店子只開晚市一輪，七人訂座要等到2024年先有位，正當大家仍在失望之際，隔咗幾日突然收到餐廳訊息，告知因應熱烈需求，老闆決定節慶期間於選定日期加開午市，嘻嘻，和牛割烹宴彷彿係天賜為食寶寶們嘅聖誕禮物。位於中環歌賦街上嘅日本過江龍黑白灰色嘅地舖只示出形似識別忍者派系嘅徽標，門面低調中帶著神秘。正門上方嘅黑色布簾及室內以木為主嘅間隔自然地流露出和風味。可容納上十一人嘅用餐大堂光線充裕，通爽潔亮，且空間感足。沒有花巧之裝潢，圍繞住師傅大舞台嘅每一位賓客都可專心觀賞Hitoshi-san嘅割烹廚藝表演。顧名思義，「割」為切割、「烹」為烹調，亦即邊切邊煮。現階段，午餐及晚餐均提供同一款十四道菜和牛廚師發辦料理（$1,280/位），訂座後必先預繳不設退還嘅訂金（$500/位）以確認留位。午餐準中午十二時開始，全場同一步伐，絕不會為遲到或早退嘅食客拖慢或加速；冇錯，遲到冇得補，早走唔會減價。週末大解放，酒鬼們當然係要歡樂暢飲啦！單點飲品項目共有兩頁。事前已問清楚開瓶費分兩種，720ml裝或以下為$400/樽、720ml以上則為$800/樽。聽到好客嘅Shirley妹妹詳盡推介，為食七子唔洗多諗，即選定性價比最高嘅Full Pairing午餐食酒配搭，$380/位可享食前酒、日本酒、白酒、紅酒，合共四杯酒酒。揀好飲品後，主廚先展出和牛主材並為其作出簡介。第一盤中，上方長長嘅為澳洲和牛牛脷，下方三件則為源自日本宮崎嘅後腰蓋柳肉、西冷及牛柳。下圖左手邊嗰盤為牛脷，右手邊為外橫隔膜。嘻嘻，小肥一向好多野想知，兼且唔會怕醜去問，結果八到主廚未夠三十歲，十五歲已經入咗行，故有「天才廚師」之稱號！席上只擺有一雙筷子，因為所有菜式都已調好味。三小時嘅和牛盛宴迅即由甘甜清爽嘅有汽餐前酒＜雁木スパークリング 純米発砲にごり生原酒＞揭開序幕。蘑菇濃湯：頭盤一小杯芳香柔滑嘅蘑菇濃湯，濃縮得黎份量剛好唔會溜。宮崎和牛主角隆重登場前，妹妹先呈上每年只生產六萬枝嘅日本清酒＜楯野川純米大吟釀急流＞。和牛他他（壽司）：如相所示，師傅細心地將鮮紅鮮黃嘅和牛及醃蘿蔔剁碎，切割步驟絕無假手於人，用紫菜加入醋米包製出卷物後就續一以心連心嘅方式直接傳遞予貴客手中，感覺尤其溫馨親切！和牛他他蘿蔔卷集鮮甜脆嫩於一身，實滋味無窮！炙燒和牛柳拌洋蔥、紫蘇葉：接著嘅燒牛柳件建議撈勻哂拌配嘅生洋蔥絲、紫蘇葉碎及蓮藕脆片黎食。外層輕輕燒炙過嘅和牛柳厚潤有嚼口，小砵中其實都有成四、五件，黏上秘汁再夾埋配料食落去，酸甜清爽中帶出芬芳，越食越開胃。山椒子燒和牛赤身配意大利黑醋燒秋茄子：外表粉潤嘅燒和牛赤身肉質更為柔軟，而且肉汁豐腴，墊底嘅黑醋燒茄子意外地一啲都唔油。準備換上澳洲和牛代表一刻，妹妹亦斟出法國白酒＜2021 Château Le Grand Verdus Sauvignon Blanc Sémillon＞。炭燒和牛牛舌（鹽味）：閃出油光嘅澳洲和牛牛脷鬆爽富彈性，簡單塗上山葵吊出清新嘅辣勁，可口又提神。炭燒和牛外橫隔膜（韓式醬汁）：牛牛嘅外橫隔膜又稱之為外裙肉，應建議用生菜包起用手拎住黎食，生菜和牛卷微辣惹味，爽潤多汁，個個食到嗦嗦聲，爽呀！自家製和牛生火腿蔬菜沙律：唔知師傅係咪食過四川名產「燈影牛肉」而得到靈感呢？！以臀肉刨出嘅和牛火腿比紙張更巧薄輕盈，放入口即慢慢溶化於舌上；沙律含醋量極高，所以食落好酸，相信係用作分解多道和牛嘅油脂。燉和牛配馬鈴薯蓉：小肥略嫌深啡色嘅燉和牛濃咸得黎帶點兒苦澀，或許係因絲毫不覺有爽嘅成份吧，身旁嘅長輩一再提出超腍嘅口感完全唔似牛脷。師傅好似聽得明大家抱有疑惑咁，急忙地攞出牛脷真身以指出燉牛脷嘅準確部位。時令水果配馬斯邦尼芝士豆腐蓉：進入重頭戲之前，先有節令嘅日本士多啤梨混芝士豆腐蓉為味蕾洗滌一番。吉列和牛菲力三文治：不知不覺已經進入直路，輪到選配最後一杯南非紅酒＜2018 Windmeul Kelder Cellar Cabernet Sauvignon Merlot＞嘅招牌和牛三文治出場。底面兩片暖手嘅多士外脆內軟，中間兩、三成熟左右嘅吉列菲力香脆鬆厚，沾上他他秘醬之外仲夾入切碎咗嘅奈良漬（ならづけ），為和牛三文治添上爽潤惹味，食過包你返尋味！壓軸上陣嘅和牛西冷分開兩個煮法，講到明係壓軸喎，煮前當然係要先哂一哂冷啦！和牛西冷洋蔥涮涮鍋：第一件用芳香嘅清湯涮熟，可以食得出西冷本身嘅肉質如何柔軟纖潤，絲毫不膩口。和牛西冷時令蘑菇壽喜燒配白飯：望住師傅將大大片和牛喺壽喜燒汁中浸一浸、拖一拖，甜甜嘅香氣迅即飄進鼻腔。上枱時，大大塊和牛正於碗中享受緊蛋黃浴！第一啖咬落去西冷件時，最突出嘅就係蛋黃醬嘅柔順感，直令靚肉變得更加細緻嫩滑！第二啖將啲精華撈埋落碗白飯到食，飽滿嘅飯粒都頓覺肥潤甜美得多，滑溜得黎仲好暖胃。溫素麵：單尾共有三款可選，覺得食夠肉嘅客人都會揀清清地嘅溫素麵。和牛咖哩：相反地，如果個胃仲有位，而又仲可以加重口味，不妨選擇被譽為日本「國民食物」嘅咖哩飯，混入咗和牛嘅咖哩飯甘香濃郁，十分飽肚。和牛時雨煮飯：想輕巧地食多少少飯呢，細細碗和牛時雨煮飯就最恰當。飯面嘅牛肉薄片夠味得黎唔會好似咖哩飯咁多汁，頂面嘅生薑絲又可以消消滯，話咁快兩、三啖就食哂。自家製安納芋Gelato：結尾一球清涼嘅安納芋雪糕微甜得黎個味道好天然，加咗兩片安納芋脆片點綴令口感更有層次，吃畢腸胃好舒適。飯後仲要由師傅親自送上熱毛巾，盡顯誠意！喺日本出名為預約困難店之一嘅「肉といえば松田」近日於香港開設第一間海外分店，同個名一樣夠哂話題性。中環新店環境簡潔樸實，高雅大方，座位闊落舒適，服務生誠懇體貼，十四道菜和牛割烹廚師發辦饗宴用材新鮮，半帶傳統半帶新穎嘅和牛菜式高質味佳，$1,280/位亦相當合理。據悉，除咗兩道招牌和牛他他壽司及吉列和牛菲力三文治之外，餐牌其他十二道菜都會定期更新換畫，務求貴客再次光臨時可保持新鮮感，絕對值得去見識一吓！

Poke Go (灣仔)

「舞」醉三人組幾個星期前發現灣仔有新店搞買一送一歡樂優惠，原本約咗週五晚收工一試，點知組長喺門外等到五點零三分先被告知店子關門三個月，臨急臨忙就轉咗入汕頭街，喺門面最光亮嘅「Poke Go」續尋歡！地舖簷篷下有幾個室外座，估計係為煙民而設。透過玻璃窗可以見到樓底高高、開揚通爽嘅用餐大堂。正門直入左方位置為開放式廚房及水吧。長櫈上擺出可愛嘅聖誕飾物。夏威夷式魚生飯專門店之前做緊$108兩杯指定紅、白、雞尾酒，不過近日就改咗為全面九折。三人各有各點。飲友教落，樽裝啤酒1664 Blanc永冇出錯。正當舞伴嫌顏值最高嘅小王子雞尾酒「The Little Prince」（$68）唔夠酒精時，坐喺隔離枱嘅老闆Jason哥哥聽聞即安排酒保增添酒精，意見接受後快速反應，實在難得！炸蓮藕片（$48）：唔想空肚飲酒所以求其叫咗客炸蓮藕片，真係冇諗過金黃吸睛嘅蓮藕片係由廚房新鮮炸出黎喎！熱辣辣嘅蓮藕片巧薄不油膩，而且仲脆卜卜，話咁快就食完一碟，結果當然係要追加啦！飲咗兩輪仲比「舞」醉三人組發現炸蓮藕片竟然都有九孔架，哈哈，眼界頓開！灣仔橫街小店「Poke Go」光鮮開揚，老闆幽默親民，不時都會推出全天可享嘅折扣優惠，價格合理，個人誠意推介香口小食炸九孔蓮藕片送酒酒，倍添歡樂。

觀星圖 (跑馬地)

早幾回提到跑馬地馬場內有幾間餐廳於賽馬日同非賽馬日所提供嘅餐飲有所不同，疫後就二戰位於馬場看台三座嘅「觀星圖」，週三初試夜馬後意猶未盡，週末再戰午市飲茶。馬場出名大、入口多，根據指示從D入口乘搭升降機，即可直達會所餐廳，不過大家要留意，用餐區域分七樓及八樓兩層，其中私人廂房只設於八樓，唔想搵錯地方又上又落的話，最好同訂座嘅會員預先確認樓層。中菜廳以「觀星」起名，室內嘅擺設當然係唔少得精緻嘅觀星儀啦！華麗闊落嘅用餐大堂光線充裕，四周可見倍率電視，地上舖上星空色調嘅厚地墊吸音，散座以屏風隔開，私人空間足，高雅舒適得很。步出窗邊嘅露台觀賞賽馬實況，可為自己嘅心水馬仔吶喊，衝線一刻一齊歡呼，勁有氣氛！餐桌上擺有齊備嘅自用及公用餐具。馬會公價茶芥每位$22，開瓶費則為$200/樽。因深覺酒酒標價唔過份，結果紅酒、白酒、香檳各開咗一樽，只係奇怪在會所內懂得開酒嘅職員不多，有點兒欠缺專業。賽馬日嘅五頁餐牌中英對照，簡單易明。糟滷黑白雞（$188）：黑白分明嘅雞件雖已預先去哂骨骨，不過外觀明顯不及之前喺金鐘名酒店餐廳食過嘅版本咁精巧，幸好帶有酒香嘅雞肉尚算潤滑，長輩都好滿意。黑魚子茶燻鴨蛋（$98）：意外地，鴨蛋嘅蛋白部份膠彈得黎毫不嚡口，散發出嘅燻味亦唔會太濃，流心嘅蛋黃鮮濃軟滑，一人半件都幾飽肚架。蔥油蟶子皇（$288）：油潤有光澤嘅蟶子十分爽脆，鮮甜中帶著微微嘅勁辣，只係份量好似少咗啲。芥末鳳梨西班牙黑豚肉（$268）：餸名作到咁長其實即係咕嚕肉！以西班牙黑豚肉做出嘅高級版咕嚕肉皮脆肉鬆爽，師傅選配兩款脆薄嘅菠蘿乾及酸甜多汁嘅菠蘿肉直令菜式增添口感同層次！櫻花蝦魚香脆茄子段（$148）：矮瓜條修長金黃嘅外表被冇份叫餸又掛住跑馬嘅老人家誤以為係炸豆腐，咁又真係幾似嘅！矮瓜條條層炸皮巧薄且夠乾身，個矮瓜心軟腍得黎一啲渣都冇，連同脆卜卜嘅櫻花蝦同魚香肉碎一齊食已夠惹味香口，嶄新演繹嘅魚香茄子完全減去傳統版本嘅油膩，輕易取勝，贏得出色！陳皮燒乳鴿伴柑普茶（$168/半隻）：連茶壺茶杯上嘅乳鴿賣相好有氣勢，紅潤亮麗嘅燒乳鴿皮層香脆，鴿肉軟嫩，脂肪不多，$168半隻，估計貴在陳皮及柑普茶之年份，不過講真唔係好食得出乳鴿有陳皮香。韮香鮮花椒崩沙腩（$528）：原煲上嘅崩沙腩熱力十足，肥瘦均勻嘅靚腩厚身得黎爽潤軟滑，香辣嘅湯底入面仲有半腍半爽嘅蘿蔔，菜式簡單可口。蔥油脆皮雞（$408/隻）：浸喺蔥油湖上嘅雞雞當真如餸名般脆皮，皮下嘅雞肉柔嫩白滑，芳香鮮美，如果碎蔥可以加倍份量相信效果應更佳。荷香仁稔蒸鱔（$288）：XO仔一向少食鱔，不過都影咗幅相同大家分享。孜然烤羊腿（$498）：席上嘅親友對羊腿嘅意見不一，正當小肥嫌羊羊羶時，暈Uncle就大讚佢羊味濃郁。。。甜品套餐（$80/位）：週三賽馬當晚嘅服務生大多為臨記，生手到連單都唔係好識落，餐桌上不潔嘅碗碟仲扮唔識處理，上甜品前細佬真係唔抵得，自己拎走哂去附近張櫃台！三式甜品擺盤似乎有啲求其，質素亦頗為麻麻，當中蜂巢黑糖糕又硬又實；香芒糯米糍雖然煙煙韌韌，但就唔係好食得出有芒果味；細細杯圓肉紅棗燉桃膠好似冇落糖咁淡而無味。家人都覺得「觀星圖」賽馬日嘅小菜唔錯，所以就索性試埋週末飲茶，可惜期望過高，結果失望而回！週六非賽馬日人流冇咁多，午市飲茶只有一張點心紙，駐場經理及傳餸員都明顯熟手同爽手得多。筍尖鮮蝦餃（$50/四件）：蝦餃皮層厚薄適中，扣分在個餡乾爭爭。蟹籽燒賣皇（$50/四件）：比蝦餃更為豐滿嘅燒賣則十分爽嫩。百花釀魚肚（$65/兩件）：睇相都應該睇得出，墊底嘅魚肚毫無水份，蒸得未夠透，食落冇汁又唔夠腍，頂面放舊蝦丸就叫做「百花釀魚肚」，廚房交貨交得好敷衍囉！五香豆乾素珍腐皮卷（$46/三件）：腐皮卷雖然濕淋淋，但係咬落腐皮仲好韌，同個齋餡一樣唔夠腍，不吃也吧！蜜汁叉燒包（$46/三件）：只屬和暖嘅叉燒包唔夠熱，所以完全唔鬆，加上入面嘅叉燒又乾又嚡，唔掂！砂鍋豉油皇銀芽炒腸粉（$42）：用煲仔上嘅炒腸粉軟滑可口，係咁多款點心中最夠鑊氣嘅！柱候牛雜（$52）：牛雜不單勁咸，而且仲好粉同好油，學姨丈話齋，「一個字：劣」！蘿蔔絲酥餅（$46/三件）：酥餅外層乾到黐哂喉，入面已經凍哂嘅蘿蔔絲味道仲好苦澀。最奇怪就係用咗苦苦咸咸嘅朱古力泥墊底，苦上加苦，乾上加嚡，配搭怪誕，感覺格格不入。果皮泥鯭粥（$115/窩）：泥鯭粥魚肉就多，而且件件都好多骨，不過最大問題又係唔夠熱！不得了豆腐（$108）：飲茶最有驚喜反而係炸皮香脆巧薄、個心幼嫩滑溜嘅炸豆腐，鮮油炸出所以特別燈亮鮮美，熱辣辣確真零舍不同！馬場餐廳「觀星圖」環境優雅有格調，每週只供應三餐嘅會所中菜廳似乎屬外判形式經營，服務生人數多，然而效率低兼唔夠專業，食物質素亦反覆不穩定。週三賽馬日嘅小菜看似有板有眼時，週末非賽馬日熱量不足嘅點心卻明顯欠缺火候，如果有意一試，小弟會建議揀選賽馬日，有氣氛之際菜式更稱心。

文華扒房及酒吧 (中環)

「香港文華東方酒店」嘅「文華扒房及酒吧」已連續十五年取得米芝蓮星星，最享受食西餐嘅迷人Uncle得知XO仔從未到訪，適逢壽辰就請肥肥家族全員一嚐。接待處一邊為西式嘅聖誕樹，另一邊及正門身後嘅卻係中式嘅兵馬俑藝術品，莫非餐廳走中西合璧路線？！面積寬廣嘅用餐大堂開揚通爽，光線柔和。厚墊椅櫈原來係有轆轆嘅，坐得舒適之外，推櫈都唔洗出好多力，只係相片難以捕捉。天花用上酒店嘅扇形標誌設計，立體到題得黎高雅有氣派。窗邊擺放著少許聖誕飾物，滲出大方低調嘅節日氣氛。長輩早已自備其愛好嘅Winston Churchill香檳；標準裝開瓶費為$500/樽，但都遠比酒牌上嘅標價合理。食物餐牌只有英文版，頭尾兩頁道出廚師採用之國際食材包括節令嘅環保海鮮及源自美國或澳洲嘅牛牛，盡量都會揀選本地農場種植嘅蔬果、香料等。頭盤、主菜及甜品項目共有六頁之多。點好菜，服務生先呈上免費贈送嘅開胃小食。應建議由圓碟嘅上方起順時針方向食，第一件鱒魚籽蝦他他撻皮薄餡鮮爽，右下方嘅煙三文魚紫菜卷就有少少腥，左下方嘅雞肝菠菜蛋糕仔軟彈香濃，都幾得意。麵包每人各兩款，分別為薯仔麵包及brioche，包身都好鬆軟。新鮮生蠔即叫即開。Classic Steak Tartare：牛肉他他鮮嫩柔潤，塗上暖手嘅多士，食落香濃惹味嘅同時入口極其鬆化，口感好有層次，而且唔會好溜。Blue Lobster Bisque（$458）：一如潮興嘅西餐廳做法，湯品先上湯料。展出碗內粒粒龍蝦肉後，再由專人於餐桌上灌入熱辣辣嘅湯湯。龍蝦湯鮮濃香醇，龍蝦肉爽脆甜美，成隻拉麵碗咁大嘅龍蝦湯絕對足量！Slow-roasted USDA Prime Rib of Beef（$888）：靚靚媽咪大讚慢烤美國牛肋扒肉厚軟腍、汁多夠潤。U.S. ‘WBI’ Prime Striploin, 10oz（$988）：碟上左方甜甜嘅洋蔥及脆脆嘅羽衣甘藍十分輕巧；厚厚嘅美國特級牛扒外表黑黑實實，但係一刀好易就切到落去，三成熟嘅靚牛肉質鬆軟，肉味濃郁，而且肉汁豐沛，堅！1963 Mandarin Cheesecake：文華酒店嘅招牌芝士蛋糕喺餐廳食嘅版本好似同餅店嗰個有少少唔同，除咗多咗層朱古力脆脆綑邊之外，糕面仲加咗層忌廉。70% Chocolate Soufflé（$388）：應推介點咗個特濃朱古力梳乎厘，真係冇諗到深啡色嘅梳乎厘竟然可以咁立立令！梳乎厘本身蓬鬆輕盈，黏上頂面濃厚嘅朱古力醬即增添香醇嘅朱古力味，加埋球朱古力雪糕涼浸浸，食落甜而不溜滯，甜品絕不邪惡，朱古力迷一定要試！名酒店西餐廳「文華扒房及酒吧」環境優雅有格調，帶哂手套嘅服務生專業有禮，不同款式嘅牛牛菜式各有特色且高質美味，特濃朱古力梳乎厘甜品更加係一試難忘，唯一酒店星級價未必人人會覺得抵。

壽司郎 (上環)

XO仔生病多天後終於病癒，蕃薯uncle即相約一訪業績疫市上升嘅「壽司郎」，見識吓人地點解咁成功。週五傍晚時份，連鎖店門外已擠滿食客候座，心急嘅長輩一收到細佬收工嘅訊息，即撳飛仔排隊攞位。圍繞住傳餸帶嘅卡位闊落舒適，又夠私人空間，桌上嘅電子餐牌簡單易明，落單亦十分快捷。綠茶自己沖。餐具及調味全部自助式，唯一要由服務生真人送上嘅就係酒酒。菊正宗清酒$17/壺，依個價位如果唔係上頭牌就一定抵，嘻嘻，每人點一壺，最均真冇得呃。食物話咁快就到。特選大吞拿魚腩壽司（$27）：蕃薯uncle早就探咗路大拖羅壽司係成個餐牌最值得點嘅一味，所以埋位一野就叫咗四碟！正當小肥覺得此舉有啲狼時，方才發現後面張枱點咗十碟，原來uncle算保守喎！大拖羅壽司鮮美香濃，肥潤不膩口，確真為成餐飯最美味嘅一款，結果食到尾都繼續追加，用行動表示支持！醬烤特選大吞拿魚腩壽司（$27）：由於拖羅被燒至熟透，反而變得成口油，食落仲帶少少腥，甚為失色。特選中吞拿魚腩壽司（$17）：有比較下，白碟嘅中拖羅當真不及黑碟嘅大拖羅鮮香肥美，依啲咪就係大肥爸爸常掛於口邊嘅「最怕貨比貨」囉！秋刀魚壽司（$17）：意外地，節令嘅秋刀魚質感軟腍，毫不爽彈，比預期相差好遠。大切油甘魚腩配鮟鱇魚肝（$22）：厚厚嘅油甘魚肉厚爽潤，頂面嘅鮟鱇魚肝恰好加添鮮濃惹味。三文魚腩壽司（$12）：薄薄嘅三文魚腩嘅味道同其色澤一樣偏淡，不吃也吧！炙燒三文魚腹壽司（$12）：輕輕燒過嘅三文魚腹壽司只係多咗一陣煙燻味，完全冇油香或魚鮮味，一樣唔係咁掂。壽喜燒牛排壽司（$12）：壽喜燒牛肉尚算薄身，敗筆在於牛肉煮得過熟，肉質乾硬老嚡，試唔過。香蔥赤蝦壽司（$12）：中等身材嘅赤蝦爽脆彈牙，香蔥成功吊出蝦隻嘅鮮味，唯一扣分在香蔥帶有一陣千年油味。醬烤鰈魚鰭邊壽司（$12）：鰈魚鰭邊油潤幼嫩，即溶喺口，屬白碟菜式之冠。炸蝦天婦羅拼盤（$27）：熱辣辣嘅炸蝦天婦羅都算好爽脆，以$27黎講真係冇乜野好挑剔。蜆肉麵豉湯（$27）：老人家話要有啖暖湯落肚先舒服，不過聽得出佢嗰句「OK啦」明顯暗示$27用黎食多件大拖羅壽司好過囉，哈哈！限定嘅六十分鐘話咁快就過！二人合共消化咗二十六碟壽司、小食及四瓶日本清酒，即平均每兩分鐘一款，講真食得好急，建議餐廳考慮延長用餐時間至九十分鐘，好等客人唔洗食得咁趕。「壽司郎」上環分店光猛企理，電子點單相當簡便，廚房效率都幾高，壽司中最正必選「特選大吞拿魚腩壽司」！雖則話最貴嗰碟都係$27，一個鐘頭沖得太狼結果埋單每人三百幾近四百，相信揀喺下午茶或者係歡樂時光幫襯可以佗佗佻佻地邊飲邊食應更為化算。