dolos (中環)

經常喺蘇豪區出沒嘅數字auntie發現鴨巴甸街斜坡上有新店「dolos」開張，即誠邀肥肥家族一試。啟業僅兩個月嘅西餐廳鋼鐵嘅外牆樸素得黎有種神秘感。真係冇諗到入面嘅樓底咁高，啲波波吊燈好似月亮咁，好太空。據悉，右方嘅七個高櫈吧位最搶手，因貴客都愛觀賞大廚即席獻技。左邊拍牆為半梳化合併式散座，可容納上十二人。木造嘅餐桌椅櫈簡潔企理，席上均擺出自用嘅餐具及酒杯。XO仔不得不承認自己才疏學淺，以為枱邊嘅擺設係紙壓藝術品，要經理哥哥講解先知此物乃迷你版「防波堤」，即店名「dolos」之來源，象徵著海洋與陸地嘅交匯點。店子只有一款七道菜品嚐餐單（$880/位起），師傅會以本地及日本嘅海陸食材交織出嶄新嘅法日料理，每個月會轉一次，食客只需揀選主菜。不得不提嘅就係經理哥哥極為細心，起菜前再一次確認大家有否食物敏感要廚房留意。部份食材其實就吊咗喺正門旁嘅紫外光雪櫃內，未食已感安全。相信酒鬼們最激動就係知悉開瓶費全免！每道菜上桌時除咗有專人作出簡介，就連餐具架上都會換上適用之餐具，專業又衞生。晚餐隨即由兩款餐前小食揭序。下圖或許有啲誤導性，第一款生蠔唔係每人三隻，而係三人份量用咗一隻碟上。肥嘟嘟嘅法國名蠔Fine de Claire爽彈滑溜，簡單伴配酸酸甜甜嘅燈籠果醬，醒胃得黎清新尤甚。第二款每二人一碟嘅鰹魚撻一口一件，極易入口。乾脆嘅撻皮入面嘅初鰹魚肉源自沖繩，混入咗鱈魚子及地中海醬汁，食落帶出微微嘅煙燻味，一啲都唔腥。Saba, Smoked Cream, Red Wine：和食鯖魚大多為醋漬，西餐師傅就洋化地轉用紅酒、橙汁同紅酒醋浸醃鯖魚件。銀光閃閃嘅鯖魚肉質爽厚潤澤，鮮味濃郁，點上碟上綠色嘅法蔥油即添上芳香柔滑，連同上方用和牛肥膏炸出嘅麵包食落去，獨特嘅組合口感十分豐富。下方其實仲有一球白色嘅煙忌廉，只係小肥唔係咁啱其濃烈嘅煙燻味，所以試咗一小口就冇撈埋入去食。Monkfish Liver, Japanese Fruit Tomato, Banyuls Vinegar, Sesame Semolina Sourdough：靚碟上看似唔係好多野食，但此道招牌菜絕對唔講得笑！鮮紅色嘅日本靜岡蕃茄又甜又多汁！右旁以紅椒粉及蕃茄粉覆蓋著嘅鮟鱇魚肝慕絲球超級軟滑，黑色嘅地膚子仿魚籽醬則好鮮濃，不過淨食真係好易會溜。所以每人都跟咗一籃自家製嘅芝麻酸麵包。外表脆脆嘅酸麵包本身帶有一陣咖哩味同羶味，原來係用咗茴香焗製。喺包面塗上微辣嘅鮟鱇魚肝慕絲，剛好中和返強烈嘅味差，同時又可以減輕個溜滯感，化學作用於舌尖上奏起嘅樂曲實在細膩！Abalone Dashi, Green Tea, Winter Melon：以綠茶油點綴嘅鮑魚高湯香濃甜美，碗中半隻鮑魚軟熟腍滑，一啲都唔韌，加埋啲冬瓜粒粒尤其消暑。Ocean Trout, Tomato, Basil, Mint, Golden Berries：法日大餐當然係唔少得魚魚啦！炭烤海鱒魚嘅魚皮香脆非常，同其親戚三文魚最大分別就係橙色嘅魚肉質地好似舊肉咁緊實彈牙，黏上以蕃茄及龍珠果混製出嘅秘醬，效果清新輕巧。Three Yellow Chicken, Crab & Ginger Sauce：除咗多款外國貨之外，大廚亦冇忘根，接著嘅菜式就選用咗本地三黃雞。經過三天熟成嘅雞雞肉質鮮美嫩滑，毫不乾嚡，炭燒雞皮仲好似薯片咁脆卜卜，頂面嘅炸薑蓉加添惹味嘅同時，墊底混合咗本地花蟹及日本長腳蟹肉嘅秘汁則帶出海洋嘅韻味，成功締造出防波堤海陸交接嘅特性，設計者明顯花下不少心思，妙哉！風趣嘅大肥形容此菜為「日法沙薑雞」，酒精影響下更逗得數字家族嘅成員哈哈大笑，掀起一陣高潮！主菜共有三款，有選擇下怕骨嘅XO仔係絕對唔會食魚，不過都影咗相相同讀者們分享。第一款魚魚為日本炸笛鯛伴青口醬「Fuedai, Mussels Béarnaise Sauce」。第二款燒本地白鱔「Grilled Eel, Shiokara Tomato, Parmigiano Reggiano」同屬游泳健將。Wagyu Beef Hanger Steak, Smoked Oysters & Bone Marrow Sauce（+$80 Supplement）：食肉獸所點選嘅和牛乃澳洲M9級別，外裙柳嘅部位肥膏唔多，滲透著骨髓油香嘅牛味香濃，就連配角嘅牛油生菜都入哂味。三成熟嘅和牛肉質鬆潤軟腍，肉汁豐沛，雖則話用上煙燻生蠔作汁液，但其燻味輕淡不過火。Sake Kazu Ice-Cream, Coconut：甜品嘅日本清酒酒粕雪糕完全唔甜，而且唔會太重酒味，雪糕底嘅椰子肉同椰子味啫喱都好清爽。Jasmine Tea Madeleine：結尾嘅甜點新鮮出爐，上枱一刻已傳出熱力及香氣！沾上士多啤梨及梅味果醬嘅貝殼蛋糕極其鬆軟，咬落去當中嘅茉莉花香迅即洋溢口腔，直上鼻樑，飯後竟能三兩吓手勢成籃清哂，掂呀！蘇豪新店「dolos」幽閒溫馨，服務生專業友善，中法日薈萃嘅廚師發辦晚餐嶄新味佳，潮派配搭不難接受，全面不收開瓶費已屬有心之舉，侍酒時所用嘅酒杯及保溫各方面仍做到足，認真態度無減，絕對值得支持！

Banh mi pate (Vietnam Genuine) (跑馬地)

蕃薯Uncle發現跑馬地有新越南餐廳「Bánh mì pâté」開張，即叫近日多咗喺區內活動嘅小肥一試。新店入口處座孔雀流水擺設貴氣得好有氣派。右方水吧嘅一邊有幾個高櫈吧位。嘻嘻，因深知食肆酒牌唔易攞，眼見雪櫃有啤酒提供即八掛地問多兩句。方才發現原來餐廳早於三年前啟業，七月中屬細舖搬大舖，由外賣為主轉營專注堂食而已。用餐大堂光鮮企理，就連洗手間都相當闊落衛生。天花吊出嘅小盆栽好有大自然嘅氣息。六頁中英對照嘅餐牌簡單易明。老闆娘極力推薦是日新菜式「新鮮本地手切生牛肉湯河」，試食價為$108/碗。新鮮本地手切生牛肉湯河（$108）：應推介所點嘅越式湯河份量都幾足，河粉麵條尚算滑溜，個人最愛就係爽幼鮮甜嘅生洋蔥絲。早幾年去過越南，明白傳統做法湯底唔會好熱，不過小弟略嫌味道唔夠濃郁。新菜敗筆在於選用本地手切生牛肉，肉味偏淡之餘，暖暖嘅湯底只夠熱力煮出半生熟嘅牛肉，全熟嘅部份好軟腍，無奈仲生嘅部份明顯較韌唔嫩。另附嘅配料都好新鮮，只係隔離街嗰間所選用嘅芽菜又肥又爽甜，印象太深刻所以難免會比下去；又証明一次大肥爸爸講野有道理，真係「最怕貨比貨」。越式炸春卷（$75/三條）：熱辣辣嘅炸春卷賣相可能唔係特別靚，但勝在皮脆餡軟嫩，每條已預先一開為二，方便貴客用生菜包住黎食，點上汁汁咬落都好清新，唯一如果個餡可以加重多少少調味就更完美。越式蒸粉卷（$75）：如相所示，蒸粉卷層外皮薄到半透出餡料，入面嘅豬肉碎同雲耳絲清脆爽嫩，捲入舖面嘅炸蒜再塗點秘汁，即成功添上鮮香惹味，必吃推介也！越式蝦仁豬腩肉米紙卷（$86）：黎到先知菜式內含花生，所以細佬冇試到，建議餐廳可於餐牌上加以註明。招牌越式法包（$78）：哥哥一向冇小肥咁多口水，只簡單形容其點選嘅法包「絕對合格，但係冇乜特色」。凍越式特調咖啡（$40）：凍咖啡喺水吧滴漏後加冰先會上枱。個人覺得凍飲嘅咖啡味同奶香都較淡，飲落唔夠香濃滑溜。跑馬地小店「Bánh mì pâté」光猛開揚，服務生效率高，午餐平均半個鐘已搞掂。質素方面，力推嘅本地牛河及招牌法包似乎比較一般，反而傳統春卷及粉卷小食更為美味可口，故今次先俾個OK評佢，等下次試埋碗「河內特級安格斯生牛肉湯河粉」後，如有改觀先再作評論。

家全七福 (尖沙咀)

年初香港宣佈與疫共存不久，富豪飯堂蛻變出黎嘅「家全七福」即於尖沙咀H Zentre開設分店，明顯睇好餐飲業快將復甦！適逢農曆新年，店名意頭咁好，大肥爸爸就專登揀咗情人節一訪，與多位長輩拜年。餐店雖設於商場內，但高高嘅樓底及雲石為主嘅裝潢仍流露出華麗嘅氣派。十一人派對於闊落嘅廂房內進行，有專人貼身招待，私隱度高。老人家除咗讚賞光線充裕之外，最欣賞就係個冷氣風位唔會吹到正個頭。貴客如欲自攜佳釀，開瓶費設於$200/樽標準裝紅、白、汽酒，絕對係良心價！桌上擺有齊備嘅自用及公用餐具。菜單早已預先訂好，餸菜均由服務生續一分配。皮蛋醬蘿蔔、涼伴木耳黃瓜、雞子戈渣、蟹肉韭菜盒：四款前菜先以拼盤呈上。木耳青瓜酸甜醒胃。雞子戈渣皮薄心軟綿，輕盈細膩。蟹肉韭菜盒皮脆餡嫩，香口甜美。如相所示，皮蛋個黃橙亮有光澤，流心又溏心，配上爽脆嘅醬蘿蔔片尤其惹味香濃！豉椒龍躉扣：所謂「龍躉扣」其實即係龍躉個胃，師傅將其切成細細條後以豉椒炒出，質感好似豬肚咁爽潤彈牙，送酒一流。由於龍躉扣嘅體積唔大且量少，往往要儲幾日先夠料炒一碟，對餐廳黎講真係唔化算，所以一般都唔會做，試問有幾多餐廳可以日日劏幾條大龍躉？！大紅片皮乳豬：原隻乳豬新鮮燒出，當然係要先繞場一周啦！零肥膏嘅乳豬皮巧薄鬆化，香脆無比，夾上包包再點上甜醬已夠可口。手撕乳豬肉幼嫩軟潤，同樣滋味無窮！掛住飲飲食食，之後先發現自己唔記咗影即場手撕嘅二道。紅燒大海翅：透明嘅翅翅粗長光滑，紅燒湯底亦十分厚濃。日本遼參鴿蛋扣腐件：女仕們大讚遼參嘅圓錐肉刺挺身得顯著鮮明，咬落爽滑Q彈，滋陰養顏之選果然受歡迎！配角潤腍嘅千層腐件入哂味，鴿蛋亦柔韌軟彈。龍躉骨湯：為咗要食龍躉扣，當晚明顯劏咗一條龍躉，魚骨就用咗黎煲湯。湯湯鮮甜濃郁，熱辣暖胃。只係受酒精影響下，部份相相離哂焦。大地魚菜遠炒龍躉片：白雪雪嘅龍躉片厚肉軟嫩，伴碟嘅芥蘭亦清脆冇渣。唐生菜炆龍躉翅：XO仔仍停留喺初級食魚班，所以只係淺嚐咗一小件龍躉翅，印象最深刻嘅係層龍躉皮超級軟腍滑溜，魚肉比炒龍躉片更為幼嫩鮮味！好魚當然係留返俾同桌嘅長輩啦！鴛鴦棗茸糕：層次分明嘅棗茸糕煙煙韌韌，極富彈性，微甜不溜滯。香芒布丁：布甸並非開粉製出，用上潤甜嘅芒果肉造出夠哂真材實料，淋上花奶即倍添柔滑，一人一小杯份量剛剛好，！高級中餐廳「家全七福」環境優雅闊落，服務生專業周到，度身訂製之「龍躉宴」高質美味，細佬可於情人節與一眾長輩同享口福及溫情福，實感美滿幸福！

Coffeelin (跑馬地)

週二請咗假充當柴可夫，陪同家人睇醫生及遠赴新界探望舅父。忙咗一個早上，眼見只剩九個字食晏就要揸長途車車，所以就勞煩蕃薯uncle喺跑馬地搵定位兼點埋野食黎個快速午餐，結果就試咗「Coffeelin」。位於昌明街斜路頂嘅咖啡室座位不多，只有門口幾張散枱，不過樓底勁高。合共由兩人打理：男主外，負責樓面工作、管理水吧同收銀。女廚師則主內。雖然名為咖啡店，架上最多嘅明顯係酒樽。原來每日最旺場係下午歡樂時光，指定飲品買一送一，標價為$88/杯，即平均$44/杯，講真唔算特別優惠。另外有一點好奇怪，貼於門外上下兩個牌寫上嘅歡樂時間不一，所以唔知係一點定兩點開波，可歡樂到八點。或許跑馬地少人飲啤酒，歡樂酒牌上並冇啤酒選擇。散點餐牌有三頁之多。另外黑板上仲有幾款是日推介項目。Caesar Salad（$88）：細佬都係第一次要用刀食凱撒沙律，因為主材羅馬生菜係成樖就咁一開二，喺面灑上脆卜卜嘅麵包碎粒及火腿薄片雖可添上咸香，食落都算爽脆，不過新派得黎感覺有點兒馬虎而已。Italian Omelette（$78）：意式奄列煎煮時間控制得恰到好處，賣相金黃，無奈餡料偏少，且淡而無味，唔係咁啱自己口味。Truffle Mushroom（$128）：意粉粒粒煙韌軟彈，菇粒都好清潤，個人只係略嫌菜式嘅蒜蓉松露調味過份輕手，食落落過份清淡，唔夠香濃。跑馬地小店「Coffeelin」環境企理，西餐菜式尚算簡單不油膩，可惜令小肥頗為反感嘅就係黑面哥哥仔所發出嘅負能量，搞到用餐後心情都灰埋，情緒咖啡屋絕非人人接受到。

圍爐順德菜 (銅鑼灣)

從舞友口中得知銅鑼灣一幢食廈內有家「圍爐順德菜」為慶祝開業一週年，五、六月期間免費送贈指定招牌菜回饋顧客，六人以上更可享用全隻雞雞，大食會聽聞當然係立即相約一試啦！於網上登記後所獲取之「招牌名菜品嚐券」上清楚列出各大小項條款，包括必需預先訂座、最低消費額、有效日期等，非常詳盡。步出𨋢門，已見牆身貼出有關大廚盧師傅嘅來歷及其拿手菜，估計店名中之「爐」字正取自主廚姓氏之諧音。中菜廳佔用面積全層，正門嘅拱門設計應該係風水陣。牆上嘅書法題字簡單到題。用餐大堂樓底高高，十分開揚，十六樓仲有靚景睇。內側原來間咗間可容納上十二人嘅廂房，經理Money姐姐話最低消費為$500/位，但絕對有商量嘅餘地，好客且具變通能力，讚！每位席上都擺有齊備嘅自用及公用餐具。多頁餐牌可於網上參閱，方便大家訂位時可順便定埋菜單。
<https://well-lo-shunde-cuisine.com/signature/>香口椒鹽鮮魷（$148）：因深覺$100/樽嘅開瓶費相當合理，長輩們決定自己帶酒，就連飯前嘅歡樂時光都唔諗地方轉場，一於直落搞掂！送酒點咗兩款小食，其中椒鹽鮮魷敗筆在於層炸漿過厚且唔夠脆。大良巧炒鮮奶（$138）：同桌嘅隱世廚神直彈鮮奶厚杰溜滯，唔得細滑。窩貼大明蝦（$248/六隻）：傳統小食嘅多士底層鬆化無比，多士面開咗邊嘅蝦蝦比細佬啲手指還要粗，爽脆彈牙，必吃推介！大良煎藕餅（$168）：煎藕餅嘅肉碎同蓮藕粒粒比例好均勻，完全唔會話黐埋哂一pat咁，煎得又夠乾身唔油膩，鬆爽Q彈，香口滋味，送酒佳品也！濃湯蝦滑浸勝瓜（$198）：簡單用高湯浸煮嘅勝瓜軟腍帶脆，蝦滑都好爽甜，屬清潤之選。西糊牛肉羮（$138 /例）：個人覺得牛肉羮好似稀咗少少，同味道偏咸。圍爐炸子雞（免費贈送；原價$360/隻）：招牌靚雞油光亮麗，雞皮巧薄香脆，肥膏不多，連雞胸肉都軟嫩香潤，仲要係免費贈送喎，大食會九子個個都話超值！薑蔥牛肉煲（$180）：牛肉煲熱就夠熱啦，不過咬落就知用咗好多生粉醃，蕃薯uncle話論性價比的話，牛肉輸比雞雞九條街！煎焗魚咀（$298/六件）：XO仔一向唔食魚咀，不過眼見長輩們邊食邊點頭，相信順德名菜質素應該好唔錯。豉汁生炒涼瓜（$128）：苦瓜甘香爽脆，轉一圈已成功清碟，知佢咩料啦！樓上中餐廳「圍爐順德菜」光鮮企理，服務優良，菜式質素雖略帶點兒參差，但良心食肆價格合理，適逢一週年紀念更大送品嚐券，希望細佬給予此篇笑評可有鼓勵之效。