Ufufu Cafe (尖沙咀)

UFUFU是日本九州芭菲大王，最出名是餐牌上有115種芭菲，雪糕迷見到一定開心到震。當日我只有兩個朋友陪伴，唔敢點最大果個「超級芭菲」，於是問隔離檯借來影一影相，呢度有15球雪糕加生果，至少8-10人至食得哂。可加生日牌，用來代替生日蛋糕都唔錯。先點飲品。我飲凍咖啡，朋友飲抹茶 latte。咖啡合格，一貫日式咖啡水準，唔會過酸。朋友話抹茶 latte好飲，可惜太細杯。唔習慣空肚食甜品，先share幾款主菜。牛腹扒是進化版 pepper lunch，由於而家的 pepper lunch 性價比大跌，呢度貴少少但夠肉味，已經大勝。加埋個「馬里奧」童年回憶「酥皮湯」，當堂開心哂。朋友覺得粟米湯太杰，但酥皮不會太油，Ok。我好鐘意食日式漢堡扒，堅持要點呢個流心芝士漢堡。估唔到佢會「包膠」上檯，之前要在高級餐廳如 Seafood Room 或上海 Mr & Mrs Bund 先見到呢種做法，作用是防止肉汁蒸發，令肉塊保持juicy。事實上真係好夠juicy，流心不是太洶湧，但我覺得漢堡扒好味道就ok。蜂蜜芝士薄餅唔知係唔係跟韓國潮流，味道普通。除了與日本相同的115款芭菲，還有4款特色芭菲，價格貴少少。我想試港式鴛鴦，朋友想試白桃，最後決定點白桃。白桃多汁，沒浸過糖水，原汁原味。內有雪糕、脆米及桃味雪芭，甜甜地又唔會太膩，岩女仔食。梳乎厘鬆餅就一般，質地唔係太似鬆餅，似海棉蛋糕。最後一個甜品，卻是我最喜歡的，因為我向來喜歡又冷又熱的甜品，牛角包加了糖粒再烘熱，上加大大個軟雪糕，令人難忘。

總括而言，呢度近地鐵站口，食物portion又較細（適合2-4人），好岩女仔聚會。

明豐粵菜館 (西環)

平時同爸媽去找「明哥」開飯，三個人試唔到太多餸，今次夾夠6個大食朋友，齊齊再去開餐。東江雞半隻，朋友話係屬於古式做法，浸到骨都入味又不會過鹹，一般酒樓已經搵唔到呢個質素。招牌椒鹽九肚魚因為休魚期無魚貨，轉食椒鹽鮮魷。如果有得揀，我會鍾意九肚魚多D。朋友話想飲湯，每人share半盅「是日燉湯」。平時我唔係太喜歡飲湯，但呢個木瓜燉雪耳（鹹版）真係一流，我食哂所有木瓜。訂座時順便訂的蒸肉餅。我覺得呢度嘅肉餅令我想起婆婆生前做的正宗順德味道，我以為以後都食唔到。一定要加白飯。朋友想食菜，我又唔係幾想食炒通菜，後尾決定聽從老闆娘建議，試下花蝦炒韮菜。呢度有個特色，好多菜式未必寫在牆上（可能得一、兩份），要問老闆娘推介。醬燒牛肋條，在嶺南樓果時已經是明哥拿手菜式，牛肋條慢煮到脂肪位都化，醬汁加入蕃茄略帶酸，更加開胃。咕嚕肉，用豬頸肉做，啖啖肉。我堅持每次都叫，飽都叫，最多打包（但次次無剩）。忽然有朋友想食牛腩，原本只係午市有得供應，於是問問老闆娘，好在可以即做一份。上次有朋友來一早訂了牛腩煲，蘿蔔極入味。今次我地即興要食，蘿蔔就無上次咁淋。建議想食的話，一定要打電話訂位時留菜。話得係大食朋友，可以食完上述全部都話想加餸，最終又加多個「家常豆腐」。呢味我第一次食，男性朋友大讚，話好難豆腐咁香又唔散。再來一個干炒牛河，朋友話「碟底無色」，證明所有豉油都在河粉上面，盡顯大師傳功夫。

最後埋單，不收茶芥加一，連汽水及白飯每人HK$133，仲有一盒牛腩及半碟牛河打包，抵到裂。

補充：牛河第二日翻「叮」都仍然好食。

明豐粵菜館 (西環)

爸媽住西營盤，自從地鐵通車之後，回去探佢地就更方便。不過老人家喜歡吃中菜，次次聚餐都係連鎖式酒樓，食物唔貴但略嫌行貨，感覺食茶餐廳都無咁嬲。後來聽爸爸講，第二街東邊街交界（Panda上少少）新開一間中菜水準好高，主廚以前做過阿一鮑魚及嶺南樓，而家自立門戶，佢已經食了幾晚小菜晚飯，我又跟佢去試下。老人家喜歡吃蒸魚。呢度平時menu無蒸魚，間中有「是日海鮮」，例如涼瓜炆倉魚，今日就有蒸石蚌，火候係大酒樓級數。另一個招牌菜﹣醬燒牛肋條（HK$98）係慢煮心機之作。我好喜歡食牛，食了大半碟。平時我唔喜歡飲例湯，但今日例湯（燉湯）合掌瓜煲豬𦟌好清甜，無味精，原來係加入了日月魚調味。呢度仲有其他套餐，因為店面較細，大部分檯係2-4人，菜式亦大多是2-4人分量，不過性價比好高（東江鹽焗雞HK$85／半隻，炒粉麵係$55左右），同茶餐廳定價差不多但水準高好多。大廚亦做慣宴客菜，爸爸已訂了一日試私房菜、另一日母親節做節。

Greyhound Café (中環)

上星期與三位在中環工作的美女相約共晉午餐，談到地點，大家不約而同的說想到 Greyhound Cafe 試試。約會之前我已到此吃過撈河粉及冰檸茶（Greyhound Style），覺得食物味道好、精緻又不算貴，就決定一起再來多試試其他的菜式。薄切三文魚配泰式辣汁（HK$108）雖然只得7片，但那濃烈如泰式生蝦調味的辣味確令人回味，對於當日感冒未癒、味覺有點遲緩的我來說，辛辣的蒜片正好打開我的胃口。我們只有4個人，就決定點兩個前菜+三個麵分享。Greyhound Cafe 最馳名的招牌脆炸單骨雞翼（HK$68）感覺比上面的三文魚片抵食得多，沒有數過碟內有幾多只，但是好像一直也吃不完，大半小時後雞翼仍是脆卜卜的，惹味香口， 下次再來我也會再點。這個麵我忘了記下名字，好像是 Noodle with Thai Braised Beef – Dry。由於我皮膚敏感隨一起感冒來探我，我要戒吃海鮮（除了魚）、牛肉及蛋，友人們很遷就我，盡量點豬肉或是乾撈的麵點。這個麵使用特幼的米粉，與帶有濃濃香葉味道的牛肉汁混在一起味道很讚！<br />鮮椒豬柳炒上海粉皮是個比較少見的組合。上海粉皮原來熱食味道也不錯，加上細滑的豬柳更好吃；鮮椒有「點睛」作用，但始終粉皮多油，炒粉皮時又要落油，一個人來吃飯時點這麵可能是太油膩了，要有幾個人分享才好。而我就 encore 上一次點過的 Noodle in Pork Stew。Pork Stew 其實沒有什麼肉味，只餘下香葉的味道，說滋味就是上面的炒粉皮的豬柳醃得更好吃，但我欣賞它將蝦乾全都加到河粉裡，樣子有點像蝦米腸粉，但更精緻及幼滑，薄如真正的「陳村粉」。再來一杯 Greyhound Style 的冰檸茶（HK$38）。此冰檸茶第一特色是用上青檸，第二特色是冰塊用檸茶製作，就不會愈喝愈啖。初初幾口會覺得味道有點像雀巢檸檬茶，喝著喝著，就會知道層次較多，不是用「雀檸」的喇。順帶一提，這裡沒有白開水供應，飯後我需要吃藥，就要點一支礦泉水。

上次一個人來吃個麵加一杯飲品，埋單大約 HK$160；今次與幾個朋友一起，埋單約 HK$700，即是人均消費大約HK$160-200；以泰國菜來說稍為昂貴，但有時不想在 IFC 只能「麵包當飯吃」時，只好再一次走入 Greyhound Cafe 囉。

東海酒家 (青衣)

昨天我約了兩位朋友去「東海」飲茶，就即時用上營養師所教的技巧，選取相對地熱量與油分較少的食物進食，也與有興趣修身或保持健康體重的你分享一下。去「飲茶」，主角是各式點心，但是熱門點心如春卷、咸水角、鳳爪、排骨、燒賣...全是油分多的致肥食物。所以第一個秘訣，就是要吃一點澱粉質「打底」。好選擇包括叉燒包或是燒味米粉。「東海」的叉燒包實在不錯，包不黏牙，叉燒的醬汁又好吃。另一方面，不要忘了吃「蔬菜」！灼菜心、灼生菜，只是說明要「全走」（走油走蠔油走豉油），就可以「抵飽」又達到纖維攝取量。我和友人精打細算，看到「東海」的鹽水灼時蔬HK$38，濃湯菜遠雲吞HK$48，就選擇了後者，多幾隻雲吞一起吃比較「抵」嘛。但是控制還控制，總有一些食物我是不宜食用但真的很想吃的，於是只好淺嚐即止。例如是這個「杏片炸蝦丸」，真的超好吃又香口！我乖乖的只吃了一個。加有青芥及蛋白醬的青瓜八爪魚也不宜多吃，因為蛋白醬的脂肪含量多啊。但是我也吃了一點試試看，這一道前菜爽爽的、辣辣的，很容易令人吃到不停口的，小心！終於在友人點「大閘蟹小籠包」時我就投降了，因為我怕海鮮會引發手部皮膚敏感，據說這個小籠包超好吃呀，希望朋友喜歡啦。最後要多謝 Alison 及蘇蘇請客，我不知有幾多年沒有星期日一早起床去「飲早茶」了，間中試試也不錯呢。