金碧酒樓 (彩虹)

由小學至大學畢業初年，每逢農曆新年總會去到彩虹邨向某位長輩拜年，長輩離世後，就沒有再去了；之後就一直沒有機會再去彩虹邨。還記得長輩住在金碧樓，每次拜年都必定經過樓下的「金碧酒樓」，印象中從未試過光顧，依稀記得是一間舊式茶樓，只差在沒有一個個吊起來的雀籠。

最近四、五幾年，香港人人懷舊；尤其40歲以上、香港出生的香港人，每個都緬懷那些年的美好時光。往事如煙，但總有一些軌跡可尋；其中一樣事物就是仍然繼續經營的舊式茶樓。無論是馳名老店、抑或屋邨茶居；總之，只要超過50年歷史，見證着香港上世紀六十年開始的經濟起飛，就會廣為人知、兼且被捧為必定要一試的餐廳，其中一間就是彩虹邨的「金碧酒樓」。趁着彩虹邨尚未清拆重建（只是遲早事情），決定約幾個老朋友來到「金碧」朝聖，以免將來後悔。如果不是堅決要來，也不知道真的人氣高企；目標指向星期五，提前兩個星期訂枱也全場滿座，結果要順延一個星期。典型第一代公共屋邨舖位，「金碧」位於樓下地舖，旁邊是一間文具雜貨店，另一邊就是通往樓上住宅單位的樓梯。望見掛在門口已經褪色的招牌，相信自開業以來未曾更換。反而貼在門面的鮮黃底色加紅字海報就非常簇新，雖然沒有任何設計、甚至顯得老土，但就重點點題「金碧 」的57年歷史；小編亦相信自金碧樓入伙起，「金碧 」就在現址開業，直到現在。以今日的酒樓標準來說，舖位面積實在太細；而且沒有任何室內裝修可言，枱枱櫈櫈亦擺放得非常凌亂。很難想像如此街坊格局的屋邨舊茶樓竟然可以人氣高企、如此難訂位；甚至可以逢星期三休息。訂枱時已經知道部份懷舊菜式必須提前預訂；從網上找到這份懷舊菜譜，卻沒有標註價錢。訂菜時亦沒有仔細問價，只是深信公共屋邨的舊茶樓貴極有限。回想起來，負責接訂枱電話的嬸嬸態度有點囂張，好像不愁沒有生意；第一次打電話過去，甚至講明如果要訂懷舊菜式，要一個星期前才好打電話落實。室內用餐環境實在幾差，尤幸衛生情況尚算合格、未至於惡劣，但就坐得完全唔舒服、亦非常嘈吵喧嘩；絕非宴客場地之選，亦並非扶老攜幼、大型家庭聚會的合適選擇。如果是一班幾十歲的麻甩佬吹水飯聚，就沒有所謂，甚至幾啱氣氛。總共預訂了五款懷舊菜式，再從菜牌上點多兩款小菜。小菜其實唔算太貴，不過，如果綜合考慮屋邨的茶樓標準及用餐環境 ⋯⋯ 要記着，這是一條超過57年歷史的舊式公共屋邨，「金碧」 格局亦有點地痞⋯⋯ 定價就似乎偏高了。先奉上一窩杏汁白肺湯(細)（$120）。侍應嬸嬸果然見慣場面，見我們個個拿起手機、相機食先，即刻自動自覺撈起湯渣、擺甫士等待我們先拍照，還要搞個爛gag：「我會擺好甫士（其實是指揸定定湯殼），你地慢慢影！」。之後才分湯。白肺湯分量十足，湯料又夠多，豬肺之外，雞腳、瘦肉、白菜膽、金華火腿當然不能缺少；五人分享，每人可以先分到一滿碗，第二碗也有六七分滿。只是賣相一般而已，燉湯顏色未夠吸引，有點偏黃，做不到奶白色。表明亦飄浮了不少湯渣微粒及湯蓉，也見到了少許油脂微粒。不過，杏汁白肺湯始終工序繁複，其他粵菜酒家即使肯花時間炮製，索價也不會便宜，只收 $120 一窩可説是街坊超值價。湯味鮮濃，完全沒有豬肺的臊腥；只嫌杏香唔夠濃郁，所以口感略欠濃稠及幼滑。杏香雖然清淡，但如果在冬季，不失為滋補潤肺、美白養顏的燉湯選擇。時下粵菜酒樓，即使有錦鹵雲吞這道菜式，要不是只簡單選用魷魚、帶子、中蝦球及甜燈籠椒（可能刻意只用海鮮，以求將菜式弄得矜貴些），甚至直接用包了餡料的炸雲吞；根本失去傳統。這裡的錦鹵雲吞（$100）用料雖然普通，但就真正傳統，有魷魚、豬肝、蝦仁、肉片、菠蘿及甜燈籠椒；配搭的鮮橙紅色甜酸醬汁，無論味道及濃稠度皆控制得很恰好，既開胃、又惹人回味。刻意剪裁成三角形的炸雲吞皮方便進食；厚薄適中，不會太薄而失去口感、但又不會太厚而變得硬崩崩。入口脆卜卜、不油膩，即使放涼了，食到最後一塊仍然香脆。酥炸蟹鉗（$85 / 隻）唔便宜，但夠大隻；食完之後就更加同意物有所值。表面炸得金黃不油膩，咬下去香口乾身，已經加分。坊間很多酒樓的酥炸蟹鉗表層都會弄得有些煙韌，影響了口感，今晚的出品就沒有這個毛病，再加分。
蝦膠爽口彈牙又多汁，結實得來鬆軟、沒有繃繃實實，啖啖充滿蝦肉鮮甜。食至蟹鉗中心部分，質感變得軟腍；味道少了蝦膠的濃郁鮮味，但多了絲絲清甜，原來蟹鉗肉也有相當份量！這道懷舊菜式確實炮製得很出色，較很多大酒樓或酒店中菜廳還要好吃。再來是另一道炸物椒鹽鮮魷（$100）。脆粉蛋漿夠薄，同樣炸得乾身不殘留油份；咬下去香脆，稍嫌椒鹽味道未夠濃郁。火喉控制恰當，魷魚炸得爽甜而不韌；如果可以採用更厚身的魷魚肉會更好。全餐飯最貴的花雕蛋白蒸海蝦（$500）最令人失望。本來見到超大盤份量，很有先聲奪人之威勢；只得五人分享實在太多，即使十人分享也足夠有餘。海蝦份量多得難以相信，不只蛋白表面，盤內也全是蝦，每舀起一湯匙皆是海蝦多過蛋白。蛋白滲出淡淡花雕酒香、又有蝦汁鮮甜，好食。不過，海蝦就一般了，唔似正宗海中蝦；蝦味唔夠鮮，肉質唔夠爽口、又有少少粗嚡兼有渣。即使份量再多也令人失望，不值這個價位；寧取較優質食材，減少份量。送上八寶鴨（$420）時，另一位侍應嬸嬸不忘提醒：「記得影完相，先至切開隻鴨！」鴨身飽滿脹卜卜、油潤又充滿光澤，好吸引。此道傳統菜式花功夫、花時間，米鴨先去骨殻、上醃料入味，之後塞滿餡料入鴨肚，然後上色、風乾；再油炸至皮脆金黃，最後炆煮至鴨肉軟腍。顧名思義，餡料共有八種食材，包括栗子、蓮子、冬菇粒、金華火腿粒、鹹蛋黃，由於炆得夠火喉，食材已經半溶，無法完全分辨。封滿了濃郁醬汁的鴨肉入口腍滑，濃而不膩，與清甜不澀的芥菜膽很匹配。飯後奉送每人一碗紅豆沙。紅豆皮殼隔走得徹底，啖啖起沙無渣，甜度又適中，好味。舊式茶樓全部用手寫單，預訂懷舊菜式的單據也是分開記下，要問嬸嬸侍應查單。原來索價甚高，直逼高級酒樓或私房菜價位。同行朋友認為：「雖然(所有)懷舊菜式真材實料、(大部分)味道也很出色，但始終只是屋邨茶樓、用餐環境又差，定價同酒樓級數不成正比。」不過，今晩所品嚐的幾道懷舊菜式，又的確全部跟足傳統程序炮製；用料未必名貴，但就花功夫。對比現今很多新派粵菜酒樓已經不願意花時間炮制，又或者減省程序，所謂懷舊菜式只徒具其形，但失去了原本精粹；「金碧」的堅持確實值得讚賞。另一個使人回味之處，就是全部侍應嬸嬸雖然上年紀，但相當熱情；待客招呼態度不能用「殷勤」形容，但就有點「家庭感覺」，就似屋企阿媽招呼食飯！趁彩虹邨尚未有計劃拆缷重建，「金碧」老闆又沒有放風聲退休結業，要朝聖就要快了！

海灣餐廳及海灣咖啡室 (黃竹坑)

上一次去迪士尼staycation碰上黑雨，今次去海洋公園 staycation，竟然又遇上8號風球。幸好兩次都能夠順利完成任務，入到去樂園嬉戲 ⋯⋯ 尤其今次，可以試玩闊別香港多年的水上樂園；小公主就最開心，玩過不亦樂乎。

香港依然未容許遊客入境，酒店仍然有抵玩staycation package，今次就揀咗個包成人自助晚餐的package。準時6:30入座，打算食足三個鐘，同佢死過！「Marina Kitchen」自助晚餐原價成人每位$798，小童每位$399；標準香港金鐘及尖沙咀五星級酒店自助餐的頂級價錢，甚至貴過同系金鐘 JW Marriott；如果唔係 package 價，是否值這個價錢，食完就知道！由於是渡假式酒店，欠缺大面積基座，冇辦法開闢寬闊空間作為酒店餐廳；所以，「Marina Kitchen」的門口很窄、又唔顯眼。另外，室內空間三尖八角；餐枱雖然有足夠空間，但佈局未能集中擺放，整體感覺欠缺五星級酒店自助餐應有的格調。受制於餐廳面積，雖然有齊五星級酒店自助餐應有的多類型美食，但全部 food station 的面積稍為細小，部份 food station 甚至未能開揚地展示美食在眼前，缺少了氣派。有兩個 Free flow package 可以選擇，任飲汽水及果汁（非鮮榨）每位 $48；如果要包含紅 / 白酒、汽酒及啤酒，就要 $198。由於自助餐已包括無限添飲熱茶及凍檸茶，放棄了 Free flow package。冷盤區的正中央位置就是自助餐不能缺少的凍海鮮，有海蝦、東風螺、青口、花蟹、藍青口、麵包蟹及花甲，每款海鮮旁邊又配有一瓶專用醬汁，可按個人喜好添加。雖然凍阿拉斯加長腳蟹腳的味道唔算出色，好多時海水味勁重、蟹肉唔夠鮮甜，但這個價位的自助餐沒有長腳蟹腳，就好像有點不太化算。一如所料，同其他自助餐一樣，任食凍海鮮唔係特別好味，但亦唔差，屬水準之上。[IMG:56]正如前文所述，地方唔夠，其他冷盤就要放在凍櫃內，很容易走漏眼。Cold cut 是自助餐的熱門食物款式之一，亦不應該與港式茶餐廳的本地火腿同日而語。鬼佬 cold cut 品種繁多，價格不一定便宜過新鮮肉，隨時還要更貴，西班牙Jamon Iberico Bellota 正是最好例子。不會奢望自助餐有Jamon Iberico Bellota，凍櫃內有四款 Cold cut：salami 鹹香味濃。意大利豬肉腸(mortadella) 加入了開心果粒，增加果仁香氣及提升口感。用豬頸背脊肉風乾醃制而成的 coppa ham 味鹹香、肉質略帶爽身；但始終不是原隻火腿，油香一般。西班牙辣肉腸 (Chorizo) 味道微辣、鹹香，帶濃郁煙燻香氣，入口爽硬。美中不足 cold cut 缺少了原隻即切意大利Parma ham 或西班牙白豬火腿 Serrano ham。
其他 cold cut 有煙三文魚及刁草三文魚。另外還有五款芝士，由最淡口味的忌廉芝士、到重口味的藍芝士都有；但地方唔夠，冇辦法展示原塊大芝士，唔夠引人注目，甚至有點寒酸。話說回頭，直接品嚐芝士（配香檳）在香港始終只是小眾口味；即使在貴價自助餐，芝士也只是點綴角色，不能缺少而已。Cold cut 凍櫃旁是自助沙律吧，食材款式一般，選擇未夠多；有四款沙律醬汁及黑醋，獨欠橄欖油。整體來講，凍海鮮比起其他同級自助餐優勝；至於其他 cold cut 及沙律，就及不上其他星級酒店自助餐。另一種自助餐不能缺少的美食日式刺身共有6款，包括油甘、深海池魚、帶子、赤蝦、希靈及八爪魚。雖然沒有三文魚及吞拿赤身，小編就覺得沒有所謂。首先，三文魚雖然是大部分港人至愛，但一向稱不上是高級剌身；至於自助餐的吞拿赤身更一向唔好味，從來未見過自助餐有顏色鮮紅、新鮮好味的吞拿。至於今日供應的刺身，意想不到地很新鮮、有光澤，入口鮮甜、有彈性；尤其油甘有魚脂油香、深海池魚清爽味濃。印象中全部刺身好味過其他同級酒店自助餐（希靈除外，一直唔明點解自助餐會採用，其他日本料理根本唔會出現）。除了刺身，還有6款壽司。其中兩款是赤貝及螺片，自助餐一貫採用急凍貝類制作壽司，所以一定唔會好食，冇試。凍烏冬及凍蕎麥麵反而幾好，最緊要細細碗，兩三啖食完，唔怕太飽，一試無妨。餐廳空間有限，本來應該佔據最大範圍的中西熱盤 food station 竟然同中式粉麵檔差不多大小，亦沒有即煮意大利麵 live kitchen 及即焗 pizza。即使空間有限，仍然擺放了多款西日式熱盤，包括煎鴨肝、磯煮鮑魚仔、西式脆皮燒肉、芝士焗青口、芝士焗菠菜、燴牛尾及焗盲曹魚片；另外還有粟米湯及番茄湯。磯煮鮑魚仔最失敗，好韌。鬼佬燒肉皮脆肉香，但欠間花脂肪，肉質稍嫌少少粗嚡。其他西式熱盤味道不錯，尤其煎鴨肝，件件厚切，咬落滿口鴨油脂肪香氣，入口即溶。[IMG:51]西日式熱盤旁邊是印度咖喱。款式比較少，只有咖喱雞、素菜咖喱、印度黃薑飯及薄餅。印度菜有多款不同款式的薄餅，是日款式碰巧正是小編最喜歡的口味。西日式熱盤及中式熱盤區之間的僅有空位插入了 grill station，位置有點隱閉，唔留心好容易錯過。烤羊架肉質鬆軟冇筋膜、有羊肉香而不會太羶，五成熟火喉剛剛好。還有即煎韓牛配四款醬料韓式辣醬、麻油、芝麻及海鹽，稍為失望偏偏沒有韓式醬油。韓牛軟滑，入口充滿油花；加一點韓式辣醬做成生菜包，實在美味。中式熱盤有6款，包括翠玉瓜炒魚塊、上湯雙蔬、京都肉排、沙嗲牛肉片配鍋巴、客家荷葉蒸雞及避風塘魷魚鬚。全部非常好吃，接近酒店中菜廳質素，並非自助餐出品。必吃推介一定是即蒸原隻活龍蝦。由於空間有限，酒店冇法展示活龍蝦，但「Marina Kitchen」一向以活龍蝦作賣點，應該不會改變路線吧？難得是晚乃平日兼8號風球高掛，餐廳沒有滿座，唔需要排隊取龍蝦。龍蝦唔算大隻，勝在熱辣辣、鮮甜、爽口彈牙，遠勝只有海水鹹味的開邊凍龍蝦冷盤。只要胃納夠大，食足四隻已經回本。[IMG:54][IMG:55]是日中式原盅燉湯是蟲草花淮山杞子燉竹絲雞，落足材料、湯香兼味清甜；如果唔係要留肚品嚐其他美食，一定會飲多兩盅。印象中除了極少數自助餐的北京填鴨較好食，大部份自助餐的廣東燒味，只看賣相已完全放棄試味的衝動。估唔到眼前的油雞、蜜汁叉燒及燒鴨的賣相竟然媲美名牌燒味店，每款淺嘗一塊，原來不只賣相，真係幾好味。中式粉麵檔的麵料有潮式魚蛋、魚皮餃、炸魚皮、豆卜及潮式滷水牛什。金錢肚、牛膀及白蘿蔔炆得夠腍夠入味，可以媲美潮式粉麵店。捧著牛什河，走到旁邊的燒味部，每款燒味斬一嚿加餸，美味加上更美味！不容錯過旁邊即叫即淥的蝦籽撈粗麵。先加一點酒店自家調製甜豉油，再要求淥麵阿姐重手落足兩滿茶匙炒香了的蝦籽。麵條爽口彈牙有嚼勁，兼且完全沒有鹼水味；加上蝦籽鹹香、豉油香甜⋯⋯估唔到酒店都可以食到雲吞麵名店的人手擀竹昇麵質素！最後輪到甜品，大部份是近年自助餐非常流行的迷你甜品，完個蛋糕只有朱古力紅桑子慕絲蛋糕及貓山王榴槤蛋糕。好處是可以品嚐多件不同款式甜品，感覺較精緻，亦可以避免發生自己切餅搞到一塌糊塗的情況；但弊處就是少了一點震撼性。多款迷你甜品以朱古力口味及奶凍為主，亦有迷你檸檬撻，但竟然欠缺芝士餅。整體來說，西式甜品款式有改善空間。[IMG:52]
估唔到中式甜品都有兩款：楊枝甘露及豆腐花。還有3個不同品牌雪糕：Haagen Dazs、Movenpick 及 I Scream；而且似乎經過刻意挑選，每個品牌分別揀了各自的獨有口味。3個不同品牌雪糕的這個安排在其他酒店自助餐較少見，抵讚。不能不提 Candy corner，款式很多，包括珍寶珠，及手工拉制糖果。眼見不少小朋友都會在 Candy corner 取一手糖果離開，雖然做法不太正確，但相信餐廳營運單位亦預計了這情況，沒有刻意制止，當作氹小朋友吧！[IMG:53]「Marina Kitchen」的必食回本菜一定是即蒸原隻龍蝦，單單是這款美食，已值回票價。雖說每個Food Station面積的確及不上同級五星級酒店的自助餐，缺少了一點氣派，但亦未至於太細。剌身 corner 欠缺了三文魚及吞拿赤身？但三文魚唔算靚剌身，而自助餐的吞拿赤身一向唔好味。沒有即焗 pizza、即煮意大利麵 live kitchen、日式天婦羅或者甜品款式唔夠多，可能是美中不足之處；但自助餐應有的其他美食種類都有齊，而且質素全部都幾高。很多自助餐的最大問題是只追求款式花多眼亂，但質素一般；而「Marina Kitchen」雖然款式唔多，但勝在有質素，尤其是熱盤。雖然價格稍貴，但仍然是值得考慮的酒店自助餐選擇之一；如果一定要食生蠔、三文魚刺身或者天婦羅，那就要另找他選。

Duck & Waffle (中環)

總店設在倫敦的「Duck & Waffle」進駐香港IFC已經兩年，自認饞嘴的小編，竟然拖到今日才到來潮拜，真有點說不過去。要形容香港的「Duck & Waffle」，型格、時尚、反傳統都未到位，最貼切應該是「Hip」。位處臨海而建的高級商場，擁有超高樓底及落地玻璃，本身已擁有先天優勢。再配合餐廳市場定位，並非 fine dining 路線，而是時尚餐飲、定價中高檔次，難怪吸引附近甲級寫字樓高薪上班一族光顧。今日星期五午飯時段就全餐廳滿座，如果Walk-in一定冇位。裝修風格摩登、同時又融合了熱鬧氣氛，就算只是和朋友飲酒傾計都相當合適。最搶眼肯定係餐廳正中央的三隻綠色大鴨，同室內裝修色調完全唔同，一進入餐廳第一眼就立即成為焦點所在。除此之外，還有其他裝修細微之處也連繫上 duck，貫徹餐廳名字及其馳名菜式 Duck & Waffle。最抵食一定是週末 brunch ($318)，包括 starter (共3款）、mains、dessert 及 soft drink。今日是星期五，只有普通 lunch set ($250)，只可以選擇一個starter、mains 及dessert。快速閲灠餐牌，大部份都是典型英國菜式，似乎不需要什麼講究的烹調技巧、也沒有特別吸引力；但細看每道菜式的簡介後，就會發現原來顛覆了傳統英國菜，加入了不少意想不到的元素、及反傳統的食材組合。正正是這些元素，令到「Duck & Waffle」成為英國倫敦的 hip 餐廳之一。每一張枱都有一隻塑膠小鴨作裝飾品，並藉此提醒食客餐廳馳名菜式正是 Duck & Waffle。Set lunch ($250) 的頭盤揀了 Japanese Yellow Tail (+$50)，配搭一塊很薄的脆麵包，可當作 cracker。cracker 配 toppings 是很典型的英式cracker 食法，只不過今次是非一般的 toppings，用上了刺身。揭開 cracker，整碟頭盤賣相就似角切油甘剌身作泥土，上面長出了小植物 (celery)，並用蔥花 (confit shallot) 作點綴；擺盤充滿創意，予人生機勃勃之感。前文提及菜式在傳統英國菜內加入了不少新元素，除了用剌身作為 cracker toppings 之外，處理刺身的方法亦有别於常見的西式烹調技巧。捨棄醋醃，用橄欖油及柚子黑芝麻醬取而代之，既有微酸提升魚的鮮味，亦有柚子及芝麻香氣；小編一向對西式頭盤的魚刺身評價一般，但也很欣賞這種創新配搭，加上日本產油甘（鰤）肉質幼滑、入口帶少少結實爽口，油脂豐富，好食。Set Lunch 主菜有焗海鱸魚柳、USDA 穀飼牛肉眼、素食，當然不能缺少主打菜式Duck & Waffle，但最後揀了 Lamb and Fennel Meatball Bake（下文交代點解唔揀 Duck & Waffle）。賣相同普通蕃茄醬焗肉丸沒有分別，咀嚼下羊肉茴香肉丸很鬆化、肉汁豐溢，但羊肉香味未夠濃香，唔講以為只是普通豬肉牛肉丸，這份主菜似乎太過普通了。用粟米、香草及parmesan chesse 煮成的玉米糊墊底，味道清甜，帶淡淡芝士香味；可以作為飽肚主食，但小編實在不太喜歡鬼佬粥仔口感，太似嬰孩食的米糊。前文提及 Set lunch ($250) 也可以揀 Duck & Waffle，但要另加 $150，唔抵；反正唔想食兩個午餐，擔心兩份甜品份量太多，索性單點 Duck & Waffle ($230) 。未食之前，一直懷疑這道菜式的可行性：又鹹又甜、還要加上一塊明明應該是甜品的 waffle？鮮橙黃色的鴨蛋黃又大又圓，普通雞蛋沒法比擬；採用鴨蛋除了要貫徹菜式名字中的「Duck」，也要蛋黃夠大才能襯得起大大隻油封鴨脾。先倒下芥末籽楓樹糖漿，再切開鴨蛋黃、油封鴨脾及 waffle。鴨脾係大號尺寸、質素上佳，加上鹽醃油封處理技巧高超，肉質特別油潤鹹香。鴨皮煎得香口鬆脆；鴨脾肉甘香，但又沒有太硬、太乾身，肉汁仍然豐富。之前食過幾次油封鴨脾，通常肉質都會偏硬、偏乾，甚至粗嚡，印象中第一次如此好味。最意想不到鹹香的鴨脾竟然與香甜的楓樹糖漿如此配搭，再加上味道濃郁的鴨蛋黃，好食，之前的擔心一掃而空。Set Lunch 有兩款甜品選擇，揀了招牌甜品 Maple Glazed Granny Smith Apple Waffle。Waffle 同 Duck & Waffle 一樣，分別在於作為甜品，加上了釉面楓樹糖漿、焦糖顆粒，並配上焦糖蘋果及自家製玉桂味雪糕。Waffle 配楓樹糖漿及焦糖顆粒本來已是經典英式甜點，但焦糖蘋果更好味。甜度剛剛好，沒有掩蓋蘋果本身的清甜及果香；表面軟腍、中心仍保持少少爽口，加上獨特的玉桂味雪糕，提升了古板英式甜點的層次。今日試了兩個主菜及一個頭盤，Yellow Tail 及 Meatball Bake 雖然加入了創新元素，突破了傳統英國菜的沈悶框框，但味道仍然沒有太大驚喜。但講到餐廳招牌名菜 Duck & Waffle 及招牌甜品 Smith Apple Waffle，就真係完全冇得輸，就算對「Duck & Waffle」的其他菜式沒有興趣，食肉獸也一定最少要試一次 Duck & Waffle。

Jan Jan 串揚專門店 (尖沙咀)

如果講到大阪的庶民美食，一定要數到串かつ，香港人一般稱之為炸串；顧名思義，就是油炸一串串的食材，小編會形容為串燒加吉列的混合體（註：各位日本料理達人不要見怪饞嘴小編的妄言，但真心認為這是最貼切的形容）。很奇怪，在香港很容易找到日式拉麵店、鮨店、串燒、甚至天婦羅專門店，但以炸串為主的專門店，五隻手指數得完；可能串かつ在日本也不算大流行的美食吧。

之前經常光顧銅鑼灣一間由日本人開設（兼且作為主廚）的串かつ專門店，喜愛其氣氛熱鬧及和風裝修風格，充滿日本料理小店風情。今日午飯就訂位試試另一間由香港人開設的「Jan Jan 串揚專門店」。午市時段都坐滿了客人，如果相信市場效應，餐廳質素應該相當不錯。同樣係日式風情小店，亦有日式居酒屋必有的開放式廚房及吧枱式座位，但同時混入少許工業風裝修風格，整體感覺缺少了日式料理小店的地道熱鬧氣氛。比較之下，還是更喜歡銅鑼灣另一家串かつ專門店的氣氛。雖然標榜為串揚專門店，但一直都講香港的飲食業風氣不太接受單一日本料理；或者這樣說，單一日本料理在香港很難生存，除了極少數的星級鮨店及頂級天婦羅名店之外，香港的日本菜餐廳即使以專門料理自居，同時也會提供少量其他類型的日本料理，以求擴大客源。「Jan Jan 串揚專門店」也沒有例外，雖然以串揚為主，串燒款式不少於串揚，亦有日式前菜 / 小吃及飯糰、蕎麥麵、烏冬等等主食。午餐有三款：4串（$148）、7串（$178）及10串（$198），包餐飲及主食各一。可自由組合選單上的串揚及串燒，但選單並非有齊單點餐牌的所有出品，部分串揚及串燒也要額外加錢。食正宗串揚必有椰菜片及秘製串揚醬汁，還有一點要謹記：「ソースお二度漬け　禁止」，意思就是只可以蘸一次醬汁。日本的高級串揚店可能例外，但在大阪新世界地區的平民串揚料理店，串揚醬汁都是共用。客人食完埋單離座，到下一輪客人入座，都是用同一盒醬汁；所以有此規定，日本人也很清楚明白規矩。香港人去旅行飽嚐串揚料理時，千祈唔好失禮人呀！始終很多香港人唔習慣，所以「Jan Jan」額外提供一個小碗給每位客人，方便搯出醬汁，自己鍾意蘸幾多次都可以。
串揚是炸物，很「熱氣」；可能日本人也有類似概念，所以配搭生椰菜片解膩清熱毒。爽脆、多菜汁，但有少少澀、唔算清甜，要蘸一點秘製串揚醬汁提味。串揚醬汁帶酸、隱含蔬菜清甜，有點似日式吉列豬扒的醬汁，只是串揚醬汁呈液體，日式吉列豬扒醬汁卻稠身。除了串揚醬汁，枱面還有其他調味。辣粉及山椒粉係串燒專用，鹽及辣醬就係串揚專用。先奉上第一碟串燒：雞翼、雞胸軟骨、三文魚煙肉卷、牛舌及牛肉；冇得選擇鹽燒或者汁燒，全部由廚師決定。碰巧五串都係鹽燒，正是小編最愛口味，總覺得只有免治雞肉棒及雞肝才適合汁燒。五支串燒的火喉控制有參差，雞翼及雞胸軟骨明顯燒燶了，有少少焦澀味。雞翼表皮香脆，可惜被燒燶的部份影響了味道。雞胸軟骨選用了較講究的前端三角位，黏附了少許雞肉，咬下去既爽脆、又有雞肉鮮味，可惜同樣燒燶了少許。牛舌軟身彈牙有嚼勁，牛肉鬆軟有肉汁，兩串都好味道。最有驚喜是三文魚煙肉卷，火喉控制得最好，煙肉的油脂加上滑溜的三文魚，大大口兩啖食完；肉香、魚鮮加上油香，好味道。雞腿肉嫰滑，但近竹籤頭的第一塊雞腿肉燒燶了。薯仔香口粉身，較用焗爐焗多了幾分明火燒烤香氣；加上一小角半融化的牛油，提升口感及香味。送上第一盤串揚，跟足日本當地的方法，用不鏽鋼托盤加隔油架，確保每串串揚表層香口鬆脆、兼且不會油膩。所有食材表面都被金黃色的薄麵粉蛋漿及麵包糠包裹，除了部份外形明顯的食材之外，大部份都很難從外表區分。所以侍應會細心講解每串串揚到底是甚麼食材，又會溫馨建議海鮮用鹽調味、肉類及蔬菜就用秘製醬汁。將整串串揚浸入醬汁，趁尚未變腍，即刻食。一支串揚最多只應分兩啖食完，否則即使不沾醬汁，表層麵包糠脆漿也會變腍，失去風味。咬下去香口鬆脆，酸中帶清甜；炸物配帶酸醬汁果然是最佳配搭，既開胃、又令人回味。洋蔥炸得剛剛熟，生洋蔥的辛辣已消失，味道變得清甜，同時爽口多汁。蘆筍已加上沙律醬調味，不用再蘸任何醬汁，咬落爽脆清甜。茄子相比其他串揚，份量最大，要分三啖才能食完；外層脆衣鬆脆，內裡的茄子就清甜軟糯。食了四串蔬菜，開始食肉。豚肉採用半肥瘦肉眼，豚脂油香夾雜肉香，加上鬆軟肉質，再配合串揚醬汁，微酸味道可中和油炸肉類的油膩，食多幾串都唔會飽飽滯滯。時間啱啱好，差不多食完第一轉串揚，隨即送上第二輪。牛肉七成熟左右，肉味濃、夠鬆軟、肉汁多。始終只是美國牛肉，油花含量唔係特別多，油脂香及不上半肥瘦豚肉，但兩串同樣美味。吃完豚肉及牛肉才食雞肉紫蘇卷串揚。比較之下，雞肉肉質較粗嚡，比不上豚肉及牛肉美味；勝在靠紫蘇葉的獨特香氣補救。蝦及北海道帆立好吃。脆衣夠薄，又沒有炸過火，兩款海鮮仍然保持鮮甜。芝士串揚很有特色，炸至半溶化，剛剛炸起又夠熱辣辣，較漢堡包的半溶芝士好食。蕎麥麵唔夠麥香，稍為粗嚡。燒飯糰(醬油) 表面夠焦香，只嫌餡料欠奉，如果多一塊香脆紫菜，可包裹著飯糰一起吃會更開心。一般日式居酒屋的茶漬飯會將茶(上湯)及飯分開奉上，由客人自己沖泡。「Jan Jan」可能想節省茶壺？三文魚燒飯糰茶漬奉客時已經代為沖泡，處理方法並不理想，缺少了茶漬飯最重要的一個環節。另外，用一個小飯糰取代普通白米飯也非傳統茶漬飯配方，亦似乎多此一舉；最終也要用湯匙將飯糰搓散變回飯粒，以吸收茶(上湯)的味道，才能品嚐茶漬飯風味。試了三款主食，味道一律麻麻；但串揚及串燒就真係好味道，尤其串揚，同日本當地小店的美味出品有得媲美。只不過，價錢分別就相當大。在大阪新世界地區的平民串揚料理店集中地，撇除海鮮食材，平均150～200円一串（大約HK$11～14）；「Jan Jan」單點價貴最少50%，但係冇得揀，在香港想食好味串揚只能夠接受現實！

鮨佐瀬 (中環)

之前好幾次想去一間只做壽司刺身的真· 鮨店，但因為完全沒有熟食供應，不方便攜同小女兒一同前往，一直未能成行。正值小女兒開始放暑假，碰巧今個週末又為她安排了一整天課外活動，小編二人終於可以實踐計劃。奈何這個決定來得太過倉促，有幾間目標鮨店已經一早滿座（其實要早兩個月訂位才有機會）。打了幾通電話，才僥倖找到「鮨佐瀨」有客人取消訂枱。於是，這個星期日中午就來到這𥚃。「鮨佐瀨」已經搬店兩次，現址主要是將以前的兩間分店搬到同一個地址，方便佐瀨師傅兼顧。一如之前兩間分店，名字一樣。其中一間由佐瀨師傅及兩位小徒弟招待客人，定價較高、食材亦更高級。小編今次光顧的這一間就由佐瀨師傅信賴的大徒弟及其他壽司師傅負責，定價較親民、食材品種亦有點不一樣；不過，供應商就係同一間，所以，食材質素同樣優質。鮨店面積細小，空間有點狹窄，但就不覺得侷促；皆因環境舒適清靜，客人之間談話都是低聲細語，而且是傳統日系風格的淺色木材簡約裝修，第一個感覺相當好。再加上全部16個座位都是壽司吧枱，不設散座 ⋯⋯ 這種布置格局才是真真正正的高級鮨店！午市餐牌只有四款選擇。北海道セット一定唔會考慮；板前おまかせ膳（$1,660）又太豐富了。至於ミニおまかせ膳（$990）又好似唔係太抵食，大概有壽司及刺身各六款及一道燒魚）；而且始終最愛食壽司，喜歡其可以近距離欣賞師傅手藝。雖然12貫壽司（$580）套餐的食材及不上較為貴價的ミニおまかせ膳，最終還是揀了12貫壽司（$580）。壽司偏向採用簡單及傳統方式展現，大部份只掃上豉油，部分則採用天然食材如蔥花、薑蓉提鮮，甚少刻意配上其他食材提味。次序以味道濃淡主導，由淡至濃，沒有刻意分開白身魚、赤身魚、光皮魚及貝類。
沒有前菜或沙律，第一道送上的是茶碗蒸。見到用透明玻璃杯奉上已經覺得有點奇怪，還未來得及發問，服務殷勤的侍應姐姐已經主動介紹是凍茶碗蒸。舖在表面的三文魚籽鹹度適中，配上少許新鮮即磨山葵末，味道鮮美。第一次食凍茶碗蒸，入口滑溜，較熱茶碗蒸多了一點較實在的口感；但味道偏淡，缺少了熱辣辣、昆布味醂日式清湯的濃味。還是較為喜歡傳統的熱茶碗蒸。
甜蝦入口軟糯、味道非常鮮甜。一向覺得甜蝦屬於比較低檔次的食材，近年甚少品嚐。可能已經有一段時間沒有食甜蝦，已經忘記了具體味道，原來甜蝦都可以咁好味。活北寄貝喺香港甚少可以品嚐到的食材，之前每次去日本旅行都不會錯過。北寄貝鮮美、爽脆、柔軟，介乎赤貝、響螺同象拔蚌之間，可以說同時兼有三者的特色。同其他貝類一樣，北寄貝味道鮮甜，但同時帶有較為濃厚的海水味，未必人人能夠完全接受。所以，師傅刻意磨了一丁點柚子皮蓉，用其清新香氣掩蓋貝類的重口味。總之，就係好食。右口魚（鰈魚）同其他白身魚一樣，予人印象味道偏淡。但其實新鮮白身魚有淡淡魚香，油脂份量適中，入口軟綿爽韌兼而有之。這件鰈魚就完全擁有這些優質白身魚的特色。下一件壽司味道開始轉濃，深海池魚入口爽脆、魚味濃郁，充滿油脂。生鯖味道更濃。喜歡的人會欣賞其濃郁魚味，厭惡的人就會覺得太重口味、有點腥。小編是前者。北海道三文魚未必係最出名嘅三文魚品種，但喺高級日本料理店，食材就要來自日本。表面用熱水略燙，口感變得複雜；表層魚肉略為綿實、內層柔軟。有別於平常食開的挪威或者蘇格蘭三文魚，魚脂含量較少，魚肉味卻較濃郁。今日所食的12件壽司當中，以禾桿草燻鰹魚最重口味。鰹魚肉質有點鬆散、脂肪含量亦唔高，但味道濃郁，所以日本人鍾意用鰹魚烘乾做成魚干，並用以炮製日式高湯。傳統會用たたき方法製作鰹魚刺身，一來增加煙燻香氣，亦可殺去魚皮表面細菌。所謂重口味其實來自煙燻本身，魚肉味道反而爽口清新。醬油漬赤身酸度平衡。
食了8貫壽司，要歇一歇，奉上赤味噌龍蝦湯。湯味濃郁，並非單純普通味噌，除了較一般味噌湯好味，相信加入了魚骨熬煮；魚骨之外，當然少不了龍蝦殼及龍蝦頭。師傅話雖然本店沒有採用龍蝦作食材，但隔鄰由佐瀨師傅親自主理的總店就有使用龍蝦作為廚師發板內的其中一道菜色，剩餘物資就用作熬煮此湯。由於每日午市只做一輪生意，只需16小碗湯，兩三隻龍蝦殼及龍蝦頭已足夠提升味噌湯的鮮味。之後是海膽三文魚子，選用北海道產海膽是高級鮨店基本要求，雖然鮮味，但海膽份量太過吝嗇，沒有大驚喜。去到品嚐最後一件壽司時，卻有意料之外的發現；那一刻就更加覺得有啲唔抵，容後再說。壽司套餐通常都會有大トロ，今次就特別一點，師傅改用了カマトロ，係鮪兩邊下巴的一小塊肉，用日本人的說法係稀有部位，價格甚至比大トロ還要貴，不過，最緊要還是味道。師傅在魚肉表面輕輕切上細紋，並掃上醬油。入口有魚油甘香、亦有滲入魚肉的醬油提味。有接近入口即溶的美味，同大トロ不相伯仲；不過就有少少筋膜，油脂的甘香豐腴亦稍稍及不上大トロ。玉子絕對唔係矜貴壽司，但就可以睇得出鮨店大師傅的功架。面前這兩件玉子有蛋香、甜度剛剛好，入口嫰滑鬆化、綿軟；係相當出色嘅玉子。不過，始終只是最普通嘅玉子壽司，有點失望。以店子的級數及價位，應該有更出色及更特別的玉子，例如：混入了魚肉蝦肉漿及雞蛋焗制而成的玉子。翻查其他食評，有部份客人曾經於午餐時段的同一款12貫壽司套餐品嚐了焗玉子及傳統的煎蛋玉子。最後以吞拿魚腩蓉手卷結束這一頓午餐。就在享受蕎麥麵期間，部份客人已經離席，師傅有空閒整理晚餐時段的食材。見到另一位師傅正在整理一盤味道更鮮味、更新鮮的鹽水海膽，多口問句：「鹽水海膽成本僅次於活海膽，貴過板海膽好多喎！」面前招呼小編的師傅回應：「其實平常我們都會採用鹽水海膽，只不過這兩天剛好進不了貨，所以才採用了板海膽，但也是來自北海道的高級貨源。」⋯⋯ 那一刻有點無言，剛才那一件海膽三文魚子就只是板海膽，唉！
甜品有兩款選擇，分別係柚子雪糕及綠茶雪糕燒餅，以後者更特別、更好味。燒餅包裹着糯米糍，內層就有原粒紅豆、紅豆蓉及綠茶雪糕，炮製方法一點都不簡單。咬下去既有燒餅鬆化，又有糯米糍煙韌，然後就是紅豆蓉的甜膩及豆香，最後還有綠茶雪糕的冰凍及甘甜；好少日式甜品做到這種啱非日本人口味的美味。
論環境、侍應服務態度及師傅的專業表現，確實比銅鑼灣店的樓上鮨店還要高一個層次；所以，索價同樣高一個層次，與中環其他同級鮨店相若，但仍然較其他星級鮨店相宜。食材新鮮、件件充滿光澤；部份食材經過熟成或特別處理，更能突顯食材鮮味。只不過食材相對普通，性價比稍遜。師傅透露，如果想品嚐更高級、更特別的食材作刺身或壽司，就要試試隔鄰店舖由佐瀨師傅親自主理的主店。