原本公司附近新開了一間日本私房料理，本來想 試下點知疫情殺到禁晚市堂食冇機會一試，星期六中午放工諗住買飯盒返屋企同老公仔女一齊食，經過見佢有開原來有得外賣，咁就入去睇吓，唔知係店員定老闆佢話畀我知便當好豐富，有牛有豬有雞肉仲有魚，搞到我呢啲選擇困難症嘅人都唔知揀咩好😅，最終我揀咗兩個牛，兩個雞。呢個真係非一般飯盒，有精緻包裝，充實嘅內涵，雞便當裏面有雞肉、豚肉仲有魚同玉子燒，當然有飯啦！D米飯真係粒粒都係飽飽滿滿嘅日本米。牛便當有牛、豚肉都一樣有魚同玉子燒，便當裏面有一種好好味嘅蔥頭酸酸甜甜可以令到你更開胃，每個便當仲跟埋一個味噌湯同埋精緻嘅木製餐具，我個女一路食一路話好好味覺得自己好似喺日本買便當食咁，老公問我今餐買咗幾多錢，我答佢每盒只係一百蚊，老公即刻話琴日食麥xx都二百幾，前日大xx又三佰幾咁仲使乜食 呢啲連鎖店快餐呀！我個女即刻搭咀，媽媽下星期六你放工再買E個便當返嚟我唔食麥xx喇！😅

籠中鳥，肉質不夠嫩滑，雞本身調味唔夠一定要點埋大量配雞嘅醬汁先得。 德國豬手皮脆肉香值得推介。 黑松露雲吞黑松露司芝士味濃郁係必點嘅一道菜。 西班牙海鮮飯用料新鲜略嫌炒飯嘅龍蝦湯味唔夠。 點品其實味道普通勝在攞件撘夠！ 枱太密坐位有點迫，E度有VIP房最低消費都係$2000，係度食$2000冇難道因為E度D食物份量比較少！

吾驶茶介加一，又冇還枱時間，食物質素又吾錯，由其係水煮同油炸食物，梅菜扣肉都係五十幾蚊，大啤都係二十蚊支，油浸筍殼真係不可不食，依D食肆係香港已經無幾多間，不過怕嘈嘅人就吾好去喇！因為E度D食客講野真係有D大聲。最後提吓大家最好訂定位，吾係就等到腳軟都未有得食！

今日陪囡囡去旺角試補習課程，見未夠鐘上堂就係周邊睇吓有D咩食肆等落堂嘅時候可以醫肚。就係兆萬中心睇中依間茶木台灣餐廳，咁未食過例必上openrice睇吓食評，點知未有人寫過，不過見有其他分店嘅食評評語唔錯，一於去試試，真係冇失望，又經濟，又好味，賣相又靚，囡囡超開心呀！ 肉噪伴麵$58麵質爽口彈牙，肉噪濃香加上芫荽再放點牛肉湯撈埋一齊食，有D身處台灣嘅感覺！

芒果蜜香厚多士$68有球芒果味雪糕加上打得香滑嘅忌廉同新鮮芒果肉再配搽上蜜糖烤得香脆厚多士，視覺同味蕾都滿足晒！

囡囡話下次要帶埋公公，婆婆嚟試吓！

買左景樂集團會藉好多間食肆都有85折，諗住逐間去試吓，今晚就試韓一館，可能杏花新城人流唔係咁多，到八點都坐唔滿。會藉除左85折外每間食肆都有一張食物卷，今晚係豆腐沙律，沙律撈左柚子汁同芝麻，甜甜地都幾清新 當然唔少得烤肉啦！我只係點左牛肉片$110，牛肋骨肉$145，雞肉$95，定食係跟湯，白飯，自選三個前菜，肉奄得唔會太咸點埋酱汁食就啱啱好，至於肉質當然唔可以同和牛比啦！比依個價錢佢都比到牛肋骨肉都算合格，肉質唔會鞋烚烚，又唔會咬唔開，當然唔會入口即溶啦！




牛肉石頭飯$68，飯多餸就少左D，為有加多D辣醬
炆牛肋骨粟子煲就抵食得多喇！$110有七大舊肋骨炆得入味又夠淋再加埋D蘿蔔，粟子鮮甜野味，連汁都扲埋去撈飯呀！
最近睇個套韓劇個女主角成日都食豬腳$88，所以都叫個試試！豬腳烤得香軟唔肥膩，仲有半隻咁多呀！再用焯過嘅大白菜加D泡菜，面醬，辣醬包嚟食，連少少肥膩嘅感覺都冇埋呀！

食完之後，囡囡都話要再嚟食過！

之前買過一次團購嚟食過感覺超值，日日期侍再次有筍野，一見到當然即刻就買，雖然貴花甜距離我屋企真係好遠，有團購就可以補番車費啦！今次我試左個綠茶心太軟，其實我對綠茶嘅食物製成品一向都唔係太like，見未食過就一於試試，好在冇簡錯，佢唔係好甜但係又唔會食到茶嘅苦澀味，側邊又伴左少少紅豆同雪糕，一啖熱、一啖凍真係幾滋味！

老公叫左杯唔記得咩名嘅沙冰，我對佢隻颜色冇好感所以冇食，但係佢話唔錯

囡囡貫徹始終都係叫薑汁梳芙厘，薑汁好香少少辣，又鬆又軟，三兩吓手勢已經比囡囡食晒落肚

又要期待下一次團購喇！

即興想食冇訂位又係星期五所以等左成個鐘先有位。因為太肚餓一坐低即刻叫到一枱都係。先嚟杯清新飲品，味道酸酸地加上係沙冰做，飲落去冰涼又清新，杯飲品個名真係叫清新架！再嚟軟殼蟹青萍果沙律，依個最特別嘅係佢唔係用一般沙律醬而係用芒果汁代替，估唔到芒果汁加青萍果原來係咁夾，香，甜，酸，唔同層次嘅味道，真係令我想再嚟一碟
香葱豆腐，面頭炸得鬆脆内裡軟滑仲有少少魚肉壤係裏面，沾啲葱汁要嚟送酒都幾啱

炸虾餅，係有小朋友時候必點，不過依度做得麻麻，太實又冇虾味唔彈牙，反而伴碟嘅虾片仲好食
蒸粉包，皮薄涵多就係油份多左少少

冬陰功湯依度後位上每碗都有一隻大虾，青檸味重，辣味適中仲飲到好重鮮虾味
咖哩羊排骨，冇羊羶味，炆得好淋好滑，啲咖哩汁甜而少辣最啱小朋友沾蒜茸包食
冬陰公炒飯，少辣有好香嘅香矛味，配料都好足就係油膩左少少
芒果糯米飯，芒果超甜，糯米可以隨喜好選擇黑糯米定白糯米再加埋啲熱嘅椰醬，將之前濃味嘅口腔變返清甜

囡囡未試過厨司係面前煮野比佢食嘅感覺係點，咁啱有朋友约去松菱未帶埋佢去試吓！依度當然係寧靜又典雅所以順道教埋囡囡要安靜有禮嘅進餐技巧。今日我地選擇左食午餐，其實依度亦有單點嘅，不過想小朋友樣樣試吓又可以經濟一啲，所以都係選擇套餐，我自己就點左（松）$560係有和牛嘅，我幫囡囡點（竹）$260係美國牛肉，其餘嘅食物係一樣。先嚟好新鮮嘅沙律，材料有生菜，車厘茄，黃椒，甜甜酸酸沙律醬可以先開開胃口先，跟住厨司就好有心機咁一樣一樣煮比我地食仲會問我地對食物嘅喜好。再嚟海鲜，海鮮可以選擇虾或帶子。當然我各選一種咁可以試齊晒所有食物，虾鮮嫩彈牙熟之餘又保留到肉汁帶仔就细隻左少少，味道到好鲜甜爽滑。和牛係入口即溶，鮮嫩多汁厨司烹調時間掌握得好好，我要五成熟就五成，朋友要七成就七成炒芽菜清甜爽脆唔會有過多嘅油份炒飯同炒麵我比較鐘意飯，因為炒飯有好多葱，虾米仔，炒到粒粒金黃色未食已經香氣撲鼻，反而麵就只有酱油同牙菜一齊炒，好似失色左少少，差D漏左味噌湯，依度嘅湯飲完絕冇口喝嘅感覺，最後係一個超迷你嘅咖啡慕絲蛋糕，滿足晒！想一試又想經濟D點竹餐就夠架喇！唔食牛嘅人仲可以選擇雞，豬或銀雪魚添！

其實我仲有幾編食評未得閒寫，但係依編真係要快啲寫左佢，等愛食嘅人衡量吓去唔去，免得中伏 講真田舍家嘅環境裝修係唔錯，窗外景觀係比人有君臨天下嘅感覺，但係食物就真係唔值七佰幾一位喇！佢係有龍蝦，鵝肝，銀雪魚同薄和牛卷但只係其中選一唔係任食




刺生都新鮮但只係普通質素，最衰就係個放題係12:00開始1:15就已經開始冇帶子喇！我問個刺生師父點解咁快就冇，佢答我因為人多，依度要預早成個月book位，個個星期都full架啦！唔通一向都係1:00就冇
天婦羅都係咁炸蠔一早就冇，我有幸食到兩隻，咁講有係幾鮮味又香脆唔油膩，其餘都係有南瓜，蕃薯，茄子，貴野一早就冇，想番本都幾難
串燒，關東煮，炒牛肉，火鍋豚肉不過不失冇驚喜
返而有個什錦魚生壽司就真係唔錯，撈左D辣辣地嘅醬汁加埋少少葱，食起上嚟又香又清新，不過又係手快有手慢冇

全餐最值得欣慰係鐵板師父，見我影相就同我講笑，要高炒嚟影咁會影得佢靚仔啲，真風趣！
依度嘅日式甜唔多，味道亦麻麻，只因太甜返而馬卡龍做得仲好，顏色吸引每隻顏色都食到應有嘅味道，講真只係依兩樣野令我有 去唔去得過就要睇吓你要君臨天下嘅感覺定係滿足你味蕾嘅感覺喇！如果喜歡飲酒都好，因為酒係任飲！

為食嘅我日日都會睇吓團購網有冇D食得嘅又係自己冇食過嘅野，又比我見到麗姐私房曲奇用$17買100g嘅團購，我緊係又買嚟試吓啦！去到換餅嘅時候職員好有禮貌，咁當然有saIe吓其他產品啦！我同佢講要返去食吓啱唔啱口味先，佢一樣好有禮咁送我出門口，講真有咁嘅服務態度未食都覺得甜啦！團購雖然只可以換取紅莓燕麥曲奇但係就可以令我囡對依種曲奇改觀，紅莓酸酸甜甜，燕麥香脆，牛油又香，一個字購晒正！其實洗咩同D自由行掙排隊吖！