臺北棧 (Hollywood Road) (Closed)

久聞其名今晚一食，果然無令人失望。小店環境時尚與一般台式食店截然不同。地方一眼望晒，最佳位置在長廊盡頭，高枱自成一角。聽到場內播放首『突然好想你』歌曲，瞬即重拾去台北的感覺，疫情呀何時先遠去呢？美食價錢幾經濟，與蘇豪區昂貴地段竟然拉不上關係，各種小食麵食甜品都咁好味，難怪高企人氣熱店之列。櫻花蝦烏醋茄子 $48冷盤小食茄子夠凍，好挺身夾落唔鬆散，口感軟綿綿，沾左醋汁甜酸美味，仲有櫻花蝦多份酥脆口感，連小食都做得咁出色要一讚。台式肉鬆榨菜蛋餅 $68蛋餅脹卜卜好大條，分左六小件，蛋皮厚身口感煙韌，餡料肉鬆榨菜頗有古早風味。適量的榨菜分佈均勻，帶來酸香爽脆口感，與香酥綿密嘅肉鬆，交織著味蕾滾動的音符，um！好味...好味。糖心蛋魯肉飯 $55賣相吸引，半隻溏心蛋黃晶瑩剔透，見到心心眼。碗飯份量唔少，鋪滿半肥瘦入口即溶的魯肉好入味，唔錯。手繪雙色鹽酥雞 $88鹽酥雞大件夾抵食有六件，酥脆外層咬落肉質嫩滑，味道唔會過咸，啖啖肉非常滿足。食原味已經好好味，仲有兩款醬汁三種食法又幾好喎，一款係黑松露蛋黃醬香濃惹味，另一款係柚子蛋黃醬酸甜開胃，我就鍾意柚子夠清新，鹽酥雞有著台灣的水準，確係必食之選！