忠記咖啡屋‧私房菜 (Closed)

又到農曆新年！慶祝佳節，當然要同成班朋友食餐好嘅！ 今日行開銅鑼灣， 上openrice睇下有咩一大班朋友可以圍埋一餐好餸嘅地方， 見到好多人推介忠記， 決定一於嚟試下佢哋嘅手藝。七點幾上到去好多人已經食緊羊腩煲 同埋其他小菜， 室內仲暖笠笠好溫暖， 我哋一行五人搵咗張圓枱坐低，決定一齊過一個肥年，食盆菜宴🙌🙌話咁快前菜已經上臺， 已經聞到陣陣酒香， 呢個四醉拼分別有木耳、露筍、鴨舌 、豬手及滑雞。個人最鍾意鴨舌， 鴨舌厚肉，完全滲透酒香，加埋杞子作調味，香味有層次。每件雞件已經去骨， 可見餐廳的細心💕呢啲得番個位數字溫度嘅日子...唔飲湯係生存唔到嘅， 這壺熱辣辣嘅燉湯完全係雪中送炭✨✨燉湯清澈， 味道豐富， 經過多個小時用各種貴價材料淆成， 每人一壺燉湯，碗碗材料多到滿瀉， 有大隻花菇、猴頭菇、花膠、乳鴿肉、雞絲等等， 淡淡都係肉嘅鮮甜。跟住就到全晚重點.. 至尊鮑魚虎蝦帶子盆菜索曬汁嘅鮑魚煮得好淋， 成隻南非鮑魚放落口啖啖肉， 係幸福溫暖嘅感覺！刺身級嘅帶子仍未熟透， 半生熟嘅狀態係享受鮮味同嫩滑口感嘅最佳時機， 大大粒 帶子放咗喺盆菜最頂層， 記得唔好煮熟佢 ，第一時間食咗先！