西門町台灣麵食 (Closed)

旺角女人街一向好多野食選擇，今日特別想食台灣野，，就喺網上search到呢間台式餐廳，佢門口都幾靚，有古色古香嘅紅燈籠，入到去睇睇餐牌，都幾多選擇，見2人餐都幾抵食，雖然係餐，但都可以自己選擇菜式。紅燒牛肉，鹵得非常入味，肉質又唔太淋又唔太韌，啱啱好，佢肉同肉之間嘅根好分明，d根食落好煙韌，好好味。鹽酥雞，炸得個皮好鬆脆，一d都唔油膩，而且咬落好juicy,d雞肉仲好嫩滑。台式燙青菜，上面有好多肉燥喺上面，夾埋d菜食好惹味。肉燥飯，真係勁多肉燥，d肉燥一d都冇肥膏，好香醬油味，真係撈飯一流。擔擔麵，呢個麵都有勁多肉燥喺上面，個湯底好香麻醬香味，d麵質都好煙韌，唔錯。香芋珍珠奶茶，唔會太甜，好香芋頭香味，加埋d煙韌珍珠，正。芒果玉露珍珠，呢杯好重芒果味，玉露同珍珠煙煙韌韌，都幾好飲。