富華餐廳小廚 (Closed)

夜晚一個人經過紅磡，唔知食乜好，於是隨意入咗一間茶餐廳。入到去睇餐牌，見到有平時鍾意食嘅梅菜蒸肉餅，於是就叫了這個。先上枱有個例湯，飲落去都唔錯(應該無味精)，之後到碟肉餅上枱，見到碟肉餅仲有好多熱氣，應該係啱啱蒸好。食落去啲肉餅幾香，同埋都好多梅菜，而且啲肉餅唔係落咗好多粉，幾好食。不過一般食肉餅一碗飯唔夠(可能本人大食，所以都係每啖多肉少飯，以免最後淨係食肉餅，應該有人會覺得叫多碗飯咪得囉，但係唔知點解我多數都只會食本身個餐包嘅嘢，唔會額外再叫，即係好似叫炒飯要多飯，叫洋蔥豬扒飯要多汁，我唔會咁做)。點知食咗幾啖之後，但侍應走埋嚟同我講:「係咪唔夠飯呀，俾多碗你丫，我哋呢度白飯任裝，唔駛另收錢㗎。」我聽到之後覺得呢間餐廳好嘢喎，呢個時勢疫情咁嚴重，少咗咁多人出街食飯，好多餐廳都縮皮減支出，反而佢哋仲任裝白飯(雖然白飯唔值咩錢，但都係支出丫)，覺得呢間餐廳幾有人情味，同埋食完之後睇到餐牌，原來佢哋已標明白飯任裝，如果大家係飯桶，可以去呢度試吓。