樂意點心

Open Now

Now Closed

今日放工後同媽咪係尖沙咀行街買野，行行下見到有間好多人排隊嘅點心店，而且仲要係免加一嘅，決定入去試下。入到去，店員好細心，見到我地攞住購物後嘅一包二包都即刻俾個籃我地放係地下。我地叫咗一壺白桃烏龍茶，茶飲落去有陣陣嘅桃香味。主食方面，我地叫咗個$68 嘅套餐，套餐包括一碟蒸飯，一碗燉湯同點心/小吃。蒸飯方面，我地加咗$55 要咗碟咸蛋肉蒸紅花蟹(配白飯)。隻蟹係原隻蟹，蟹肉都好多，餐廳俾埋剪刀同手套俾我地自己開蟹黎食。蟹下面就有鹹蛋肉餅，肉餅好鬆軟，配白飯食一流。燉湯方面，我地叫咗鮮花甲粉絲湯(另加$10)，花甲同粉絲嘅數量都算多，配湯一齊食好有口感。至於小食方面，我地叫咗鮮竹牛肉球，牛肉球大大粒，肉質鬆軟。嚟到點心店，點都要叫多d 點心試下，於是我地再叫咗：一份$30 沙律蟹柳春卷(3件)，一份$30芝麻蝦多士(3件) 同一份$28薑蔥牛柏葉。牛柏葉非常爽口，仲可以拌飯食。春卷入面嘅沙律餡料甜甜酸酸，非常醒胃。而芝麻蝦多士，多士好脆好鬆軟，而且蝦同芝麻嘅數量都十分足。叫咗咁多野食，埋單$244，也算扺食。