夏日炎炎唔單止正好眠，亦係攞正牌瘋狂食刨冰嘅好時機！以下係3間澳門刨冰店推介，有打卡熱店日系刨冰、粉色小屋水果刨冰，同韓國過江龍雪花冰，同大家清爽一「夏」。

日系刨冰甜點  HANO

圖：Joannakawai

水坑尾呢間白色小店主打日式刨冰，有宇治抹茶、蜂蜜乳酪同一至兩款期間限定口味選擇，最近係芒果椰子同荔枝玫瑰！佢哋前身係賣蕨餅嘅網店，實體店亦有得食原味同抹茶蕨餅，另外Lunch Time有定食，下午時段亦有小食供應，唔食刨冰都唔怕無嘢食。
 

粉色小屋嘆刨冰  Ice On Me

圖：餐廳IG

喺路環市區嘅粉紅色小屋，其實係主打冰糖葫蘆同刨冰嘅小店！山楂梅酒口味酒香濃郁而且味道偏酸，食完立即醒神晒。另外仲有抹茶紅豆刨冰，同季節限定嘅菠蘿刨冰、芒果刨冰等。唔想食冰亦有冰糖葫蘆、冰糖草莓等小食呀。
 

韓國特色雪花冰  Goobne Chicken

圖：餐廳FB

呢間嚟自韓國嘅No.1烤雞品牌，除咗UFO韓式烤雞同芝加哥Pizza之外，佢哋嘅雪花冰都好受歡迎。韓式雪花冰嘅特別之處在於食落更綿密、更入口即溶啊。有紅豆年糕、阿華田脆脆、藍柑同水蜜桃等唔同口味。