啖啖肉大滿足!
2019-05-29
一日三餐即係代表每日都要諗食咩呢個問題三次,相信唔少男士都曾經畀身邊嘅女友用相同嘅問題考起。但食親西餐唔係意粉就係「鋸扒」,食到悶,聽到西餐都怕怕?今期小編為大家介紹三間新奇啲嘅西式餐廳,今個假日男士們就唔怕再比女友話無新意啦!

The Salted Pig (荔枝角)       
The Salted Pig 以英倫鄉村風格為主調,主打英式及歐陸式豬肉菜色,主要選用肉質優良嘅天然飼養美國杜洛克豬種,提供一個「Good for Sharing」嘅環境比朋友同一家大細分享美食。餐廳別出心裁及分量十足嘅菜式讓餐廳一直大受歡迎, 荔枝角分店座落大型商場D2 Place,交通方便,更以特色嘅工業風裝潢,於2017榮獲香港餐廳最佳室內設計獎! 去到記得打下卡呀!

慢煮醬燒豬肋骨 (Slow-Cooked BBQ Baby Back Ribs)
每一份豬肋骨都經大廚精心炮製,用自家秘製醬汁慢煮超過12小時,再真空包裝,做到肉質嫩滑 又入味,仲可以鎖緊肉汁 ,又咬落彈牙,骨同肉分離效果! 配埋椰菜沙律、栗米同脆卜卜嘅薯條食,可以有助減輕肉滯感!

地中海風味串串豬 (Grilled Mediterranean Style Pork Kabobs)
餸飯一流!串串豬份量十足,足足有手臂咁長,大大粒加拿大豬肉,咬落鬆軟有肉汁,中間仲夾雜住清甜嘅菠蘿同甜椒,可減低純肉串嘅肉滯。配菜香甜嘅燒粟米,同有滲透住清新檸檬香嘅中東小米,口感特別,配搭清新!

忌廉菠菜三角酥 (Spinach & Cheese Puff Pastry Triangles)
三角酥外皮焗得金黃,鬆化酥脆,入面嘅菠菜苗香嫩,加上巴馬臣同意大利水牛芝士,切落有強勁嘅拉絲效果!芝士同菠菜嘅份量比例啱啱好,食落完全唔會覺得膩。配上芥末忌廉醬汁同新鮮嘅沙律菜一齊食,啱晒素食者同Green Monday食!

西班牙海鮮飯 (Seafood Paella)
大蝦、青口、魷魚等樣樣海鮮都煮得啱啱好,唔會過熟,飯入面仲有辣肉腸、三文魚粒等配料,食落每一啖西班牙米都吸收哂海鮮嘅精華,粒粒飯都好飽滿,啱晒海鮮迷!

太平洋蟹餅 (Crab Cake Dungeness Crab Cake)
蟹餅用上新鮮蟹肉、意大利軟芝士(Mascarpone Cheese)、洋蔥等製成,外層酥脆,中間口感濃郁,咬落啖啖都係蟹肉, 非常足料!配埋青檸青瓜蛋黃醬食,出奇地清新,完全唔會膩!  

Hunter & The Chase (中環)
Hunter & The Chase位於皇后大道中 L Place 三樓及四樓,三樓嘅The Chase係由一系列私密性高嘅主題區組成嘅當代雞尾酒酒吧,有供應摩登酒品同經典調酒嘅高貴優雅長枱酒吧區,輕鬆休閒嘅用餐區、專門為搭配葡萄酒而設嘅芝士吧。非常適合一班好友同同事放工聚腳Happy Hour!

而四樓嘅 Hunter 則同傳統扒房不同,提供嶄新嘅餐飲體驗,供應嘅菜單極富創意及充滿優雅感覺,更設有自家明火炭爐,提供出多款坊間少見嘅精選肉類同海鮮選擇。餐廳由美籍行政總廚Felipe Lopez負責,運用佢豐富嘅經驗,將各款新鮮食材同北美原料演變成為精緻嘅當代美國菜式,最適合想嚐鮮嘅美食愛好者同一大班朋友Gathering!

明火炭爐烤脆皮乳豬 (Suckling Pig) 
用最傳統嘅明火炭爐烤去咗骨,醃咗24小時再風乾24小時嘅乳豬腿。燒3小時後外皮薄脆而煙韌,肉味香甜,肉嫩而多汁,再配埋Slow Cook煮成嘅蘋果肉汁,為完美配搭!  

燒法國鵪鶉伴松露雞肝慕絲 (French quail) 

烤焗過後嘅法國鵪鶉香味濃郁,肉厚鮮香,肉多骨細,而且油脂豐滿,肉質嫩滑,含豐富蛋白質,非常惹味! 配合巧功夫製成,滋味濃郁、口感宛如絲綢般細緻微酸嘅松露雞肝慕絲進食,更能帶出其鮮嫩嘅肉味! 

味噌牛油煮龍蝦 (Miso-Butter Poached Lobster)
餐廳選用肥厚多肉嘅波士頓龍蝦尾,並細心地將龍蝦手拆肉,方便食客進食。龍蝦煮到啱啱好半生熟,食落啖啖都有牛油同日本白味噌嘅香味,仲可以食得到龍蝦嘅爽脆口感同原本嘅鮮味!加埋鮮美嘅醬油三文魚子漬一齊食,口感同味道都好吸引呀! 

芝士釀意大利手瓜花 (Suffered Zucchini Flowers)
Zucchini比稱為美洲南瓜或意大利節瓜, 係美洲同歐洲好普遍嘅瓜類蔬菜,但香港好少有餐廳供應,但係到就可以品嘗到! 意大利青瓜花,加上瑞可塔芝士 (ricotta cheese)作為餡料,炸到外脆內軟,配合埋意大利黃蕃茄醬,有助減輕油膩感,係一道非常意大利風情嘅頭盤!

海膽手工製結他意粉 (Chitarra Pasta) 
有别於平時我地食開圓長條型嘅麵條,傳統嘅結他意粉嘅麵團要用上好似吉他琴弦嘅器具嚟切割,做成麵條斷面四方形嘅麵條,因此比稱為結他意粉。煮到啱啱好al dente嘅自家手工製嘅結他意粉,彈牙有口感,加上又金黃又甜美嘅新鮮日本時令海膽,賣相吸引 !每條意粉都沾滿蒜味醬汁,加上面頭嘅烏魚子乾,一啖入口勁滿足! 

Three Blind Mice (灣仔)      
由香港欖球隊隊員林銘寧(Matt Lamming)及前隊長打造嘅意式餐廳,裝潢簡約新潮,設計別緻,係一間主打歐洲風格料理嘅小餐館,氣氛非常悠閒,樓上更設有房間,讓食客包場開party, 非常適合同三五知己、情侶嚟飲飽食醉!

美式烤豬肋骨 (Overnight BBQ Ribs) 
豬肋骨用秘製醬汁醃製,再用低火慢煮12小時,鎖住肉汁,難怪可以做到入味,又外酥內嫩,仲入口即化,令人吮指回味無窮! 

3BM牛肉漢堡 (3BM Beef Burger)
漢堡選用咗草飼英國牛肉,佢牛味天然,無美牛或澳牛咁肥膩多脂肪,肉味較濃, 配埋芝士,煙肉,新鮮嘅生菜同蕃茄一齊食,口感同肉汁都勁豐富!  

鴨腿窩夫 (Duck Leg & Waffle)
驟耳聽來依個配搭「九唔搭八」咁,但當一小片鬆化香脆,不油不膩嘅油鴨腿,配上一小片新鮮出爐後微甜而爽脆嘅窩夫,同果仁一齊放入口再慢慢咀嚼,所有味道就形成咗個微妙嘅平衡,出奇地好好味! 

比爾森啤酒炸魚薯條 (Pilsner Beer Batted Fish & Chips)

有別於一般嘅炸魚薯條,廚師加入咗比爾森啤酒當炸魚所用嘅特製啤酒炸漿中,即點即炸,做出外層金黃香脆,裏面魚肉嫩滑嘅炸魚,配埋它它醬同牛油果醬食,完全唔會有油膩感!

海鮮蟹肉意式扁麵 (Mixed Seafood & Swimmer Crab Linguine)  
海鮮同蟹肉份量勁豐富,同埋煮到啱啱好al dente嘅意式扁麵份量差唔多一比一!醬汁微辣,蟹肉勁鮮甜,好開胃嘅主菜!細細份獨食食啱晒!

心動不如行動!有興趣就快啲約埋三五知己去嘆下美食啦!快啲bookmark定啦!

*以上圖片只供參考,所有食品以實物為準. 食品供應因餐廳而異
關鍵字
灣仔
荔枝角
D2 Place
中環
西餐
西式
酒吧
鋸扒
西式餐廳
飲飽食醉
意式餐廳
新意
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
本月熱門
享受微醺週末!居酒屋新風潮!(2)
2019-06-05
不可不試 高質日菜餐廳推介
2019-06-13
飲飽食醉意式風情餐廳
2019-06-20
啖啖肉大滿足!
2019-05-29