以前想食到呢碗日本第一天丼，唔飛去東京日本橋都要飛台北一轉。不過上個月，金子半之助終於登陸澳門試業啦！到底呢碗天婦羅丼飯有幾厲害，澳門出品同日本又有咩分別？即睇開飯仔直擊報導！
 

金子半之助總店位於東京日本橋，主打江戸前天丼，顧名思義到目前為止用嘅依然係江戸時代承傳落嚟嘅秘方。因此就算唔係百年老店，依然有「日本第一天丼」嘅美譽。
 

而澳門分店嘅廚師亦特別飛去日本總店學習兩個月，醬汁同炸粉等材料都同日本店一樣，天婦羅用到嘅海鮮亦100%從日本進口，令呢碗日本第一天丼能夠原汁原味呈現畀大家。
 

餐廳用嘅係日本研發出嘅古麻油，既係以高級麻油再經古法精煉，比一般嘅油多一份濃郁嘅麻油香。而粉漿用嘅亦係日本北海道小麥粉，同雞蛋以黃金比例混合，油炸後天婦羅外皮非常酥脆，淋上日本進口嘅秘製醬油後酥中帶鬆，有別於一般天丼。
 

江戸前天丼（單點$138）

餐廳有三款天丼，最豐富嘅江戸前天丼就有穴子魚、鳳尾蝦、雜錦海鮮餅（墨魚粒、干貝）、溫泉蛋、海苔同小青龍（青椒）天婦羅。穴子魚即係海鰻，長達近30cm，肉質嫩滑而且無腥味。上面特別加上一小片柚子皮，幫大家喺中段嚟一個Refreshing。鳳尾蝦同雜錦海鮮餅口感彈牙。
 

想品味到天丼嘅最佳滋味，可以按餐廳建議嘅步驟享用！首先享用一條鳳尾蝦同穴子魚天婦羅，然後就開始食飯同其他天婦羅，食到一半嘅時候就將溫泉蛋嘅蛋黃篤穿，用半熟蛋液同醇厚香甜嘅醬油撈飯食，一個字：無得輸。因為日本人特別鍾意蝦天婦羅，大家都可以學日本人咁，留一條鳳尾蝦天婦羅最後食唷。
 

食食下大家就會發現個碗睇落好高身，但裡面比較淺。唔好以為係餐廳偷工減料呀，其實呢個碗係佐賀有田燒，雙層碗底其實係為咗留住空氣嚟作保溫之用，而每個碗使用之前亦會先預熱，心思位係加分嘅。
 

連前菜都有驚喜！醃蘿蔔嚟自日本，而醃薑係澳門店自家醃製！蘿蔔爽脆而薑片辛辣，同樣帶少少酸味感覺更開胃。另一個好幫手就係黑豆茶，帶烤黑豆嘅香味，而且有解膩消脂等作用，食完飯不妨飲多兩杯呀。
 

金子半之助
地址：澳門新馬路板樟堂22號龍昌商業大廈地下

文：Cathy
圖、片：Kar，Cathy