今日同朋友夜晚黎依度打邊爐，9點半前離座，任食2小時，未計加一都係228炸。座位非常寬敝，好舒服，冷氣一流，唔會打到身水身汗。    首先食雞煲，辣辣地，冇得揀辣度嘅。雞件好惹味，唔食得辣嘅朋友都覺得OK。  之後換另一個煲打邊爐，湯底揀咗比較特別嘅鯊魚骨猴頭菇，好清甜又健康，我地每人都飲咗一碗。  配料有好多選擇，免費嘅已經有好多，加錢可以點高級牛肉同海鮮。 上菜非常快，唔洗一陣已經黎咗好多配料。  一開頭會額外送一碟手打安格斯肥牛，牛味非常濃郁。  配料方面，手切肥牛條理分明，唔會有過多太肥嘅部分，肉質鮮甜。  佢地嘅油炸鬼都好特別，好有口感。  鵝腸爽爽脆脆，忍唔住叫咗幾盤！  飲品方面，特別推薦竹蔗茅根馬蹄水，落足料煲，打邊爐飲啱哂。  仲有雪糕機可以自己吱雪糕，隔離仲配備咗其他配料可以DIY~

尖沙咀美食多多，今日同朋友黎到依間韓國包車食午餐。韓國包車即係類似香港嘅大排檔，啲韓國人放咗工之後會到路邊攤同朋友傾計食飯，有睇開韓劇嘅人一定好清楚依個文化~ 餐廳裝飾得好懷舊，打卡一流。 
 
午市時份推出咗便當，可以一人一份。我地叫咗吞拿魚蛋卷便當，吞拿魚蛋卷非常長同厚，蛋卷食到層層嘅蛋香味，而入面包住滿滿嘅吞拿魚，非常有口感。隔離仲有必備嘅小菜，就係芽菜同泡菜，作為開胃前菜亦都唔輸蝕。 醬油炸雞 半份，一上到黎已經香噴噴，醬油味非常入味，炸雞外脆內軟，雞肉雖然炸過但係依然鮮甜多汁，認真加分！ 招牌炒章魚，係椰菜紅蘿蔔爆炒章魚，好有鑊氣，章魚好彈牙，一定要叫黎送啤酒。 紫菜飯卷，配菜好豐富，好飽足。 最後叫咗2杯飲品，熱情果梳打同埋菠蘿梳打，清甜爽口，為下午增添番唔少能量喔~ 

旺角有好多飲品店，竟然有間專賣蔗汁嘅新式飲品鋪，係登打士街同花園街交界。依頭仲有好多小食鋪，掃街一流。 
 
飲品主要分為水果類蔗汁同埋咖啡類蔗汁。蔗汁溝水果平時可能會飲過，不過居然可以用黎沖咖啡，聽落好新奇。 蔗打檸檬，係蔗汁加青檸，飲落去青檸會比蔗汁味更加重，口感清涼，非常消暑，蔗汁更加有清熱嘅功用添。 除咗蔗汁仲有少少其他類型嘅飲品，依杯斑蘭椰奶一拎上手就見到綠綠白白嘅條紋，好夢幻。椰奶用咗生椰乳，香滑濃厚，而且椰奶仲健康啲添，而斑蘭味非常重，估唔到斑蘭同椰奶嘅飲品都可以咁夾。 店鋪最近做緊抽獎，有機會可以免費送多一杯~~~ 
 
除咗飲品，店面嘅設計都幾搞鬼架，影咗幾張相俾大家欣賞下，最緊要係側面嘅打卡牆，塗鴉上面有「旺角」、「掂過碌蔗」依啲字句，一定要拎杯野飲黎影靚相。 

今日同朋友黎到犇道，個名幾搞鬼，如果唔係網上推介，都唔知原來依度有間CP值咁高嘅西餐廳！環境一流好自然舒適，未食已經打咗好多卡XD

午市有唔少款式嘅飯、意粉、沙律、漢堡飽、扒類，仲可以追加小食同甜品添。 是日廚師發辦牛扒 配薯菜，今日係西冷牛扒，大約7安士。牛扒叫咗7成熟，煮得剛剛好，因為超怕太生或者煮太耐老哂，而且肉味超濃郁，非常鮮甜。午市薯條仲可以無限增添哇。 冬陰公海鮮意粉，冬陰公味唔會太濃，唔洗驚會過酸或者過辣。海鮮有蝦、青口，蜆，非常豐盛。 追加咗3款小食，辣雞肉串只係少少辣，類似日式。芝士蘑菇雞翼好香滑。薯絲蝦最推介，脆脆嘅薯仔絲包住Q彈嘅蝦肉。 甜品當時係唔少得啦！朱古力心太軟配雪糕，滿滿嘅流心朱古力，夠哂邪惡。至於是日切餅係芝士蛋糕，口感比較綿滑~ 飲品可以加配特飲，強烈推薦芒果生椰乳特飲！椰奶又香又濃，除咗有芒果仲有西米露，有啲似楊枝甘露。蜜桃柚子四季春好清新，啖啖果香味。

cafe位於錦田，係西貢都有分店 。元朗站搭巴士去，10-15分鐘左右車程已到達。cafe環境好寫意，慢活，嘆咖啡。餐牌上亦有少見嘅dutch baby pancake，是日款式產品。 松露蟹肉沾醬($108)，松露味超突出，麵包烘過後，外層脆，但內鬆軟。醬汁唔會太稠密，鹹度適中。另外有芝士拼盤，岩哂芝士愛好者。 是日濃湯配麵包($68)，當日提供南瓜濃湯，送上枱時熱烘烘。濃場非常綿密，啖啖南瓜甜味。旁邊配有麵包，同樣外層硬脆，但內裏好軟熟。 香蔥鴨南蠻蕎麥麵($88)，熱湯鹹香，調味比其他食物重。湯內嘅鴨肉厚實，配大蔥及菇菌。蕎麥麵硬身，份量足及飽肚。麵條掛湯，一冷一熱perfect。 蟹肉薯仔沙律，薯仔打成蓉，帶有少碎粒，增加沙律嘅口感。額外加上parma harm，鹹香味令薯仔沙律味道提升。如果想食蔬菜類沙律，cafe都有另一款沙律提供～ 最期待及必點嘅甜品黃豆粉年糕班戟，外層焦脆，煙韌嘅年糕，配上黃豆粉，無得輸。年糕煙韌到好似拉絲嘅動作咁，雲尼拿雪糕配熱pancake，冰火交融嘅感覺。 好多顧客都會點一杯咖啡慢慢嘆，既可以坐室內，亦可以坐室外有遮陰。Dirty漸層靚，入口香濃，後有奶香。而桃味飲品清新，加入冰塊飲用，感覺high class咗～

今日lunch黎食日本野，唔係朋友介紹都唔知依度有間咁抵食嘅日式餐廳。 
午市有套餐，包味噌湯、茶碗蒸、醃蘿蔔。味噌湯好清甜，唔似一般整嘅得個咸字。茶碗蒸入面有好多配料，例如蟹柳、菇菇，非常豐富。醃蘿蔔酸酸甜甜好開胃。  第一份套餐係三文魚飛魚籽丼，三文魚好大片，食落口好鮮甜，而滿滿嘅魚籽佈滿整個丼上，每啖飯都咬到粒粒爽甜嘅魚籽。  第二份係蒲燒鰻魚丼，鰻魚燒得好香口，肉質肥美，而白飯撈咗雞蛋絲，一啲都唔寡。  套餐可以追加飲品同小食，我地追加咗忌廉蟹肉薯餅，外脆內軟，入面熱辣辣又綿滑。  飲品點咗日本青檸梳打同白桃梳打，好清香，仲可以一邊歎一邊欣賞風景。

我同朋友都中意食辣，每隔一段時間都會忍唔住食番餐川菜。今次佢帶我黎碼頭上魚，話依度嘅四川菜夠正宗！    雖然依度出名食魚火鍋，不過因為我地想試下川菜，所以就直接點咗酸菜魚套餐。一上菜真係嚇親我地，估唔到有咁多菜同埋每一份都咁大碟。    老壇酸菜魚，魚片有好多片，每片都好嫩滑鮮甜，而且湯底好濃郁，非常開胃。本身以為剩係得鮮魚片，點知仲有好多配料，例如闊薯粉、豆皮、萵荀、芽菜、豆卜等等。  脆皮炸BB鴿，細細隻炸得好脆，肉質紮實。  經典回鍋肉，師傅落足火侯去炒，回鍋肉同椰菜炒得好香口，回鍋肉片片肥瘦均勻，真係想送幾碗飯！  川北粉皮，粉皮好爽口，嗦哂啲調料。  夫妻肺片，有牛肚牛展，秘製麻辣汁好惹味。 

難得今日放假，過黎元朗歎番個靚靚lunch先！今次黎到87 coffee，係位於水車館街嘅巷仔入面，平時冇經過真係為意唔到！    意式波菜蟹肉闊條麵，爽滑嘅闊條麵上鋪滿厚厚嘅蟹肉，蟹肉非常鮮美，調味豐富。  香濃意大利飯配紐西蘭肉眼，意大利飯非常綿滑，有火腿粒同翠肉瓜粒，每口都好濃郁，而肉眼揀咗七成熟，外表焦脆而內裡呈粉暗色，口感嫩滑，肉汁鮮甜！  藍柑檸檬梳打，好似陽光與海灘一樣，打卡一流，夏天飲好清新。  榛子朱古力鮮奶，好creamy，榛子同朱古力味好重。 

朋友介紹黎依間囍串gathering，除咗串燒，都有提供一啲主食架。店舖唔算特別大，勝在夠乾淨企理。未夠7點已經有幾枱客人邊食串燒邊歎啤酒，勁chill。 
用QR code落單，先揀辣度。今次叫咗幾款串燒同炸饅頭。串燒會放係一個小火爐上面”興”住，咁就唔洗擔心啲串燒會凍咗。  右邊係鮮牛肉串，每日限量！牛肉烤完仍然十分嫩滑，非常惹味。   左邊牛胸爽，即係牛肋骨中間嘅軟骨，好爽口，以為會好油膩點知一啲都唔會。  厚切牛舌，真心勁厚，以為會好韌，點知一咬發覺原來腍到就黎可以入口即溶！  金鑲豬皮肉丸，一層豬皮再一層肉丸咁串住，好搞笑！肉丸好札實，而豬皮嗦哂啲燒烤汁，2個一齊食都幾特別。  孜然羊脾肉，孜然味夠重，羊肉完全冇騷味。  炸饅頭，炸得金金黃黃，一咬外脆內軟，再沾少少煉奶，真係可以一次食10個XD  我同朋友都唔飲啤酒，所以叫咗2杯其他飲品，估唔到都整得幾出色。雜莓乳酪好滑，望落用咗唔少種類嘅莓黎整。水蜜桃梳打夠哂清甜，而且仲好大杯。 

香港最近開咗好多螺絲粉店，依間嗦爸螺絲粉係元朗新開嘅。雖然店面細細，但係位置寬敞，有一人吧枱同埋卡位，而且冷氣開得夠足，坐得好舒服。

螺絲粉有唔少款，亦都可以單點然後額外加料。除咗螺絲粉，仲有小食同埋炸串添，一個人黎嗦粉，定係一大班朋友黎聚餐都得！

螺絲粉一上枱已經聞到佢特有嘅酸臭味，湯底非常濃郁，配料好豐富，有必備嘅木耳、酸荀、酸豆角、蘿蔔乾、花生、炸腐竹。

依碗係海鮮螺絲粉，必食炸蛋！炸蛋索哂啲湯汁好惹味。海鮮有蝦、青口、蟹柳，亦都非常新鮮，同螺絲粉一齊食令到味道更加清甜。 嗦爸全家福螺絲粉。配料有肥腸、鴨腳、牛展、豆卜、炸蛋。鴨腳同螺絲粉真係絕配，可以一邊算骨一邊啜佢嘅湯汁精華。因為太早黎到餐廳未煮得切鍋燒，所以轉咗做肥腸，肥腸煙煙韌韌唔錯。 霹靂炸豬手，係限量架，老闆推薦食試一試。豬手熱辣辣上到黎，外皮脆脆，裡面非常香糯，啖啖都充滿住骨膠原，一定要趁熱食先食到黏黏嘅口感！額外仲附有一小杯濃縮果醋，食完螺絲粉要飲咗杯果醋，去一去陣味，先更加品嚐到豬手嘅味道。 一口炸豆腐，豆腐係骰子樣，炸得金金黃黃，外脆內軟。 最後仲食咗幾款炸串，有一口牛、肥牛芫茜、肥牛泡椒、翠玉瓜。調味非常十足，好有係大陸食炸串嘅味道。