登上米芝蓮指南嘅餐廳，正常無乜邊間唔駛等位。一到中午食飯時間，等十張八張枱乃是常識吧，好彩哩幾日天氣都比較涼姐。 入到去位置唔多，佢哋準備咗口罩紙袋俾客人放口罩，亦有貼心嘅圍裙，唔使驚d汁彈到成件衫都係。👍🏻 急不及待要落單啦，叫左碗周月沾麵（哩到嘅招牌麵，當然要一試）。濃淡味、麵嘅份量、硬度、要加咩餸，同好多日本食沾麵／拉麵嘅餐廳一樣，寫係張紙再比侍應。 佢地嘅服務真係好好，自動問你加唔加茶／湯，見你食完野又會問你要唔要收走啲碗碟，唔好阻到你。 等過一排番工，我再黎哩到食先！

十年前拍拖成日食佢 十幾年後佢仲係到 好慶幸佢未被連鎖餐飲店淘汰 每次食親回憶都出晒黎 今日4點幾黎到 唔駛等位 平時中午同夜晚你係30-45分鐘等候時間你都一定食唔到 （強烈唔建樓take away) ⁡ 雞扒炸得好脆 仲鎖住到肉汁 加埋淋上去嘅肉燥 拎黎送飯就更一流🤩 野飲方面 唔駛諗 一定係叫珍珠奶茶 我把口對珍珠/芋圓都好講究 哩到嘅珍珠奶茶唔止有茶香 珍珠係爽口彈牙嫌好煙靭 一般街邊手搖野飲店嘅珍珠都係無咩咬口淋嘅 （天仁茗茶嘅珍珠我都覺得麻麻） ⁡ 小食我會推薦 皮蛋豆腐 考下自己揸筷子嘅功力 夾唔夾得起舊豆腐又唔爛啦🤪 ⁡

近哩幾年，每當有朋友生日2-3人飯聚，一般我都會買La Famille 嘅mimi cake去。試過4-5款不同口味，只有Earl Grey Tea Chiffon Cake（英國伯爵茶蛋糕）先留得住我個心！ 大cake我都有買過，不過係十幾人生日派對上先會叫大size，通常食飽都係象徵式食cake影相！有時番工攰想食甜野，我都會即刻諗起哩間嘅蛋糕😋😋😋 食cake最怕膩，但即使佢哩款蛋糕最入面都係忌廉，但就絕對無哩回事！ 咬落去鬆軟，有淡淡伯爵茶，面頭仲有我最愛嘅macaroon❤️我都唔記得我荼毒左幾多個朋友食哩款蛋糕😎✌🏻  

屯門係好少有石板燒牛嘅餐廳，唔想委屈自己食任食放題燒肉，可以選擇哩間炻板燒！成日見佢排長龍，之前都冇機會試，今日朋友話提議食哩間黃店，好好彩我哋8點幾去到仲有一張吉枱，唔使等！👏🏻 舖頭內掛住好多黃色文宣，好靚❤️  1）封門柳十片 配白飯+麵豉湯+凍熱餐飲 石板燒重點係控制燒既時間，燒耐左肉變老，咩食慾都無晒。開頭見得十片都諗會唔會唔夠飽，若果一男一女食，食到尾其實都好夠。有舊細脂肪比你搽係鐵板，迫d油出黎你就可以開始燒。 從來都無聽過咩係封門柳，原本係牛橫隔膜肌肉，一牛得一條，較罕有。脂肪紋路平均，食落都重牛味，肉質鮮嫩較腍，基本上唔駛點醬汁都好好味！個人認為燒到約五成熟就好，放一陣等餘溫令片牛再熟多dd，prefect！  2）吉列牛板腱 +$15轉烏冬+麵豉湯+凍熱餐飲 佢個吉列牛炸得好脆，不過略嫌牛味唔夠濃，所以我都會點醬汁一齊食，反而佢個烏冬都唔錯（圖4: 有海苔，香蔥，粟米粒）  3）飯係有飯素（芝麻 海苔 鰹魚） 好少地方會配飯素，絕對睇得出佢地係用心經營既黃店！

唔知幾耐無飲Starbucks，但熱起上黎都想搵間手調野飲解下渴。小妹鍾情花斑茶社，成日番工都會撩下d同事一齊叫外賣。有時Lunch食沙律，但又覺得太寡，就會突登行去樂道買杯過下口癮，肥妹就係咁練成架啦！

1）白桃烏龍茶加寒天 $29
本身白桃都偏甜，唔想甜到漏，可選擇叫微糖。
哩到係用鮮桃整，所以會飲到絲絲桃肉！
烏龍茶既清新濃香味同白桃簡直係絕配，加上超有口感既寒天（蒟蒻製成既晶球），係我既消暑必選！


仲有openrice 外賣自取有時都有著數，試過飲野平一半價錢，又或者張單減$30

小妹適逢就生日，朋友淨係想係屯門食，又知我情迷生蠔，於是我地又黎哩間食法國菜既餐廳啦。  1）法國生蠔：係檸檬旁邊順時針開始 由淡至濃味 Jolie Mauger x2 Ostra Regal x2 Gillardeau x2 食生蠔我鍾意品嘗佢既原汁原味，如果想調味，加一兩滴檸檬汁或Cocktail Sauce都夠。若然你唔知食邊隻生蠔好，放心交比侍應推薦。  由於我同朋友都唔係大胃王，所以我地淨係叫左一個Set Dinner B（$368），再散叫一個Appetizer。加上訂枱慶祝生日，比現金係會送一款甜品，我一早揀左心太軟所以要留肚食甜品☺️  2）Set Dinner B - Goose Foie Gras Mousse Toast 法國鵝肝幕絲多士 罐頭鵝肝切成片，搭配烤吐司麵包，係最常見既食法。塊鵝肝都算大，share剛剛好唔怕太油膩，底下有紅菜頭絲，酸酸甜甜中和番，唔錯！佢appetizer有另一款鵝肝選擇，香煎法國鵝肝伴無花果陳年黑醋汁 。 兩者我都食過，後者的確係出色，鵝肝係大舊d，煎完酥脆香口，所以一份都要$168架！  3）Appetizer - Spanish Iberian Ham 48months(50g)with Brie cheese &Cantaloupe 西班牙伊比利亞48個月風乾火腿配法國Brie芝士&哈密瓜 $318 之前賣過Parma Ham，所以略懂，係時候廢up扮晒嘢先。呢啲黑毛豬係放養時期已經係食橡果，所以其肉都帶有榛子香味。風乾需時最少24個月，36/48個月未必人人接受到，有人會覺得好鹹，口味真係個個唔同既！ 每次黎都單點哩個，份量都算誇張，黑毛豬一向同哈蜜瓜就係最佳拍擋，加一塊芝士，送酒一流。你見到佢d雲石紋路就知哩道前菜有幾咁正啦！  4）Free - South Africa Whole Live Abalone with Black Truffle Champagne Sauce 香檳黑松露煮南非五頭活鮑魚（單點要$168架） 鮑魚好爽口彈牙，佢面頭既黑松露汁creamy得黎又同鮑魚好夾，不過我就建議唔好點太多汁，少少點綴下就夠。  5）Set Dinner B - Stuffed Herb Garlic Butter Snail with Fresh Mushroom 香草蒜茸牛油焗法國田螺釀鮮蘑菇 哩個一般般，底下既焗薯蓉好食！（錯重點）  本身個set有碗匈牙利牛肉湯/是日精選餐湯，不過我地都好飽，所以叫佢唔駛上，費時浪費。  6）Set Dinner B - Roasted Chilled Australian Grain Fed Sirloin Steak with Red Wine Gravy Sauce 烤澳洲穀飼超西冷牛扒配紅酒燒汁 一向食開5成熟，個扒黎到係咪5成你無得呃。切開肉質紅潤軟嫩，可能已經太飽，所以我覺得無咩特別。🤷🏻‍♀️  7）Chocolate Lava Cake with Ice Cream 心太軟 個心太軟火侯拿捏到位，一切就見流心，旁邊配雲呢拿雪糕。雖則係送，但都無揸流！寫埋名同HBD，好彩隻碟夠大，影相好彩好多。😛  最後值得一提，佢地d侍應都幾有服務。由於我book6:30坐出邊睇埋日落，但我又好怕比蚊咬，佢地好細心咁點著蚊香。每碟見你食完佢會黎收，又執好枱上既野先影相，相當識做。

一星期總有幾日都會食哩間餐廳 從來都無諗過要打食評 由於之後唔再係尖沙咀返工 所以終於的起心肝 將我第一篇食評獻比Co-dinning space! 佢好食既菜式有好多 個人推薦炸雞髀煎蛋飯/吉列豬扒煎蛋飯（即叫即炸） 汁方面 我會揀日式咖喱汁（燒汁都唔差架） 佢炸出黎個髀/扒唔會乾爭爭 內裏仲有肉汁 $50蚊都有既質素 反映間餐廳真係用心製作 上次食過白汁雞皇飯都正 原來都幾受歡迎 一行5人去個個都叫哩個😯 可揀飯/意粉（另上） 個意粉有驚喜 唔係就咁滾水淥熟個隻 佢會再炒一炒 無論你食咩餐都好 識食一定會加$18 要黑松露薯條 佢唔係比黑松露醬你咁流 試下你就知我講咩架啦 如果2人食飯 叫一份都okay分量都唔算少

係佐敦同尖沙咀之間 要搵間chill coffee shop除咗聖巴克仲有咩選擇 今次想介紹哩間位於山林道既「梔子」 同友人一行三人 本身想食佐敦壽司郎 點知等位等到天昏地暗 於是諗起附近有間幾好食既黃店 介紹比朋友叫佢地試下😌✌🏻 一入門口都有一個唔錯既打卡位 （為左保持丁點神秘感 所以無影😂） 朋友想點日式蘋果咖喱雞肉飯 我再同佢講呢個好似好伏咁 點知到落order嘅時候原來已經賣晒😱 佢哋就叫咗個蟹肉意大利麵 我就叫左燻牛肉比高三文治同埋個養生茶 茶呢我就揀咗黑糖紅棗薑 壺茶到嘅時候 個侍應同我講焗多3分鐘就可以飲 同埋飲完可以加水 我refill左一次 都仲有味👍🏻 個三文治呢佢就會叫你盡快食 如果唔係個包就會林晒唔好食 個比高的確係有意外 意外地好食 個包好脆 燻牛肉唔會好乾 配埋個汁 prefect match!! 旁邊仲有少少沙律菜 有羽衣甘藍🤭 我幾鍾意食 不過唔係日日接受到佢有少少苦 本身想叫cake 但要轉場唯有下次啦 溫馨提示 如果想享用穩定wifi 唔好坐咁入既位置