影片
食记 (2)
3月20日, 最后一站, 全日食不停口食到上船前都仲要食个饭! 喺酒店附近求其揾咗间茶餐厅开餐, 呢间野绝对唔系游客食点, 但就似乎系澳门人嘅饭堂… 时值晚饭时间, 一众伙记们都十分忙碌地处理著一大堆一大堆外卖order中!::: 海蜇手撕鸡 ::: $25作为小食呢个手撕鸡都几大盒~ 有海蜇有鸡丝外仲有大量青瓜丝! 海蜇爽口, 鸡丝嫩滑入味, 系出奇好味的开胃小食!::: 焗葡国鸡饭 + 粟米忌廉鸡汤 ::: $29随饭餐附送一款汤, 我拣咗粟米忌廉鸡汤~ 百分百系罐头货色! 不过好在佢用罐头货用得足料, 唔会沟水沟到稀溜溜, 汤底都几杰身~ 不过系有d过咸.叫得做地道狂食团, 咁地道嘅葡国鸡饭竟然未食过! 所以一定要叫番个! 卖相就真系几得~ 个砵好似好大兜咁但其实好浅, 差d比佢呃咗~ 葡汁颜色比平时见嘅淡咗少少, 味道亦有少少淡. 不过d鸡就几好食~ 又弹牙又入味~::: 芝士焗猪扒饭 + 紫菜蛋花汤 ::: $29紫菜蛋花汤唔系唔好饮但就好似味精水咁, d紫菜都几多~芝士猪扒饭焗得唔错, 卖相已经加分! 炒饭底粒粒分明够干身, 面头d芝士汁烘成金黄色~ 猪扒份量超多, 大大件炸得松化, 难道澳门人对烹调猪扒真系特别有研究? 整体呢个饭几好食!::: 鸡扒薯仔米线 ::: $24汤底清得嚟无乜味~ 鸡扒脆身, 但肉质干咗d… 米线一般~ 唔淋唔弹~ ok啦!终于食完最后一站, 团友们都食得饱撑回港~ 好开心今次食咗好多地道d嘅野, 发掘到一个深入d嘅澳门! 希望下次嚟再继续食埋我地未完嘅狂食list!!!
继续阅读
我住过澳门一排，有食过呢一间野，D野唔错啦~~D野食都几平架，又开得夜㖞~~你知啦~~系氹仔，一到11点就好多食店都会CLOSE，而呢间好似开到12点架~~D消夜都OK架~~好多澳门人或者学生都会去食，如果系食饭时间去，好多时都无位要等位。所以大家去既就自己留意时间啦~~
继续阅读