想搵正宗法式麵包？九龍城呢間新開嘅麵包店可能就啱你心水啦～Elysee Bakery喺澳門已經有成六間分店，主打正宗法式麵包，原材料由法國入口，製法都跟足法式傳統，但價錢就夠哂貼地。負責人話希望可以推廣法式麵包，令到更多人認識真正嘅法包。

原味牛角包($13)、朱古力榛子牛角包($18)、皇室蝴蝶酥($18)

牛角包外脆內鬆軟，店主話牛油係牛角包嘅靈魂，佢地用咗純正法國牛油，足足有24%都係牛油，難怪麵包咁鬆軟！而蝴蝶酥都係用咗高質法國牛油製成，香脆之餘好鬆化！

葡式蛋撻($10)

蛋撻跟足歐洲製法，外皮鋪上一層又一層嘅酥皮，餡就相對奶味重啲同甜啲。

法式小麵包($5)、法式小餐包($7)、奶油小麵包($11)

呢三款就簡單啲無任何內餡，法式小麵包就係麵粉加鹽，法式小餐包就加埋奶，食落就鬆軟啲。

芝士扭結條($18)、磨菇雞肉批($22)

除咗甜包外鋪頭都有供應唔同款嘅鹹包，芝士控一定唔可以錯過芝士扭結條，加入咗大量芝士同麵包一齊焗，啖啖都係香濃芝士味。磨菇雞肉批就夠哂足料惹味！

心太軟($35)、閃電泡芙($25)

講到法式又點少得法式甜品呢！心太軟可選凍食式熱食，仲即場可以幫你熱埋。用咗黑朱古力，食落口先食到苦味，再慢慢回甘。而閃電泡芙就有焦糖、白朱古力同黑朱古力口味，食落一樣唔會過甜，咁就唔會太heavy啦！

店鋪仲好貼心咁提供迷你麵包類，一個都係五、六蚊起，想試多幾款都無問題啦～

香榭里

地址: 九龍城賈炳達道28號九龍城廣場地下18號鋪

文：Yanica

相、片：Tom Li