呢間隱身於中環都爹利街既低調酒吧，以海洋為主題，入到去令人有種置身神秘海底既感覺。呢到最signature既一家係店家自創既海洋雞尾酒，分別以七大洋命名，每杯都充滿特色。到訪當晚仲有DJ 打碟live show，相當有氣氛! Indian Ocean ($160) 呢杯cocktail以Whisky 作為base，加入椰奶、肉桂、芒果糯米飯、菠蘿同埋檸檬草，表面再放上一樣海苔脆片作點綴，飲落層次感十足，創新之餘，味道亦相當清新開胃，仲好易入口添! Atlantic Ocean ($160) 另一杯以大西洋命名既cocktail靈感來自於大西洋文明，採用左蘇格蘭威士忌、蘇格蘭坎吉卡椰奶、波爾圖白酒、越橘汁、檸檬汁、糖漿、海水等材料調製而成，入口第一啖椰奶同威士忌味道相當heavy，中期會有淡淡白酒、越橘汁同埋檸檬汁既甜酸味，最後有海水咸味淡淡浮出，口感融和又突出，相當impressive! Cold Cut Platter w/ Toasted Bread ($188) 飲得酒就緊係要配埋小食先perfect啦! 呢碟cold cut platter唔單止有常見既ham, 最特別既係有店家自家製既龍蝦開心果火腿，鹹鹹香香，配酒一流! Tacos of the Sea ($148) 呢碟迷你Tacos一碟齊晒三隻味， 分別有芫荽蟶子配蔥粒、泡菜章魚以及虎蝦，濃郁既調味相當有有地中海特色，食落taco皮仲帶點煙燻味，令人忍唔住一啖接一啖!

📍順日本料理 - #YFF天后 【私心推介世一厚切牛舌飯🥇長佔牛舌關注組第一名】 呢間位於天后嘅居酒屋由日本廚師主理，主打多款日式丼飯，佢地嘅燒牛舌飯更係長佔牛舌關注組的第一位。個人認為佢地嘅出品更加係比起日本著名嘅利久牛舌有過之而無不及！🙌 ➤ 厚燒牛舌飯($158) ➤ 厚燒牛舌便當 ($138) 五大塊極厚切嘅牛舌，表面灑上海鹽同埋黑椒作調味，簡簡單單已經可以帶出極濃郁嘅牛味。牛舌經炭火烤過後油香四溢，外層爽口而內層軟腍，口感極佳，完全唔會韌～配上粒粒分明飽滿的珍珠飯同食，每啖都係令人幸福的滋味。定食套餐相當豐富，跟配前菜、味噌湯同埋沙律，性價比頗高。而便當set就係跟配凍蕎麥麵、煙三文魚沙律、味噌湯同埋雪糕，更加豐富！ ➤ 清酒煮蜆 ($145) 每隻蜆都好大隻厚肉，食落冇沙之餘亦超級鮮甜！加入清酒煮過唔單止可以提升鮮味，食落仲帶淡淡酒香，簡單的美味(⁎⁍̴̛ᴗ⁍̴̛⁎) 可惜份量真係比較少～ 📍地址： 天后永興街23號地下

📍Baci Trattoria - #YFF中環 ❝Weekend Semi-buffet❞ — $488 per head 最近嚟咗呢間位於LKF嘅意大利餐廳試咗佢地嘅weekend semi-buffet，最大嘅賣點緊係可以任嗌佢地獲得全港第二呢個稱號嘅pizza啦～ 一個價錢可以食足三個鐘，愛酒之人仲可以加錢試埋佢地嘅紅白氣酒free flow，嘆住咁度過週末下晏。 餐廳提供5款即叫即烤嘅手拉pizza，今次我地就試左佢地嘅four cheese同埋bbq chicken flavour，用上傳統窯爐高溫烤焗，即叫即製非常熱辣辣，餅底外脆內煙韌，食落帶有麵粉香氣，極有正式意式風味。 海鮮吧呢個回本位大家都千其唔好錯過～ 餐廳提供多款高質海鮮，包括開邊波士頓龍蝦、蟹鉗、紐西蘭青口、海蝦同埋翡翠螺等，款款都鮮味十足。其中最鐘意原隻開邊龍蝦，肉質新鮮結實，味道相當鮮甜。另外沙律吧都有提供幾十款多款新鮮蔬菜、精選沙律同埋芝士冷盤，選擇相當豐富，令人眼花撩亂。 最後提提大家一定要試埋佢地高質素嘅甜品吧！當日餐廳提供6-7款自家製甜品、gelato同埋即切水果。個人大推Tiramisu，特點除左用上意大利雞蛋之外，而且冇額外加入忌廉製作，令mascarpone cheese味道更為突出。

鳴虎 鳴海老 ($88) \ 蝦味噌豬骨湯拉麵 / 滿滿的櫻花蝦，濃濃的蝦味融入香甜的湯頭中，搭上味噌，令味道更加豐富，彈牙的拉麵掛著湯汁，一口拉麵再喝一啖湯，每一啖能喝出香醇的蝦油味。 黑鳴虎 ($88) \ 博多黑蒜油拉麵/ 黑蒜味非常濃厚，蒜油味道好有層次。至於麵條幼細，非常掛湯。配料有紫菜、黑木耳絲、流心蛋、葱同叉燒，叉燒有2塊，屬於五花腩部位，肥瘦適中，入口甘香！ 將軍澳貿業路8號新都城中心3期1樓161-162169及171-174號舖

K-Palace 今日帶大家嚟試下呢間由韓國人開設嘅正宗韓式餐廳，位置方便之餘，性價比亦相當高！ 醬油蟹 ($168/pc) 醬油蟹堪稱韓國名菜，鮮甜美味令人難以抗拒。呢到嘅醬油蟹價格非常親民，百幾蚊就可以試到，仲要包埋紫菜白飯！醬油蟹醃得好入味，肉質非常嫩滑，味道鮮甜帶醬油香，仲有唔少呈鮮橙色嘅鮮味蟹膏，入口既鮮且香！ 牛肋骨 ($228) 牛肋骨燉到非常軟腍，輕輕一咬肉質就喺口腔化開，牛味香濃，配合埋香甜嘅醬汁超級下飯！配料仲有韓式年糕、紅蘿蔔、蛋絲等，索晒味好惹味～

鮨山月 \頭盤/ •刺身三品 象拔蚌 - 口感新鮮爽脆 石坦鯛 - 肥美黏口 墨魚 - 中間包裹自家醃製的溏心烏魚子和蘿蔔，味道鹹鹹香香 •櫻煮八爪魚 - 經過慢煮後肉質顯得格外柔軟 •一夜干目光魚 - 香脆帶鹹香，啱晒送酒! •大拖羅 - 來自山口縣仙崎市既野生吞拿魚!! 由於係野生捕獲而非養殖，肉質係呈鮮紅色架! 師傅用上備長炭燒手法烹煮 ，可以令吞拿魚啲筋化開，味道充滿炭香味! 配合炸大蔥絲同埋醬油蛋黃醬，口感同味道都相當有層次!! •白子 - 白子即係鱈魚精囊~ 經醬油浸煮後再放入燒爐輕烤 ，配搭上京都名物聖護院大根汁同埋菜之花同食，味道相當清新! •吉列炸帶子 配 馬糞海膽 – 炸得外脆內軟既帶子夾住鮮甜既馬糞海膽，雙重鮮美! •千葉縣赤鮑 - 赤鮑係師傅特選時令食材，以清酒加入肝醬慢煮，口感腍身彈牙 •煙燻鰆魚 - 以日本禾稈草煙燻，並炙燒過魚皮，加入秘製酸汁同食，面頭灑上福岡河豚蔥，鮮味十足 •酥皮鮟鱇魚肝 -> 香滑可口既鮟鱇魚肝配上酥皮，多重口感 , 好新式既配搭! •瑩光魷魚墨汁茶碗蒸 茶碗蒸加入墨汁，除了令賣相與別不同，亦使味道更濃郁。 加入來自富山灣的螢光魷魚，為嫩滑的蛋漿增添鮮味，比平常的茶碗蒸更有層次! \壽司/ •半天然深海池魚 - 半天然池魚比起純天然/養殖池魚味道較濃郁肥美! •碳燒梳子魚 - 炭燒的魚皮油脂更豐富突出，加入梅醬同食更能中和膩感！ •池魚 -> 魚肉細緻富油香，配上蔥醬更添香氣! •醬油漬中拖羅 – 同樣係來自山口縣仙崎市既野生吞拿魚~ 醬油香更能掀升吞拿魚味層次! •炭燒赤陸 – 以備長炭輕烤過逼出魚油，極為肥美，油香在口腔中爆發! •海膽三文魚籽杯 - 賣相相當精緻，多重鮮味口感層次! \吸物/ • 麵豉魚濃湯 \甜品/ •水果（淡雪、福岡草莓）

Crust Italian 這棟有百年歷史的建築，前身是一家老當鋪---和昌大押，活化後裡面開了一家主打南意大利菜的餐廳，想一嘗正宗特色拿坡里菜的你千萬不要錯過! Beef carpaccio with black truffle 意式牛肉刺身，薄切牛肉吃起來很軟熟，是室溫狀態的，橄欖油下得份量剛好，味道很香，配上火箭菜及芝士，吃起來很不錯的。 Seafood Pizza 傳統napolian pizza餅底，口感既脆又帶煙韌，薄薄的餅底上放滿新鮮海鮮，包括青口、大蝦、魷魚等，口感相當豐富，配合芝士的鹹香，充滿意式風味。 Homemade pappardelle with beef cheek 自家手製意粉，質地彈牙有口感，非常al dante。慢煮了數小時的牛面頰肉超級軟嫩，有濃烈的牛肉味。喜歡吃肉的食客，一定會愛上它。

想食大排檔但又想舒舒服服坐室內涼冷氣？去乾淨企理嘅室內大排檔就實冇死😗 知道之前介紹過俾大家嘅楚撚記長期爆滿，book唔到嘅大家可以轉移玉步試吓呢間同樣出色嘅良心小炒店，同樣鑊氣十足，啱晒成班人食飯飲返杯啤酒吹水👅 ➤ 拔絲咕嚕肉 ($108) 聽講去見工做中菜廚師，其中一道必考嘅菜式就係咕嚕肉，絕對係易學難精嘅一味。呢到嘅咕嚕肉趁熱夾起嗰陣仲係拔絲架！外皮裏滿酸甜嘅糖醋汁，味道相當開胃。炸皮好薄，咬落外脆內嫩非常鬆化，唔會食到成口都係油，入面半肥瘦嘅肉質相當軟腍，好有水準！ ➤ 蜜薯牛柳粒 ($128) 次次口痕想食呢味餸都會諗起萬X，不過2019後就唔建議大家去食喇。呢到嘅薯仔牛柳粒都相當出色🥹 牛柳粒每粒都好鬆軟嫩滑，掛滿黑椒汁相當惹味。不過呢個餸緊係薯仔先係主角啦，用咗大量蜜糖去炒炸過嘅薯粒，形成焦糖脆面，食落外脆內軟，整體味道微辣帶甜，真係食到停唔到口！ ➤ 乾燒蝦油粉絲煲 ($128) 勁香勁重鑊氣！粉絲炒得好乾身，索滿晒蝦油，而且啖啖都食到蛋絲同埋蝦肉，口感十足之餘仲超級惹味。

放假嘅時候都幾鐘意cafe hopping，貪佢靜靜地可以放鬆chill下咁過一個晏晝。呢日嚟到出名多cafe嘅西環，揀咗呢間都bookmark咗一段時間嘅人氣cafe。店內裝修走純白木系風，空間感十足，仲擺咗唔少熱帶植物，所以都坐得幾舒服🧘‍♀️ 呢到最出名嘅就緊係佢地門口嗰個走波希米亞風嘅室外位置啦，藤椅木枱真係幾打卡able~ ➤ 龍蝦湯配牛油果大蝦稻庭烏冬($128) 招牌菜式✨ 其實唔多唔少我都有少少係想朝聖呢個烏冬而慕名而來😛 店家用金澄澄嘅茶壺裝住熱騰騰嘅龍蝦湯，食之前再自己將個湯慢慢倒入烏冬到，keep到warm之餘又幾有儀式感😆 烏冬口感煙韌，配埋軟熟嘅牛油果同埋幾隻爽口嘅大蝦，清清淡淡幾健康，係一份簡單嘅美味。 ➤ 乾炒大蝦蒜香意粉 ($118) 上菜嘅時候超香，香到我有一瞬間唔想俾相機食先🥹 意粉炒得好香，無論食落定聞落都好香蒜味，不過相比起啱啱個烏冬就真係油咗少少。意粉加咗幾多菇落去炒，食落口感十足，調味亦恰當，輕鬆ko全碟！ ➤ 熱情果高山茶 ($48) 百香果is lifeeee!😙 飲落酸酸甜甜好清新，仲加咗啲菠蘿粒增加口感，不過茶味唔算突出。 ➤ 抹茶拿鐵 ($47) 抹茶味香濃，同奶香平衡得宜。

呢間舊址喺大坑嘅人氣酒吧原來喺銅鑼灣名店坊呢到重開咗！一直都對佢地嘅招牌「大坑薯條」心心念念，見唔少人食完都大讚係全港數一數二嘅薯條👅 佢地仲有提供廿幾款生牌，仲要唔少都係香港製造嘅手工牌，好值得支持！呢日終於的起心肝同朋友嚟呢到飲酒relax吓～ ➤ 大坑薯條 ($188) 好！惹！味！🍟 炸得超香脆嘅幼身薯條加入咗乾椒、高菜、孜然粉調味，成件事超重口味，單食有啲鹹，但要嚟送酒真係一流🍺👅 另外仲跟咗個辣辣地嘅蛋黃醬，點嚟食更濃味。 ➤ 啫啫牛筋煲 ($118) 牛筋炆得相當之軟腍，texture都幾漿口，絕對唔係咬到牙鉸軟都未咬得爛嘅質地🤨 加咗蒜頭、辣椒、basil同埋芫茜炆煮，嚿嚿都幾入味，食落鹹鹹香香帶微辣，不過略嫌份量少咗啲～ ➤ 炸雞塊 ($128) 用三黃雞製成嘅雞球炸得外脆內嫩，主要靠伴碟嘅南乳醬調味，表現不過不失，不過送酒係要嗌下呢啲香口嘢嚟食下架喇😗 ➤ 腐乳卡邦尼 ($158) 變奏版港式carbonara，玩味fushion菜🍝 可惜食落腐乳味唔算好出，但醬汁濃郁有蛋味，意粉亦彈牙掛汁，不失為一碟中上表現嘅carbonara。 ➤ 咖央西多 ($88) 多士內層搽上咖央醬同埋椰子吉士醬，香炸後表面放上椰絲、雪糕，再淋埋啤酒糖漿，層次都相當豐富，冰火交融嘅口感超正！作為飯後甜品真心好滿足🥹 ➤ Red Hare ($63) 味道偏酸，飲落有一陣士多啤梨溝咖啡嘅味，味道幾特別幾有新意😮 ➤ Mandarin Collar Club ($59) 呢款味道幾fruity但相對上都較苦，係一款hazy嘅IPA beer~