下午六點幾，難得黎到咁吊腳嘅慈雲山，當然要揾名物試下。一講慈雲山，個個都會叫我食煲仔沙嗲牛面，奈何我唔食得牛，所以就叫咗煲仔沙嗲豬扒米($68) ，好彩佢有鮮牛，豬扒，雞扒選擇 望住滾到卜卜聲嘅煲仔米粉，飄住一浸沙嗲香氣，我流哂口水，對佢期望好高。不過，見到好多唔知咩泡係個面度，有d扣分。講湯底先，好香花生味，好濃味，但唔會渴(傑)撻撻似醬咁，起碼似個湯。米粉就正常，唔係好易斷果d,但亦唔係好吸湯果d,非常一般；再講，成碗得好少米粉，夾一大夾已經夾哂，作為女士都唔夠飽。至於豬扒，如大家所見，又細塊，又薄。薄到咁，都可以煎到柴一樣，好難咬爛，唔講以為食緊外國嘅豬肉乾，硬到咬崩牙果隻。又多油係碟底，非常失望。 至於環境，都係典型茶餐廳，我去嘅時間無咩人堂食，都算乾淨。 整體黎講，名大過實，食gimmick，偏貴，$68一個唔夠飽嘅米粉，仲要唔包野飲，所以試一次就夠。我俾3/5分，係不過不失嘅分數。 p.s. 坐低食緊時，我見好多街坊叫外賣都係叫小炒，炒麵炒飯等，而睇到佢又真係即刻炒，可能小炒好味d掛，如果下次仲有機會先再試

平日灣仔食 lunch 真係多人到打仗咁，某日行過見到餐廳岩岩新開，擇好吉日即刻去試。好彩餐廳可以預早book，到咗即時入座，唔駛再等。 果日望落個場都full 哂 睇menu, 最吸引我眼球係牛油果雞扒漢堡，竟然只係$68,仲要連杯簡單熱飲，今次我就叫咗朱古力 個餐有一個大漢堡，小小沙津&薯條。 大漢堡內有大雞扒，係完全係大過個包，有半個牛油果仲有d配菜。包個皮係超級好食，軟熟唔乾；牛油果都係好靚嘅青色，無任何發黑，熟而淋身；雞扒外脆內嫩，雞皮煎得好香口，有少少調味，但唔會太咸。 至於薯條係幼薯條，feel 到係即炸，熱辣辣又脆身，有少少味椒鹽調味。 其實剩係食個包已經飽咗，薯條我都係盡力食咗一半都放棄。再飲埋杯朱古力，面加咗小小奶泡，非常好味，就抱住個肚走。(我見佢地嘅咖啡，有簡單拉花，不過個圖案就有進步空間) 整體黎講，餐廳性價比好高，價錢係灣仔黎講唔貴，但質素高，野食好味，而且侍應服務態度幾好，lunch hour又無催人走。我會俾夠5/5分。希望可以keep住水準，如果咖啡有靚拉花就更開心

確罐蝦，我地係食野唔抹嘴嘅拉拉屎戰隊。
我地都食左咁多野,點可以未試過香港地道特色食物「燒味」呢! 屎女人(黃)戰士: 叉燒味道剛剛好,但肉質方面「那」得少少過份。 熏蹄味道正常,整得幾乾淨,無毛。 湯就大大碗,整體份量超級多! 屎MON(紫)戰士: 叉燒係靚既,入口即溶,阿婆都食到,好岩我食!燒肉就硬左啲啲,唔夠嫩滑。 例湯幾好飲,又大碗,飲左我好耐。 食物份量好多,如果4個女仔的話SHARE三個餐都夠添! 屎DUM(黑)戰士: 叉燒NO GOOD,「那」得太過份!  燒鴨正常,好既係有隻肥脾,但係啲皮唔脆。 (呢個見到燒鴨脾好興奮咁食無影到相...) 屎橋(青)戰士: 我碟叉燒味道都正常,但比較瘦同乾身,好羨慕黑戰士同紫戰士的半肥瘦叉燒,睇黎啲叉燒未必係同一批整。 油雞就無咩特別,唔算特別好肉,份量又唔算好多,而且鴨有鴨脾,如果雞都有雞脾或者肥美啲既就好啦! 拉拉屎Conclusion 睇黎叉燒都係呢度的王牌菜!遇到好的一批就好好食!但唔好處係都要撞下手神,睇下抽到既係叉燒係肥美定係乾乾瘦瘦,有啲又可能「那」過左火添!
套餐份量好足!有湯有油菜,平民得黎大件夾抵食!而且咁多種燒味整體都好食既!

確罐蝦，我地係食野唔抹嘴嘅拉拉屎戰隊。 今日我地戰隊人少少,想搵啲刺激,於是就決定去食泰國菜，可惜今次食完都係未搵到刺激感。 屎女人(黃)戰士:
海南雞好普通,醬汁淡左啲,份量唔係好夠,性價比一般。
餐廳環境一般,好多野都痴立立咁。
但呢間係附近唯一一間比較出名近似傳統泰國菜的餐廳,想試既就一於試下。(5/10)
屎橋(青)戰士:
咖哩汁好稀,無香濃的感覺,味道都淡淡地,好一般。我本身唔好辣，但起碼都想食番咖哩的香味，可惜都無乜。
豬扒份量都算少,而且就真係啲普通豬扒咁,無咩特色,差啲都唔記得左食左啲咩。(5/10) 屎靚(紅)戰士: 咖哩汁好稀,唔似平時會杰啲咁可以撈飯,豬扒好乾,味道一般。 整體就覺得性價比OK,四十幾蚊有埋飲品。(6/10)
拉拉屎conclusion
算係新蒲崗附近一間較地道的泰國菜餐廳,未試過可以試下。但整體食物味道好似差左,無以前咁好食,而環境就一般,一係坐門外的位,店內的位比較少同迫夾。

確罐蝦，我地係食野唔抹嘴嘅拉拉屎戰隊。

話說戰士們成日食好西，好易肥，所以就好「健康」咁相約去打波。但返完成日工，已經無哂ENERGY，又想食D 小食，填滿空虛嘅肚腩先開波，就黎咗呢間雞蛋仔….

屎橋(青)戰士：口感夠脆，唔會淋到好似毛巾咁。味道正常，唔係特別好食。整體都有7/10。

屎DUM(黑)戰士：一……陣風咁，食完好似無食過。5/10分算。無野講。

屎MON(紫)戰士：係囉。食完好似無食，空氣感太重。但因為即整，皮係好脆，支持小店，見到有好多其他特別嘅味，都可以試下，但價錢黎講有D 貴。嗚嗚……而家食雞蛋仔都無錢，要募捐，成立個扶助肚腩成長基金呀。整體有6/10分。

屎女人(黃)戰士：即整夠熱夠脆，但個蛋漿唔係太得。我覺得雞蛋仔要外脆內軟，有一定咬口。但D個完全無咗「軟」果部分。圖中見，雞蛋仔入面好似空的，一半嘅蛋糕都無，即係得個脆字。比較好嘅地方係有D雞蛋味。整體有7/10分。


拉拉屎戰隊CONCLUSION：支持小店，都可以試下，但真係預咗食陣風…

確罐蝦，我地係食野唔抹嘴嘅拉拉屎戰隊。

呢幾日潮濕到好似春天咁，大家無咩胃口，所以就去咗附近食酸酸辣辣嘅泰菜……

辣椒肉碎飯
屎DUM(黑)戰士：味道正常，唔係特別好食，唔係難食，食品嘅選擇全部都係好安全，好難話唔好食，係咁多。有7/10。呀! 順帶一提，熱飲份量太少，一啖就飲完。

屎女人(黃)戰士：個肉碎炒得夠「獲氣」，附送一隻煎蛋，賣相幾好睇。但略嫌太多豬油粒，食落有D膩。整體夠食，夠熱，帶有少少辣，都幾惹味。但杯熱飲份量真係太少，100ml 左右，完全唔夠。最後，餐廳送咗個啫喱，普通野。但我想講D 服務員態度認真麻麻地，無笑容，未食完已經想趕人走咁，感覺唔太好。整體有6/10分。

泰式豬手飯 屎橋青戰士：碟豬手夠多肉，又唔算好多皮，份量岩哂食肉獸，而且賣相OK。唯一失色嘅地方係汁太多，多到好似食湯飯。但就味道而言，唔差，食落有D 似鹵水汁。之於拉茶係好味，除咗比普通奶茶多層泡泡係面，個茶味更濃更滑。不過要加$10，值唔值就見人見智。整體都有7/10。

馬拉盞炒米
屎狗(白)戰士：炒米夠大碟，夠乾身，而且有4-5粒頗大粒嘅蝦。加$10 的拉茶係好味的，但太細杯。附送嘅甜品正常，無特別。整體有7.5分。

紅咖哩魚薄餅

屎靚(紅)戰士：魚肉份量多，薄餅味道亦正常。但紅咖哩是甜嘅，好似日式咖哩咁，怪怪地。整體有7/10分。
屎MON(紫)戰士：原本我叫冬蔭公米線，點知附送一隻小昆蟲，2塊生菜又黑咗一達，即刻叫侍應黎換。最後換咗碗喇沙俾我。喇沙正常味，正常份量，有D 豆腐，有幾隻蝦仔。整體一般，無驚喜，又唔算好食，整體只能俾6/10，因為$60係偏貴。
拉拉屎戰隊CONCLUSION：所有野食一般，無驚喜，唔難食，但都唔係好食，LUNCHTIME 要預咗俾人催走。性格比相對低。間唔中食下都得嘅…

確罐蝦，我地係食野唔抹嘴嘅拉拉屎戰隊。 今日就黎到頗有家常小菜feel的嫲嫲雲吞雞，即刻黎介紹下。 麻婆豆腐 屎花(藍)戰士：好夠味，好香好足料。 屎靚(紅)戰士：夠晒麻，好岩我口味，唔似其他餐廳普通的辣。 屎mon(紫)戰士：味道夠麻味，豆腐尚算嫩滑。 黑醋咕嚕肉 屎女人(黃)戰士：味道好，而且口感食得出唔係翻炸。 屎橋(青)戰士：酸酸甜甜味道挺好，口感少少脆，不錯。 紅燒魚塊 一致認為正正常常不過不失 蝦醬秋葵炒腩片 屎花(藍)戰士：秋葵炒得入味，爽嫩可口。 屎女人(黃)戰士：夠鑊氣，味道好，蝦醬份量適當，唔會太咸，但腩肉太肥。 屎mon(紫)戰士：秋葵唔錯，但太多肥豬腩肉，感覺油膩。 屎橋(青)戰士：秋葵炒得香，蝦醬唔會太濃太搶，好食。腩肉味道唔差，但的確太肥。 雪菜肉絲炒年糕 屎花(藍)戰士：淡而無味十分清淡，好似只得年糕而無雪菜肉絲咁。 屎靚(紅)戰士：雪菜肉絲好少，唯一神奇係年糕都會跟一個白飯比你，超夠飽。 屎mon(紫)戰士 ：淡而無味，雪菜太少。 屎橋(青)戰士：很淡很淡，味道和賣相一樣，一片空白。

拉拉屎Conclusion：呢間勝在餐牌多選擇，上菜速度算快，而且最重要係白飯任裝，絕對可以食得好豐富好飽，而價錢都相當經濟。
各戰士評分，排名有分先後
屎女人(黃)戰士(9/10)　：　我好鍾意食呢間架！
屎花(藍)戰士(8.5/10)
屎橋(青)戰士(8/10)
屎靚(紅)戰士(7/10) 屎mon(紫)戰士 (6.5/10)  

確罐蝦，我地係食野唔抹嘴嘅拉拉屎戰隊。 如果有跟進開我地戰隊情況的朋友,都知道呢排我地戰隊食左好多好重口味甚至伏味濃的食物。 所以今次就黎食個清新齋菜fresh一下,好在無令我地失望,成功補充能量! 由於戰隊成員好耐未食過好野,今次就叫左個好豐富的套餐,圖片排名依受歡迎程度排行 香橙骨 麻醬雞絲粉皮 沙嗲肉串 紅菜頭湯 甜酸魚塊 海鮮雜菜煲 叉燒炒米 炒飯 屎Dum(黑)戰士: 香橙骨酸酸甜甜,調味恰到好處,用菇黎整無平時用肉咁肥膩,但都保持到味道,好! (9/10) 屎女人(黃)戰士: 紅菜頭湯新鮮加甜,多湯渣,份量夠晒多,而且係飲得出無落味精既! 粉皮都好食,但雞絲份量太少。 (10/10) 屎狗(白)戰士: 雞絲粉皮好食 香橙骨色香味俱全,用猴頭菇黎整好特別 (8.5/10) 屎鬆(橙)戰士: 粉皮爽口,雞絲做得似,整體其他菜都平平穩穩。 (7/10) 屎靚(紅)戰士: 沙嗲肉串同魚的醬汁好味 香橙骨用菇黎整,新奇特別 (8/10) 屎橋(青)戰士: 香橙骨,口感飽滿,外皮香脆,原來以猴頭菇製作,不講不知,很有驚喜。 沙嗲肉串以豆類裝肉類,口感相若,而咖哩醬汁亦好吃。 其他菜則正常不錯,無一道難食。 拉拉屎conclusion: 齋菜製法新穎創新,擺脫傳統油淋淋染晒色的單調印象。製法的創新令食物不但賣相吸引,連味道和口感都能做到很多變化,使全素的齋菜在色香味方面都近似本來的肉食,非常吸引!無疑令食齋菜的人有更多選擇,甚至本身對齋菜無甚好感的人相信也有興趣一試!

確罐蝦，我地係食野唔抹嘴嘅拉拉屎戰隊。

今日幾位戰士又出咗去尖沙咀打怪獸，打到腦閉塞，諗唔到食咩，但又想試特別野，所以就去咗間好似有D 歷史痕跡嘅印尼餐廳食野…見到2款2人餐咩餸都有，俾我地一次過滿足幾個願望，所有就試下…

屎諗但(啡)戰士：我始終覺得印尼咖哩唔好食。不過D個係個人口味黎嘅…其實整體質素OK。份量偏少，尤其椰汁雞得幾件雞，仲要係雞殼黎，無咩肉咁。7/10分。

屎花(藍)戰士：點只少，而且舊雞鞋烚烚。汁係好味，但太稀，如果杰少少會更好。反而我覺得串燒嘅雞仲鮮嫩，比椰汁雞嘅雞滑。串燒嘅醬汁亦都好出色。另外，要提下個酸辣蛋，佢帶點微酸，味道特別，出面好少食到，幾開胃。有7/10分

屎女人(黃)戰士：好滿足，好好味呀。因為我好中意食加多加多(沙律)個醬汁，濃濃嘅花生味，甜甜地帶點微辣，好開胃。而我覺得咖哩牛腩同椰汁雞個汁都可以，係偏水，但好送飯！另外，粟米餅都幾特別，個調味幾好，食到粟米味，帶有咸香，有咬口，但唔會剩係咬到麵粉。唯一要改善嘅地方係唔夠熱。7.5/10

屎狗(白)戰士：認同！我都覺得最好食係個粟米餅，有口感，唔只係麵粉。另外串燒都好食，味道夠濃。如果再辣D更好。肉唔太韌，亦唔會太腍，岩岩好。有7.5/10分。

屎靚(紅)戰士：整體OK，幾好。咖哩牛腩入味，而且牛腩幾腍。加多加多(沙律)幾好。但椰汁雞唔夠味，串燒唔夠熱同有D 干硬。有7/10分。

拉拉屎戰隊CONCLUSION：話說，我地未食前有段插曲，因為我地叫加多加多(沙律)另外上醬汁，結果我地將沙律醬同沙嗲醬撈亂咗，係討論之際，企係附近嘅侍應已經主動同我地解釋返，服務態度真係要俾個讚！。而餐廳環境、座位相當舒服，帶有印尼特色。我地係LUNCH HOUR食都唔算多人，無坐滿，所以比較靜，可以傾到計，而且上菜快。野食方面整體都幾好味，以尖沙咀黎講，性價比係高，大家都可以去試下！

確罐蝦，我地係食野唔抹嘴嘅拉拉屎戰隊。

今日戰士們唔齊人，人少少又眼訓，所以就決定去試下川菜，辣一辣佢。

屎DUM(黑)戰士：我食酸辣肉絲土豆絲，好味。成碟又夠鑊氣，又香。而且份量夠食，唔會太少，我俾7/10分。
屎女人(黃)戰士：難哂大譜！我要個酸菜魚飯，飯市時都等足半個先得食。個湯淡而無味，無薯粉，唔算好熱，酸菜得幾片酸菜頭。最慘係無得揀咩魚，唔知佢係用咩魚，我食落去少少腥，又鞋烚烚，重點係多細骨。每一片魚肉近皮嘅位置好多唔同方位嘅細骨。港女我唔係幾識食魚架嘛！又趕住返OFFICE做SLAVE，結果等得碟野黎，又要走，我成碟都無咩點食到。最搞笑係後面果枱話佢地等酸菜魚等咗45mins。所以，我只能俾4/10分，實在等得太耐。
屎花(藍)戰士：我個魚香茄子飯，味道都OK。唔算好油膩，份量適中，夠食。而且個器皿有特色。可惜嘅係，D 餸唔夠鑊氣，上台時整碟野唔算好熱，只係微微暖。6.5/10分。

拉拉屎戰隊CONCLUSION：舖頭好明顯人手不足，得2個樓面2個廚師，但食飯時段有大量學生。如果太趕時間，就唔好食D 間。同埋，剩係試下炒野好啦，招牌酸菜魚真係要諗過！