新拱照車仔麵 (灣仔)

呢晚同老友去灣仔睇舞台劇前搵食，想食粉麵但要平Ｄ嘅，係譚臣道行下見到嘅都較貴，直到見到新拱照出面張餐牌，都算抵食喎，車仔麵都好啦，還惦好耐冇食過，入去啦！
裡面好大坐位竟然擺放得好寬闊，只有幾張大圓枱，成個樓面只見一位睇落較年輕嘅男子落單、上菜一手包辦，動作好快手。
車仔面菜單只有一張單面供選擇，不過已經夠多野揀喇，更是$26有三餸一麵，行來行去最抵呢間，我地好快就點單，食物也好快上枱喇。
下次要再來灣仔搵仔，呢間都可以再來吖~
以下係我地點嘅：
① 三餸一麵： 蘿白、豬肚、牛栢葉配米粉 ($26)
② 三餸一麵： 牛肚、五香肉丁、紅腸配米粉加腩汁 ($26)
Total = $52

 

蘿白、豬肚、牛栢葉配米粉：蘿白份量多又腍入味又唔渣；豬肚都幾腍唔腥；牛栢葉唔韌質地算爽，好食，米粉正常，份量好飽。
牛肚、五香肉丁、紅腸配米粉：又估唔到有咁多五香肉丁，而家四一罐都好貴嘛；牛肚唔韌夠腍好入味，正；紅腸切得幾大塊，貨色ＯＫ；腩汁都好味。 

Maison Eric Kayser (灣仔)

上次去尖沙咀想去呢間店買包，點個見到執左，真係有Ｄ傷心，畢竟我係呢到食過多款包都覺得好食，冇食一排就會有Ｄ掛住，好彩上網見到港島區仲有分店，呢日去開灣仔點都要來試下新包先得！！
呢到嘅迷你包Size絕對統一咁迷你，當然唔抵食架喇，但係好處係可以試吓好唔好食，覺得好食下次就可以買個正常Size，都好嘅。

香草迷你橄欖意式包 ($12)
細細個包已經有青橄欖同黑橄欖係面，橄欖有咸香，好食；意式包裡面煙靱豐香草味，好食。

迷你芝士包 ($12)
的確好迷你，呢個價錢絕對覺得貴，好彩包外面香脆，包心煙靱有粒粒芝士，都算好食。

迷你開心果朱古力牛油包 ($18)
包面小粒粒開心果，裡面青綠色以為都有開心果味，原來又冇嘅，朱古力係同麵粉卷住焗而唔係用作餡料，麵包好鬆軟，整體都係偏啖。

紅桑子蜂蜜法式包 ($22)
Size唔算好大個，但麵包質感幾厚實食完都幾飽，麵粉味較啖，蜂蜜味唔重，紅桑子就不得了喇，撕開見到裡面有好多紅桑子粒，食到尾都依然充滿紅桑子粒，好食！！ 

星巴克咖啡 (沙田)

新地市終於開返間新店，雖然要行到去HomeSquare，不過總好過冇，呢間地方夠大，空間感又大，最適合夜晚來hea吓，日間太多人就免喇。 野莓朱古力麵包布丁 Raspberry Chocolate Bread Pudding ($29)
面層有燕麥脆、朱古力粒同野莓，野莓反而比其他材料少，朱古力燕麥脆翻烤過好香脆好食；呢個麵包布丁比之前推出嘅質地乾身，只有底層有奶蛋，不過好甜，濕潤些好Ｄ，今回呢個一般喇..。
Almond & Raisin Biscotti ($17)
食得Biscotti當然知道要點咖啡，淋返少少先好食，如果唔係真係會太硬，呢個Biscotti齋食嘅話會覺得甜左Ｄ，不過果仁都幾豐富，都幾好食嘅。

 雙重黑白朱古力咖啡 Dark & White Cocoa Mocha (T: $40)
冷熱都估唔到係唔甜喎，朱古力味都幾重但係唔會分得出係黑定白，冇咖啡味嘅，如果要有咖啡味一定要額外加一shot espresso先得。
不過我分別飲過凍和熱的，我比較覺得熱的比凍嘅朱古力味重，而朱古力忌廉就冇朱古力味。

 芒果熱情果茶星冰樂 Mango Passion Fruit Tea Blended Juice (T: $40)
好甜，熱情果極濃，但芒果味欠奉，麻麻地。
 咖啡香蕉拖肥批 Coffee Banoffee Pie ($26)
外貌如雪山般咁高，白雪二忌廉份量好多，濃厚幼滑嘅，批中間有三件厚切香蕉，可惜咖啡和拖把味唔突出，可以話唔太食得出有咖啡同拖把，幸不甜膩。批底有一層薄朱古力，但唔夠香脆。


　火腿蕃茄丹麥酥 Ham & tomato Danish Pastries ($21)
Size唔係好大，丹麥酥中間有２塊薄蕃茄，火腿咸咸地幾好食，可是丹麥酥唔夠香脆，腍咗Ｄ。 

大興餐廳 (第尾牛扒) (太子)

我都唔知有幾多年冇去扒房喇，呢晚老友話想鋸扒，話呢間好食唔使等咁就去啦，點知要係樓梯排隊，如果要坐卡位就要等耐Ｄ，我地４個人唔揀卡位會坐得鬆動Ｄ，所以今次等左２０分鐘已經覺得快喇。
入到去，佢地係熟客仔已經極速諗到要乜野餐，我就要等到佢地點哂餐上到枱先諗到食乜，我真係有選擇困難症架哩！！
呢晚我地４個點左以下食品：
① 晚餐F：鐵板肉眼牛扒配黑椒汁、鮮油餐包、羅宋湯、凍檸茶 (84)
② 晚餐G：鐵板西冷牛扒配黑椒汁、鮮油餐包、羅宋湯、凍檸茶 (84)
③ 雞絲湯米粉 ($42) + 鮮油餐包、羅宋湯、熱咖啡 ($24)
④ 晚餐A：鐵板牛仔扒配蒜茸汁、鮮油餐包、羅宋湯、凍檸茶 (72)
Total = $306
10% Service Charge Total = $336

 

 

鮮油餐包：本身個餐包已經有牛油味，唔使額外塗牛油食都得，不過個包實的的嘅，麻麻地。

羅宋湯：睇落好稀，但又估唔到味道幾濃，有好多椰菜，也有牛肉碎、甘筍同西芹，都幾好味喎！

鐵板肉眼牛扒(黑椒汁)：有２塊大肉眼扒，厚身唔韌且嫩，唔錯；扒下面有好多雜豆，冇雪味唔經食得落，則邊有厚切薯條，唔脆又腍....。

鐵板西冷牛扒(黑椒汁)：黑椒汁唔辣帶有甜味；有一大塊西冷，呢件都係厚身，但比較韌，唔夠嫩、牛肉味淡；呢個薯條脆少少。

雞絲湯米粉：第一次係扒房食湯米粉，仲要揀食雞，湯底好飲又濃帶有雞油味；米粉爽；雞絲好似唔使錢咁食極都有，而且有雞味又嫩滑，芽菜又爽，呢碗好食！

鐵板牛仔扒(蒜茸汁)：牛仔扒錘得薄Ｄ唔韌，雖然薄都仲有Ｄ肉味；同樣都有好多雜豆，有一顆硬硬的西蘭花，可惜蒜茸汁食唔出蒜茸味，個汁就麻麻。
咖啡：我知我知，我係唔應該係扒房叫咖啡....就是用即沖咖啡粉沖嘅味...好難飲。 

GUM "JENG!" X 御前上茶 (銅鑼灣)

抹茶霜淇淋•筒 ($32) 
抹茶味好濃，抹茶本身嘅啖啖苦味啱啱好，甜筒厚身而且好脆，好味，雖然細枝，不過覺得已經比坊間日本果Ｄ平。

焙茶霜淇淋•筒 ($32) 
第一次食焙茶味雪糕，呢個焙茶味同抹茶同樣咁濃，唔甜且有茶嘅苦味，雪糕又滑，好味！！
不過唔知點解相同嘅價錢，焙茶呢款比抹茶細小嘅呢？