牛大人台灣火鍋吃到飽 (觀塘)

今次黎到觀塘既牛大人，環境舒適，好闊落，而且店員服務態度都非常好，而我就揀左最貴個個餐，澳洲和牛極上套餐（$298另加一），咁就所有既牛肉都可以試哂🤩

🐽台灣濃香蕃茄鍋
湯底好濃郁，好多新鮮嘅蕃茄，湯底食到最尾都仲好濃😋，酸酸甜甜，好開胃🤩

🐽牛肉
最推介當然係M5和牛牛肩卷，肉味好濃，口感都好軟淋，而安格斯牛小排就會較肥，大塊啲同油脂味重啲🤤🤤而手切封門柳同安格斯一口牛肉粒都係必叫，唔會韌，牛味好重🤣平一個價錢既牛肉都有試埋，SRF極黑牛板腱同安格斯特選牛板腱都好有質素，套餐仲送左每人2粒M9和牛牛丸，超多肉汁，好香既牛味

🐽其他火鍋配料
秘製滷牛筋、牛肚和大腸都好推薦，因為滷得好淋好入味，仲試埋好有特式的章魚珍珠漿同蟹籽墨汁漿，兩款都好彈牙，章魚同墨魚味都好濃🤗

海鮮都有好多款，海蝦、花膠、沙白都好新鮮，而且全部都好大隻，一啲都唔孤寒🤣

其他仲試左既特別配料有鴨血、即煎午餐肉、鬼馬老油條、福建燕餃、屏東水蓮菜等等，老油條真係好好味，炸得好脆，浸落湯底一陣就索哂啲湯😝水蓮菜都係第一次試，口感都幾爽

🐽小食類
等食物熟既同時，都有叫2款小食試下，包括梅甘酥脆薯同士林鹽酥雞，炸得好香口，脆薯味道甜甜地，而鹽酥雞嘅調味都鹹淡得宜

🐽自助吧
出面仲有大量既火鍋配料可以自己拎，包括不同丸類、豆製食品、蔬菜同麵類等等，唔驚食唔飽🤣飲品都有好多款，例如有冷泡茶、汽水，有幾款台式飲品可以自己係手機點，有烏梅汁、冬瓜茶、金桔椰果同酸梅汁，非常適合清下熱😼

🐽手工啤 （流水落花）$48/1
不過想飲啤酒就要另加叫，同友人就叫左兩杯流水落花手工啤，好易入口，帶有啲果香味，配打邊爐一流👍🏻

🐽甜品
每人可以揀一樣，有movenpick既雪糕同仙草凍，仙草凍有好多配料，啖啖都有豐富既口感，食完超滿足

熊本牛鍋 (元朗)

今次去到元朗打邊爐，網上見到有間火鍋店，$298就可以任食澳洲和牛火鍋180分鐘，5點前或8點9後座仲唔使加一😍，呢個餐仲會送一鍋海鮮雞煲，而家元朗分店加$1仲可以任食雞煲，另外，頂級牛小排、其他配料、Dreyer’s 雪糕、所有飲品都係任飲任食😋



和風海鮮雞煲好足料，有鮑魚、蝦、蜆、雞件、豆卜、金菇、蕃薯同紫薯，醬汁見到十分濃稠，好夠味但唔會過鹹，鮑魚同蝦都好爽口彈牙，幾新鮮，雞件都好入味，最特別係有蕃薯同紫薯，完全冇違和感🤣

食完雞煲就換湯底打邊爐，揀左個沙爹湯，估唔到湯底咁濃郁，仲有好多花生粒，真係真材實料😍，澳洲和牛同牛小排都encore左好多碟，見到肉既顏色一啲都唔暗啞，紋理都幾靚，有牛味，而牛小排仲帶啲肥肥地，好嫩滑😋，小編仲叫左一碟牛白肉試下，平時都冇見其他地方有得食，口感有啲似煙煙韌韌既脂肪咁


出面既配料選擇都多，除咗各式各樣既丸，仲有好多款蔬菜、豆製品及粉麵，推薦既仲有粉腸同鵝腸，新鮮又唔會韌👍🏻


最後梗係要食埋甜品，呢度有Dreyer’s 雪糕同泡芙，三隻味既雪糕我都覺得好好食，有士多啤梨、芒果同曲奇😝，飲品都係任飲，除左普通既罐裝飲品，仲有兩款係自家製既樽裝，包括夏枯草同冰糖紅棗雪耳，可以清下熱

整體黎講，都會再去呢間餐廳，環境夠闊落，可以慢慢食足3個鐘，而且價錢都好抵食😎

祥利車仔麵 (旺角)

見到呢間咁文青裝修既車仔麵店，就比佢吸引左，係外面睇仲以為係cafe黎🤣🤣


🐽九格定食 $108
貪心既小編叫左個九格定食，裏面咩都有，有好多日式既食材，有豬手、豬軟骨、醉雞、墨魚餅、蘿蔔、冬菇、秋葵、糖心蛋同花膠湯，真係超級豐富，豬手同豬軟骨都好入味，夠哂淋，醉雞有淡淡既酒味，另外花膠湯同冬菇都好出色，基本上樣樣都好岩我口味，但食完真係會好飽，因為佢除左有碗飯仲有碗烏冬😝


🐽三餸車仔麵 $64
餸就叫左原件花膠、秘製魷魚同豬大腸，花膠有2大塊，淋得黎有膠質，係必點既餸，魷魚爽口，豬大腸滷得入味，湯底就揀左豬骨湯加辣汁，食食下都幾辣🤣🤣🤣

麥金.麥金馬來西亞特式茶啡室 (大角咀)

較早前去左呢間裝修好有特色既馬來西亞餐廳，感覺好似好地道咁，食物款式都應有盡有😎


🐽細滲 $78

呢度肉骨茶有好多款，叫左個細煲，裏面除左有一字骨，仲有三層肉、豬手仔、雞腳、豬肚、豆卜、金菇同油炸鬼，而且個湯仲可以任添，藥材味都幾重，鍾意藥膳既朋友仔應該幾like🤣，叫呢款既好處係每樣材料都可以試下，基本上都夠淋，小編最愛係雞腳同一字骨，枱上仲有辣椒、蒜蓉同豉油可以自己調配😍


🐽怡保芽菜雞配黃薑飯 $68
雞皮爽彈，肉質好嫩滑，另外有甜醬油可以沾，黃薑飯有淡淡既薑味，雞下面仲墊左啲芽菜，配埋食好有風味😋


🐽椰香鮮油咖央多士 $28
每次食都覺得好邪惡，但次次都忍唔住會點，呢度一啲都唔姑寒，牛油同咖央醬都夠多，食落好香😆，多士都烘到好脆


🐽青檸梳打 $25
加左啲青檸汁落去，所以飲落好夠酸😜

圓仔記 (旺角)

去旺中行街，行行下見到有間賣芋圓甜品既小店，上網睇返原來呢間店本身由網店做到實體店，真係好犀利🤣佢除左賣甜品，仲有
餃子同手抓餅，全部都好吸引，但因為真係食唔到咁多，所以淨係試左其中兩樣


🐽 招牌包心三色芋圓仔 $45
裏面有仙草、2粒地瓜包心芋泥球、芋泥同三色芋圓，食完真係好飽好滿足🤣芋圓好煙韌，分別有紫薯、芋頭同地瓜味，芋泥綿密，最鍾意佢唔會太甜🤤而地瓜包心芋泥球其實就好似湯丸咁，只不過係包住芋泥，都幾特別😝仙草底就比較淋同滑身


🐽泡菜豬肉餃/韭菜豬肉餃 $40 （8隻）
另外仲買左佢地既煎餃，叫左比較少見既泡菜豬肉餃同大路既韭菜豬肉餃，兩款都煎得十分香脆，小編覺得泡菜豬肉好有驚喜，辣辣地，惹味可口😋😋