CocoSweet's Profile

去得大角咀搵食，好自然就會去嗰區嘅"食街"埃華街搵食。從奧運站B出口沿住天橋行，直到埃華街嗰個出口落樓梯。我同朋友都熱到唔想行，決定以9秒9速度入最近嗰間餐廳。原來我哋入咗一間食雞煲嘅餐廳。坐低，發現冷氣都多夠，連水都無一杯，只有叫餐紙上供應嘅凍飲。全部飲品都係罐裝汽水、樽裝涼茶或樽裝啤酒。由於朋友唔食辣，食唔到招牌菜"麻辣雞煲"，我哋就揀咗椰子雞煲(細)。 主菜係煲，分別有雞煲同魚煲之後我哋睇大紙揀配料。 有不同種類配料由於得2個人，我哋只係叫咗5個配料，有黑蹄豬梅肉、蜂巢豆腐、蔬菜大拼盤、雙拼滑(蝦、墨魚)及一品花膠。 黑蹄豬梅肉估唔到椰子雞煲材料十足。白白嘅椰子湯內有半隻雞，又有紅棗、杞子、洋蔥等。 鮮甜椰子雞煲(半隻) - 椰子雞煲材料十足，白白嘅椰子湯內有半隻雞，又有紅棗、杞子、洋蔥。個椰子雞煲原來用咗三黃雞，一種煮幾耐肉質依然咁滑。唔怪得黑蹄豬梅肉煮到"嚡"晒，但係D雞食落去仲係咁鮮甜同滑溜。 椰子雞煲 - 三黃雞質感、味道都係一流。今次我哋為咗幫自己補一補，叫咗"一品花膠"。一嚟到就全部落晒煲，將佢增值變成"椰子花膠雞煲"。為咗保住D花膠，花膠只放某一個位置同計好時間，否則會溶入湯中。好睬今次呢D花膠無咁嘅情況發生。 一品花膠 - 以咁嘅價錢、質量，花膠算係抵食。仲唔到無叫錯蜂巢豆腐，佢可以吸收晒湯內嘅精華。每食一啖豆腐，除咗聞到椰子香，仲嚐到雞煲嘅鮮甜。 蜂巢豆腐食到一半，D湯少咗。叫侍應幫手加返D清湯，水位升高咗；同時煲面浮出三黃雞嘅黃油，係時候煮蔬菜大拼盆。 鮮甜椰子雞煲(半隻)估唔到大拼盆內每款蔬菜都咁新鮮，煮熟後，蔬菜本身嘅甜味連埋雞油，每一口都好滑溜。唔係5分鐘，煲內嘅蔬菜都俾清晒。我特別欣賞蓮藕片，每片都好爽甜。吸埋椰子嘅香，估唔到一片有2種味道。 蔬菜大拼盆 - 有齊各款蔬菜雙拼滑都好食，可惜，我覺得佢唔多配合到椰子雞煲。 雙拼滑(蝦、墨魚)整體嚟講，所有食物質素都有保證，連最重要嘅煲都係咁好食。價錢相對亦合理、實惠。唔怪得見到有食客只叫一個雞煲，2碗白飯，已經夠晒數。上菜都算快手，服務都好好。可惜，個個都叫煲，店內氣溫比較高，感覺冷氣唔多夠，食到出汗。雖然食嗰日係星期二，估唔到都咁多人幫襯，坐無虛席。訂位會比較安全。…Read More

一直工作到五點，終於可以放MEAL BREAK，求其搵間靜靜地嘅餐廳食碟飯。咁啱見呢到無乜人，應該都好快有得食。見午餐又係例牌嘅蒸餸，呢個時間叫應該都反蒸N轉喇。好睬話仲有東江雞飯，咁就要佢喇，有D保證呱。好睬碟東江雞都唔差，一上檯都睇得下。份量可以話正常。雞嘅味道一般，勝在肉質滑。呢碟雞唔太肥，仲可以食到啖啖肉。加埋碗飯，半個鐘內完全晒，可以話滿足咗個胃先，停咗打鼓先。可以慢慢、靜靜地享受埋杯奶茶，之後返去完全埋餘下工作。…Read More

今日整日要喺紅磡工作，先嚟個早餐醒醒胃，醒醒人喇。由火車站行咗10分鐘，嚟到紅磡區一間老舖"東門冰室"。街口已見舖外坐埋人，心知舖內應該都滿坐。一入舖內，真係人頭湧湧，樓面阿姐已做到唔停手、唔停口。好睬有一個角落空咗，即坐落去，唔好阻住阿姐。早已聽聞呢到出名"媽媽豬扒"，特別有"媽媽"嘅味道。咪一心嚟食個豬扒麵，配上熱奶茶。點知落單時，阿姐問要咩麵。原來呢到有福麵同丁麵2種選擇，我揀咗丁麵。呢頭落單，轉頭即嚟杯熱奶茶。果然快手。原來呢到係落大粒白沙糖，真係好少見。味道同普通白沙糖無乜分別。喝咗幾啖奶茶，碟豬扒福麵嚟喇。睇落豬扒份量頗多，雖然碎上，但應該唔止一塊咁少。快速叉一塊豬扒試試，睇吓有冇媽媽味道。點止 -_- 豬扒薄身，有點粗鞋，無乜肉汁，完成係一般嘅感覺。點解有人話係"媽媽豬扒"o架！但係以$26呢個價錢，咁又覺得佢係實惠，份量多，而且菜唔係話俾一塊咁少，都有3塊o架。下次嚟，我肯定唔會反兜"媽媽豬扒"喇。…Read More

5:45到達大坑，路邊攤檔都收晒。想要又快又實惠的飯，相信祥勝係其中一個選擇。一到就點咗個祥勝百搭飯，加杯熱奶茶，貪佢快手同唔阻人收工。好快我碟鋪咗太陽蛋喺頂嘅百搭飯就喺我面前出現。太陽蛋係我特別要求，可以豬扒點蛋汁或者蛋汁撈飯。百搭飯有一塊豬扒、一塊午餐肉、一條腸仔、一條菜、一隻蛋，淋上鼓油汁，感覺像豐富牌學生餐。我好鍾意豬扒煎得啱啱好，唔會乾到硬，之後切條上，方便我食用。只可惜俾我食到少量梳打粉。整體嚟講，質量都唔錯，一定會ENCORE試埋其他食物。…Read More

今日大暑，但係由朝忙到晚，完全無時間煮任何飲品消暑，唯有喺鴻福堂買。估唔到可以消暑嘅飲品唔止涼茶，原來連蔬果汁都可以，真係要試試佢嘅功效。揀咗枯白玉苦瓜菠蘿蜂蜜甘露飲品，原來可以清心消暑。冰凍甘露一拎已經可以幫手消消熱力。成枝甘露菠蘿味蓋過晒苦瓜、蜂蜜，完全唔覺得苦，亦唔覺得甜。原來樽底有菠蘿碎，我飲到一半先至知。為咗唔想浪費，真係要間中搖吓個樽。D菠蘿碎係新鮮生果，完全唔係被糖水浸過嘅罐頭菠蘿。雖然材料真材實料，不過就貴咗D。…Read More

早到店舖，無人龍兼好好睬有4個空位，唔使等即係可以坐定定，揀心水拉麵。店內裝修仿似日本拉麵店，大部分位都係圍住廚房，可以清楚睇到廚師煮麵，同埋將麵送到你面前。我嘅位置可以睇到廚房兩位師傅嘅合拍度、認真度同埋手勢都係好好，すごいです。位前面已經貼出店舖供應嘅食物，分別係黑龍豚骨拉麵、炭燒牛筋拉麵和牛筋BLACK沾麵3種款式。仲有每日只限供應10碗黑龍叉燒飯。一個ORDER紙已列出晒所有選擇。原先我選每日限量供應嘅"叉燒飯"，不過聽到店內唯一一位講廣東話職員介紹後，我決定轉軚食"炭燒牛筋拉麵" ($98)。點解轉軚，除咗因為第一次試有牛嘅拉麵，仲有另一個原因，之後先講。由於我早落單，所以我碗麵好快就上檯喇。終於有一碗正宗日本拉麵出現喺我面前，真係開心到難以形容。(因為之前某幾間嘅經驗，真係差到難以形容)第一吓，當然係喝返啖湯先喇。嘩， おいしい （o i shi i）﹗個湯真係好濃稠，而且仲好夠熱添！原來係店舖獨門湯底，以沖繩特產「Agu豬」的豬骨和豬手熬製，質感濃稠，而且骨膠原特別豐富。下一步就試拉麵，拎起一注，知道係正宗日本拉麵，即係安心晒。(之前喺銅鑼灣拉麵站食埋D不知所謂嘅拉麵，麵嘅質感完全唔點。)將拉麵沾上湯及油，然後一啖"殊"入口。今次真係食得夠爽、正、開心，呢D先係日本拉麵嘛！接住就食牛筋，都有4粒四四方方嘅牛筋粒。牛筋炆得淋同入味，但就無中式牛筋嗰種漿口嘅感覺，同埋食唔出炭燒味，感覺都係一般。呢碗麵另一驚喜係溏心蛋，坊間通常只俾半隻，但係呢到係整隻。筷子將蛋一分為二，內裏流心蛋黃係咁流出，完全無熟咗嘅蛋黃，真係做到啱啱好！我將蛋黃汁沾上麵條嚟食，真係正！拉麵仲配上一塊叉燒，不過質素無上面講嘅材料咁好質素，唔夠味之餘，仲偏厚，失策。咁嘅質素叉燒，即係令我覺得自己轉軚轉得啱，否則就食咗每日只限供應10碗嘅黑龍叉燒飯。食到最後我剩餘咗濃濃嘅湯，唔通就咁喝咗佢，好似好寡。其實我只係食咗上半場咋。之前職員推介我先食拉麵，留返少少湯，之後再加飯，變成湯飯，咁就成為我下半場，呢個就係我轉軚嘅原因，亦讓我體驗日本人的地道食法。將一碗熱辣辣嘅秋田小町米做嘅飯 ($10)，倒入已涼嘅濃湯，將兩者搞勻。結果，唔止令湯熱返，仲可以令每粒飯都沾上濃湯，每匙飯都係熱辣辣同埋充滿濃濃嘅豬骨湯味，比起食韓式湯飯嗰種感覺更加強烈同有口感。唔好睇少一碗飯，都食到成10匙，真係好飽同滿足。估唔到一個拉麵可以分上、下兩場食法，兩種都各有千秋，令我一餐午飯可以咁豐富同飽足。不過相信只有星期五，我先可以做D咁奢侈嘅事！喝咗咁濃稠嘅湯，又唔想喝水沖吓個口，可以試吓放喺檯上嘅清湯。倒出嘅清湯(無記錯好似仔比目魚同昆布)香氣已經四圍飄，湯嘅味道好清甜，絶對啱晒用嚟清清口腔，沖走濃烈豬骨湯味。"黑龍"仲有提供酢、胡椒粉及鮭大蒜等調味料。不過我覺得碗拉麵各方面都配合得好好，唔使再添加其他味道。…Read More

喺旺角行街行到攰攰到，想搵個又靜又舒服嘅地方休息吓、食吓嘢。點知喺貼近旺角外圍嘅黑布街見到Next Station Dessert，聽聞甜品由前五星級大酒店甜品師傅主理，加上價錢又合理，於是同朋友決定試一試。入到店內，暗黃燈光，木製檯櫈，同室外嘅強烈光線成180度對比，令我即時感到輕鬆、舒服，成個人鬆晒。原來店舖都好大，除咗門口入嚟嗰到有40-50個位，原來店後面，仲有30個位，而且仲比前面更清靜、更暗。不過比我揀，我寧願坐後面嘅位置，絶對係同朋友促膝談心嘅好地方。坐定定，已送上一杯水，俾我定一定神，抖抖氣，先至慢慢揀心水甜品。MEUN內有嘅甜品，其實同門口塊介紹牌差不多，不過就會更詳細介紹甜品嘅材料。今日，我肚空空，一於就豪D，我獨自點咗2款甜品，應該都食得晒呱。第一個：鳥結糖芭菲 Nougat Parfait我自己好鍾意個外型，好GRAND，而且似鳥展翅開飛嘅感覺。呢個"鳥結糖"，唔同平時食嘅鳥結糖，佢偏向杏仁味；但質感明顯地滑溜，放入口後，佢喺唔停喺口，會即時瀡落喉嚨。"鳥結糖"好實淨，可以慢慢食都無有怕。第二個： Black Pepper Chocolate Molten Cake served with Vanilla Ice-Cream呢個俾到我驚喜，而且心太軟做得好唔錯。黑胡椒心太軟係中間嘅朱古力醬加上黑胡椒粉，兩者配搭得好好，唔會好辣，亦唔會好甜，令我食得好舒服。而且心太軟嘅溫度啱啱好，令我食嘅時候唔會因為溫度高，感覺到"辣"親咀仔，亦唔會令黑胡椒辣到搶咗朱古力味。仲有個雪糕球係超凍、超硬淨，可以俾我先食完個心太軟，之後用剩餘嘅嘅黑胡椒朱古力醬配上雲呢拿雪糕慢慢食，超爽耶！我同朋友都幾滿意今次嘅甜品同埋環境，唔止甜品賣相、口感好正，仲可以坐幾耐，吹幾耐水都得，真係一個可以落腳嘅好地方。 …Read More

今日，我就同幾位朋友嚟 IFC Greyhound Cafe 食特式嘅泰國菜。IFC Greyhound Cafe 環境寬敞，座位都寬落，檯同檯之間嘅距離有返咁上下。哈，咁就唔使怕嘈親隔離檯，仲有位放低我哋嘅戰利品添。由於我同朋友喺外邊趕過嚟，成身熱辣辣，即刻叫咗杯凍喝消消暑。話都無詌快，龍眼特飲同番石榴特飲都送到嚟。2杯飲品都好真材實料，尤其是番石榴特飲，啖啖果汁，消暑又醒胃。我哋幾個女生早已聞風 Greyhound Cafe 甜品好食，仲設計得好吸引添，所以決定只係叫5款前菜、主菜，留返第二胃食甜品。發板無耐，食品已經逐碟逐碟送上。1. 芝士雜菜千層麵沙律 Fresh Lasagna Salad HKD108材料新鮮，配埋清淡沙律汁，令材料更加鮮甜。只係拎嘅時候比較麻煩，上層無可能切開，唯有逐層逐層拎；到下半層時，就可以將食物切開一半，同友人分享。2. 鮮蝦帶子墨魚汁麵 Spaghetti Cha Cha Cha我比較少食墨魚汁麵，唔知道墨魚汁麵係有腥味，為咗減低腥味，所以加辣味平衡返，搞到我第一啖喺無預計底下，就中招。整體嚟講，除咗辣，真係一碟質量同質素好嘅意粉。3. Grilled Angus Sirloin with North Eastern Thai Spicy Hot Sauce HKD208唔記得中文名係咩喇，賣相一般。要問待應先至知食法。首先，食條青瓜清吓口腔，然後才食西冷牛。西冷牛已經切好一片片，拎一片後，可醮特製醬汁，或配糯米飯或雜菜一起食。4. 軟殼蟹沙律配蜜糖芥末醬 Soft-Shell Crab Salad HKD1285. 漢堡包全名唔記得，只係想試吓店舖特色漢堡包，所以先點佢。點知靈魂漢堡失色，無牛肉味又唔夠肉汁，配埋上下兩層漢堡包，真係得個"乾"字。好睬有其他醬汁同配菜，咁先唔使乾食。跟住，大家每人都叫咗一個甜品，分別有朱古力香蕉千層蛋糕、雜莓千層蛋糕及Chocolate Lover。大家已急不及待手起羮落，慢慢享受甜品。呢個時候係全餐飯中最寧靜嘅時刻，每人都全心全意去品嚐，讓味蕾感受細滑、香甜。…Read More

元朗，對我嚟講，係一個假日先會去嘅地方。不過今日，我就專登放工入去食泰國菜。原來坐西鐵入元朗，超級方便、快捷。30分鐘，就由紅磡到達元朗喇。今次嚟到泰國菜館 ~ Mint Thai House 薄荷葉泰國菜，位於元朗安康路怡康大廈地下12-13號舖。喺元朗站落咗車後，要轉乘輕鐵到豐年路落車。再行5-10分鐘，經過元朗警署見到元朗劇場，向左轉90度，就見到 Mint Thai House 薄荷葉泰國菜。Mint Thai House 薄荷葉泰國菜門外放有燈光及樹，周圍嘅店舖又閂門，所以好易就認出。Mint Thai House 薄荷葉泰國菜以開放式設計，有內外舖。內舖大概有40個位，外舖就有30個位，另外有高櫈坐，可以俾客人同朋友喝酒食小點，歡聚吹水。店舖比較昏陰，唔同一般餐廳，燈火通明。牆上掛住泰國傳統手工藝。舖內用木檯及木椅，裝潢簡單。每個位都放上餐具及水，絶對係 "welcome your visit"。對我嚟講，只要坐得舒服，環境清潔就得，反而食物質素及服務質責先係我嘅著眼點。今晚，3個人一齊食，叫咗成檯菜。哈哈，對我嚟講，"豐富"係一件好事，食得既開心又多選擇。第一道菜：黃咖哩牛肉。睇見熱辣辣嘅咖哩，已經流晒口水。即刻手起羹落，試一試味先。黃咖哩係咁多款咖哩中辣度一般，好多人都接受到嘅辣度。牛肉係一片片，煮得好滑溜，食落仲好有牛肉味同幼滑；而且仲有新鮮配料，鮮嫩可口。叫得咖哩，當然唔想嘥咗 "精華"。一係撈白飯，一係醮薄餅。Mint Thai House 薄荷葉泰國菜嘅薄餅好出名，所以我決定叫佢嚟送咖哩汁。新鮮熱辣嘅薄餅送到，傳來一陣陣牛油香味，明顯係即叫即做。我已經忍唔住，碟一落檯，我即刻拎一塊食。咔咔咔，邊食薄餅，邊發出萬不得已嘅聲音添。拎薄餅醮咖哩汁，令薄餅即時添上咖哩香，得到味覺同嗅覺雙重享受，所以話呢 "咖哩 + 薄餅" 係孖兄弟，缺一不可。接住，係烤羊鞍架，my favorite。一碟有4件羊鞍架，擺設都好有心思，而且仲有新鮮蔬菜伴住，令羊鞍架更為突出。羊鞍架唔止燒得靚，食落肉質嫰滑，調味啱啱好，仲無羊嘅羶味，完全唔使任何sauce，絶對可以食出羊肉嘅味道。連第一次食羊鞍架嘅小妹妺都話好食，要ECHO添。本身羊鞍架肥瘦適中，加上燒走咗大部分油脂，所以食落無話油笠笠。另一巧妙之處係碟上鮮菜，可以幫我洗走口中羊脂，令我可以keep住口腔fresh，繼續下一道菜。接住嚟，係我好鍾意嘅烏頭，仲要斤兩十足，有成2斤重o架。一整條烏頭配埋甜酸醬料，完全係泰國風情，相信好惹味。我用叉隨意喺魚肚後嘅位置抓一下，點知拎咗到一大嚿肉。睇吓不知幾肉質結實，肉汁仲流埋出嚟。食落有鮮味，但無泥味。唔怪得人人都話元朗出產嘅烏頭好味喇，未試過當然唔知佢好喺邊，試咗就俾佢吸引到，食唔停口。最後，我同朋友兩個人竟然可以將佢食清晒，得返棚骨喺到。哈，哈，哈。到最後一道菜，亦係 Mint Thai House 薄荷葉泰國菜嘅推介：梅子豬手。梅子豬手，仿似食開嘅咸豬手，成隻上o架。聽老闆媽媽講，成隻豬手係由師傅一手一腳製作。先將生豬手用水煮熟，然後才加工釀製而成。我見咁巨型嘅豬手，好鬼難切。當然先幫佢解開，然後才慢慢品嚐。估唔到我三兩下功夫，就可以將成隻梅子豬手瓦解，明顯地係肉質鬆軟。仔細睇，發現豬手唔太肥，充滿啖啖肉，肉質仲油水均勻。就算我一口將釀上梅子醬嘅豬皮吞落肚，都唔覺得油笠笠，因為豬皮嘅香配上梅子嘅酸，令食者嗅覺同味蕾得到不一樣嘅享受。呵呵，我一口氣將一半豬皮獨吞，不知食得幾開心，一次過滿足我幾個願望：有嚼口，有豬味，有酸味。可惜，之前食得太多嘢，唔可以用泰啤送梅子豬手。相信咁嘅配搭係最佳享受，亦係吹水歡聚嘅推介。今晚我真係食得好豐富，好滿足，仲好開心。一次過食到咁多泰國佳餚，完全迎合到香港人嘅口味：不油膩、不太酸、不太辣，謝絶 "重口味"，但又不失泰國菜嘅精髓。另外，食材既新鮮又正中。除咗烏頭出自元朗外，當中嘅蔬果、香草，包括金不換、薄荷葉、洛神花等都係出自老闆嘅後花園，絶對新鮮。所以話呢，入到元朗，又點可以錯過新鮮美味嘅泰國菜。…Read More