onQQfoodie的個人專頁

喺屯門Vcity行街，記得朋友推薦過天橋底附近有間Food Combo大件夾抵食，所以打算親身去試下。餐廳門口係落地玻璃，再加上內裏以白色裝潢為主，所以顯得室內更光猛舒適。餐牌上見到每個set都有沙律、餐湯同生果杯，好豐富！而且凡惠顧所有套餐都可以享用自助水吧，分別有鮮薑紅棗桂圓杞子水（熱）、薄荷鮮橙水（冷）同埋檸檬茶（冷）。🔹有骨豬鞍野菌汁配白酒煮青口 $168豬鞍比我想像中大件兼厚身，雖然有少少靭但無因為咁扣分，因為保留到肉汁算Juicy，配埋野菌汁更惹味。白酒煮青口份量都多，而且肉身肥厚，正。今次個餐湯係南瓜湯，好香南瓜蓉味；生果好鮮甜，有誠意。🔹美國安格斯西冷（9安士）荷蘭汁配南瓜薯餅 $218西冷煎得好香口，肉汁鮮嫩，而且煎得剛剛好，唔會太過生或熟，讚！南瓜薯餅外層幾香脆，但南瓜味就唔算太明顯。隨碟附上薯蓉同粟米，每樣都份量十足！食到好滿足！值得再Encore！📍Food Combo屯門鄉事會路88號The Parkville地下6號鋪．．環境分數：8.5/10食物分數：8.5/10…查看更多

🔹烏卒卒火山鰻魚櫻花蝦飯 $148呢個烏卒卒火山造型好可愛！真係突登為佢而嚟♥️ 外表係蛋白表面，一挖開就製造咗「火山爆發」嘅情景出嚟，所謂嘅「火山」其實係蛋黃汁，撈飯一流。鰻魚切粒上，每粒都算厚肉，飯即叫即製，熱辣辣，不錯。🔹甜薯條 $52甜薯條其實係甜蕃薯條，好香蕃薯甜味，而且小食嚟講份量算多，有千島醬同茄汁比你選擇，個人覺得千島醬適合啲。🔹韓山什莓窩夫 $68見到每張枱除咗叫烏卒卒火山飯外，都會叫甜品。眼見餐牌上甜品款都多，今次揀咗窩夫食。窩夫好結實，內裏好軟綿綿，配埋果醬加雪糕，好正！📍Seoulmate Cafe 銅鑼灣駱克道491-499號京都廣場4樓．．環境分數：7.8/10食物分數：8/10…查看更多

放工喺旺角一帶搵地方食飯，揀咗近麥花臣球場嘅申子居酒屋，交通都幾方面，近旺角東火車站同港鐵站。🔹燒油楊腐皮 脆卜卜嘅小食，唔會太油膩，炸得啱啱好。🔹申子飯 外型好特別，啱哂去打卡。蛋白用發泡型態去處理，選用了日本蛋，食前撈下佢，就係蛋黃蛋白撈飯，撈勻咗加埋紫菜配料，幾入味，都可一試。🔹吉列千層豚肉 吉列千層豚肉外層炸漿夠薄身，所以咬落去好酥脆，內層由多塊豚肉卷成，好有口感，唔會炸到好乾身，保留到肉汁，夠哂juicy，如果同行多人啱哂可以一齊happy share！🔹軟芝士黑豚卷 豚肉依舊好味，夠哂肉汁唔會太膩，配埋芝士一流，夠哂邪惡。🔹厚切煙肉車厘卷 與豚肉相比，厚切煙肉有少少肥，但配返車厘茄就可以中和煙肉油膩感。📍申子居酒屋旺角黑布街74號藝興大廈地下1號舖．．環境分數：7.8/10食物分數：8/10…查看更多

難得知道要去元朗，所以特登book定位夜晚嚟食蟶子。假日嘅元朗真係好多人，每一間餐廳都排哂隊，就算book咗位都要等多一陣先入得。🔹鐵板鹽焗蟶子 + 叁芭爆蟶肉 $198以$198 兩款蟶子菜式嚟講算好抵食，無諗過會落足料，每隻蟶子都係脹卜卜好肥美！鹽焗蟶子好入味，而且好鮮甜。另一款叁芭爆蟶肉就夠哂鑊氣，雖然本身唔食得辣，但佢有少少辣味吊起哂成個味都幾香口。蟶子菜式係值得一試👍🔹莆田荔枝肉 $89呢個簡單得嚟有驚喜！因為見平時咕嚕肉多數配菠蘿或者蜜桃，少見配荔枝，所以order呢個試下，點知效果不錯！每舊咕嚕肉都係無骨，而且肉質好鬆軟，甜酸汁調得好好，唔會有酸到攻鼻個種感覺，開胃到食極唔停口😋🔹莆田扁肉湯 $22肉餃細細粒，皮薄煙韌，一啖可以食幾粒，湯底偏濃，呢個做飯前小食都不錯。🔹興化炒米粉 $86第一次食呢種米粉，米粉好幼細，而且口感軟綿綿，唔會好乾身癡口。材料都足料，有蜆、蝦、菜等，味道帶點焦香味。📍 莆田元朗元龍街9號形點一期2樓2040號舖．．環境分數：7/10食物分數：8/10…查看更多

最近身邊嘅朋友都去哂日本睇櫻花，搞到我又掛住日本😭唯有以食嚟解決思念之情！同發Gor兩個人去咗K11隔離嘅居酒屋食晚飯，當晚好多人，去到要等多15分鐘先有得入座。門外到室內嘅環境裝潢帶有日本風，好有置身係日本嘅居酒屋！我就當去咗日本架啦😂 杯同碟有雞泡魚圖案，好可愛❤🔹原條成田醬炭火燒鰻魚飯 $128呢個鰻魚飯特別之處係好似巨大化咗嘅鰻魚壽司咁，成隻手掌咁大！鰻魚偏向鬆軟質感，無細骨而且肉質算嫩滑，鰻魚汁拌飯幾惹味。🔹煙肉櫻花蝦燒日本播磨蠔 $38 + 雙色芝士燒日本播磨蠔 $38煙肉櫻花蝦燒蠔鋪滿哂櫻花蝦，配埋肥美嘅蠔身食落口，又脆又Creamy！我偏愛雙色芝士燒蠔，芝士都算厚身，而且可以做到拉絲效果，芝士控可以一試😋🔹油甘魚刺身(三片) $68刺身好新鮮，厚切肥美，入口無渣，小店嚟講刺身質素算不錯！🔹 芝麻雞翼(3隻) $68雞翼不過不失，炸得好乾爽脆身，唔會好油，肉質都幾嫩滑。溫馨提示，因為即炸關係，所以肉汁好熱，小心辣口。🔹火灸北海道帆立貝蟹膏卷 $88喺menu見到呢款已經心心眼😍 因為帆立貝同蟹膏嘅配搭好少可見到，帆立貝算厚身，蟹膏味濃郁味道偏重但唔腥，下面卷物包住青瓜同蟹柳，size啱啱好可以一啖放入口😋 好味！🔹巨峰提子乳酸梳打 $38 + 白桃乳酸梳打 $38果汁味好重，個人偏愛白桃味😋 甜度啱啱好唔會over咗👍📍 味道樂居酒屋尖沙咀河內道2號地舖．．環境分數：8/10食物分數：8.8/10…查看更多

「度小月」呢個名成日聽得多，每次經過都好多人排隊，今次同朋友食飯，大家都異口同聲話想食台灣菜，所以就揀咗佢啦🤤 因為平日放工關係，趁佢未多人就成功攞到位。時代呢間分店分開咗兩邊座位，一邊較開揚，另一邊係室內，我哋被安排坐室內位置，比較靜，啱哂傾計。🔹蒜泥鮮蚵 $88呢個餸得時代廣場先有，由油炸鬼、鮮蚵同豆腐撈埋一齊，再配香口嘅蒜泥汁，成件事好惹味。而且要讚下佢個油炸鬼，撈埋熱食同醬汁都唔會受影響，食落口仲係好香好脆，會食唔停口😂🔹台南芋糕 $48 + 烤紹興香腸 $28台南芋糕唔似香港嘅芋頭糕，佢係以多條細芋頭條集結而成，咬落好有口感。台灣腸雖然份量唔多，但烤得好香口，唔會太乾，保留到香腸肉汁。🔹紹興酒香雞 $68酒味算濃郁，酒浸入雞件入面，令到雞份外好味，而且雞肉幾嫩滑，不錯！🔹鳳梨蝦球 $118呢味餸幾特別！起初以為係鳳梨同蝦球分開上，咬落去先知原來蝦球入面藏有鳳梨！外層炸得幾香脆，鳳梨酸汁令到炸物唔會太膩。🔹安平鮮蚵湯 $38 + 山藥排骨湯 $38同朋友叫咗每人一碗湯share飲，安平鮮蚵湯湯底好清甜，而且好多蚵仔🤤 山藥排骨湯其實都不錯，湯底都有藥膳味，而且排骨好鬆軟，湯底偏濃少少。兩碗湯之中我較喜歡安平鮮蚵湯，清清地飲落去好舒服。🔹祖傳肉燥飯 $28嚟到見到個肉燥飯好似好細咁，但加埋其他餸都夠哂飽。肉燥肥嫩，撈埋白飯一齊食真係好味。🔹香檳巨峰乳酸(椰果) $38椰果好有嚼勁，偏重乳酸味，唔會太甜。走個陣見到出面櫃枱有得買罐頭肉燥，好似好正咁，有機會下次買返屋企自製台灣風味都不錯。📍度小月銅鑼灣勿地臣街1號時代廣場B2樓B215號舖．．環境分數：8/10食物分數：8/10…查看更多

自從同朋友食過蒸氣鍋之後，如果係外出打邊爐同蒸氣鍋嘅話，依家會多揀後者。一嚟個身唔會好大陣味，二嚟蒸氣鍋多數係蒸海鮮，唔會太過油膩，啱哂keep緊fit嘅人😂今次呢間有蒸氣海鮮石鍋專門店，上網教喺佐敦港鐵出，但google map指錯路，兜咗好耐先搵到，去到先發現原來尖沙咀站出會方便好多，喺美麗華個邊直行到婚紗街尾轉上去就見到。地方都幾大，而且唔會好似酒樓晚市火鍋坐到好迫，有好多四人卡位同多人卡位或圓枱。🔹有蒸氣石鍋海鮮餐 $328 (2位起) 有四款海鮮餐，揀咗個最平嘅，要咗鮮響螺竹絲雞湯底。之後店員會預備好哂所有食材，然後每樣幫你蒸。食海鮮前每人送咗個黑松露蒸蛋，都幾香滑，配埋黑松露醬幾特別。海鮮餐包括有：蜆、海中蝦、鮑魚、元貝、美國桶蠔、薑蔥蒸鮮魷、豬肉丸、墨魚丸同蒜蓉勝瓜。起初諗住如果唔夠飽就可以叫個小食，但原來去到最後飲埋碗湯都飽了，好彩無眼闊肚窄😂海鮮整體都好新鮮，而且都好厚肉。個人喜愛大元貝，好大隻有膏位！由於處於keep fit其間，所以盡量都無額外蘸醬油，都食到海鮮清甜味，如果鍾意重口味嘅朋友，都可以蘸醬料，令到海鮮更惹味。湯都偏向清甜，有我最愛食嘅響螺😋📍有蒸氣 海鮮石鍋專門店尖沙咀天文臺圍5-9號寶軒酒店1樓．．環境分數：7.8/10食物分數：7/10…查看更多

前幾日白色情人節同發Gor嚟咗佐敦嘅Plato Cafe & Bistro撐枱腳，係呢啲節日最好book定位，咁就唔怕等walk in排隊😁 佐敦呢間分店係地鋪，空間環境好大，坐得好舒服。我哋叫咗個精選二人套餐 $458，除咗有主菜＋意粉／意大利飯之外，仲會有前菜、餐湯及麵包條，最後仲送餐茶同甜品，都幾豐富。🔹 龍蝦汁大蝦露筍意大利飯賣相擺盤好靚，遠距離都聞到大蝦嘅膏味，大蝦size算大隻厚肉，啖啖肉，正👍 意大利飯粒粒分明，龍蝦汁滲入飯之中，都算幾惹味，如果龍蝦汁再重多少少味會較好😋 🔹 炭燒美國安格斯西冷牛扒發Gor要咗五成熟，牛扒厚身又大塊，肉質算嫩滑唔會韌。🔹 松露薯條熱辣辣薯條份量都算多，松露粉雖然眼見唔算多，但食落都幾夠味。🔹 朱古力焦糖蛋糕伴意大利雪糕甜品一上就已經心心眼😍 底層朱古力焦糖蛋糕唔太濃朱古力甜味，所以配搭埋cream加雪糕一齊食就好match，而且唔會甜得濟！好味到想encore多個甜品🤤📍Plato Cafe & Bistro 佐敦吳松街186-188號地舖．．環境分數：8/10食物分數：7.8/10Encore分數：7.8/10…查看更多

聯和墟中央位置新開張咗一間意樂餐廳，有新餐廳當然要試試看！裝飾幾光鮮，樓底幾高，內裡寬敞，吸引咗唔少人嚟食飯。🔹墨魚汁鮮蜆魷魚意大利飯 $66鮮蜆魷魚用茄醬去調味，鮮蜆魷魚都幾足料，但配埋墨魚汁，兩種醬料感覺上唔係太match。而且墨魚汁太多太稀，有少少泡飯感覺，有待改善。🔹美式雜扒 $76雜扒幾豐富，包括有：豬扒、雞扒同煙肉，配埋煎蛋同野菌炒珍珠飯。肉質都算OK，唔會太韌，呢個飯就偏乾同硬咗少少。📍意樂粉嶺聯和墟和豐街28號囍逸地下G04號舖．．環境分數：8/10食物分數：6/10Encore分數：7/10…查看更多

同發Gor嚟到尖沙咀寶勒巷食隱世串燒，點解叫隱世？因為佢嘅店鋪位置係「屈」入咗大廈入面，唔似其他地鋪，但佢地嘅宣傳招牌、菜單就會放到街邊，所以都算係易搵嘅。呢排鍾意食串燒，一嚟啱哂一邊傾計一邊食，二嚟好香口又多款揀。呢間店鋪雖細，但係環境唔錯，係一個放工可以約朋友嚟chill一chill嘅吹水好地方。而且店內有電視機，有時會播放足球比賽，啱哂約埋朋友一齊食住串燒睇波。🔹 燒芝士響鈴(兩件) $19呢個好特別，要推薦。響鈴只係喺打邊爐食過，但就未試過燒同埋入面有芝士流出嚟！好特別，正喔！🔹 燒雞肉串 (沙嗲味) $24 + 燒沙嗲燒賣 $21首先要讚下個沙嗲醬，因為無論配落雞肉定燒賣都好夾同埋好惹味；再者燒燒賣好特別😂 發Gor本身已經鍾意食燒賣，依家更愛上燒燒賣😂🔹 炸日式餃子 (五隻) $45餃子皮薄餡多，炸得幾香口，幾好味。🔹 鹽燒清香翠玉瓜 $18呢個有意外驚喜，翠玉瓜好厚身，燒完仲保留到入面嘅鮮甜翠玉瓜汁，唔會乾身，正。🔹 燒芝士西班牙黑毛豬五花肉 $46 + 燒芝士蘑菇雞翼(兩隻) $45五花肉好juicy，啖啖肉好邪惡，但芝士蘑菇雞翼就較為普通，如果咬落去芝士湧出嚟就好嚕😋🔹 燒美國珍寶生蠔 $48六呎長嘅蠔好肥美😋 雖然望落去唔似燒過，但係蠔殼仲有微熱，蠔食落就有燒香過嘅味👍📍喜膳燒 尖沙咀寶勒巷10號地舖．．環境分數：7/10食物分數：8/10Encore分數：8/10…查看更多

Lunch time與同事喺大埔搵食，發現沙田陳根記化身饑落亭分店喺大埔大明里地舖，入面好寬敞，而且牆上嘅掛畫都幾特別，大約等咗一陣就可以入去坐低叫嘢食。🔹 蠔仔肉碎瓜粒泡飯 $45諗住食清少少減下肥，無諗過一個泡飯都可以咁豐富！蠔仔份量好多，而且每粒都好肥美，湯底味道適中，唔會太淡，又唔會好鹹，而且配上瓜粒，令到每啖食落去都好爽口！好喜歡呢個泡飯😋📍饑落亭 大埔大明里12號儲金閣地下12-14號舖．．環境分數：7.8/10食物分數：7.8/10Encore分數：7.8/10…查看更多

繁忙時間店內會坐滿哂人，座位與座位之間較為迫，坐得唔算舒服。菜單方面粥類都多選擇，本身以為食粥嘅鋪頭應該有糉食，但呢間無，所以叫多咗個炸両。🔹 新鮮豬膶粥 $25幾欣賞佢用砵仔裝住啲粥，可以稍微保溫，粥底熱辣辣又軟綿；豬膶好大片，而且幾厚身，$25咁足料又大碗好抵食。🔹傳統炸両腸 $17炸両一般，唔算太脆口，而且偏少少淋，食炸両喜歡落大量甜醬同麻醬，但甜醬味道偏少少酸，怪怪地🤔 📍發記腸粉粥品 大埔汀角路17號地下A號舖．．環境分數：5.8/10食物分數：5/10Encore分數：5/10…查看更多

近幾年好興晚市喺酒家食長腳蟹，而我同屋企人都好鍾意去海港食清蒸長腳蟹，因為食過翻尋味，實在太鮮甜啦！😋🔹 阿拉斯加長腳蟹🦀每次同屋企人食多數會叫4至5斤嘅長腳蟹，每次見到成隻巨蟹放上枱都會哇一聲！不過今次蟹頭嘅膏有少少苦，但係蟹肉身都依然係咁正！蟹殼用較剪好易剪開，入面嘅肉係好厚身，好鮮甜！喜歡食蟹嘅朋友一定要試下～當然如果唔食蟹嘅朋友都有其他小菜食😜🔹 鹽燒八頭燒鮑魚鮑魚燒得好香口，外層帶點香脆，但唔會燒得過火導致乾身，仲keep到鮑魚香味，有嚼勁唔會太韌。🔹 蒜蓉粉絲蒸元貝元貝肉豐腴肥美，入口好彈牙有質感，蒜蓉都炒得好香口，粉絲偏硬，淋身啲會更完美。🔹 黃金奶油海鮮豆腐呢道菜好特別！係鹹蛋黃豆腐再加海鮮配料！海鮮份量唔吝嗇，有大蝦、帶子、鮮魷片。而且鹹蛋好足料，醬汁好夠，仲有好多鹹蛋粒，好邪惡😋📍海港酒家粉嶺聯和墟和滿街8號帝庭軒購物商場1樓34號舖．．環境分數：8/10食物分數：8/10Encore分數：8/10…查看更多

約咗朋友嚟到又一城千両食晚餐，好耐無食過千両嚕，我諗應該都有好幾年以上，大家都形容千両係高級版嘅元氣，我諗食物質素應該都唔會差。大約等一陣就可以入座，餐廳內幾大，燈光偏暗，有種日式情調感覺。🔹 千両海鮮燉蛋 好大碗燉蛋，而且材料比坊間更豐富，因為佢係有海鮮料，包括：冬菇、帶子及大蝦，不錯。🔹 三文魚壽司、三文魚腩壽司、灸燒左口魚群邊魚生好鮮甜，特別係左口魚，入口即溶，好好味！🔹 日本芝士年糕好特別嘅芝士年糕擺盤方式，皮薄餡多，啖啖芝士好正。🔹 吉列廣島蠔炸得幾香口，但皮較厚身，蠔身偏細。🔹 軟殼蟹手卷建議如果手卷一到要即刻食，因為我放耐咗遺忘咗佢，紫菜就軟哂好難去咬。軟殼蟹都ok，但唔係太多膏位。🔹 板燒茄子田樂呢個板燒茄子幾特別！醬料好香，配上茄子份外惹味。🔹 串燒粟米 串燒雞翼串燒系列不過不失，唔算太熱，但都幾好味。📍千両 九龍塘達之路80號又一城L1樓L1-19A號舖．．環境分數：8/10食物分數：8.5/10Encore分數：8/10…查看更多

每次經過門口，都會見到好多人圍住呢間Comebuy Tea，而且會聽到蒸茶嘅聲，裝潢亦有別於一般嘅台式飲料店。經朋友推薦下，就同發Gor一人一杯試下佢😛望住個飲品餐單花多眼亂，唯有喺佢TOP 5 名單揀咗頭兩位。🔹 厚奶烏龍小芋Q (半糖小冰) $30好香烏龍茶香，但係飲唔出佢係「厚奶」，只係飲到淡淡奶味，芋圓同珍珠size差不多，幾有嚼勁，口感不錯。因為叫咗半糖，所以整體唔會太甜，可接受。🔹 桂花烏龍黑糖Q (半糖小冰) $33呢杯桂花烏龍味道個人唔太接受到，桂花味的確好重，但茶底略帶苦，而且黑糖粒怪怪地，口感唔太好，兩杯嚟講都係厚奶烏龍小芋Q比較好。📍Comebuy Tea 旺角彌敦道700號T.O.P This is Our Place G03號舖．．環境分數：8/10食物分數：6/10Encore分數：5.8/10…查看更多