candies_lo's Profile

叫左涼皮（$25）加手撕雞（$8）同豬大腸（$8）。佢地用既係闊身涼皮，質感算彈牙，調味汁既味道無咩特別，但可惜兩個餸既味道強差人意。睇佢地餐牌，手撕雞應該係重點推介之一。份量唔算少，味道無咩特別，但肉質有d奇怪，唔係梅既但好林，林到咬落冇咩口感。豬大腸唔似鹵過/用其他調味事先煮過，食落無味，似就咁白灼完就拎出黎撈多d。如果本身個調味汁係惹味既，可能都還可以，但配佢而家呢個汁既話係完全唔夠味。作為配料既花生唔係好脆。另一點值得留意既係拎到上手盒野係暖既，食既時候某d食材係凍既有d係暖既，即係一盒野入面既食物有唔同溫度，感覺好怪。…Read More

少去大角咀，但呢度一d都唔難搵。呢度book位既方式係黎到有得優先入座，如果滿座就變相book左位既排第一張台。鋪頭比較細既話，呢個都係幾能夠善用哂所有台既方法，如果你鐘意留位直接入座既話就要留意下。叫左幾個熱門既菜式 -燒汁一口牛 - 牛肉味幾濃同埋都juicy既，係偏熟既口感，幾有咬口。火炙壽司拼盆 - 不過不失，唔會覺得好大驚喜。火龍卷 - 呢個推介，蝦肉好爽口，卷入面舊蝦既外皮好脆，唔會一陣就淋哂影響口感。蟹籽多到滿哂，足料！仲叫左黑松露三文魚帶子炒飯不過太肚餓食左唔記得影相，但都好足料，黑松露味好香會令你好有食慾。座位舒服，員工都好有禮貌亦好注意衛生，坐低會提醒食客食野先好除口罩安全d，抵讚👍🏻…Read More

聯和墟有好多好野食，但唔少鋪頭都比較細，未必坐得舒服。有friend入黎食飯，所以想坐耐d、好好享受下美食，就去左試呢間。叫左塊牛扒七成熟配飯。塊扒煎得唔錯，幾juicy，唔會煎老左。個燒汁就正常味道（最怕死咸既汁），亦唔會太稀或者太濃稠，岩岩好可以突出番塊扒自身既味道。餐牌無寫，比較肚餓所以就冇問，但如果可以轉薯菜就更加好喇。裝修樓底好高，感覺寬敞。侍應都好有禮貌，入門口量體溫、點餐等等都唔該前唔該後，服務唔錯。值得再黎！…Read More

間野係公司附近，但見lunch成日都好多人等，所以一直都冇試過。上個月30號夜晚放左工見冇人等就walk-in試下。的確，食物係唔錯既。點左三個菜，Massaman Curry，肉碎豬生菜包同馬拉盞通菜。後兩樣都係一般味道啦，反而個咖哩係有驚喜既，少少甜，濃度恰到好處，好岩送飯/點薄餅食。不過，staff既態度真係好難頂。話說落完單成25分鐘都未上過野，咁就同個著橙色衫既staff講聲啦。（個位女士應該係senior staff，因為其他人普遍著深藍色。）我地問可唔可以追一追張單，因為落左成25分鐘都冇野上過，見隔離台遲落單過我地都已經上左成10分鐘，就想問一問會唔會其實漏左定點。個位女士好大聲咁話「你講野啦，我地電腦入單架，點會你入單先但野食黎得遲過人呀」（意指我地話自己落單先過隔離係講大話），然後就自己走左去。粒粒字都好刺耳。我理得你入單程序係點，但可以係你地漏左張單架wor，點解可以一口就咬定我地講大話？食餐飯姐，d客需唔需要咁講大話黎屈你呀？同埋自問一路態度都好好，只係問下都咁被人話。好谷氣，好食到識飛都一定唔會再幫襯。如果想受氣就去食啦。…Read More

夜晚七點幾，三個人貪方便唔想行咁遠，就去左聯和墟街市食飯。見呢間幾多人幫襯，仲有報紙報導過，諗住應該唔錯，所以就坐低左。叫左三個小菜：馬拉盞生菜、蒜茸牛仔骨同豉椒炒蜆，落完單十五分鐘後話冇蜆:(，叫我地揀第二樣。見佢擺出黎既牌介紹咖哩芥蘭豬頸肉煲，都幾吸引，所以就轉做呢個菜。點知過差唔多十五分鐘之後，又走過黎話冇芥蘭:(，問可唔可以轉菜心。覺得反正都差唔多，所以就轉菜心。由坐低開始計起成四十五分鐘都冇小菜到，直到催左二、三次先黎左個牛仔骨，隔多陣先有生菜。個牛仔骨唔怕韌，而且好香蒜茸味，的確唔錯。個馬拉盞生菜都OK，但成碟野比較多水，所以D味唔係太濃。個煲一路都未黎，唯有唔食住等佢，等緊既時候見隔離台台都有湯飲，淨係我地冇，覺得有D奇怪。依稀記得之前同屋企人幫襯好似有例湯送，問一問佢先俾湯我地。我真係不禁疑惑：唔通係見我地幾個十幾歲所以就HUP我地？:(催住等等到差不多九點終於頂唔順問佢:(，究竟係唔係漏左單，但幾次都淨係應我地話等佢CHECK下，跟住又冇話番俾我地聽結果係點樣。追問左好多次都係咁，都估到佢可能係落漏左但又唔想我地取消，最後嬲嬲地直接同佢講我地取消個菜同埋單，淨低D野都冇食就走左。另外幾台客都嘈好耐都冇菜出，有D仲嬲到走埋。其實食物既味道係唔錯，但等咁耐真係無辦法忍受LOR。三個人食餐飯，又唔係要你煮九大簋，竟然可以搞成超過個半鐘都出唔到三個菜，仲要D客三催四請。咁既服務質素，上報紙、味道幾好又有咩用，唔洗旨意我下次再去。…Read More