BeebeeChan's Profile

一條街有三間鋪頭，我都幫襯過，今次呢間係最新開嘅，之前已幫襯過，食過佢嘅海鹽燒鱸魚伴水瓜榴鮮蕃茄汁，好有驚喜。所以今次生日都選擇嚟依度再幫襯，我哋叫咗兩個扒餐。西班牙黑毛豬胺扒伴燒菠蘿$142豬胺扒好厚肉以為會好鞋口，但又煮得啱啱好，好淋，個燒菠蘿又多汁又甜，好好味。海鹽燒鱸魚伴水瓜榴鮮番茄汁$118鱸魚扒好嫩滑，有兩塊，蕃茄汁酸酸甜甜好惹味。可以半價叫飲品。椰子芒果沙冰，薰衣草藍莓梳打，飲品都ok。[IMG:5]…Read More

昨晚慶祝母親節，之前已上網揾定食咩，貝到佢母親節推出花膠飽魚牛柳套餐，預訂可用優惠價$268，所以訂咗位。我們一行六人去到餐廳已有好多人，好彩訂咗位。服務員態度殷勤，除了訂咗三個花膠套餐，另外仲點了牛柳餐(12oz)和鰽魚餐。餐廳出品質素很好，家人個個都話好抵食。花膠鮑魚牛柳餐$268鰽魚餐好大份$158牛柳餐7成熟啱啱好$198還加配了甜品特飲都OK呢間餐廳以前都有幫襯，水準到現在也能保持，以後也會再嚟。…Read More

環境清優，出品有水準，在灣仔區這家一定係我首選。今次老公生日，我揀咗嚟這裡慶祝，喜歡職員服務態度，夠專業又禮貌，尤其那位女職員，令客人很窩心。我們點了兩份餐，鐵板和牛漢堡及香煎三文魚扒。除主菜外，還有半自助餐任食，好滿足好美味。…Read More

兩公婆放假一早去咗飲早茶，屋企附近啲茶樓已經去過曬，又想試新嘢，上網搵到呢間舖頭未試過，食評都唔錯，一於去試吓。八點幾去到，唔使等位，冇職員喺門口招呼，自己入去搵位，每張枱只可以坐四個人，我哋揀咗張要搭枱嘅枱坐低，但中間有塊透明膠板隔住，飲得安心啲。點心紙都好多選擇，價錢都算抵食，蝦餃燒賣一定唔少得，叫吓叫吓，兩個人叫咗八樣點心，一於試晒佢。樣樣點心上枱時賣相都好👍😋，尤其蝦餃一定要食，皮薄餡靚，其他點心都好好食，下次會試吓佢嘅晚餐。…Read More

因應疫情，所以約朋友食飯同傾計都要改喺中午， 今日就約咗個朋友喺葵芳新都會廣場食，行咗個圈見呢間舖頭午餐幾抵食，就試吓啦。兩個人揀咗個精選二人套餐$188(免加一):1️⃣胡麻豆腐沙律，我一向無乜興趣食沙律，但朋友話啲沙律菜好新鮮👍2️⃣吞拿魚玉子燒，以為係熱食，原來凍嘅，但味道都唔錯。3️⃣吉列豬扒配飯，塊豬扒炸得啱啱好😋，好食。4️⃣汁燒雞扒烏冬，個燒汁就好惹味，但塊雞扒就煮過咗火路，好嚡口，唔掂😣。5️⃣是日甜品，普通雲呢拿雪糕6️⃣餐飲兩杯呢個價錢，有咁多嘢食，其實都🆗️嘅…Read More

疫情又再爆發， 又唔想買外賣返屋企食， 唯有早啲食晚飯。入到舖頭已經接近五點， 職員話五點最後落單， 我哋三個人叫咗三個下午茶套餐。餐牌選擇少， 唔想食粥麵 ，所以全部叫晒精選下午茶套餐 ，$58(包飲品)，但要收加一服務費， 下午茶嚟講都唔平。1. 日式鰻魚雞粒炒飯👍， 鰻魚雞粒落足料，炒得好好味。2. 乾炒牛肉河粉，牛肉好滑， 唔油膩😋3. 濃香星洲炒米粉，都炒得好出色。整體嚟講，呢間舖頭啲嘢都幾好食同份量足， 不過就食得趕啲，要喺六點限聚令前埋單。…Read More

見好耐無食街坊小菜，今晚兩公婆就去大埔揀咗呢間饑落亭，可能疫情關係，去到唔駛等位。餐牌好多餸想試，但得兩個人，唔叫得多，就叫咗三餸一石鍋飯。麻酱蟹籽粉皮手撕雞(例)$92，👍必食，成碟手撕雞撈滿晒麻醬和蟹籽，非常好味。黄金豆腐$88，鹹蛋佈滿在每件豆腐上，遠睇真係好似一磚磚黃金，食落滿口都係鹹蛋黃，豆腐又嫩滑，份量多到食唔晒。椒鹽豬扒$78，好香口，👍豬扒炸得啱啱好，肉質又林，好好味。廣島蠔石鍋飯$78，幾特别，上菜時附上一個⌛漏斗，侍應姐姐話要漏晒啲沙先好開蓋，等咗十分鐘完成。打開蓋一睇，無乜驚喜。薑葱味唔夠香濃，啲蠔又細隻，下次都未必會叫。整體嚟講，每個菜式份量都多，抵食，有下次。😋…Read More

星期五晚約埋幾個師奶仔，齊齊唔煮飯，出街食晚飯。之前食過呢間舖嘅下午茶，都唔錯。所以今次試吓晚飯小菜。打開餐牌睇，樣樣都想試，揀吓揀吓結果叫咗五個小菜同兩個小食，都好大食吓😋。先嚟兩個小食: 香煎腐皮卷(3條)$32，好普通。風沙雞中翼(6隻)$38，👍皮脆肉嫩又惹味。五個小菜:鹹蛋黃金蝦$78，食得出係新鮮蝦🦐，鹹蛋黃炒得好入味，但份量就少咗啲。燒汁蜜糖薯仔牛柳粒$88，👍💯份量足，煮得好入味，牛柳粒好嫩滑，燒汁蜜糖配薯仔好好食。脆皮德國咸豬手$98，大大份，好味抵食。潮式煎蠔餅$65，賣相麻麻，睇落煎得唔夠香口，但食落啖啖蠔仔肉，😋估唔到咁好食。魚湯魚腐浸四寶時蔬$63，好多菜，魚湯又好味。最後叫埋凍檸檬薏米水和凍檸茶仲有甜品送: 芒果布丁今晚我哋食得好飽，又唔貴，下次去九龍灣行街 ，都會再來幫襯。🎊…Read More

疫情較為穩定啲，係時候約老友出嚟聚吓舊，我哋揀咗呢間老子號餐廳。九龍灣站出，好易搵。訂咗枱，去到就入得。座位寬敞坐得好舒服。落單嗰位肥哥哥好好禮貌，仲好仔細咁介紹餐牌上嘅食物。 我終於揀咗羊脾扒伴大蝦配薯菜，要松露洋蔥汁。而我朋友就叫咗美國極級牛肉眼扒。原來套餐仲可以優惠價加配小食，於是又再叫咗: 椒鹽雞中翼沙律同炸馬介休球。好快就嚟咗個熱辣辣嘅蒜蓉包，嘩…..咬落去，同出面嘅唔同，佢外脆內軟蒜蓉好香。羅宋湯亦非常濃郁，用料十足。主菜都好快到，羊脾不單止賣相好，啲肉仲好嫩滑，羊味唔太膻，大蝦鮮甜，伴菜都有三種，份量足。而我朋友要嘅肉眼扒略嫌太多筋，但肉質尚可。椒鹽雞中翼非常入味，外皮炸到脆卜卜，肉質仍保持嫩滑。炸馬介休球更加不得了，鹹香味恰到好處，好特別嘅味道，兩份小食嘅沙律菜好新鮮。最後仲叫咗兩個甜品: 奶凍和有椰子肉嘅椰子雪糕，再嚟埋杯手調咖啡。完美的一個晚餐。下次約朋友都會再嚟食呢間。…Read More

無飯夫妻又出動喇，今晚揀咗大圍，呢區出名美食多，今次行遠少少，去咗美林邨個美食亭食日本菜。平日夜晚入到去無乜人，我哋揀咗張卡位坐，攞個餐牌睇，簡簡單單叫咗兩個套餐，包括有前菜，麵豉湯，加州卷兩件，主菜和甜品。另再叫咗客三文魚刺身。前菜和麵豉湯無乜驚喜，反而加州卷加咗少少沙律醬，好惹味。我叫咗壹級丼飯套餐$98賣相吸引，蟹羔和海膽好鲜甜，好好味。我老公叫咗蒲燒鰻魚飯套餐$80略嫌鰻魚份量少，又冇乜鰻魚汁，唔特別好食。三文魚刺身$48都算新鮮，抵食。加埋甜品(雪米糍)，一頓美味晚餐啱啱好。…Read More

昨晚忽然想据扒，但想揾間坐得舒服，出品質素好，同埋梗係要抵食嘅餐廳啦，就近近地走咗去上水匯間茜廊餐廳，幾年前試過佢嘅下午茶，已經覺得好好食。今次就試吓佢晚餐掂唔掂先。去到舖頭門口望吓有咩推介，眼前一亮，大大張海報寫著"快閃優惠''，比佢塊西冷扒吸咗入去。服務員好快安排入座，遞上餐牌，並推介今日晚餐美國西冷牛扒套餐$88(包蒜蓉包，餐湯，牛扒，餐飲)，加埋一都唔駛一佰蚊，超抵食。1.蒜蓉包烘得好鬆脆，好好食。2.羅宋湯多料，酸酸辣辣好好味，最緊要夠熱，佢做得到。3.西冷扒好大塊仲厚切㗎，仲諗住$88會好細塊添，我要咗六成熟，啱啱好，肉質鮮嫩多汁。4.再叫埋杯凍檸茶。超滿足的一餐…Read More

其實想幫襯華嫂冰室好耐，但每次午飯時間門口都好多人等位，所以由佢開張到而家都未試過。今晚放工後要去聽個講座，我和老公決定碰吓運氣，一於去試吓，六點幾去到竟然唔駛等位，超正。即刻入去揾位，攞餐牌睇，選擇唔算多，無套餐，單點粉麵均可以半價配飲品，我倆便叫了1.檳城喇沙豬扒湯米線$50 喇沙湯底好好味，兩大塊豬扒，大大碗份量夠。2.秘制撈米線$52 配豬扒.餐肉.紅腸.青瓜和芫茜，味道偏咸。3.兩杯半價飲品(凍檸蜜和柚子蜜)下次會再嚟試埋其他嘢食…Read More

中秋節兩公婆入咗長洲玩兩日，感受吓長洲節日氣氛，下午搭船到去，先去酒店攞房，放底行李就出去覓食。喺長洲揾嘢食一啲都唔難，大街小巷都有得食，聞名嘅芒果糯米糍，大大粒魚蛋一定要試，但都要留定肚晚飯食海鮮，在海傍行吓見到幾間海鮮菜館，店舖職員都好落力推介菜館美食優惠，最終我們選擇了恒樂，六點幾就食晚飯，由於時間尚早，唔駛等位，一坐底就嚟咗個粟米湯(送嘅)，再睇餐牌，佢地嘅超值套餐由二個餸至十二個餸都有，我哋兩個人叫咗四個餸嘅套餐$238(免加一)，仲送多碟菜。五餸一湯，超飽超抵食。…Read More

迎月日，兩公婆又出去周圍行吓揾嘢食，想入馬鞍山行街街，於是坐馬鐵，途經第一城站時，我倆見從沒在此附近覓食，就即時下車向第一城商場進發，行咗一陣見肚餓，係時候食午餐了，我們都想食薄餅，見間餐廳有得食，便二話不說走咗入去揾位。睇過餐牌，我們選擇了二人餐$138，包括:1.夏威夷至尊薄餅 薄餅皮唔脆，還偏硬，有點失望。2.特濃芝士汁卡邦尼意粉 味道配得啱啱好。3.意式香辣雞中翼 香香辣辣好惹味，值得一試。4.兩杯飲品食完普普通通的一餐，又向下一站出發了。…Read More

朋友為我慶祝生日，在Openrice預訂了Gochiso，四個女人仔聚會一定要揀間可以唔限時的餐廳，一邊傾計一邊享用美食，唔覺唔覺可以坐到舖頭關門。預訂座位仲可享有飲品買一送一優惠可能係平日夜晚，七點去到都未坐滿，店內環境舒適，確係三五知己聚腳好地方。餐牌很多食品都好吸引，我們選擇了以下幾款1.西班牙風海鮮飯(半份)$1082.山葵松葉蟹肉意大利燴飯$933.羅勒醬鮭魚牛油果薄餅(11吋)$1584.小食可自選三款$108，我們選了蝦牛油果法包多士(2份)及宮崎縣產脆皮腸配有皮薯角。5.飲品買一送一，我們叫了四杯咖啡，不過唔係咁好味其實，除了飲品，全晚的食物都好有水準，店員的服務亦非常好，結賬時某信用咭消費滿$300可減$50，$600減$100，如此類推。…Read More