kayley212's Profile

地點近我住，都食過幾次。酸辣湯就麻麻地，麻辣湯好食啲。每次都會叫麻辣中辣招牌小鍋米線，餸就叫咗蒜香雞扒，飲品係附送豆漿，成個餐$45+$2外賣費。佢個湯底唔係好濃同麻辣唔算好辣，如果鐘意食濃味湯及辣未必啱。本身已經包咗好多配料，有菇，雞肉，酸菜，肉碎，芽菜，腐竹。配料最好食係酸菜，係甜甜地爽脆嘅口感，個人係幾鐘意食，其它配料就正正常常。米線爽口，好食。蒜香雞扒都ok ，肉質唔太靭，雞皮有少少脆，成嚿食落去係舒服，如果蒜味重多少少就好。飲品附送豆漿，豆漿幾好飲，唔太甜，都重豆味。…Read More

唔算抵食及好味嘅一餐。因為食物味道好一般，相對價錢就會覺得有啲貴。5位叫咗5個餸都食唔晒，可能味道麻麻地及大家唔算太肚餓。叫咗乾蔥豆豉雞 （味道正常，唔係話好惹味，雞肉好靭，份量唔大）露筍山藥炒蓮藕 （蘆筍山藥蓮藕全部都好爽脆，有鑊氣，但蘆筍及蓮藕嘅份量偏少，淮山就食咗好多嚿）酥香鴨 半隻 （鴨皮脆口有少少鹹香鹹香，肉嫩有汁，但同個包好唔夾）蟹子蟹肉燴伊麵 （蟹子蟹肉嘅量都多，味道都鮮甜，但伊麵有啲淋身，如果做到爽口少少就比較好啲。）（唔知咩）魚煲 （魚煲價錢最貴，$398如果冇記錯，有少少湯汁，湯汁好似麵豉湯，同條煎香咗嘅魚都幾夾，但就唔值哩個價錢，唯一食淨好多嘅一味餸，可能係長輩唔鐘意食煎咗嘅魚）埋單$1200，另外一入到去職員有介紹話食穌香鴨，話幾抵食 ，但就唔講有個套餐優惠$398，可以揀兩個餸，好似有龍蝦伊麵，燒鴨？.... 但當時睇晒所有menu 都冇哩個優惠，係我哋落完單之後，出去商場廁所見到有張優惠poster貼係門側邊先知。…Read More

屯門好好食薯粉之一！地點比較近屯門西鐵站，唔係住屯門既人比較方便。平時去食通常會叫酸辣湯薯粉，佢嘅酸都幾酸吓，鐘意食酸嘅人，可以試下。同埋一定要叫薯粉，佢嘅湯係好夾薯粉，唔夾米線。有一次失手叫咗米線，成餐都食得好唔開心。今次試下唔同嘅湯底，叫咗金湯同麻辣，金湯係酸辣加麻辣嘅味道，食落去好似食緊酸菜魚湯咁，我個人係幾鐘意，同薯粉都夾到。麻辣就一般，少咗啲麻辣感，通常麻辣食完個口有少少麻麻地，但佢冇咗哩種感覺。至於啲餸，豬頸肉係切到一條條咁，食起上嚟冇咁油膩，有啲人會鍾意食大大嚿嘅豬頸肉，但我覺得太油膩，食幾嚿就唔會想食。豬大腸都係細細塊，醃得都幾入味。小食最鐘意係食圖片個款（唔記得叫咩名：~ $29價錢唔平，得幾條。）但炸得啱啱好。另外一款都會成日叫嘅小食係芝麻醬萵筍絲，萵筍絲好脆，口咁勁清新，食得太多辣嘢，可以中和下個口。下午茶（$43一餸）餸同薯粉份量比較少，但就唔駛點排隊，試過中午（$49一餸）去食要大排隊，但份量真係多好多，價錢都貴幾蚊。…Read More

上午睇片有人介紹越南表嫂，睇片通常都有啲伏伏地，訪問老闆個陣話有大埔嘅客人專登揸車過嚟食，咁一定係好食先會專登過嚟食，下午即刻搭車出元朗試下，果然係好食嘅。一去到3點幾法包就賣晒，有少少失望，但都揀咗火車頭河粉同豬扒撈檬試下。火車頭河粉湯底清甜，牛肉好有牛味，牛腩肥瘦均勻，唔會好韌，牛丸彈牙爆汁，扎肉就正正常常。但有少少油膩，少咗面頭個種油膩會梗好，有可能係太多客人關係？豬扒撈檬重點係個汁度，酸酸甜甜放少少都好提味，豬扒味道適中，肉質唔算好淋，整體係愈食愈開胃，啱晒夏天食。鋪頭有堂食，位置唔算多，有少少冷氣，等餐時間都等咗15-20分鐘，因為小店關係，客人又多，下次要早少少到食佢個法包！！！食完好想唱返首Tình Tình Tình Tang Tang TìnhTang Tình Tình Tình Tang Tang Tang…Read More

好好彩食到！！最後2碗，連湯底都冇得揀，得返清湯醬油拉麵。麵度有啲硬身，湯底比較單一，只食到係鏗魚醬油味，但價錢係合理嘅。哩次係第二次食奇蹟，第一次係屯門食濃厚辣味拉麵同原味拉麵，比較有驚喜，第一次食個2款湯底都比較有層次感，麵口感都適中，真係好似係日本食拉麵嘅感覺。如果有機會再食一定要早少少到，可以揀返其它口味，清湯唔太推薦。…Read More

任食飯，沙律，湯。先揀一個肉主食，今次揀咗期間限定$95蚊黑安格斯牛肩胛扒套餐（300g)同主餐牌$138牛豬雞300g（主餐牌係openrice 訂枱有79折優惠）。 個人覺得$95個套餐好食過牛豬雞餐，牛味道正正常常，牛豬雞都冇乜點醃過，一定要點醬食。反而任食白湯有驚喜，好有牛味。白飯有得任加紫菜，可以自制牛角飯（衰在個汁，冇牛角汁咁好食，但小女子都食咗2碗飯，如果大食既人算係抵食。如果沒有加一服務費會好抵食d。…Read More

哩間串燒每次經元朗都會食，沙嗲汁勁惹味，唔會太甜或太鹹，對比泰國餐廳仲好食，雞肉串夠厚身，$15蚊一串。雞肉有陣時燒得好嫩口，有陣時擺得耐會會嚡身咗d，睇彩數。另外一串豬頸肉都係15蚊，豬頸肉都係厚身，食完一嚿已經覺得好油膩。…Read More

住在濕地公園附近，揀咗間新開至尊雲吞雞煲餐廳試下。避風塘魷魚飯大碟抵食，味道還可以。但炸粉粉漿太厚，表皮唔夠脆身，試一次就夠。美極牛肉炒河不過不失。炒得夠鑊氣，河粉唔會黐住一嚿嚿，條條分明。牛肉生粉醃得太多，少左牛肉味，芽菜蔥頭比較少，如果多返d，整體係幾好食嘅。…Read More

餐牌只有3款拉麵第一款雞白湯拉麵第二款醬油雞清湯拉麵第三款濃醬油雞清湯拉麵連續2次去都係叫咗第一同第二款。第一款雞白湯拉麵湯底不濃稠，帶有清清地濃郁雞湯味，味道適中，唔會太鹹。拉麵屬幼中身，不過不失。可能係個人口味關係，有啲人鐘意好濃郁杰身湯底，但我最怕就係好濃稠杰身湯底拉麵，所以哩款湯底好中我口味，湯每次都會飲晒，而唔會口渴。第二款醬油雞清湯拉麵湯底好清好清，清到好似飲緊滴雞精咁，帶有少少醬油味，鐘意食得清少少嘅人會啱d。…Read More