fun20's Profile

平時好少寫食評，但今次真係完全唔掂。只此一次，下不為例！星期日下午經過，見到紅茶排哂隊，呢間野有位就入去食，點知中哂伏。。。叫餐時個男人勁串 態度又唔好，叫3個餐 寫都唔寫，又無反應 一句聲都無出，都唔知佢有無聽到，淨係講完一個餐 佢就大叫後面叫人落單。餐枱嗰張膠枱布 好油 好似抽油煙機嗰種痴笠笠，掂到都唔開胃。食物好快就上，叫咗個瑞士雞翼公仔麵，瑞士雞翼無味，慘過去超市買枝瑞士汁自己煮，似係個汁加水已經加到無味，只係上到色。屋企人叫咗午餐 肉硬 難咬，話有餐湯 無俾我地，叫咗凍鴛鴦 漏咗（懶叻唔寫低 靠大嗌既後果），上餐專係放係個幼兒前面，幼兒枱前清空唔係俾位放食物 係唔想佢手快打爛野 倒瀉野（不過呢啲都只係有經驗既侍應 餐廳先識），價錢唔平，連鎖餐廳價錢，呢個價錢不如加多少少食花園餐廳。拿拿林食完走人，兩個小朋友跟住屋企人去俾錢先，我執埋啲野跟住走，俾個男職員夾係我同小朋友中間，個職員要放餐具係門口，佢叫兩個小朋友出門口先，大嗰個10歲 叫佢出去先無問題，但點解會叫個2歲既出去先？金魚街咁多人，突然衝咗出去追唔切咁點？本身佢乖乖地企係屋企人身邊等緊。放餐具點解唔可以等一等先 或者讓開俾我帶佢地出去？俾個錢要幾耐？嫌小朋友阻住佢放嗰籃餐具 我都嫌佢阻住我出去。家庭式餐廳，連鎖店價錢，態度服務差，無下次！Blacklist!…Read More

新年前去完太子金鳳，見到門口寫住D2開左分店，諗住近屋企，就去試下，但最後都係覺得寧願行遠少少去太子金鳳。兩個大人一個小朋友，叫左2個扒再另加白飯，承惠$233 (相同既餐，係太子金鳳食$200有找)。小朋友每次去太子金鳳都會食哂2個餐包同飲哂成碗白湯，但今次食左2啖之後話個飽好硬，碗湯唔好飲，爸爸話個包唔熱同有啲硬，似係就咁用微波爐翻叮，唔似太子金鳳咁用焗爐翻熱，碗白湯只係火腿湯，同太子差好遠。牛扒都幾淋，但無乜牛味。可能因為商場，唔可以大煙，冷氣開得勁同個鐵板唔係好熱，牛扒好快就凍冰冰。…Read More

因某雜誌報道而去試一下，但比較失望。二人叫了 什錦麵 海南雞飯 泰式咖啡 同 青檸紅茶。海南雞飯同平時係餐廳食既差唔多，連埋一碗椰子雞湯，雞湯唔錯，起碼飲完唔口渴。羅勇什錦麵，個湯好大陣滷水味，但食落係無味，自己再落埋嗰4種調味料，都係得啲調味料既味，啲丸都好食既，個河粉就痴埋一舊舊，份量少，男人食唔夠飽。咖啡唔會話好甜，但唔香咖啡味，而青檸紅茶就好似係泰國飲既檸檬茶少甜版。食過一次唔會再食了。…Read More

叫了碟牛河，等了15分鐘，見住旁邊既人都已經有牛河(啲人比我遲入座) ，叫佢幫我追，佢話叫我等等，5分鐘後見到有人已經牛河(又係比我遲入座)，跟住我又問，佢又係答我就快，最後佢一堆牛河咁送出嚟，但又係未派到俾我，我已經黑面咁問，佢先話俾我先，聽完真係火都嚟，由入座時無乜人等到滿座，老公碟快餐都食完，我都未有得食。之後有個職員嚟解畫，話啲單無記時間又唔係電腦單，越早叫就放得越底，所以派左俾遲叫既先，咁我話呢個係你公司問題啦，越早叫既就越遲，跟住個職員就話呢個係老闆問題。牛河啲河粉碎濕濕，牛肉好un。快餐石班魚只得雪藏味，差。住海麗咁耐，呢間餐廳越做越差 ，由以前經常食，食到而家1個月都食唔到1次，真係唔會再幫襯。…Read More

]因為生日當日可以免費入園，所以就同老公入去行下，順便睇下新既展館。一早食完早餐，入園左睇右睇，2點幾鐘先覺得肚餓，所以就去冰極餐廳食野。餐廳門口封住左，之後問個staff係咪已經off左，個staff話唔少遊客以為餐廳係展館，所以就攔住左。餐廳內有好多位，我地等都唔駛等 (之前一日打去book，佢就話預約已經full，要walk in)，仲可以幫我地揀坐方枱定梳化，因為想坐得舒服d，就揀左坐梳化，梳化雖然遠少少，但都可以睇到d企鵝游黎游去。(方枱有兩排，除非坐到第一排，如果唔係第二排既係會俾第一排既位阻住)兩個人叫左3樣野食同一杯野飲 ( 呢到無免費水供應)1) 極光 $42 薄荷加雪碧，仲有椰果係入面，都幾好味 ( 普通一杯飲品都要30幾蚊，不如飲特飲 )2) 芝士焗薯條 (二人份量) $88 幾好味，特別係佢o岩o岩拎出黎個時，又熱又香，但係老公嫌佢有d喊， 我就只係覺得佢落鹽唔平均所致。 如果想試多d其他野食，兩個人叫標準就已經夠， 因為二人份量再加埋其他野食都食到我地好飽。3) 卡邦尼帶子意大利幼麵 (標準) $108 呢碟一拎出黎我同老公就呆左，似一碟米粉上面加左3隻帶子。 碟幼麵係好香煙肉味，但d帶子太乾身。4) 啖啖肉薄餅 (標準) $168 不過不失，係個底有少少燶，都唔錯，脆脆地。小朋友就會有一件企鵝圍裙送。其實好難得係主題樂園入面竟然有間算ok既餐廳，而且價錢其實唔算貴，平時出去外面既cafe食都已經係呢個價錢，仲有企鵝陪你食野。…Read More