傻蕃薯仔包's Profile

近期居住嘅環境變左，離開左生活超過廿年嘅紅土區，黎到細個都經常打等嘅馬鞍山區生活🏡當時資訊科技冇咁發達，冇咁多人評論邊區邊區有咩好野食👀但細個果陣而家覺得馬鞍山區係冇野食，係落街食都冇咩野特別想試果種👀不過聽聞近5-10年其實呢一區都變化得好大，可能隨著愈黎愈多嘅私樓落成，唔再係以前嘅居屋集中地（除左新港城一帶）所以連帶食店都多左好多選擇😀今日自己一丁友搵野食嘅時候就搵到呢間毫不起眼但聽講已經有廿年歷史嘅米線鋪黎試試佢星期日下午兩點黎到，地理位置的確唔易搵而且店舖面積真係比較細，不過而家嘅香港，搵小店食野先係樂趣:)之前都做個下資料搜集知道佢出名d乜，所以就叫左碗酸菜麻辣雞米線+臭豆腐呢到幾好就係米線嘅size可以自己揀，咁我就叫左個中試試佢，份量都唔細，不過比較食得多野嘅男性就可能爭少少麻辣雞係呢到嘅名物，採用嘅應該主要以雞胸肉為主，不過食落唔算乾柴，咬落去麻辣味好強烈，但唔至於嗆喉，係屬於“辣得好過癮”果種，所以會令人慾罷不能不過唔食得辣又想試，就真係要分開上唔好放落個湯到，放左落個湯係會令到碗米線起碼有連鎖譚x 三x嘅麻辣5少嘅辣度，而雞就一定仲辣過個湯因為已經入曬味麻辣雞會配埋洋蔥，我個人就麻麻地，不過的確係有種清新嘅感覺，但我就覺得洋蔥配落碗米線到就唔太夾因為其實呢到嘅湯係好清嘅豬骨湯底，係似家的味道嘅果種清而不淡，可以想像下屋企煲湯，清雞湯或者豬骨湯落洋蔥嘅話就係唔太夾，反而幾時會落洋蔥？就係羅宋湯、蕃茄薯仔湯呢d本身味濃，需要透過洋蔥嘅甜黎做到個balance所以呢碗米線有洋蔥，就唔太合我河車講番碗米線，米線質感偏淋但未至於一夾就散，所以唔算overcooked，但如果好似我咁個人口味係鐘意爽身彈牙嘅，可能就唔太啱喇:)臭豆腐，相傳起源嘅故事同芝士差唔多，都係誤打誤撞將d野擺到發酵(臭)左，又有烈士食完發覺好好食，就發揚光大其實臭豆腐有好多派別，港版、中國大陸版、台灣版都有差別當然我地鐘意食嘅都係食開港版先試埋其他版本嘅，而呢到都係港版臭豆腐，黃皮乾身冇落醬汁落單前職員已經同我講，未夠時間會唔夠臭，有少少偏酸問我接唔接受？講真，我好欣賞呢間鋪嘅做法，先小人後君子，講到明話你知今日出品係唔夠臭你唔好食完嫌我唔臭呀好，我就鐘意你夠坦白，一於試試佢！拿，炸野不嬲個大原則都係即叫即炸熱辣辣實冇死，咁呢到小店就基本上唔會出事上枱的確聞落唔算臭，不過“香”味係有嘅食落去都係外脆內軟，先係有淡淡嘅臭味然後就係好薄嘅發酵酸味，食完都仲係有餘韻講真呢碟臭豆腐係收貨嘅，當然我一定會黎再試一次所謂夠時間嘅臭豆腐先可以再判斷真實嘅水準啦，不過以佢地包左底講到明嘅情況下，呢碟臭豆腐，收貨嘅總括黎講，小店嘅環境大家唔好要求咁多，熱門時間黎我諗都要等一陣，不過以麻辣雞同個湯頭黎講，水準絕對係有，值得大家一試…Read More

是咁的~早排叫外賣嘅時候見到有間米線無論係個名定係款式都同我喺元朗食開果間好似所以都懷疑過係咪分店黎今次得閒就專登過黎堂食睇睇啦鋪頭位於街市側邊，喺一個小小嘅foodcourt入面嘅細鋪仔，都唔算難搵雖然店內面積唔大但都坐得舒服嘅睇睇個menu就覺得應該同元朗果間係無關係掛咁我就叫左碗招牌麻辣(bb辣)跟炸豬扒:) 一黎就梗係試下個湯先啦咦，呢到嘅湯香得黎又好清唔會好咸好濁，簡單講就真係食完唔會口乾相信餐廳個清湯係冇落味精bb辣嘅麻辣味唔太夠，如果本身都食到小小辣嘅相信要叫小辣先夠味招牌米線入面有好多菇菌鮮冬菇、雞脾菇同木耳絲 特別係木耳絲夠曬多令到碗米線生色不少口感爽脆同米線嘅腍滑係相得益彰不過如果食開爽d米線嘅朋友仔就可能要喺落單果陣講聲喇另外d甜酸菜都係好出色，味道啱啱好唔會過咸或者過酸炸豬扒係跟埋嘅餸 唔洗加錢另外都有幾款野揀嘅不過呢到嘅豬扒應該用左豬肉眼嘅位置食落比較乾身同柴雖然食得出豬扒有醃過味道尚算惹味但個肉質真係扣唔少分即炸嘅豬扒最緊要係外脆內軟兼有肉汁呢點就要改善下喇:)總括黎講，呢間米線都算幾好食同抵食50蚊有找食到豬扒米線飲埋凍飲兼且碗米線嘅湯底都幾出色 我覺得絕對值得一戰啦不過餐廳方面真係要改良下豬扒嘅部位或者製作方法喇…Read More

是咁的~ 呢日同女朋友仔喺屯門區打等夜晚想食打邊爐但又唔想食牛x果d日式邊爐放題，想搵d平平地嘅選擇搵搵下就搵到呢間酒樓有做火鍋放題地點雖然唔係太就腳但勝在價錢抵星期五晚正價時段都只係168全包啫係免加一！仲可以食埋任食雞煲不過我地得兩丁友食唔到咁多野所以都係直接打邊爐算:)除左火鍋配料紙上面可以剔嘅野食之外仲可以喺出面拎好多火鍋嘅配料（牛栢葉、水魷果d）同埋野飲其中包括一堆熟食炸物 而且全部係新鮮炸起我地試左炸多春魚 炸海鮮卷 炸蝦角 全部都唔錯而且間中都見到職員會喺廚房攞新野出黎refill 所以真係新鮮製造:)Menu上面可以寫嘅野食都唔算少 肥牛 羊肉 豬呢d一定有，仲有包埋脆肉鯇片同骨腩呢個價錢都真係算性價比唔錯喇至於食物質素方面，當然唔好期望可以同出面268一位嘅做比較啦大家可以當係以前冇連鎖火鍋專門店果陣只係得酒樓會做任食火鍋果d質素但佢勝在計埋熟食其實都好多選擇樣樣嘅質素都平均最驚喜係脆肉鯇片，超大片 而且夠曬爽脆 鐘意食魚嘅必食雖然今次嘅食評簡簡單單 但其實正正就係酒樓打邊爐嘅特色簡簡單單打番個邊爐有時唔係人人都想俾2、300百打個邊爐又要逼自己為左回本係咁食肉呢間酒樓應該target街坊生意為主見到職員同熟客都打成一片不過最開心係d職員個個都開開心心 服務態度又好好 對我地呢d生面口佢地都好好招呼咁好招呼但又可以一個價錢全包唔洗加一如果大家有經過呢頭 又想簡單打個邊爐真係歡迎黎試試…Read More

是咁的~ 好耐冇寫過食評今次遇到好西決定要再次出山因為有事慶祝所以早左一個月已經訂左黎天海到食，之前一直都有聽講過天海係由日本師傅主理所以一直都想黎試試天海做緊平日晚市優惠，$500一位都可以食到omakase，呢個價錢都真係幾吸引嫁Omakase係由日文"任せる"(makaseru)演變出黎，有住委托嘅意思，簡單講啫係"你話事"咁解，所以而家menu上見到嘅野食係會隨住師傳因應食材時令而改變嫁。一入座職員會問你飲咩，而同一時間師傳就會準備食材，食omakase最重要係可以近距離欣賞到師傅熟練嘅手藝，個人覺我係一種享受同埋係對師傳一種尊重黎前菜係南瓜肉碎南瓜煮到好淋而且食落好甜配合埋肉碎嘅咸香，味道好夾好醒胃第一道就係炸蝦天婦羅呢一樣簡直係天海嘅Signature炸漿薄脆，蝦嘅鮮甜味十足而且一d都唔會好乾好柴，保持到彈牙口感。每一件上枱果陣都會有職員(廣東話)講番係點天婦羅汁定係點鹽食，呢件海老就係點鹽，而我覺得最正係用手(食指同母指)夾起少少鹽，然後手指前後捽咁樣灑d鹽落去，咁樣比起成件夾起去點更加均勻，唔會食落突然覺得有啖咸左d，灑d鹽上去令到件海老更加鮮甜，好正第二件係魷魚呢件要好小心因為係超級熱亦都係灑鹽食，一樣係會帶出魷魚嘅鮮甜，而且食材新鮮所以同時食到炸漿嘅酥脆同魷魚嘅爽脆，係雙重口感呀！第三件係一款白身魚(而我唔記得左咩名，應該係沙鑽)，呢款魚開頭入口比較輕盈清新，但慢慢食落去都有幾香嘅魚味，白身魚黎講係絕對合格嘅味道跟住到冬菇呢件菇一定俾你地想像中好食，菇味好濃又有菇汁(唔係廢話)，呢件點天婦汁係非常好食，完全發揮到件食材菇之後係另一款蔬菜，豆兩款蔬菜係一樣咁出色，呢款豆好脆好甜跟住係帆立貝天婦羅配山葵鹽呢件食材係非常高質，而且好講炸嘅時間，好易過時就變柴，炸唔夠時間又會唔夠熟，所以呢件係食師傳嘅工藝多過味道，講真個人覺得帆立貝點都係刺身先食到最鮮甜嘅果一面再黎就係三文魚，呢到係兩人份量黎，呢件天婦羅整嘅步驟要煩多少少，炸完之後師傳係需要做resting，相信係用時間俾餘溫去煮三文魚最中心嘅位置而唔直接延長炸嘅時間去避免三文魚肉變得比較乾同柴。呢件上碟果陣已經淋左醬汁所以唔洗要去點盬/天婦羅汁，味道亦好好，保持到三文魚香之外仲可以keep到有肉汁，估唔到三文魚都可以咁樣整做天婦羅最後登場就係穴子，亦啫係海鰻，而平時經常食到嘅鰻魚係淡水魚黎，所以佢地食落口感都好唔同，穴子係好綿滑又帶淡淡嘅香味，天婦羅嘅做法係將穴子口感帶到另一個層次，酥脆同綿滑同一時間呈現面前，鐘意食穴子嘅人係必試Menu上最後嘅主食係飯，今日個菇飯幾特別，用到薑汁去整，不過個人都麻麻地薑喇呢個係壓軸重頭戲和牛壽喜燒，呢樣off-menu，需要訂位果陣已經要預訂(兩位起)，唔係黎到想食都冇人幫到你喇兩個字﹕必食！和牛非常極之咁靚，放入口係化開牛味濃而且好重油香，放入口果刻包你好食到講唔到野有人話點解omakase賣咁貴，我覺得除左食材靚之外，最重要係食果種匠人精神。日本傅統一個壽司師傳係要由執頭執尾開始做幾年先一步步去做準備食材果個，隨時用上10年時間你先可以握第一件壽司俾客食。天婦羅師傳都係一樣，一炸就係一生，一生懸命，或者唔係人人能夠理解，但佢地都係會繼續專注自己嘅工作，就睇下有幾多知音人去賞識佢地喇:)…Read More

是咁的~呢個品牌嘅拉麵店開張之後都好受歡迎，聽講佐敦店仲經常都要排隊等位，今次同女朋友仔包黎到土瓜灣，明知呢邊比較容易有位就梗係去試下啦中午時段黎到果然不出所料係唔洗等直接入，入到去其實已經嚇一嚇平時經過完全想像唔到入面個格局竟然係咁有格調雖然裝修幾靚但食評嘅重點就梗係野食啦:)拉麵款式都有唔少選擇最後就決定叫一碗招牌雞白湯拉麵同一碗黑蒜醬油拉麵雞白湯拉麵一上枱職員都會好細心咁講炸牛蒡要儘快食，咁唔洗講大家都知係怕擺耐會浸淋左啦炸牛蒡係日本居酒屋入面傳統常見嘅佐酒小食，牛蒡本身味道甘甘苦苦咁，炸左之後香口左苦嘅感覺會減低左，真係會愈食愈過癮，唔難想像點解炸牛蒡會係佐酒小食一碗拉麵個靈魂就喺個湯頭到，呢款招牌雞白湯飲落好順滑，飲到好濃郁嘅雞湯味:)湯頭順滑得黎有煲好耐嘅雞湯果種質感，非常出色嘅拉麵湯底拉麵質地彈牙掛湯力足夠，兩者配合得好好兩塊雞胸肉，用慢煮嘅方法去逼出雞肉嘅鮮味，而且慢煮亦隱藏左雞胸肉又鞋又韌嘅缺點，呢到揚長避短咁去處理雞胸肉真係非常聰明，值得一讚至於叉燒，相信係為左避免醬油叉燒嘅濃味掩蓋左呢到最大賣點嘅清湯，叉燒亦專登用比較淡味嘅處理手法，以接近白烚嘅方式去處理，但呢片叉燒油脂度唔夠，咁樣處理反而食落既無叉燒肉香亦冇油脂香，所以片叉燒就麻麻地喇女朋友仔嘅黑蒜醬油拉麵，一上枱一定係好香嘅黑蒜味呢個係所有黑蒜乜乜乜都有嘅效果，真正好食嘅黑蒜湯一飲就分得出，呢到嘅湯真係好出色，黑蒜湯飲落第一啖唔係突兀嘅黑蒜味，而係醬油味之後先慢慢有黑蒜嘅香、甜味滲出，充滿層次感出面好多所謂嘅黑蒜拉麵都係直接喺湯到滴黑蒜油，嚴重d就落黑蒜粉去個湯到，呢種做法嘅湯只係做到個形做唔到個神，聞落係就有黑蒜味但飲落個味好突兀飲得多仲可能會覺得好膩但呢到嘅湯明顯地係落足心機功夫，淆湯時係直接落真正嘅黑蒜放落去淆，飲落好自然同樣啦，咁出色嘅湯配合埋掛湯力十足嘅拉麵，呢碗野同樣都係冇得輸:)總括黎講，金鶴嘅拉麵非常出色，以呢個質素加上餐廳嘅環境黎計，價錢亦算合理聽講呢到嘅鰻魚飯好出色，睇下有冇機會食下啦:)如果大家喺其他區成日因為太多人食唔到金鶴嘅話就非常建議黎到土瓜灣呢到，唔洗點等位得黎又可以探索下舊區呀嘛…Read More

是咁的~有日平日同女朋友仔黎到尖沙咀呢邊training，搞掂之後諗住食餐好嘅再去睇戲，前果兩次都喺另一間分店見到師傅喺到切原條藍鰭吞拿魚，好似睇show咁所以就對呢間野好有興趣喇今日一於黎到厚福街呢邊試試呢到嘅刺身飯啦呢碗叫築地極上海鮮丼，特價時段先做緊158見咁抵梗係要試下啦:)原粒帶子非常厚身，口感緊緻彈牙，好鮮甜三文魚籽份量多，調味適中唔會過咸牡丹蝦大大隻，食落未至於非常肥美甘香但都新鮮嘅蔥吞拿魚蓉未至於好肥美但都食到吞拿魚嘅魚油香:)磯煮鮑魚彈牙但略厭唔夠入味聽講以上呢幾款都係鐵膽，再配上三款當日比較靚嘅刺身就造就呢款刺身丼喇:)今次我遇到嘅分別係：劍魚腩 - 呢款刺身比較難處理，因為劍魚油脂比較多，捉左上黎如果處理得唔好就好易變味繼而變壞，特別係喺油脂最多嘅腩位開始先，所以劍魚由捕捉，放血，冷凍處理都要做得好，呢到嘅劍魚腩攞貨嘅來源應該幾靚，肥美甘香無腥味金目鯛 - 其實餐廳冇話我知果三款係咩，我都係憑自己經驗黎判斷，上面講嘅劍魚腩係100%肯定，而金目鯛就9成肯定啦，應該都係佢嫁喇，鯛魚呢種魚嘅魚味比較淡肉質亦比較實，鐘意食嘅人就貪佢果陣淡香，好清爽，但金目鯛有個特別嘅地方就係將佢連皮稍為火炙一下，皮下嘅脂肪會熔為魚油同魚身化為一體，咁樣食就係最正喇而呢到嘅金目鯛就正正係有輕輕燒過，食到魚油香又有鯛魚果種清香最後果款我都唔肯定係咩黎，有可能係伊佐木亦有可能係劍魚嘅背肉，不過真係唔肯定但想講呢款魚都好好食，鮮甜冇腥味肉質爽口而且亦有赤身魚普遍都有嘅香味女朋友仔就食自選丼，啫係車仔麵形式咁點幾款鐘意食嘅餸當中點左中拖羅，不過呢到嘅中拖落刀有誤差，腩位部分（粉色）偏少赤身位比較多，所以食落未至於好有油香只有吞拿魚嘅肉香，雖然都非常新鮮但唔夠油香就失色不少另外都有叫帶子但自選叫嘅帶子好明顯比跟set嘅帶子薄身，帶子一薄除左影響口感亦會影響食落嘅鮮甜程度由於果日冇鰻魚就叫左穴子，穴子我幾鐘意食，佢雖然冇鰻魚果種焦香（都係鰻魚汁+燒嘅效果）但佢肉質係嫩滑細緻，正蟹鉗就冇乜特別，唔夠鮮甜火炙三文魚呢d冇得輸，燒過嘅火文魚係幾咁香幾咁入口即溶相信都唔洗著墨太多最後就係兩個丼都有嘅玉子燒，玉子燒其實係一門好高深嘅學問，喺日本一個玉子燒師傅可以用上十幾廿年時間去不斷練習先可以做到一份一流嘅玉子燒，當然啦我未至於要求咁高，不過呢到件玉子真係普通，蛋味唔夠亦比較老身....總括黎講，我覺得如果用特價158就食到頭先講果份極上海鮮丼我覺得非常抵食，車仔麵嘅方式亦可以令大家多一份選擇，餐廳整體嘅質素都幾好用料新鮮製作方法亦幾好，喺厚福街呢條咁同聲同氣嘅美食街大家都好應該黎捧場…Read More

是咁的~呢排黎到尖沙咀呢邊上堂，今日有時間就搵下附近有咩同聲同氣嘅好西食啦，就俾我搵到呢間台灣麵中午十二點半黎到都好多人，等左15分鐘就入得，鋪頭幾有格調（門口睇勁似食日本野），裝修得幾好野食方面我叫左份川味紅燒嘅三寶牛肉麵，要食梗係食足料d呀嘛:)據聞鋪頭叫六両三嘅原因就係選用比較粗身嘅麵加埋湯同餸係有六両三咁重，經小弟屈指一算啫係236gram嘅重量，一睇就知唔止啦（我諗應該唔計湯掛）無論食咩麵，最緊要一定係個湯頭，湯汁唔好味嘅話其他野點靚都冇意思，呢到食牛肉麵可以揀川味紅燒同麻辣，其實兩款都源於台灣嘅正宗牛肉麵味道台灣牛肉麵最初版步只係得紅燒牛肉麵但因為當年嘅台灣係充斥住外省人，紅燒牛肉麵呢種偏上海風嘅味道未必人人接受，慢慢就演變出廣東派嘅清湯牛肉麵、四川派嘅川味牛肉麵、閩南派嘅蔥燒牛肉麵等等，無話邊個先係最正宗，大家都係由住喺台灣嘅人研發出黎講完經，呢到嘅湯底係濃郁但唔會過咸，飲到肉香但唔會油膩，配合埋川味嘅辣個湯係非常好飲呢到用嘅麵係粗身類似上海麵果種質地，掛湯力十足彈牙得黎可以連埋湯咁食，perfect:)配料方面叫左三寶，啫係有齊牛展、牛筋同牛助條牛展厚薄適中，太厚容易鞋口咬唔爛，太薄又冇味冇口感，呢到嘅牛展保持到適當嘅口感而且鹵得好入味牛筋炆得好淋，但唔會過火削曬變成一pat野，保持到彈牙漿口嘅質感牛助條選材位置好好，肉筋肥膏三者比例啱啱好，炆得夠淋夠入味得黎仍然食到牛助條筋膜嘅爽脆，油脂嘅香亦冇流失，正呀總括黎講，喺香港食台灣麵唔難搵，但具質素嘅台灣麵就唔係咁容易，鋪頭位於尖沙咀相信都係價格比較高嘅原因，但一分錢一分貨，絕對值得大家黎試下…Read More

是咁的~呢個晚上黎到尖沙咀但由於夜晚講好左要食某一樣特別嘅甜品關係，所以去到晚市時間就諗住同女朋友仔簡單食下，費事太飽啦然後就搵到間喺附近嘅黃店係食泰國船麵嘅，食麵非常啱而家呢個情況，所以一於就去試下啦鋪頭位於方便嘅厚福街，成條街都好多野食而且都係同呢間船麵一樣，好多都係同路人小店，睇黎下次黎呢到就多好多選擇喇果陣去到好似7點半左右，所以都等左一陣，雖然鋪頭唔算大不過流轉速度都好快等左十分鐘就得喇，因為要留肚所以叫左一碗麵同d小食兩份分就搞掂:)泰國船麵細細碗，唔好搞錯我唔係要指責佢嘅份量:)而係傳統船麵份量係唔會太多，船麵顧名思義係真係同船有關，泰國其中一樣最出名就係歷史悠久嘅水上市場，以前嘅人喺水上市場食野但又擔心會倒瀉（搭船幾咁浪相信大家都知），所以喺船上食麵係會做到細細碗方便食講完歷史，講下味道方面啦~呢碗船麵味道非常好，首先係湯頭非常濃郁，係有少少似鹵水汁果種香但未至於咁稠咁濃，而且飲到淡淡嘅香料味等比較獨特嘅香味相信鋪頭煮呢個湯時都有加到八角、香茅、檸檬葉等嘅香料調味傳統嘅泰國船麵係會用上牛血/豬血去整個湯令層次感更強，呢到唔肯定佢有冇加但個湯已經非常好飲:)其他食材方面都係好食嘅，雞翼都炆得好淋肉丸亦彈牙唔會死實或者成口粉舊豬油渣乾身，食落香脆有油香，做得好出色不過由於船麵嘅餸其實黎黎去去都係果d，有d似車仔麵、艇仔粉咁，餸係好食但唔會去到好驚艷，但個湯頭已經非常值得大家黎食叫左兩串串燒，火喉都控制得幾好:)但牛舌就未至於好靚，所以食落冇果種彈牙爆肉汁嘅感覺，不過不失啦烤雞就出色嘅唔會鞋口總括黎講，有時想食碗麵但又唔想太求其，對麵食有d要求嘅非常推薦大家黎呢到食船麵:)價錢唔貴又好食又同聲同氣，唔係唔支持掛！？…Read More

是咁的 肺炎有所回落於是終於可以同女朋友仔拍下拖出去食下好西喇今次黎到大埔就決定支持一下好耐之前食過嘅同路人小店，由於節目緊逼所以我地12點鬆d就到左，餐廳開12點所以可以直入，不過都已經爆左8成，好開心可以有唔少人支持佢地太耐冇拍拖就決定豪食叫左一個set lunch扒餐，一份小食白酒煮青口同一份意粉Set lunch肉眼扒率先登場，跟餐叫左薯條，薯條即叫即炸非常脆口 薯味未至於好重薯味但都係好食:)主角肉眼扒水準不變，依然係咁好食，肉質淋得黎係自然嘅，唔係用鬆肉粉整淋果種，食落好有肉香，加埋有條肥膏喺頂真係好香口而且呢到煎扒嘅火喉都控制得好好，牛扒厚薄適中煎嘅時候亦唔會過熟導致柴口，啱啱好keep到肉汁肉味另一個主菜就叫左煙三文魚黑松露意粉，賣相非常好而且份量都好足夠，聞落都好重黑松露味初步睇的確吸引嘅:)不過可惜嘅係食落黑松露味唔強，望落其實都好少松露粉相信炒意粉嘅時候應該係用黑松露油，但應該因為落嘅份量同時間太遲嘅關係，黑松露味未夠時間逼出黎 有形冇實，可惜另外印象中嘅意粉都係比起以前差左，今次食落有好幾啖都係有種漿住好糊狀嘅口感，雖然睇落賣相冇問題但食落出現呢個都幾嚴重嘅失誤，意粉烹調時間過長喇，口感扣曬分不過除左份量同賣相值得讚之外，煙三文魚同意粉個汁都出色嘅到白酒煮青口喇賣相都係出色嘅青口size適中食落鮮甜，用料係OK嘅不過敗筆位今次就係個汁到喇，個味入唔到落青口到，只有單獨飲汁嘅時候先食到白清味但青口係一d白酒味都冇，相信今次就係落完酒焗青口個時間唔夠耐，逼唔到個香味出黎，所以呢碟白酒煮青口真係有d貌合神離....可惜可惜叫左杯凍榛子朱古力，呢杯真係好飲嘅，好香榛子味，朱古力味都好重，好味總括黎講，拉上補下之後整體評分唔算好高，但單獨黎講份牛扒係非常出色，都推薦大家黎試嫁！…Read More

是咁的~機緣巧合下同女朋友仔包黎到旺角，其實一直都想同佢一齊試呢間不過之前就因為各種原因冇黎到，今次難得兩個人夜晚喺旺角食飯，一於黎試下啦:)其實呢到最出名係食burger, 但由於我地兩個都仲係飽飽地所以就唔係咁想食burger喇之前食過間墨西哥菜嘅餐廳都發覺墨西哥菜幾特別都幾好食，所以最後決定食墨西哥菜啦因為真係飽飽地，所以叫左一份burrito一件Taco同一份水牛城雞翼首先黎到嘅係雞翼水牛城雞翼嘅做法五花八門，而且辣度都係各有各做，呢到嘅雞翼就係用烤焗嘅方式而唔係炸嘅方法，咁做雖然冇咁酥脆但優點係冇咁油膩亦冇咁熱氣餐廳先係醃好左d雞翼然後再去焗，既能夠保存雞翼肉汁而醃料亦唔會咁易流失水牛城雞翼嘅辣係愈食愈滋味，愈辣愈想食多隻果種惹味！Taco，係一種好傳統嘅墨西哥夾餅，好多時喺香港見到都係用粟米脆片夾住d餡咁食，不過呢到有軟餅就梗係食軟餅皮，因為我鐘意呢種皮煙韌嘅口感，而粟米脆片就好似一路食佢d餡一路食薯片咁怪怪地呢到嘅餡可以自選，咁我地揀左烤牛肉，貪佢有股油香味呀嘛:)而傳統嘅Taco除左肉仲會有好多配料，例如係蕃茄、包心菜絲、唔同嘅醬汁等等而呢到嘅Taco都做得到，用料幾出色食落清新得黎又有主角牛肉嘅肉香，正呀最後呢份就係Burritos，亦啫係墨西哥捲餅，而佢同Taco最大方別就係份量同做法，佢地入面嘅料可能會差唔多但taco係用皮就咁夾住黎食同burrito就要捲曬成舊好似壽司卷咁食，另外burrito就會有可能有豆或者飯喺餡入面卷黎食，所以其實一舊burrito已經係非常飽肚嘅野黎，不過呢到嘅burrito就有少少反傳統喇，因為飯係分開上嫁本身已經唔太肚餓嘅我見到份burrito上枱嘅時候就更加覺得飽飽地喇餡料方面我就揀左手撕豬，整體咬落都好有肉汁而且手撕豬都唔會鞋口，幾好味！總括黎講，喺香港真係想食乜野菜式都得，而且質素亦唔會太差，好似呢到咁墨西哥菜同美國菜嘅burger就可以喺同一間餐廳到食到，雖然餐廳坐位唔算多但價錢公道，味道亦唔錯，仲要係同路人添大家可以考慮下喺“美軍來了我帶路”之前黎呢到試下美墨菜呀:)…Read More

是咁的~壽司郎進軍左香港都幾個月但實在係太受歡迎根本就訂唔到枱一直都想試好耐今次終於的起心肝同女朋友仔包黎到黃埔分店walk-in搏一搏啦十二點前黎到但一等就等左個半鐘頭喇入到去就即刻瘋狂係咁禁野食，其實就唔止叫左下面咁少嘅不過篇幅會太長所以下面係重點d嘅野食油甘魚壽司在場燈光影響左手機嘅效果，實物份油甘魚充滿光澤食落亦好香魚油味，唔少人驚食油甘魚因為會有陣腥味，而腥味一般係因為處理得唔好或者唔新鮮先會咁，但呢到就完全冇呢個問題:)唔記得真名叫咩嘅燒牛肉壽司，係燒得非常之香，燒左嘅牛肉d油逼曬出黎食落係好甘香不過如果塊牛肉熱辣辣咁嘅話就會更香更好食喇鰻魚壽司食鰻魚好基本就係要冇骨，呢樣根本野呢到都做到証明處理鰻魚嘅功夫都做得唔錯:)而且鰻魚厚薄適中，魚肉細緻嫩滑，連埋彈牙嘅鰻魚皮~呢到嘅鰻魚壽司好出色蟹腳壽司（真名又唔記得）呢個幾驚喜，因為一般呢種壽司應該係會灼熟條蟹柳位，或者至少都半生熟不過呢件壽司就完全係生蟹腳，所以食落嘅口感就並唔係一絲絲蟹肉嘅質地而係類似布甸狀嘅口感，配合埋淡淡嘅蟹肉清香，食材非常新鮮:)呢個係一件頭嘅國產牛壽司牛肉好嫩滑但肉味唔濃反而上面個燒牛肉更加出色，不過呢個一件頭配埋d洋蔥絲感覺都好fresh:)大拖！可以話係呢到嘅重點好似話啱啱開業果陣係17蚊件抵到痴線，就算而家賣番27蚊我都覺得性價比好高:)大拖真係充滿魚油香而且係非常接近入口即溶唯一落差就係有少少筋，前後我地叫左三件都有一件係再多d筋，不過壽司郎定位始終唔係d咩高級壽司餐廳係行平民化嘅迴轉壽司，加上27蚊呢個價錢少少筋我覺得可以接受因為佢真係好鮮甜好香海螺兩食呢個係兩種唔同食法嘅海螺一種係最原始嘅刺身另一種就係火炙:)食呢d貝類，刺身就最能夠食得出食材最原始天然嘅味道，呢隻螺係好爽脆亦有少少貝類嘅香味，加少少檸檬汁嘅話佢個貝香味會更加突出反而火炙海螺就破壞左爽脆嘅味道，熟左嘅海螺口感偏淋，失去左螺嘅獨特性，都係生嘅啱我多d深海池魚壽司池魚係一種魚腥味比較重嘅魚，所以一般都會係薄切而壽司郎嘅池魚壽司都有加薑蓉同蔥粒僻腥，不過份量掌握得唔好所以食落淨係食到薑味根本食唔到池魚嘅魚味，薑呢d咁重味嘅野其實真係少少一點就已經好足夠所以我食第二件嘅時候就撥走曬d薑先食，食番個原味道呀嘛:)不過呢到嘅池魚冇乜特別，唔腥但魚味亦唔夠，普普通通咁啦鮮鮑魚壽司聽講呢個係期間限定呢個真係幾正，雖然鮑魚本身係d冇乜味嘅海產黎，但單從光澤度同爽口嘅口感都食得出用料嘅新鮮呢個都值得一試赤貝壽司呢個係我幾鐘意食嘅一種貝類因為好鐘意佢獨有嘅血腥味:)赤貝亦係行爽口路線嘅貝類，佢嘅爽脆程度低過上面講嘅海螺但又脆過頭先嘅鮑魚，而呢到嘅赤貝血腥味比較重，如果本身唔鐘意d味道重嘅朋友仔就要注意喇北寄貝壽司佢就同頭先嘅螺、鮮鮑魚、赤貝係行完全唔同嘅路線，北寄貝口感係屬於彈牙，而且呢到嘅北寄貝挺身肉質厚，如果本身係北寄貝fans嘅話一定要食！最後一款要講嘅就係帶子喇:)呢到係用上日本產嘅帶子，特點係肉質厚味道鮮甜，新鮮嘅帶子唔會好淋，食落係會有一種彈牙厚實嘅感覺，帶子呢個位係屬於佢嘅肌肉位，用黎控制殼嘅開合，肌肉如果係淋嘅話就一定係代表唔新鮮，呢個原則基本上適用喺所有貝類刺身到，因為通常食開嘅都係佢地用黎控制開合嘅肌肉位，一定係有d肌肉纖維先代表新鮮嫁總結一下，壽司郎嘅用料係好新鮮，唔少食材都註明日本係原產地，單憑呢點用呢到價錢食到咁多日本新鮮食材已經好抵，佢地嘅壽司飯當然都係用上日本珍珠米，而且通常呢d講求速率嘅壽司店握壽司嘅力度都掌握得唔好，好易一夾就散，呢到嘅問題唔算大當然遇然都會有兩件係好易散但整體平均黎講呢方面都係合格嘅當人地集團要放棄年青人嘅時候我地係咪都應該要轉移下習慣呢，雖然呢到排隊嘅時間一定長過果到但類近嘅價錢可以食到質素更好嘅壽司，加上壽司郎喺香港嘅業務只係屬於初期，只要keep住咁多人幫襯就一定會再開多好間分店！到時就睇下邊個放棄邊個喇…Read More

是咁的~今時今日香港疫情搞到咁，而香港相對都仲算唔係爆到好大鑊都係全靠香港人自己嘅功勞而我自己都好耐冇喺週末週日出街拍拖食飯...今日平日番工lunchtime同女朋友仔出左去食就遇到一間同路人嘅車仔麵小店而且味道上都好好就寫篇食評支持下佢啦:)政府嘅四人一枱成間店坐一半嘅規矩一出，打擊最大一定係黃店（試諗下好似敏華/美心集團呢d業務又廣鋪頭又大就算坐一半佢傷極一定冇黃色小店咁傷）所以有機會喺出面食都希望大家搵番啱自己嘅鋪頭呢間車仔麵好似係新開而且真係好細開頭都冇俾太大期望諗住是旦食個麵，點知有驚喜:)女朋友仔叫左牛根、牛柏葉同鴨胸米粉+沙嗲醬車仔麵個人覺得最緊要除左食材就一定係個湯底，呢到嘅湯底好正:)佢係直接用鹵水汁做湯底當然一定有校淡左啦，就咁飲鹵水汁真係腎虧都似不過呢個湯一飲你係好明顯知道自己飲緊鹵水汁：月桂葉、桂皮、八角、冰糖呢d味全部都出到黎而且校個咸淡味都好正常，有鹵水香但又唔會太咸飲完亦唔會好口乾啫係冇咩味精，好正講完湯底一定要講食材啦，牛柏葉好彈牙爽口，口感偏向未漂白前嘅黑柏葉相信佢嘅牛柏葉唔算浸左太耐化學野，幾好牛根炆得好淋好入味好有膠質但又未至於淋到一pat溶曬咁重點係鴨胸，好多食店用緊鴨胸都係講緊超市買到果種急凍煙燻鴨胸肉但呢到嘅鴨胸肉竟然唔係用煙燻果隻係用新鮮鴨胸肉！淨係呢點已經睇得出呢間小店嘅心思！:)新鮮鴨胸肉同煙燻鴨胸肉最大分別就係個肉質，完全冇得比，煙燻鴨胸肉個肉質似d火腿腸仔咁完全同新鮮肉嘅肉質冇得比較至於我就叫左魷魚、牛肚同枝竹魷魚就同一般嘅車仔麵店都一樣用水魷但口感爽脆都係冇比化學品浸淫太耐嘅口感黎至於牛肚就用上左草肚而唔係金錢肚，草肚口感比較爽，加上呢到嘅鹵水真係做得好出色所以d牛肚頭先嘅牛筋全部都好入味！枝竹就真係冇咩特別喇咁就冇咩好講都係平常嘅枝竹不過呢到車仔麵雖然好出色，但個人覺得份量真係唔太夠，三餸麵都四十幾五十蚊一碗但麵底嘅份量真係太少喇希望餐廳可以改善下:)總括黎講，呢間小店好有心，食材出色湯底好好:)份量上有待改善但新開嘅餐廳黎講都好值得期待加油…Read More

是咁的~今日係同女朋友仔嘅四週年紀念日，Chow chow cafe係對傻妹特別有意思嘅地方所以今次都揀喺呢到食我地嘅週年飯啦！餐廳因為係星期六嘅關係，會限左客人喺兩個時段入：1800同2000，六點對我地黎講實在太早所以就揀八點啦:)雖然近排香港都受到武漢肺炎嘅影響但chow chow呢到夜晚人流都好旺！全場無論室內定室外都爆滿，不過呢到質素本身都高嘅~爆滿都唔意外Set dinner有埋湯，沙律同餐包~全部都唔馬虎，今日嘅湯係南瓜湯呢到南瓜湯嘅質感控制得好好，稀稠度適中，灑左少少白胡椒粒都令到南瓜嘅甜味更出，唔錯呢到餐包永遠都係有整熱到先上枱，食果陣一定唔會凍冰冰，如果可以再熱d溶牛油嘅效果就可以更好喇不過餐包個質地都軟熟嘅沙律就係少少沙律菜撈最正路嘅胡麻醬啦，值得講下嘅係有幾片腸仔，係用蒜蓉煎香過嘅脆皮蜜糖腸，好味呀我就叫左份煎鵝肝配牛柳跟薯菜鵝肝煎到好香，名副其實係入口即溶，一咬落去果個鵝油香真係正到痺不過呢種食材始終係種唔人道嘅食物我平時都好少食我諗對上一次食應該兩年前lu:)牛柳我叫左五成熟，靚嘅牛叫五成熟就最能夠食到佢嘅牛味，呢到嘅牛應該係來自美國果邊，美國牛嘅特色係脂肪唔多油香味雖然唔會太重但勝在肉味濃而今次食嘅牛柳更加係牛扒入面最軟腍嘅部位，脂肪含量亦係比起西冷同肉眼更少:)而且五成熟就更加能夠食得出牛肉鮮嫩嘅肉質！正呀伴碟嘅薯條都係新鮮炸起熱辣辣，薯味夠呢到嘅醬汁都OK唔會太重口，黑椒汁唔會太咸點完都仲食到牛柳嘅肉味，芥末醬亦唔會太濃味唔錯！女朋友仔就叫左銀鱈魚餐，本身係跟白飯嘅但問左餐廳話可以轉意粉呢個餐個感覺好似小朋友食嘅兒童餐咁好開心有沙律、冷盤同生果盤，真係麻雀雖小五臟俱全:)講左個意粉先，意粉唔係好hea嘅白烚（始終本身係白飯）或者茄汁意粉，而係用蒜蓉炒香嘅蒜香意粉，意粉軟硬到掌握得好好唔會過硬或過冧，配合埋淡淡嘅蒜香味，盡顯功架！:)至於主菜嘅銀鱈魚都好出色，以前都喺其他食評提過好多餐廳會用鱈魚扮銀鱈魚黎賺到盡，好多人都知道銀鱈魚嘅菜色價錢都有番咁上下例如係銀鱈魚西京燒、香煎銀鱈魚等等，所以叫得銀鱈魚俾左咁嘅價錢當然唔想俾人厄啦，而呢到嘅銀鱈魚都係貨真價實！至於點分？之前嘅食評都有講過不過都可以略略再講下，最主要可以從外表同口感去分，銀鱈魚嘅魚皮比較黑魚鱗細密所以魚皮嘅紋理都會係比較幼密，而鱈魚就相反，魚皮紋理比較大顏色亦比較白:)至於口感方面，銀鱈魚魚油比較多所以口感相對鱈魚都會幼嫩d香d:)而chow chow呢到就用上正宗嘅銀鱈魚，拍左少少生粉之後用半煎炸嘅形式去煎香魚柳，咬落外脆內軟魚皮更加好似食緊薯片咁鬆脆而且又有魚皮獨有嘅魚油香，屬於高分之作！雖然話銀鱈魚價錢比較貴，不過呢個set都要200蚊個人覺得比多塊魚會抵食d野飲就叫左一杯忌廉紅豆冰同朱古力，一杯高分嘅紅豆冰d紅豆一定會煮爛但又唔可以完全溶曬，呢到亦都做到紅豆冧得黎仍然保持到一定程度嘅口感，成杯個甜度都掌握得唔錯，總之就好飲啦最後，跟餐係有甜品送，我亦都係早前訂位嘅時候同餐廳講左準備呢個小小嘅心意啦，祝女朋友仔4週年快樂總捨黎講，chowchow cafe除左係好多元朗人充滿回憶嘅地方之外，佢嘅食物質素都係非常有保証，雖然價錢略為高左d，但材料、烹調嘅方法亦有水準，未食過嘅可以去試下呀…Read More

是咁的~今日係情人節喇！近排香港受到武漢肺炎嘅影響，真係連出街拍拖都驚，但情人節始終都要食餐開心飯嘅~不過為免去d人多擠逼嘅地方所以最後都喺女朋友仔包屋企附近食呢間1523一直都想試跟住仲要發現原來係同路人，更加大誘因去懲罰下可能因為疫情嘅關係，雖然係情人節但我冇訂枱都可以喺十分鐘內入得餐牌都冇因為情人節而改曬d“情人餐”，最後我地決定叫一份沙律，一份特選美國肉眼扒同慢煮德國脆皮咸豬手跟餐會有餐湯同蒜蓉包，聽職員話呢到餐湯日日唔同今日係西蘭花湯，幾特別飲落仍然食到西蘭花d一粒粒花嘅口感幾過癮不過個人覺得可以再打蓉少少因為一粒粒嘅口感好易令飲湯嘅時候濁親，每啖湯都要再咬幾下先吞得至於蒜蓉包都好出色，蒜蓉份量啱啱好最重要係熱辣辣前菜沙律叫左煙三文魚沙律配士多啤梨果醋，份量足夠都幾抵食，士多啤梨果醋都係第一次食，味道好特別應該係用意大利黑醋溝士多啤梨汁/蓉不過個人覺得太酸，食沙律嘅時候點少少都已經夠，個醬咁特別其實誠意分十足不過配搭上有少少出錯，食煙三文魚沙律由於有煙三文魚呢種咸鮮嘅食材喺到，如果配太酸嘅汁就破壞左份沙律嘅平衡喇所以黑醋已經係最盡嘅選擇，揀番d有少少甜味嘅汁反而更好，就例如係紅酒醋、蜜糖醋、蘋果醋之類跟住就到特選美國肉眼扒配薯蓉，呢份扒真係超抵食，99蚊一份就有12安士嘅肉眼扒，性價比極高味道方面亦都唔錯唔會將價就貨，我叫左5成熟切落去個軟腍度啱啱好呢塊扒嘅厚薄適中肉味都足夠肉眼同西冷其中一個好大分別就肉味方面，西冷肉味濃但會有條大筋喺到，肉眼就啖啖肉，肉質腍但相對肉味會薄番d:)我見餐廳都有西冷食嫁，下次有機會試試薯蓉都要提下，因為份薯蓉係有撈埋少少黑松露粉一齊整，而且唔係整好個薯蓉之後先灑黑松露落去，相信餐廳係喺壓薯仔嘅時候一路落黑松露一路壓，所以每啖薯蓉都食到好香嘅黑松露味，好夾！最後就係慢煮德國咸豬手，由於一上枱果樣太吸引所以唔記得相機食先，切左幾舊先影所以張相入面嘅豬手好似甩頭甩骨咁，但事實絕對唔係咁嫁！（要幫餐廳澄清番嘛:)）點呢份豬手嘅時間，女朋友仔問左個好好嘅問題，佢問我德國咸豬手唔係炸（或者焗）嫁咩，點樣慢煮呢？相信可能有d讀者都未必知，咁其實整德國咸豬手係有事前工序，唔係就咁烤焗者炸嘅，豬手一定要煮熟左先，如果就咁生嘅攞去焗就會導致處理時間過長肉質太韌，而呢度嘅煮法就係先將豬手慢煮，咁樣肉質就可以保持到腍滑嘅感覺之後再攞去焗，就真正做到皮脆肉嫩喇而出面有唔少餐廳係直接放豬手落滾水到淥熟之後再烤，呢個方便就再於慢煮可令肉質保持腍滑口感而滾水淥熟就會令肉質死實，所以點解有d鋪嘅豬手食到硬掘掘就係咁解！呢度嘅豬手價錢都只係168比起其他鋪平但技巧更好！有食過有d餐廳嘅咸豬手肉質太鞋太韌，食完真係牙痛咁款呢到嘅豬手味道出色得黎份量亦係非常足夠，係超大隻！一個女仔係冇可能食得曬，記住佢仲有熱辣辣嘅薯條配埋嫁真係平靚正呀！不過呢大家都知德國咸豬手一般係配芥末醬，呢度嘅芥末醬應該都係自家調配，但係呢芥未味太重喇，點少少都遮蓋左食物原有嘅味道，做唔到畫龍點睛嘅效果喇，呢到有少少扣分總括黎講，呢間都係一間好出色嘅西式小店，食物質量高、煮嘅技巧亦好好誠意十足！不過醬汁嘅配搭上可能要執執喇，另外題外話係餐廳有蚊，唔知係咁啱今日定點，但我抬頭望係見到有盆謝謝左地嘅盆栽，有可能係蚊嘅源頭，餐廳就要處理下喇，始終俾人感覺都唔係咁嘛…Read More

是咁的~黎到2019年最後果幾日，又聖誕又除夕咁梗係到食好西，而家搵野食除左菜式之外都多左樣野睇，作為消費者當然有權選擇自己想幫襯嘅商鋪啦，因為商鋪嘅理念、取態而去選擇呢d就叫自由市場喇:)今次黎到港島區，同女朋友仔搵左間居酒屋試試，摸摸酒杯底作為2019嘅聖誕餐啦:)由於我地好早就黎到，基本上都係頭果兩台客人黎，店鋪鋪位唔大真係有種日本居酒屋繁忙中可以坐底食下野飲下酒嘅感覺款式都唔少嘅情況下咩都叫d試下~就叫左個魚生沙律，呢到嘅沙律好特別會有埋海葡萄食，海葡萄係一種可食用嘅海藻外型好特別好似細粒提子咁，所以就叫海葡萄，盛產嘅地方係日本嘅沖繩不過其實好多人都唔知菲律賓海域都有海葡萄嘅養殖場，本人食過喺沖繩買嘅海葡萄咁講真我講得呢碟海葡萄嘅味道又真係及唔上果次食過嘅味道，不過都係好食嘅：口感似蟹籽咬落都有淡淡嘅海鮮鮮甜味，都幾好食嘅另外魚生方面都有三文魚，吞拿魚赤身，立魚等等，全部嘅角切魚生都大大粒好鮮甜，絕對係一個開胃之選跟住叫左份帆立貝刺身，呢到應該係兩粒四切，收費就70蚊算中規中矩，不過帆立貝真係好新鮮，肉質彈牙鮮甜，新鮮嘅帆立貝刺身係會肉質厚實彈牙唔會好腍，因為帆立貝係肌肉組織黎，如果新鮮嘅一定會有某程度上嘅彈力唔會冧曬，冧曬嘅帆立貝就係死左好耐唔新鮮嫁喇:):)跟住就叫左d壽司食啦最好食係赤蝦壽司，勁大隻又新鮮爽口彈牙，赤蝦嘅鮮甜味好足，正三文魚都好肥美，而且呢到嘅壽司飯都幾好食，食到醋味又有少少黏口個吞拿魚壽司就...明明我落單嘅時候講到明係要中toro但好明顯黎到就變左赤身...算啦唯有照食囉，係幾好食嘅但我想食中拖呀嘛:(再叫左份炸軟殼蟹卷物，因為女朋友仔好鐘意食炸軟殼蟹嘅野，呢個卷物都做得好出色，上枱時軟殼蟹依然能夠保持溫度，而且卷物份量好夠，大大舊炸軟殼蟹配埋d蟹籽同沙律醬就一定冇得輸去居酒屋就梗係要叫串燒啦，牛舌同烤雞皮各一串，呢到燒牛舌真係一流，牛舌好厚身但燒嘅火喉掌握得啱啱好，唔會太乾亦唔會未熟，咬落去係軟硬適中有肉汁，食到牛舌獨特嘅騷味，牛舌真係必食，好正呀:)另外烤雞皮就稍為有d失色，烤得唔夠乾身，個人prefer燒再耐d令佢d雞油再逼多d出黎，個食落嘅口感就會再脆口d，呢到嘅烤雞皮就似燒春雞d雞皮咁，少少脆口有d咬口咁由於頭先食唔到toro就諗住叫番份吞拿魚蓉卷物，點知上枱變左做咁，真心失望，間鋪又唔係新冇理由師傅會搞唔清吞拿魚蓉係咩黎，咁個卷物都OK ge，佢呢到嘅魚生水平都幾高好新鮮所以點都唔會差，不過究竟佢識唔識分赤身、中拖、大拖、吞拿魚腩蓉呢？？話明居酒屋就梗係叫番兩杯酒啦！一杯係紫蘇葉梅酒一杯係蜜柑酒蜜柑酒酒味好薄好易入口，甜甜地係好飲嘅非常適合平常少飲酒飲唔慣重酒味嘅人，至於另一杯梅酒都好特別，都飲到梅味我都覺得幾好飲嘅總括黎講，呢間居酒屋幾有氣氛，食物質素都有保證，基於佢地材料新鮮，魚生呀壽司果d都做得幾出色，不過叫極都食唔到拖羅就真心令我失望，而且價錢唔算抵食，八折之後都要八舊水，但係佢地嘅立場都非常值得大家去支持下振興黃金經濟圈…Read More