請各位俾少少時間睇晒我成篇評價，再考慮食唔食🙏🏼P.S 用咗10幾年OpenRice第一次嬲到要寫食評今日同我喺外國返嚟嘅長輩嚟到呢間「坪洲過江龍」囍筷大排檔晚市用膳，book位嗰陣時仲話逢禮拜五六日晚市都要分兩輪，心諗一定唔差啦咁嘅時勢晚市做到兩輪。今晚因為老人家小朋友比較多，所以order嘅嘢食都係揀比較家常嘅小菜多啲，以為呢啲基本野冇死啦 七大一小order咗9樣野，埋單$1900，我可以講’沒有’一樣餸係對得住佢嘅價錢。譬如說魚仔鮮美湯(4位用)，嚟到得半盤，湯腥得嚟冇乜魚食(因為碎晒)，豆腐有一舊仔，滾湯嚟咋喎收我198+1😅。另外一碟上湯魚腐浸時菜，我地揀咗菜芯，啲菜芯好多條個菜頭都係爛發黑嘅😥 另外個海鮮泡脆飯🙂，隻蝦嘅邊係黑色嘅，啲肉係霉嘅，$329再+1，菜又係落咗嗰條黑頭菜芯呀🙂。湯個量好夠呀，但係啲飯個量呢就我額外再車多個白飯落去都唔夠分🙃我哋仲嗌咗個帶子多士，呢樣嘢係冇寫喺Menu所以唔清楚價錢，係老闆娘積極推薦我哋，仲話唔用蝦嚟整多士改用帶子係因為怕有人食蝦會敏感，咁人人都用蝦嘅時候，你唔用蝦咪就係錯囉！一啲咬口一啲鮮味都冇。雖然都冇再對你啲蝦有希望，然後38蚊+1一舊仔。芝麻雞老闆娘極度推薦後原來賣晒🙂，改嗌豉油雞，0入味，就係豉油&雞。越食我就越崩潰，我覺得好對唔住我啲外國嚟嘅親戚，人哋嚟到香港咁短時間都冇乜幾多餐可以留喺香港食，佢哋竟然嘥咗個肚皮嘅位置喺呢一間餐廳度。食咗千九蚊但七位大人都唔飽，老人家仲講笑話下次食兩餸飯好似好啲，作為後輩真係想搵個窿捐吓先。我知冇圖冇真相，對唔住我廢事影響長輩心情所以我冇下下影相,冇叫人換過晒啲唔滿意嘅餸。最後問喺坪洲住嘅朋友，原來冇乜坪洲居民會幫襯呢野，唔知哪裏來嘅自信去開分店，總之就睇路啦各位🙂…Read More
