KeroWong2852's Profile

每次嚟到都會食芝士粟米煎餃及芹菜豬肉湯餃，兩種都超好味再加上無限添加 辣菜脯及配料醬汁， 令一切都變得更加野味。而芝士粟米豬肉煎餃芝士喺半融化嘅狀態，加上煎香嘅餃子令餃子變得更惹味。 而魚湯芹菜豬肉餃子，魚湯亦非常好飲芹菜豬肉餃👍令我每次嚟都必點嘅美食👍😊…Read More

今日喺灣仔見到有間叫做🤓民初嘅餐廳出面寫住咕哩茶☕，見到個名咁得意，決定買個外賣試下。喺等外賣嘅時候，我問咗收銀姐姐係邊個國家嘅菜式，原來係廚師媽媽👵🏻的家傳味道，但帶有點點的✨星馬風味🔥，同絕對唔會落味精，全部真材實料🥘。原來咕哩茶味道好似肉骨茶嘅易入口版😋，湯是深啡色入邊有幾嚿肉排🐷，但係藥材味冇咁濃比較適合香港人口味🥰。因為我唔太鍾意濃藥材味，但這間的咕哩茶味道啱啱好😋，藥材味唔會太濃，開頭飲頭幾啖，覺得味道偏淡，但越飲覺得越濃越夠味，最重要係飲完一啲都唔口渴，證明真係冇落味精🤩。而靈魂嘅肉排🐽唔鞋而且有濃濃嘅肉味數量亦不少，點埋辣椒豉油真係一絕👑。我好期待食埋佢哋其他菜式🐷🐔，因為佢哋真係貴精不貴多全個餐牌都係得四五樣選擇，我會搵機會試曬佢，呢間小店值得支持💪👍我一定會再嚟幫襯🌈。順帶一提，我個日係閒日夜晚7點幾鐘，已賣淨一碗咕哩茶，其他啲嘢已經賣曬，如果想試嘅記得早啲過去買啦！🔥👍…Read More

經兩班唔同嘅朋友都同步介紹呢間餐廳，仲話啲海鮮好正尤其是生蠔，所以就急不及待約埋合共四個人來食餐勁。首先當然叫咗佢哋星期一及二既超特價既二人海鮮餐$99，即係每人$50，每人有一隻磯煮鮑魚、兩隻青口、一件帶子、一隻生蠔及一隻翡翠螺。磯煮鮑魚、帶子及生蠔都好好食超級性價比，尤其是係隻生蠔是日本的單點$59一隻又大隻又甜美，我之後再encore多兩隻。我哋叫咗小食嘅雞翼，但係我朋友唔食得辣佢食唔到，味道都正常。之後再叫咗Pizza可選兩款味道，揀咗辣肉腸及黑毛豬兩款味道，都好食，餅底夠薄身同脆卜，餡料味道啱啱好。不過之後叫咗個牛骨髓意大利飯，就認真一般，我覺得好鹹同埋好油，但其實味道係ok嘅，如果調節下唔好落咁多油及鹽咁會好好多。順帶一提，如果每位叫兩杯紅酒或白酒所有生蠔有六折，但我兩個朋友都唔飲酒，所以就享受唔到呢個優惠另外，生蠔嘅cocktail source，你要主動問侍應攞佢先會提供，希望你哋可享用愉快嘅一餐。有啲食物我冇影相呀，因為掛住食唔記得咗。…Read More

今日同啲同事去食下午茶, 叫咗皮蛋瘦肉粥及炒麵，另外再叫咗個炸兩。味道唔錯，粥底好軟綿，之前食過佢既雞粥好正仲有雞油嘅油香，雞肉又滑又夠味，雞粥絕對係佢哋嘅名物。炸兩嘅油炸鬼都脆口味道ok，而炒麵就正常水平。其實佢呢間餐廳嘅炒嘢都好味，好似星洲炒米同埋XO醬豬扒炒公仔麵都好正，都係我常叫嘅嘢食。特別一提佢有個咖哩豬扒飯，真係估佢唔到啲咖哩又香，豬扒又好食喎。上次我聽到有兩三個人叫咗炸魷魚鬚外賣，下次等我都試下好唔好味先。…Read More

今日同同事過咗嚟食，一行三人叫咗五味餸分別係：涼拌花甲($138)：味道同涼拌青瓜差唔多，但係非常大堆頭亦好惹味，值得試下。金莎黃金鮮魷$138)：真係估你唔到，以為係魷魚鬚或者係墨魚餅，點知原來係勁厚切嘅魷魚，真係未食過呢種口感，一生人應該試一次，非常香口送酒一流，但係鹹咗少少，加上好大碟，我哋得三個人真係食唔曬。潮州豪爽($138): 呢個真係好好味，我張相已經係食咗一輪㗎啦，我又好遲先記得影相。呢個係必食菜之一。唐芹豬肺：超好味，重胡椒味重啲豬肺又唔會太淋有咬口，亦係我必食之選。豉油王炒粗麵：有鑊氣，味道不妨一試。佢雖然要夾都百幾蚊唔平，不過真係好味又大碟，想食小炒就過嚟試下啦。…Read More

之前有個住灣仔嘅朋友成日推介呢間九記牛腩粉麵話啲牛雜冇得輸，今日離開即刻試試，我星期日下午兩點零鐘過到來都有十個八個人排緊隊，上網睇過牛雜同魚餅係必食嘅，所以第一時間就叫咗牛肚、牛腸、魚餅同蘿蔔嘅粗麵加咗腩汁，但最緊要係佢有炸蒜同埋辣椒油可以落令到成碗湯好香口。牛雜好新鮮呀！不過我唔記得講要肥牛腸，所以勁瘦，如果有脂肪會仲金香。而牛肚方面今次我全部都係草肚唔係金錢肚，整好Lum同埋食得出嚟新鮮牛雜嘅味道。聽人講草肚比較少有啲，唔知真定假，但如果有埋金錢肚就perfect喇！因我食完飯碗麵，杯凍奶茶少甜少冰都未出現，本身想唔要，好彩冇退錢啫，點知又幾好味喎，又滑又有奶香，估你唔到連杯奶茶都做得唔錯，下次我決定嚟試下佢即磨咖啡掂唔掂先。如果鍾意食牛雜，又住喺九龍區嘅都可以考慮下太子界限街嗰間我都唔記得個名有X記潮州.....㗎，佢個牛腸勁肥美，食到唔停得口，真係食到有金香嘅味道。…Read More

因為睇左右youtube有人介紹話呢間舖頭嘅炸醬麵有9.5分，我抱住好大期望來試，坦白講有啲失望，佢嘅味道係ok既，但係真係冇好大驚喜亦都冇9.5分咁高，加上太多汁比較重口味咸左d，可能因我期望太高，但可以一試!而介紹嘅凍奶茶亦都唔係好飲，我覺得有啲澀，完全唔需要專登試。另外，我仲試咗佢個牛腩河，因為下午茶平啲，牛腩個纖維幾好食(即係米白色嗰塊)，但係啲牛肉真係有d鞋口，但河粉同個湯底都可以，實情係真係唔使專登去食。因為本身冇諗住寫呢篇食評，所以冇影相，可能係我唔好彩，今日佢嘅食物質素冇講得咁正。至於牛雜及牛內臟，因為下午茶時段冇特價所以冇試，可能好食都唔定。唔知有冇人同我有同感呢？如果有可以留言畀我。…Read More

今日要買午餐外賣返公司食，諗起瓊媽媽個豬軟骨飯所以過去買，點知去到已經一早買曬，最後唯有食口水雞菜飯加例湯。估你唔到價錢非常超值，如果我食白飯只係35蚊加所以加多兩蚊要埋個菜飯。攞到返公司見碟頭都幾大，先試咗個例湯係合掌瓜蘿蔔煲豬肉，味道幾清甜加8蚊都值得飲, 有住家湯水嘅感覺唔錯。而口水雞以呢個價錢同埋份量我覺得係抵食嘅，佢個口水雞醬汁唔同一般四川菜做法，佢應該落咗少少花生醬，我覺得一啲都唔辣，所以同正宗四川菜有啲出入。而雞既下面就放咗啲芽菜。雞既嫩滑程度一般正常水平，而醬汁我就鍾意正宗四川菜嘅口水雞多啲，但佢啲雞斬得唔好勁多碎骨，如果老人家食真係要小心。菜飯方面都幾多菜就淡而無味，唔知係咪因為要健康啲少鹽少糖呢？整體嚟講我覺得呢餐飯絕對對得起佢個價錢，因為我唔加例湯只係$37，加例湯再畀多8蚊，但味道我覺得係正常水平，可以一試，但抵食。因我喺北角店食個豬軟骨同咖哩牛腩飯都唔錯，下次如果想食豬軟骨唯有中午十二點之前叫定，如果唔係都唔使諗。…Read More

想去雄記食咖喱牛腩好耐，次次星期六想去食但因疫情無開。今日星期一去開灣仔做野終於食到，我下晏2:30去到餐廳都坐左成7成人，有d野食都賣晒，証明生意都唔錯。一入到去我點咗咖哩牛腩通心粉，因為之前見到雜誌介紹過咖哩牛腩通心粉同埋招牌煎腸粉都係出名嘅，但今日得我一個人所以食唔落煎腸粉。個咖哩牛腩通心粉可以選擇大中小辣，我揀咗中辣，嚟到聞到好香嘅咖哩味，通心粉嘅煙韌度適中，咖哩亦都好香幾好味，入面除咗牛腩之外仲有啲薯仔粒粒，牛腩方面我覺得中規中矩，但咖哩汁唔錯，我覺得中辣都算辣啦，下次我可能叫小辣都應該夠。之後我加咗十蚊叫咗一杯凍嘅腐竹糖水，味道好似好濃郁嘅豆漿，甜度適中都值得一飲。如果你哋經開灣仔又咁好彩佢開門嘅都可以試下，佢哋家庭式經營服務服務態度都好好，味道都唔錯。…Read More

今日咁啱經過麵包舖, 見到有人排隊以為買法式麵包布甸, 點知原來佢星期六日冇得賣, 見到都係有條好短嘅人龍, 排第一位嘅阿姐同我講有個芝士包好正, 叫我排隊試下, 心諗人少少博一博, 咁就買咗三個芝士包。其實我連佢幾大咩樣都唔知, 見到人買我就買, 我果然係地道嘅香港人。因為啱啱出爐個包超級香芝士味, 打開個袋原來都幾大個, 一個包其實2-3個人食都得。攞到返屋企五個人分2個包眨下眼就搶曬嚟食。啱啱出爐個麵包真係好正, 入面勁多芝士粒粒, 個包好軟熟, 加上個包上面有啲焗過嘅芝士燶燶地好香, 個包真係唔細幾大個, 如果呢啲包正常喺日本麵包店最少30幾40蚊一個, 而家賣$26蚊真係超級性價比呀!你哋經開都可以買過嚟試下喎本身我都冇影相因為我屋企人搶住嚟食, 所以影唔切, 之後我叫我同事畀返張相, 不過佢冇影到入面啲芝士, 見到入面一粒粒嘅方形芝士仲更加吸引, 如果你係芝士控不妨一試其實真係好開心有呢間家庭式既麵包店, 而且咁有心做麵包, 希望大家都可以多多支持。…Read More

上次同朋友嚟食過佢嘅燒春雞意粉真係勁好味, 性價比高, 所以心思思想再嚟食。但係上次食過燒雞, 所以今日想試新嘢, 加上口淡淡, 就決定食咖哩牛腩飯。但老實講, 真係有d失望, 因為咖哩汁好咸, 所以我唔敢撈汁食飯, 勁口渴。但事先聲明我係超級重口味嘅人。而牛腩就比較乾, 薯仔亦都太入味, 其實我係薯仔控超級鍾意食薯仔, 但係我都食唔曬放棄咗。希望餐廳係一時失手啦！不過以$49蚊下午茶呢個價錢, 佢有好多舊牛腩仲要好大嚿, 碟頭好大, 而且佢盒飯應該用蒸飯形式煮, 所以粒粒分明, 而且我搞咗一輪先返屋企, 佢仲保持到好熱。另外, 佢杯凍檸茶都幾好味, 是一般茶餐廳以上水準。所以我都係決定下次食燒雞算啦！希望餐廳可以改善下, 因為佢哋真係一間有誠意嘅餐廳, 加油！食燒雞真係無敵為表明我食淨咗幾多嘢, 你哋可以睇下張相…Read More

又係食到一肚火，本身真係冇諗住寫食評，所以冇影相，滿心期望過去食，因為好朋友生日一行四人星期五7:30去食，一早較好社交平台 第一日可以訂位嘅時間立即上網book位，就係差個一兩分鐘Book唔到，最後特登當日四點親身走去排隊終於攞到籌食晚上7:30食最貴嗰個餐$398/位，萬眾期待滿心歡喜諗住去食好嘢，而當日排隊嘅時候四點半已經有廿幾人喺度攞籌，心諗今次掂啦咁多人排隊實好好味。不過要讚嘅就係門口接待嗰個女仔態度真係好好，好有耐性！餐廳環境唔錯好乾淨裝修亦幾好。先講我最不滿嘅地方，就係所有牛肉都唔掂，即低於我預期呢個價錢嘅標準，嗰啲所謂嘅和牛完全唔似和牛，我以為我食200零蚊一位嗰啲任食，但係我埋單成400幾蚊一位。如果你諗住狂食和牛，真係唔好嚟安平燒肉囉！而最好食係個牛舌心，諗住可以任叫終於有樣似樣嘅嘢食下，點知淨係每位送兩條之後就要收你$68蚊3條，好心就唔好咁孤寒啦！我畀成四百幾蚊一個人㗎而可任食嗰啲牛舌薄到嘔血，勁失望！講番啲海鮮，我印像中除咗個大蝦及麻辣元貝之外冇樣得，其他都係普通貨色食唔食都得。啲小食真係好差囉冇乜邊樣掂，除咗燒雞泡魚乾同鴨舌好味外，真心失望！不如講下食得過嗰啲嘢啦，我印像中最好食係牛舌心不過每人得嗰兩條，知道之後勁唔開心。牛仔骨、鴨舌、燒雞泡魚乾、出面自己整嘅櫻花蝦紫菜飯幾正、社交平台like完送嗰杯類似橙汁嘅飲品、燒豬肉乾、大蝦、豬腸及牛肚。其他嗰啲嘢食唔食都唔緊要啦！但重點係我畀成四百幾蚊食埋啲咁嘅嘢完全唔值囉！都係嗰句啦咁多正評，我覺得好流！食完我頂住條氣走咗上去youtube睇啲youtuber講呢間餐廳，有兩個比較老實嘅都話唔掂，我真係勁後悔冇上網搜習資料淨係見到人排隊我就排隊嘅心態去食，所以抵自己今次中伏。我又呻完啦，如果你哋想去食就好自為之啦！就算係食都唔好食最貴嗰種，真係冇咁嘅需要！:(…Read More

今日同朋友過嚟食飯慶祝生日，聽講呢間餐廳好多明星(真係畀我見到葉倩文喺度食緊飯)嚟食所以一早book咗位點咗$820一位嘅Omakase，因為冇諗住寫食評同埋掛住食, 所以冇相片提供, 食物如下：第一碟係和牛壽司，講真一啲都冇特別，可以唔需要食都得。而其他嘅和牛簡單講下，因為待應有教我哋每一塊牛係要點啲乜嘢嚟食，我本身個人都非常重口味，佢舊舊都話要點醬汁或者加鹽，所以我冇先試味就跟佢意思做，結果發覺舊舊都太鹹，其實唔駛落鹽或者點太多汁，因為本身佢牛肉已經係有味，所以我覺得嘥咗嚿牛肉既原味。其實第二舊牛肉淨係點蒜蓉，而第三嚿只需加芥辣已經夠曬味唔需要再加鹽, 但我跟侍應意思做所以就超鹹。但係最離譜係嗰碟海膽牛肉飯, 個豉油蒜片汁直頭咸到爆炸, 本身佢用細蔥粒配合海膽, 我覺得呢個食法幾好味幾清新, 同埋同海膽幾夾, 但係真係畀個鹹到爆嘅汁破壞曬。其實餐廳啲嘢食全部都好食嘅同埋用料唔錯, 但係真係唔需要咁重口味囉。如你們有興趣真係值得去試下, 不過唔好太衝動試咗未先加汁或鹽, 以免掩蓋牛肉嘅原味。另外, 順帶一提佢嗰個芒果牛油果沙律雖然超細蝶, 但係幾清新, 不妨一試。我篇篇食評都好似係踩啲餐廳咁, 但我真係忍唔住囉, 有時真係不吐不快, 亦都想你哋聽到真實嘅食評。呢啲純粹我個人睇法, 亦都希望餐廳可以改善下, 改善咗之後我相信會有更加多人幫襯呢間餐廳加油…Read More

行完山去三聖邨大約下午六點左右買海鮮，本身諗住去青x灣食，點知畀賣海鮮嗰個人老點咗去東南家菜，話清x灣冇位，我本來信以為真，佢搵同事帶咗我上去哩間餐廳，越坐越唔對路4圍客人不多，所以我立即打去清x灣睇下係咪畀人老點，點知人哋真係話十分鐘內到有位，算啦人都坐低咗諗住試下佢算！點我哋點咗芝士焗龍蝦、酥炸鮑魚、椒鹽瀨尿蝦及蒜蓉粉絲蒸扇貝、之後再叫咗一個秋葵牛肉卷，啲海鮮係出面海鮮權買咗$600幾蚊嗰。嗰個侍應應該唔知係咪泰國人，廣東話理解力差少少，我哋話想加番芝士龍蝦要伊麵底，佢話見到已經煮好咗冇得加，但係我哋等咗成二十分鐘都未見龍蝦出嚟，之後一上枱就有伊麵底，之後我哋問點解有伊麵底佢話同我哋加咗，真係o曬嘴。個龍蝦overcooked芝士又淡，嘥曬隻新鮮龍蝦。龍蝦之前第一味餸係椒鹽瀨尿蝦，味道ok不過比較油，酥炸鮑魚塊皮超厚完全冇味道可以唔使叫。清蒸蒜蓉粉絲扇貝正常酒樓水準。芝士焗龍蝦收咗我118加60=$178加工費，重點係唔好食又熟得滯。最恐怖係個秋葵牛肉卷，佢係做東南亞菜，基本泰國菜都煮得勁難食，牛肉勁乾冇牛肉，秋葵都好一乾，最恐怖係個汁，貌似沙嗲汁加花生碎，食落淡而無味，完全唔知係用乜做嘅，我同我男朋友每人食咗一嚿之後就已經放棄，但係嗰碟嘢仲要收我98蚊。我哋同個staff講呢碟牛肉卷好難食，佢又喺度傻笑問係咪乾得滯，佢話佢見到個樣就知，我哋話最差係個汁，佢完全冇回應我哋。我勸籲大家就盡量唔好去呢間餐廳，費是糟蹋曬啲新鮮海鮮，以後唔好畀啲海鮮舖老點。…Read More

本身因為睇咗某食評人（佢話冇收過任何人錢自己畀錢試食）嘅介紹話呢間超好食所以過嚟，仲要俾錢落訂先至可以預約，但係真係大失所望。除咗個避風塘茄子同埋甜品椰皇奶凍ok之外，其他嘢都超級鹹，其中包括燒腩仔（似鹹肉多個腩仔,不過皮薄同鬆化係事實,但係太鹹已扣曬分）、糯米釀雞翼（糯米飯已經鹹嗰隻雞翼又鹹仲有南乳味完全唔夾）及美極蝦碌（一個字鹹），本身我都係一個重口味嘅人食得好鹹、我都覺得頂唔住，我有理由相信廚師落咗兩次鹽嚟醃，鹹到猛咁飲茶，唔食飯根本食唔到。唔係單純我一個人有咁嘅感覺同枱幾個人都覺得超級鹹，我真係大失所望，下次一定唔會再幫親，仲要唔平每人食成三百幾。最後我朋友問我，會唔會仲介紹畀人食,我答佢一定唔會。招牌燒鱔我覺得個汁可以，但係成個質感太硬冇鱔嘅彈性亦無肉汁，坦白講好一般，走嘅時候我就好似仲食淨咗兩嚿。講真我真係好懶寫食評食評,但係我真係忍唔住囉，因為我真係好大希望去試，唔知係我唔好彩,定係本身佢哋真係咁鹹,我只係如實將我嘅感受講出嚟,唔知有冇人同我一樣感覺？定係我呢一次只係純熟不幸,不過無論點都好我唔會再幫襯。…Read More