KeLoFo的個人專頁

星期六晚搵野食，想食d特別得來又好食既，友人提議去金城，話呢間野好出名，舊時係顯徑，而家搬左去海福，但一樣咁多人幫襯。好彩去得早，比我地搵到一張六人枱。一坐低都未叫野食，阿姐就奉上例湯同白雲鳳爪。個例湯份量都唔細，我地每人飲左一碗以上，飲完唔口渴，應該冇落味精，同阿媽煲既湯差唔多。個白雲鳳爪雖然唔算好熱，但暖暖地有𡁻口，可以接受。我地六個人叫左五個餸同白飯。梅菜扣肉，色香味俱全，反而我覺得有d扣肉再肥少少再好食d。炸蠔餅，鬆脆得來又有蠔味，唔會乾爭爭，食完一件又想食第二件，這個餸師傅拿捏得恰到好處。香橙琵琶蝦，有五隻，隻隻都大大隻，蝦肉爽而不膩，有d似去飲既時候食既炸蟹蚶，加上香橙汁，香香甜甜，開胃又清新。琵琶豆腐，這個餸下過不失，冇咁乾身，亦冇乜特別。胡椒豬肚鷄煲，d鷄浸係胡椒湯度，鷄肉嫩得來有鷄味，又有胡椒味，而兩種味道係埋一齊並沒有違和感，相反來說幾好味。埋單時阿姐送上啫喱，當係飯後甜品，very good.總括來說，每個餸都大大碟，而其中有d餸煮得幾有特色又好味，唔怪之得呢間茶館雖然坐落係橫街雜巷，環境不算理想，又唔係坐得特別舒服，都咁多人幫襯，真係有佢既道理。…查看更多

今日晏晝去荃灣，友人提議去食泰國野，揀左呢間坐落係荃新天地二期望落都幾chill 既茶餐廳。入口右邊放滿泰式飲品零食，好似圖書館咁，不過架上唔係圖書，而係泰式食品，幾特別！餐廳內裝修別緻，好舒服，位與位之間闊落，最啱同朋友食飯吹水。我們一行四人，叫左兩個冬蔭湯河，一個蠔仔煎蛋飯，一個香茅豬扒蛋飯。冬蔭湯河味濃但又不太辣，有少少酸，酸得來好開胃，唔錯。蠔仔煎蛋飯有驚喜，有蠔味，同蛋混合一齊食，一絕，值得推薦。香茅豬扒蛋飯，豬扒煎得啱啱好，鷄蛋大份得來又唔會老，唯一要彈既係醬汁比較多一點，不過對於我這個喜歡有汁撈飯既人，就冇乜問題。雖然話係食飯時間，但侍應都冇話催促我們埋單，所以都食得幾自在，包埋野飲人均$69，唔貴，有時間有機會可以再幫襯。…查看更多

係田心村應該無人不識榮發，話佢係街坊打墩既茶餐廳，相信冇乜人會反對。下午茶選擇多，有炒粉飯麯，三文治，又有粥餐。朋友叫左咸魚鷄粒炒飯配凍O茶，我就叫左巨人西多配凍鴛鴦。雖然係下午茶，個炒飯份量都唔細，色澤分明，但卻嫌少左d咸魚既咸香味。巨人西多果然夠大件，夠哂厚，皮鬆脆得來食落又有花生醬味，值得比個兩杯凍飲不過不失，唔會特別甜，ok。食完個下午茶好滿足，埋單總共$83，價錢夠哂大眾化，唔怪得咁多人幫襯。…查看更多

有事出開銅鑼灣，順便去飲餐早茶，記得皇室堡有間八月花，好耐冇去，一於去試下。兩個人等左15分鐘，都ok可以接受，話飲茶限時90分鐘，由於之後有節目，90分鐘內都要走，當然冇問題啦！叫左盅飯，腸粉，蘿蔔糕同馬拉糕，都係基本野，就睇下有冇驚喜！鳳爪排骨飯 個飯係好食既，不過略嫌d餸唔夠多，食哂d餸都重有好多白飯。韮黃鮮蝦腸粉個樣幾靚，皮夠薄，蝦又多，重大大隻，咬落口都好爽！煎蘿蔔糕分量都唔少，食落幾有蘿蔔味，唔錯，重要只係$30，性價比高。古法馬拉糕熱辣辣，睇得出係啱啱蒸好，咬落口幾鬆軟，有d甜，當甜品食不錯！雖然裝修不算豪華，但坐位與坐位之間有足夠空間，食物質素唔錯，人均$109，係銅鑼灣，一d都唔貴！…查看更多

今晚去新翠邨冬菇亭，幫襯呢間街坊茶餐廳。經歴過三年新冠肺炎，呢間茶記依然屹立不倒，證明應該有d料到。同朋友兩個人，叫左㗎喱豬扒飯，同一個晚餐（茄汁餐肉腸仔煎蛋飯），加兩杯野飲。一坐低，侍應就奉上兩個例湯（青蘿蔔瘦肉湯），免費送，都幾貼心。㗎喱豬扒飯d㗎喱一d都唔辣，重有少少甜，豬扒煎得啱啱好，雖然好似乾身d，但食落口鬆化得來幾好味。至於個茄汁餐肉腸仔煎蛋飯，分量好足，有双腸双蛋同兩塊午餐肉，味道ok，適宜一d鍾意食傳統野又唔細食既人士。凍飲叫左凍O茶同凍奶茶，同其他茶記分別不大。埋單$131，兩個飯，兩杯凍飲，兩個湯，咁既價錢，重想點?…查看更多

今晚去尖東搵野食，平時食粵式，今晚試下泰國菜。搵左間係半島中心小巷既泰沾麯，係文青打卡既熱點。入到餐廳，幾乎全部年青人，配上現場環境及強勁音樂，好有活力！由於唔係好肚餓，我地兩個人，只係叫左出名既泰Duck生菜包同鷄肉鑊氣炒河，同兩杯飲野。泰Duck 生菜包先上枱Duck 肉味道好濃，少少辣，比較鹹，幾惹味，好在同生菜一齊食，中和番，適合一d追求重味道既顧客。鷄肉鑊氣炒河，河粉好特別，有別於我們平時食既粉，煙靱得來又唔會痴埋一舊，有咬口，成碟粉都好有鑊氣，配埋個酸酸甜甜既醬，very good，但份量偏細，大胃王肯定唔夠食。最後係飲野。我飲泰式奶茶，茶滑得黎又有茶味，唔錯。朋友叫左泰式檸茶，用青檸，對於平時飲開茶記凍檸茶既人，會覺得比較酸，但都可以接受。整體來說，環境好，食物有特色，值得推薦。…查看更多

今日去太古飲茶，揀左西苑，呢間酒樓出左名質素好，但價錢唔平。星期日飲早茶有特惠，10點到12點，所有點心，無論大，中，小，頂點，都係計大點價錢$42。咁就梗係揀d平時都唔係幾捨得食既頂點啦。四個人叫左以下點心:柱侯牛孖筋(大點）估唔到d牛孖筋整得幾入味，又夠淋。蝦餃（頂點） 夠大粒，新鮮彈牙，皮又薄，冇得輸！鮮蝦菜苗餃（頂點）味道不錯，夠大隻，但比我揀都係鍾意蝦餃多d。燒汁釀茄子（大點） 魚肉入味，茄子夠淋，配埋一起，襯到絕！蝦膠（頂點） 皮薄餡靚，賣相又靚。蟲草花灌湯餃（頂點） 兩個人一盅，叫左兩盅。灌湯餃味道冇想像中咁濃，勝在食材豐富，口感好！最後，重嗌左個腊肠滑鸡飯，都係$42。味道不過不失，可以接受。以西苑既質素，有特價，點可以唔考慮！…查看更多

出開旺角，唸起呢度有間舊式酒樓好有特色，就上去睇下。搭lift去3樓，嘩，人山人海，星期六早上11點都咁多人，重要自己搵位，好彩最後都搵到張二人枱，唔駛搭枱。呢間酒樓好有懷舊feel，有推車點心，又有大排檔，點心款式都好多，價錢又唔係貴。最後食左以下點心：牛肉 - 有3粒，大大粒，味道都唔錯。蝦餃 - 皮薄餡靚，幾好味！燒賣 - ok好食，但冇驚喜。生菜水餃 - 係大牌檔叫，幾大碟，味道幾好，都係$43，性價比高。蛋撻 - 雖然得兩件，但大大件，熱辣辣，好有蛋撻味，食完有滿足感。本來想去大排檔攞棷王，但排隊既人太多，最後都係決定唔要，留番下次，咁多人排，相信有一定質素。…查看更多

間中有嚟呢間酒樓飲茶，今日試下係度食晚飯。叫左個特價例牌乳豬（$48.8），咕嚕肉同海味什菜煲。咕嚕肉上枱先，賣相唔錯又夠大碟，除左有咕嚕肉，重有菠蘿，青紅黃椒等。咕嚕肉酸酸甜甜，非常開胃，最啱送飯。跟住就係海味什菜煲，清清地，除左什菜外，重有蝦米，蝦，鱿魚，貴花蚌等，都幾豐富。最後先到乳豬出場，雖然係例牌，分量都唔細，食落口皮脆肉滑，重好有豬味，點埋乳豬醬，正，要比個佢！埋單時送糖水，今晚糖水係綠豆沙，算係今晚最失色既一環，冇乜綠豆味，味道差少少甜味。…查看更多

今日係大圍搵早餐食，又唔係約左人，都係離不開茶記，快餐店之類。不過，近火車站既茶記都好多人，要搭枱，又好有壓迫感，坐耐d都唔好意思，想悠閒嘆個早餐都唔得。思前想後，都係行遠少少，稍為遠離火車站，搵左阿爺燒鵝，距離火車站都係5-8分鐘路程，可以接受。早餐好多選擇，由A到G，每款都係$35，唔貴。雖然開宗名義「阿爺燒餓」，但早餐冇燒餓揀，唯有求其揀個A餐「金鐘罩义燒」麯配双蛋多士。义燒比較瘦，肥少少會好食好多，双蛋太陽蛋，賣相好吸引，兩隻蛋都好完整，煮得啱啱好，味道亦不錯，多士可以接受，奶茶就冇驚喜，同其他茶記分別不大。最緊要坐得舒服，冷氣夠凍，又唔駛同人逼，一個人坐哂個卡位，冇人趕你走或俾眼神你睇，可以慢條斯理嘆個早餐，正！…查看更多

大圍新商場人山人海，搵食都係去返傳統既食肆，今晚揀左明星，貪佢夠大間坐得舒服d。大約係6點幾入坐，可能早，重未算多人。見片皮鴨做緊特價（$88），梗係要食啦！唸唔到都幾大碟，4個人食絕對足夠，味道唔錯，性價比高！個鮮果脆皮生炒骨有驚喜，好鬆化，味道出乎意料地好，我地4個個個都話好食，very good!椒絲腐乳通菜就一般，勝在熱辣辣，送飯一流，價錢也不貴。埋單冇糖水送，少少失望，不過價錢都係$4××，想點？老實講，價錢非常平民化！…查看更多

今日出開觀塘，約埋幾個朋友去觀塘飲茶，鱷魚恤大厦有間玉桃軒，以前住港島東時時常去鰂魚涌間玉桃軒幫襯，今日就試下觀塘呢間。上到酒樓已經係中午12點。嘩，人山人海，唔知係咪因為今日係星期日特別多人。好好彩，搵到一張枱，遲dd都冇，唔通真係咁抵食（心唸）？叫左10個點心，包括鮮蝦菠菜餃，魚肚百花蒸粉扎，流沙包，藥膳鷄腳，义燒酥，炸雲吞，豬手，山竹牛肉，蘿蔔糕等。覺得個菠菜餃幾好味，重有特價（$32.8），個流沙包幾滑又多蛋黃，义燒酥就好鬆化（原來係其中一個推介既點心），其他點心都OK.埋單4位四百幾，茶錢每位$13，都算平，冇乜商場酒樓今時今日咁平既茶錢，抵讚！…查看更多

約左朋友去尖沙咀食野，佢推薦去東海中心basement 既淘源酒家，話佢上星期食過，好抵，我心唸你上個星期先食完，而家又嚟，真係咁好，抱住一試無妨心態，就去試下。三個人埋單$251，叫左總共9個點心，非常抵，有下次，朋友話佢上次人多，酒樓重比左間VIP房佢，好正！…查看更多

今日同朋友係大圍，天氣好熱，又想清靜d，唸起去金鿋商場既吉野家，好耐未去過，印象中環境唔錯，就一於上去睇睇。去到吉野家，同想像一樣，依然都係咁雅緻清幽，方便傾計聚舊。朋友叫左個和風牛肉丼，我就叫左個吉列豬扒定食。個牛肉丼質素一如以往，仍然好有佢個獨有牛肉味style。個吉列豬扒定食賣相唔錯，肉質厚實。原本跟餐綠茶，由於天氣實在太熱，我改為飲汽水，又得喎，夠彈性，抵讚。埋單兩個餐加埋都係$101，以咁既價錢同質素，環境，簡直超值，有機會會再幫襯。…查看更多