workhard_eatharder's Profile

今日經過深水埗見到黃金電腦商場對面開咗間新嘅飲品店，見個門面幾靚，又行到熱辣辣，一於試下。店員好有耐性咁介紹唔同飲品俾我哋，見佢有鮮果茶、芝士奶蓋、珍珠奶茶、沙冰、蘇打，同朋友一共叫咗三杯野飲：芒果乳酪沙冰、柚子蘇打同古早味鳳梨四季春，全部都叫咗半糖。芒果乳酪沙冰🥭推介推介👍🏻👍🏻👍🏻 今日超級熱，出街行兩步已經成身汗🥵 咁熱嘅天氣最適合飲沙冰，呢個芒果乳酪沙冰好濃芒果味，每啖都食到一粒粒嘅芒果肉，以$36呢個價錢好抵飲，消暑一流，爽！柚子蘇打超級解暑，完全係透心涼，飲落唔覺得甜。柚子味好香，感覺清新。另外，杯底有柚子粒，增加口感同香味。飲之前將整杯搖匀，果肉配合強烈嘅梳打汽泡，加上本身又唔算好甜，令人係炎炎夏日，好想飲多杯！古早味鳳梨四季春🍍飲得出係用新鮮菠蘿整，茶底濃郁，甜酸度同茶味配搭得宜，配合幾片薄荷葉，飲完杯野仲有超多菠蘿肉喺底😌雖然附近有好多類似飲品店，但感覺呢間小店用心製作，亦真材實料，實在驚喜，如果經過深水埗不妨一試！😋…Read More

當初認識呢間餐廳係一個住咗元朗好耐嘅朋友介紹，餐廳位置比較隱蔽，喺嘉城後面條巷仔，如果唔熟元朗嘅人可能要搵一搵。第一次嚟見呢間餐廳喺後巷都竟然咁多人有啲好奇，但食咗完之後就明白喇！我覺得小鍋係元朗最好食嘅米線，而家每次想食米線都會食小鍋😆餐牌分咗小鍋米線同精選米線，小鍋米線就係有基本嘅配菜，再自選餸，而精選米線已經幫你配好哂啲材料，可以選擇大、中、小麻辣或者大、中、小辣，面底可選米線、拉麵、米粉、薯粉，而價錢已經包咗豆漿或者熱飲。平時通常叫精選米線，因為配好哂啲料唔洗煩😂 湯底比較清唔會好油膩，亦好多配料，每款都有腐皮、芽菜同甜酸菜。其中推介大理或者麗江米線。大理米線入面有金菇、牛乾菌、茶樹菇同蕃茄，菇味香濃，鍾意食菇嘅人一定唔可以錯過。而麗江就有鮮鵝腸、雲南野菜、雞脾菇、鮮雲耳，金華火腿，味道比大理清淡少少，最鍾意食雲南野菜，唔係間間舖頭有。每次都會另外加$9要份南乳雞件，其實係斬開一半嘅南乳炸雞翼，好香脆，亦好入味。最鍾意佢嘅秘製甜酸菜，味道偏甜，爽脆解辣，好食到想買番屋企食！可惜佢話無得就咁賣🥲…Read More

餐廳位置喺伊利近街斜路嘅一間小店，門面唔係好起眼，有少少難搵。平日十二點幾去到唔洗排隊，不過店舖比較細，得兩排吧枱，坐得比較迫。Baked嘅sourdough好出名，係南非店主養咗超過50年，由南非帶嚟嘅酸種做麵包。見佢嘅open toast好吸引，叫咗好多人都推薦嘅Oh My God($159)，sourdough外脆內軟，帶點煙韌，好似海綿咁吸哂黑松露味加上mozzarella cheese 煮成嘅醬汁，配上大啡菇同poached egg，加點火箭菜，perfect combination! 另外叫咗一杯Iced Americano($40)。買咗半個酸種麵包($70)番屋企，擺喺雪櫃，食嗰陣焗番佢或者用olive oil煎番佢都得，如果想keep耐啲可以擺入冰格。Baked八月就會開分店，遲啲灣仔都會有得食喇😌…Read More

如果唔介意企喺度食野，立鮨絕對係quick lunch嘅好選擇👍🏻餐廳大概有十個企位，用QR code落單後，師傳就會馬上整俾你。🍣自選壽司定食8貫 $158珍寶甜蝦壽司、北海道帶子壽司、蟹肉蟹膏軍艦、火灸左口魚邊壽司（兩件）、深海池魚壽司、日本真鯛壽司、本鮪赤身壽司（吞拿魚）另外再加咗：海膽軍艦 $22北海道海膽壽司 $45北海道特大珍寶帶子壽司 $22中吞拿魚腩壽司 $22建議叫北海道海膽壽司唔洗叫海膽軍艦，北海道真係鮮甜好多！另外推薦珍寶甜蝦同北海道帶子😛…Read More

終於試咗呢間長期處於元朗頭幾位受歡迎嘅泰國餐廳，薄荷葉喺元朗體育館對面，係間提供泰國菜嘅半開放式酒吧，天花掛滿五顏六色嘅民族吊燈，有室外同室內座位，我哋七點半食完離開已經全場滿座。一坐低就會擺低一碟要收費嘅青瓜😂 自家制炸蝦餅($78)金黃香脆，彈牙軟殼蟹咖哩（$178）軟殼蟹份量唔少，但浸到淋哂，咖哩味亦唔夠香，比較淡，麻麻哋薄餅($55)有四塊，牛油味好香，鬆脆馬拉盞炒通菜($78)幾惹味，咸咗少少椰青($50)餐廳有好多特色啤酒，氣氛好適合一大班朋友飲下野，食物中規中矩，可以一試但唔洗抱太大期望，元朗泰國菜有好多其他選擇。😌…Read More

The Mussels以法國傳統路邊咖啡廳為主題，一邊餐椅向住維港景色，另一邊對住吧枱望住師傅。餐廳主打法國藍青口料理同特色奄列等歐陸菜式。Scallop & Tuna Tartare裡面有帆立貝、呑拿魚、牛油果、青瓜，味道非常清新又健康，顏色繽紛，影相一流😍 嚟到呢度就一定要食青口！青口有四個味道：香草白酒汁、意式羅勒番茄汁、日式柚子胡椒忌廉汁、法式藍芝士。每份青口都會配上薯條，我哋亦另外叫咗一份法包點啲汁食😆 Traditional style白酒、牛油、香草係比利時人煮青口嘅最傳統味道，青口細細仔但肉質嫩滑，白酒香氣帶出青口嘅鮮美，完美配搭。Japanese style用柚子胡椒、忌廉、檸檬葉同青檸調製嘅日式醬汁，柚子胡椒原產地喺九州，其實製作原料中並無柚子，亦無胡椒，而係以切碎咗嘅橙皮混合青辣椒同鹽製作。配搭非常新穎，估唔到柚子胡椒同青口個味道咁夾，非常清新！…Read More

Asok Thai Garden係元朗同大圍阿叔泰麵嘅分店，係一間泰國fusion餐廳🌾餐廳有好多打卡位：太陽傘、藤椅、藤織吊燈、木傢俬、植物、乾花等，充滿泰國渡假風情。而座位區亦有好多唔同選擇，榻榻米、太陽傘下嘅圓枱、高身吧枱、長木枱。Lunch包咗餐湯/沙律+主茶+飲品，仲可以加$25要埋甜品添是日餐湯🫕/沙律🥙今日嘅餐湯係椰子雞湯，而我揀咗柚子沙律。柚子加上紅石榴沙津菜，好清新。主菜🍝辣羊肉醬貓耳形粉配流心蛋平時嘅肉醬多數都係牛肉或者豬肉，用羊肉嚟整帶少少羊羶味都幾好食，貓耳朵意粉厚身煙韌，加上流心蛋同芝士，但一啲辣味都無嘅😂飲品🍹Set lunch包嘅飲品係菊花茶/泰式檸檬茶/即磨咖啡，又或者可以以半價升級無酒精飲品。今次加咗個泰式奶茶，最鍾意佢唔會太甜，冰會用另外一個杯裝，咁就可以自己控制落幾多冰又唔會一次過沖到淡哂喇👍🏻餐廳嘅裝修花咗好多心思，周圍嘅佈置都非常適合影相，亦有好多小擺設，處處都係影相位🌴而食物擺盤亦好有心機，特別係佢嘅cocktail同甜品，加上員工熱情，難怪成為最近大熱餐廳～…Read More

灣景中心Brim28呢個平台有好多西餐廳，其中Frites嘅裝修最吸引，模仿比利時傳統啤酒屋的裝修，有室外和室內座位，環境唔錯。除咗星期五之外，餐廳每日5pm後都有唔同優惠，而星期二嘅優惠係$355海陸大餐Surf and turf，即係合拼海鮮同紅肉，包括原隻加拿大龍蝦米多、250克美國USDA 1855 黑安格斯牛扒同芝士燒汁薯條。龍蝦好彈牙，最好食係面頭用芝士蘑菇整嘅醬😋 牛扒唔錯，但個薯條好淋，啲燒汁令佢完全唔脆，如果燒汁同薯條分開上會更好，而且食物唔係太夠熱。蘑菇risotto好有咬口，飯粒索哂蘑菇汁。下次想試吓星期一嘅任食青口🤪 另外平日3-8pm happy hour半價，非常抵，好適合收工過嚟飲啤酒👍🏻…Read More

喺尖沙咀行街見到呢間鮨樂，記得上次喺中環食過都幾好，就入去食個lunch喇。原來鮨樂同板長係同一個集團的，但我覺得鮨樂高質啲。所有lunch set都會包沙律同麵豉湯，叫咗梅壽司盛合，因為有海膽又有拖羅😬 有十二件壽司：墨魚、帆立貝、牡丹蝦、松葉蟹腳、真鯛、深海池魚、平目魚、油甘魚、吞拿魚、拖羅、海膽、玉子。不得不讚個帆立貝，好鮮甜好厚肉，拖羅油花重，但有啲失望個海膽唔係太新鮮☹️ 不過整體嚟講都係唔錯，質素絕對對得住價錢，性價比高😌…Read More

喺又一城嘅呢間Va Bene Italiano逢星期一至日都有提供半自助午餐。餐廳喺商場內採用半開放式，室外用餐位置比較開揚有陽光，室內比較暗同有氣氛。$268就可以享用buffet同咖啡/茶，而加$20，即$288就會有埋主菜。主菜選擇有意粉、牛扒、魚、pizza等，款式定期都會轉的，留意有啲主菜要另外再加錢。Buffet食物包括海鮮、沙律吧、烤肉、水果同甜品。海鮮有牛油果蟹肉沙律杯、蝦、青口，最愛佢嘅蝦，好大隻好鮮甜，食自助餐好少有咁高質嘅蝦！沙律吧有十幾款，紅菜頭、burrata、蘑菇、八爪魚，南瓜等，仲有四款cold cut，熱食有燒牛肉、燒雞同腸，而甜品有十款左右，有tiramisu, creme brûlée, oreo cake, brownie, 紅絲絨千層蛋糕,朱古力撻等，個人推薦tiramisu、cream brûlée同紅絲絨千層蛋糕 👍🏻 另外亦有兩大盤雜果。我認為唔叫主菜都好夠飽，不過主菜味道都唔錯，另外同枱可以有啲人叫主菜有啲人唔叫咁就可以share食，但留意唔可以takeaway。Staff服務好好，收碟速度好快，亦經常過嚟睇下你有無咩需要。食物種類唔算多，但質素高，而且以呢個價錢嚟講超值！…Read More

今日嚟到Black sheep restaurant旗下的Fukuro，餐廳位於伊利近街嘅斜坡，店內裝修型格，配合黑暗嘅燈光，適合放工後同朋友小酌。我哋今次叫咗set menu，呢個份量係二人的，本身見啲食物細細碟，但原來食到最後係好飽的！Sashimi platter呢個係餐廳送的mini platter，刺身幾新鮮Spinach ohitashi芝麻醬配菠菜，好清新Crispy Caramel Butter Corn以焦糖沾滿粟米，脆脆地好好食Beef tartare生牛肉他他拌生雞蛋配rice cracker，唔食生牛肉嘅人唔洗擔心，食落去完全無腥嘅生牛肉味Chicken katsu sando見好多人都影和牛三文治但呢個set係雞，三文治入邊有芥末醬，雞唔會炸得太乾好juicyGrilled scallop 上枱嘅時候帶子上有火焰，staff會攪拌帶子加埋雜菇Kimchi udonKimichi配海膽同蟹肉烏冬，烏冬煙靭，好大碟Monaka ice cream sandwich由兩塊薄身威化餅皮包住雪糕，並印有貓頭鷹(店名Fukuro意思)的圖案，本身食唔出係咩味道，原來係seaweed!Staff熱情有活力，會同我哋介紹食物傾下計。食物配搭新穎特別，好食但唔算好驚艷，略嫌menu選擇唔係太多。…Read More

突然凍番嘅幾日，最適合打邊爐。來自四川成都嘅碼頭故事火鍋，喺內地有過百分店，除咗喺尖沙咀，亦喺元朗開咗喇。碼頭故事火鍋起源於長江邊上，據說長江邊上沙灘是牛羊屠宰集散之地，內臟多而且便宜，碼頭工人生活艱苦，於是將比較便宜內臟煮食，變成而家美味火鍋。餐廳位於一樓，要行樓梯上一層先到，門口放著紙傘，環境古色古香，天花掛滿燈籠、配上木枱同長木櫈，亦設有幾間vip房，而叫嘢食係自己用手機落單的。湯底款式唔多，只有五個選擇：牛油鴛鴦鍋、大骨百味湯鍋、番茄鍋、菌湯鍋同牛油紅鍋。我哋要咗牛油紅鍋拼大骨百味湯鍋，辣度可以自己選擇。配料方面有好多，大部分都可以叫一份或半份，兩個人叫半份就可以試多d食物。調味料方面，枱上放有香油、蒜蓉、芫荽、蔥、蠔油、醋、鹽同味精，四川同廣東打邊爐唔同，係無豉油的，而辣椒仔同乾碟係要另外收費。餐廳教利用香油、蒜蓉、芫荽、蔥、蠔油、醋制作油碟，香油係用米糠油、芝麻油同玉米油混合而成，加蠔油增加鮮味，而加醋可以減辣。餐墊紙上面寫咗d食物要淥幾耐，可以參考番。食麻辣火鍋一定要叫三寶：黃喉、毛肚同鴨腸。金牌牛黃喉黃喉並唔係動物嘅氣管或食道，而係豬或牛嘅主動脈弓，即通往血管的大動脈，只需淥兩分鐘，非常爽脆。餐廳有牛和豬黃喉選擇，牛黃喉比豬黃喉厚，口感更好。金牌脆毛肚牛有四個胃：瘤胃（牛草肚）、網胃（金錢肚）、瓣胃（牛百葉）和皺胃（沙瓜），而毛肚係瓣胃部分，只需要淥10秒就可以食得，好爽口。一米鴨腸有一大盤冰保持新鮮，配合少少肥膏，肥瘦比例得宜，齒甲留香羊肉卷都幾厚，又香羊羶味，唔錯紅酒腰片即係豬嘅腎臟，先倒紅酒落啲腰片到先再淥30秒就可以，用嚟去除豬腰嘅腥味，我覺得食落去好似豬潤咁足料墨魚丸入面有一粒粒的墨魚，好彈口手工餃子韭菜手工餃子有白菜、韭菜同西洋菜，但就無mix喇，韭菜餃細細粒都幾好食鮮紅薯粉非常煙韌，配埋麻辣湯底係絕配，忍唔住encore多一份養生黑豆花本身以為係黑色的，其實係蜂巢豆腐手工青笋甘片切到好薄砌到好似花嘅萵筍埋單先知原來有折，7pm前離座有七折，7pm後入座就有八折 (海鮮、酒水、茶芥及加一服務費除外)。至於服務就麻麻地喇，大部分都係唔熟手嘅姐姐，連擺低嘅係咩食物都唔知，紅酒腰片又無跟到紅酒。食物新鮮質素高，環境都唔錯，食得辣嘅朋友一定要叫牛油紅鍋。…Read More

入嚟深井一定要食下燒鵝，沿路都見到好幾間燒鵝店，朋友推薦陳記，一於試下。陳記燒鵝酒家係深井第一間燒鵝專門店，已經有超過40年歷史，裝修係傳統舊式酒樓，員工非常有經驗，食物方面除咗燒鵝之外，仲有各類小菜、炒粉麵、海鮮等。兩個人叫咗個午市A餐($318)，包燒鵝例牌、兩個小菜、兩個例湯同兩碗白飯/瀨粉，小菜我哋叫咗椒鹽鮮魷同啫啫時菜煲。燒鵝皮好有光澤，鵝味濃郁，肥瘦適中，肉質嫩滑多肉汁，完全唔會韌，配上自家制酸梅醬，深井燒鵝果然名不虛傳。唯一不足係鵝皮可以脆啲，可能因為我哋三點先食距離岀爐時間太耐。椒鹽鮮魷好酥脆，粉漿唔會太厚。啫啫時菜煲，通菜配蒜頭、芹菜、蝦米同肉碎，好惹味！呢度唔只燒鵝好食，估唔到小菜都唔錯，有鑊氣，不愧為老店！…Read More

今日天氣好好，決定去西九行下。上次食過呢間意大利餐廳覺得唔錯所以再嚟食。由於係平日嘅關係，唔洗等位就入得去喇，入座時店員提醒用餐時間90分鐘。餐廳有室外同室內座位，但今日實在太熱喇，所以坐咗室內。呢間嘅pizza同意粉都係手工制的，推介！推介*****Boheme pizza ($198)好脆嘅薄底pizza，分量十分足夠，配料有水牛芝士、蕃茄醬、Parma ham、火箭菜、橄欖同水牛芝士球。水牛芝士球切開係流心的，奶味濃非常creamy，加埋黑醋汁，再配Parma ham同火箭菜，我最鍾意嘅combination，好食！推介****Pasta of the day - spicy crabmeat spaghetti aglio olio ($178)可以問番店員或者睇下塊board當日pasta of the day係咩，今次係香蒜蟹肉三文魚子橄欖油意粉，有好多蟹肉同三文魚子，意粉好有咬口，蒜味亦好香，但個人覺得可以再辣少少。Iced latte ($40) 唔好飲，可以飲其他飲品。食物同環境都唔錯，對住草地同海景，喺度渡過一個下午好悠閒好舒服😌 服務唔錯，要讚下有個扎辮嘅男仔非常殷勤有禮貌👍🏻 …Read More

今日嚟到Pirata Group嘅Pane e Latte，由於五點幾先到，唔洗排隊就可以直接入去喇餐廳內外都係打卡位，室外係粉黃小屋，室內以粉紅色為主題，所有畫、擺設、天花板嘅吊扇、麵包嘅display櫃，全部都好靚，好有歐陸風，好適合嚟影相！呢間餐廳主打麵包同甜品，自家烘焙工場喺地庫，所有麵包都係每日新鮮出爐，可以行出去counter望下啲食物先再決定食咩，今次我哋比較晏先嚟到，食物選擇唔係淨番好多。Tartufo pizza ($88)黑松露片加好多嘅ham，pizza底脆得嚟有口感，唔錯Chocolate eclair ($48)朱古力味好濃，面層一粒粒脆嘅朱古力加埋入面嘅cream，鍾意食朱古力嘅人一定要叫Pistachio and raspberry bomboloni ($42)甜嘅開心果配上酸酸哋嘅紅莓醬意大利冬甩，配搭幾好食，不過麵包比較厚，有啲失望Latte ($42)Iced latte ($48)咖啡普通，無特別環境裝修的確好靚，但食物質素普通，見好多人都話要排好耐隊，我認為食一次影過相就夠。…Read More