人形卡比獸's Profile

位於K11 Musea嘅Gontran Cherrier，相信識飲識食嘅大家未親身嚟朝聖過都聽過佢嘅大名啦。週末午後同朋友係K11 Musea行街行到有啲攰，就嚟咗Gontran Cherrier嘆返個tea。未行到鋪面，已經見到在排外賣的隊人頭湧湧，可見人人都為呢度嘅牛角包而瘋狂。好彩我地選擇dine in, 唔洗等好耐已經有位，我揀咗杯Ice Cream Latte同Choco Scone仲有Raspberry Cloud Croissant。原味croissant太多人嗌，咁岩賣晒，想食就要等下一盤新出爐嘅。原先以為加咗雪糕，杯咖啡獨有嘅苦味會被蓋過。點知飲第一啖唔淨止食到雪糕嘅甜味，仲飲到陣陣咖啡香味，成個人即刻精神番晒。Choco Scone外脆內軟，口感一流，好少呢個時間都食到新鮮嘅麵包，而且係我鍾意嘅朱古力味。Raspberry Cloud Croissant上面嘅cream cloud我自已就覺得偏甜喇，可能會比較適合女生口味，麵包方面就一樣咁出色，對得住個價錢，值得一試。:)…Read More

以前係大圍返學，間唔中放學／溫完書都會去豬屋食飯，都有好多回憶。上一次嚟係幾時真係冇乜印象，基本上裝潢都冇大變化，不過食物選擇就豐富咗好多。今日咁岩朋友想探索下大圍呢區有咩好野食，我就帶咗佢嚟呢度試下價位比較相宜嘅日本餐廳。鋪頭嘅位置唔算多，大約只有1x-20個位，經常都會坐滿客人。我自己揀咗食特選時令海鮮丼，分別有三文魚，油甘魚，劍魚腩同芥辣八爪魚，款款刺身都好新鮮，口感都唔錯，比好多連鎖日本刺身丼都要好食。跟餐仲有麵豉湯同雪糕糯米糍。麵豉湯味道就不過不失啦。朋友就叫咗鹿兒秘制汁煮豬軟骨定食同沖繩便當，賣相嚟講沖繩便當嘅吉列千層芝心豬扒就非常吸引喇，搞到我都忍唔住夾咗一塊試下味。外皮炸得好鬆脆，加埋流心芝士，呢個配搭無敵啊。呢間餐廳離大圍站大約10分鐘路程，位置唔算易搵，不過勝在庶民價格，高級享受。…Read More

撞正好朋友生日，就約埋去食餐好嘅，我地揀咗位於尖東嘅日本燒肉店和牛燒肉。純。之前試過係呢度食午市套餐，質素都唔錯，今次嚟試晚市，價格當然會高一啲，繼續睇就知質素係點喇！先嚟主打二人前特選鳥取和牛厚切西冷豪華燒肉套餐，有前菜拼盤同沙津，另外就有特撰鳥取和牛厚切西冷，日本產黑毛和牛（特選牛排肉，特選和牛紅肉），日本產豬腩肉，牛舌。厚切嘅鳥取和牛口感極之豐富，雪花分怖都好平均，又睇得又食得。牛舌都非常值得一提，一啖咬落去啲肉汁出曬嚟。散嗌咗日式和牛炒飯，聞落好香牛味，味道唔算出色，勝在有果腹感。仲有"二十世紀梨"做最後點綴，口感清爽，帶一絲絲清甜，一洗食燒肉後嘅油膩感，總括嚟講，食物同價錢成正比，環境都幾寬敞，服務態度友善，值得一試。…Read More

呢排日日都出沙田，心思思想試下啲新野，呢間Brick Lane Deli開咗一排但都未有機會食，之前食過灣仔嗰間都幾有水準，今日就試下沙田分店嘅水準。🤣晚餐選擇唔算多，都係啲大路菜式，鍾意食肉嘅我於是叫咗美國頂級肉眼扒同燒豬肋骨。肉眼扒唔算厚身，不過勝在夠大塊，肉質尚算嫩滑，脂肪比例平均，唔會食到成口油。個人覺得生熟度可接受，雖然慣咗食五成熟。🤪豬肋骨份量較想像中少，只有大約三條肋骨，肉量加起來可能只有半塊牛扒。伴碟嘅燒烤汁幾惹味，加上豬肋骨燒得岩岩好，肉質鮮嫩，唔會變咗一絲絲同'鞋'口。😌如果每人只叫一份main，要有飽肚嘅感覺有難度，可以另加一份小食或意粉。老實講，呢個價位仲有好多選擇。😉😉…Read More

呢日係新城市行完街，覺得餓餓地就搵咗間想試好耐食葡國菜嘅餐廳。平時好少葡國菜選擇，所以覺得個菜單都幾新奇。🤩因為都差唔多到下午茶時間，基本上唔洗排隊就有位。菜式嚟講都五花八門，樣樣都好吸引好想試，最後揀咗椰香葡國雞配飯同牛肝菌鵝肝鴨飯，貪佢夠熱辣辣。🤭焗飯等咗大約十五分鐘就到，速度都唔算慢，上菜果陣仲出緊煙。我自已就比較鍾意葡國雞飯，葡汁鋪完係飯粒上面，而且充滿椰香。呢款經典葡菜果然冇令我失望，仲愈食愈回味，以前謮書經常食葡國雞，真係萬千滋味在心頭。😆至於牛肝菌鵝肝鴨飯就比較重口味，啖啖飯都好入味，重點當然係塊鵝肝啦，不過就略嫌油脂分佈唔夠平均，有少少肥膩。總括嚟講，食物質素唔錯，只係價錢略貴，份量岩岩好夠一個人食。😉…Read More

相信大家都曾經有幫朋友慶祝生日搵餐廳嘅煩惱，今日想推介係朗豪坊隔離嘅呢間Romanne Leisure Food Concept俾大家，價錢合理，食物高質。呢度菜式選擇好豐富，梗有幾款岩你心水，裝修都好有心思，有唔少燈飾同裝飾，感覺好溫馨。唯一美中不足係枱同枱之間距離唔夠，可能會有啲嘈。同行朋友胃口比較好，所以我地嗌咗一個二人set加多兩個小食。最先上嘅係煙燻三文魚鮮柚子沙律，跟餐餐湯仲有黑松露炸薯條，南瓜湯唔算特出，而薯條份量都幾多同重黑松露味，沙律都好大碟好足料，不過我地都唔係省油嘅燈，話咁快就清晒。主菜我地就揀咗北海道帶子南瓜意大利飯同香煎沖繩豬鞍扒，意大利飯係比較正宗嘅口感，飯粒中間唔熟得晒，南瓜味岩岩好唔太重口味。豬鞍扒比較細塊，肉質軟熟，冇令我地失望。最意想不到係馬來西亞叻沙煮美國馬拉蜆，叻沙非常滋味，蜆肉新鮮而且有滿滿叻沙味，絕對值得一試。食飽飽之後，我地仲事先準備咗個生日蛋糕俾朋友，店員好有心思咁幫我地擺碟，又幫我地影合照，服務冇得彈。…Read More

適逢會展舉辦電腦節，決定同朋友重溫一下久違嘅懷舊風味。傳統招牌叉燒炒蛋飯幾乎每次都必叫，充滿蛋汁嘅軟滑炒蛋加上惹味叉燒實在令人愛不釋手。😍因為同朋友係下午茶時間拜訪旺記冰室，幾乎唔洗等就可以入去坐低。我嗌咗招牌叉燒炒蛋飯，朋友就嗌咗另一款蕃茄湯通粉。話咁快啲野食就嚟齊喇，可能係因為下午茶時段，叉蛋飯份量比平時細份，不過滋味就一啲都不減，都係食到lamlam👅。而蕃茄湯望落幾濃郁，聞落仲好重蕃茄味添，味道都唔差同時好醒胃，未試過嘅值得一試。咁就渡過咗一個悠閒嘅下午～☺…Read More

今日食飯冇乜靈感，就約咗朋友係尖沙咀等，見到面再諗食啲乜。😌集合後我就建議去Mira Mall望下有咩餐廳揀，因為一向Mira Mall嘅餐廳俾我嘅感覺都係水準幾好。大家都想試下越南野，所以就去咗係UG嘅Madam Saigon, 餐廳外面經常有Mini Music Concert,鍾意聽住音樂食飯嘅朋友仔可以嚟撞下彩。🤣頭炮係咖哩軟殼蟹，沾上咖哩汁嘅軟殼蟹十分惹味，份量啱啱好。冬蔭公係我最愛😍，今次都唔例外，叫咗冬蔭公海鮮湯金邊粉，有得食又有得飲，而且味道正宗足料。見啲海鮮咁有鮮味，朋友提議追加椰青香茅蜆湯，果然冇令我地失望，啲硯大大粒又新鮮冇沙，個湯清得黎又唔會太淡。🤭仲有馬拉盞肉鬆扎肉炒飯，賣相唔算吸引，不過食落都唔錯，至於馬拉盞通菜就普普通通。整體上，價錢比一般越南菜略貴，不過食物質素頗高，人均二百左右。😋…Read More

平時都比較少出港島，今日有朋友話想試下呢間新開冇耐嘅樓上西餐廳，經呢度訂枱仲有折扣優惠添。餐廳座落蘭桂坊附近嘅大廈士丹利街11號3樓，旺中帶靜，都算方便。😆餐廳位置唔算多，坐得都算寬敞，燈光剛剛好，睇得出裝飾都幾有心思，好適合約會同慶祝架。🥰我地嗌咗烤澳洲羊架伴豚肉腸配紅酒燒汁跟薯菜同脆皮德國咸豬手，羊架都幾惹味，大約七成熟到，咬落去仲係好多汁，肉質都好唔錯，可惜份量較少，只有兩支。咸豬手好多時都係原隻上，自已唔太鍾意落手落腳切，咁岩呢度會切晒件上碟，食起嚟方便得多。服務好之餘，每件咸豬手上面都有塊脆皮，絕對不失風味架，而且跟咗三款醬汁，任君選擇。😛除咗肉食之外，仲叫咗雜菌意大利飯同火箭菜巴馬火腿薄餅，意大利飯飯粒外軟內有咬口，唔同出面煮得好淋嘅意大利飯，聽講有咬口先係正宗嘅煮法。薄餅對比其他菜式就唔算出色，但搭配都唔差。🙆🏻‍♂️整體嚟講，呢間餐廳性價比非常高，下次會再嚟😃👍🏻…Read More

今天跟朋友相約了在葵芳站附近的葵廣，相信咁多位對呢個地方都唔會陌生。尤其係住荃灣／葵芳嘅朋友仔，葵廣絕對係個熱門蒲點，事關入面嘅鋪頭包羅萬有。各式各樣嘅小食茶飲店、潮流服飾、格仔鋪等等，留待大家去慢慢發掘。😎今日嘅主打嘅係屹立葵廣多年嘅手抓餅店慧食貓，即使唔係熱愛食手抓餅，但每次嚟到呢到都會忍唔住嗌返一份過下口癮。😝鋪頭隱藏係幾間小食店中間，唔算顯眼。每次去都見到老闆熟悉嘅面孔，用熟練嘅手勢為客人炮制新鮮熱騰騰嘅手抓餅，親切感都不禁油然而生。呢種感覺到咗呢個世代好少會感受到，大家可以親身嚟感受下哈哈。🤣不負眾望，餅嘅外皮鬆軟，餡料份量剛剛好，口感豐富，非常推薦大家揀肉鬆做餡，相信大家都會喜愛。🥰…Read More

踏足社會之後，好難得先可以抽空約到班舊朋友出嚟食飯。咁岩今個週末夾到時間同昔日好友聚舊，大家都極之愛好泰國菜，就約咗大伙子去咗呢間位於銅鑼灣嘅樓上泰國菜。😆先上場的冬蔭公湯非常惹味，辣味好足，岩晒鍾意食辣嘅朋友。指天椒片好新鮮，如果自認唔食得好辣記得先隔走啲辣椒。🥵卡比獸唔小心中咗椒，就嗌咗個椰青降一降溫解辣，椰青水太鮮甜，忍唔住大啖大啖咁飲好快就見底。😎另外仲嗌咗炭燒豬頸肉同生蝦，味道都好唔錯。嚟得呢度，又點少得招牌菜式火焰燒雞同咖哩三重奏。待應會等燒完後拎返入去切件，而咖哩鍋就會用細火係鍋底加熱，食到最後都仲係熱架，服務好周到。個人比較推薦燒雞，肉嫩多汁，點埋醬食仲非常有風味添。🤪最後再嗌多個芒果糯米飯先算完滿，比起其他菜式就普通咗少少，可以唔嗌都得，大家都食到棒住個肚咁走。😌…Read More

適逢週末放假，同朋友相約於旺角附近食雞煲。因為週末比較多人等侯入座，拎咗飛仔仲有超過十張台先到我地，所以我地去咗小食街睇下有咩可以醫肚。😛一路行沿路見到嘅小食都比較上火，行到尾見到招牌小食店肥姐先醒起已經好耐冇食過，差啲口水都流埋出嚟。可能依家係食飯時間，平時長一長嘅人龍今日見唔到，好快就到我地嗌野食。黎得肥姐就梗係叫皇牌套餐啦，墨魚、細生腸、火雞腎，加埋醒胃嘅芥末簡直係夢幻組合。每次食雖然隔咗一段時間，不過口味照舊，水準依然，食幾多次都唔會厭。😆👍🏻黎開附近一定要試下啦。🤪…Read More

為食卡比獸平時愛好日本菜同泰國菜，呢一日心思思想試中菜，就去咗旺角MOKO嘅北京樓覓食。聽個名就知係食正宗北京菜，同朋友四個人一致通過叫北京填鴨過一過口癮。待應同我地講要等最少十五分鐘，上菜既時侯大家都有少少嚇咗一跳，因為份量比想像中多，加上北京填鴨比較尾段先上，大家都已經七八成飽啦。薄薄既餅皮熱辣辣又鬆軟，絕對值得加分，加上青瓜、京葱等配料。夾起一片鴨肉點上京醬，用餅皮包好就完成整個步驟。口感滿分之餘，心靈都覺得好滿足，大家你一塊我一塊好快手就ko咗成碟片皮鴨。另外仲叫咗水煮魚同雲吞雞，味道上就俾唔到驚喜，不過不失啦。總括黎講，卡比獸都幾滿意呢度嘅中菜。…Read More

係台灣好出名嘅茶飲店沐白小農原來係尖沙咀已經有分店😍，路經寶勒巷離遠就見到醒目嘅招牌。網上推介飲黑糖波霸鮮奶同大甲芋頭鮮奶，不過呢排食到有啲濟，想飲清新啲嘅飲品，就揀咗珍珠紅茶拿鐵少冰。😝俾完錢就行咗入去等野飲，入面都幾闊落仲有個sitting area，如果想影相，係隔離有個俾你打卡嘅靚背景。🥳話咁快就嗌到我個no. ，店員好友善，提醒我上下搖勻之後先飲。😀第一啖就飲到珍珠，入口Q彈有咬口，咬落冇痴牙嘅感覺。茶底唔算濃味，有啲清清澀澀嘅味道，如果奶味再出啲就更上一層樓喇。😆😆…Read More

今日比平時早收工，就同朋友出咗旺角行一陣街先食飯。朋友A提議食十三姨，話上次食過想再試多次。沿住女人街行到差唔多最尾就見到鋪頭出面有人等緊，不過好快就到我地。我見大家都推薦就嗌咗個手撕雞伴雞油飯。賣相還可以，飯上面有一層手撕雞同蔥花，手撕雞絲絲分明，份量岩岩好。個人感覺雞油味都算突出，整個飯略嫌乾身，平時鍾意食飯拌汁嘅朋友可能會比較喜歡呢度嘅麵食。朋友A就嗌咗招牌十三么，入面有手撕雞、雞肉叉燒、腸粉、溏心蛋、米粉，好足料！雞湯湯底濃郁，味道十足，炙燒雞肉叉燒有驚喜，成個搭配好出色！整體幾滿意，合理價錢，食物足料，招牌麵食必食。**********提番大家呢度會收加一…Read More