piyoko_bggd's Profile

同朋友一行5人諗住喺中環食飯聚一聚，提早兩日見重有位book到就book咗呢間，點知中大伏🥲唔明點解有人會特登為呢間嘢食咁麻麻連食物都唔熱嘅餐廳寫好評，以身試咗伏想警惕下大家🫠一入去侍應叫我哋坐張高枱，我哋一見坐得咁唔舒服就問可唔可以轉矮枱（當時差唔多8點，餐廳八成空嘅）侍應即刻話：無得轉，矮枱俾二人枱book晒。我哋指住餐廳一角張四人枱問可唔可以加個位坐果張，佢好唔耐煩咁話：加唔到位喎，就算我俾你坐咗都上唔到菜。都係問一句姐唔知點解態度咁差，我哋已經諗住快啲食完走人算😮‍💨小食嗌咗雞軟骨餃子、溫泉蛋芝士薯條同避風塘單骨雞翼（小食賣相好唔吸引唔記得影）全部小食都只係微暖一啲都唔熱同好快送到😥令人好懷疑係咪整定。因為人多嗌咗兩個主菜，吞拿魚丼同鰻魚蛋包飯，吞拿魚丼正常無乜特別，個鰻魚蛋包飯多骨到我哋全部人食咗兩啖鰻魚就投降淨係食到啲飯😰從未食過咁多骨嘅鰻魚，唔想嘥嘢但真係食唔到。呢間餐廳最出名嘅腐皮壽司都每人嗌咗一款嚟試，但唔覺有咩特別，塊腐皮好似同壽X郎果啲無乜分別。我哋見個楓糖麻糬窩夫有麻糬所以嗌咗，但原來唔係麻糬filling果啲窩夫嚟，麻糬好少得一舊仔喺入面🥲窩夫死甜無楓糖香，有咁上下年紀食甜嘢quota有限，大家一致認為呢個係嘥quota嘅甜品😮‍💨最尾好辛苦食都食唔晒被迫坐高枱坐完腰痛咗成晚，人均食咗200蚊但食完都唔知食咗咩。總括而言以咁嘅食物質素嚟講佢定價都好進取，咁嘅環境同價位中環絕對有更好選擇，相信市場是汰弱留強的🙂…Read More

有晚經過旺角東要食個快飯，同行伙伴提議入去食，我起初重有啲猶豫因為睇門面唔係特別吸引，點知食完發現好有驚喜好高質！🤩嗌咗蕃茄蟹肉河粉、牛肉濱海、沙嗲牛串燒，每樣都好好食😋，而且價錢實惠。蕃茄蟹肉個湯底好鮮味，係喺香港無食過嘅味道(⁎⁍̴̛ᴗ⁍̴̛⁎)餐廳入面聽到店員似係操越南口音，見Openrice都有其他人話係越南人開嘅，唔知係咪因為咁味道正宗🤔重有我平時食味精重嘅嘢會好唔舒服，呢間餐廳唔敢話無落味精，但至少食完唔會好口渴，價錢又抵食物又好味食得出用心做，好值得推介😚…Read More

曾經覺得黃金冰室多選擇味道又唔錯，一打開餐牌淋漓滿目選擇困難症發作，每次食完都幾滿足。無諗到睽違一排無去，再訪只可以用「大失所望」嚟形容。其實食得冰室預咗期望不要太高，但俾咗75蚊呢個份量就有少少值得商榷，隻碟就大但雞嘅份量就連平過佢嘅橙色連鎖快餐店都多過佢，講新鮮度嘅話快餐店重新鮮啲添，其中一件雞食落口臭臭地我忍唔住吐返出嚟🥲另一舊好紅，紅到我唔敢食(˶‾᷄ ⁻̫ ‾᷅˵)有諗過係咪因為就收鋪（閂10點我9點入去），但以前試過差唔多鐘數去食，賣相同味道好好多㗎，同埋都唔係就收鋪就俾臭雞人食嘛？🥹曾經好欣賞佢哋，希望可以有改善，如果唔係觀塘又少一間幫襯得過嘅餐廳啦。…Read More

同朋友喺平日夜晚大約7點嚟旺角分店，見餐廳入面人頭湧湧，好彩有book定位好快入座😌對上一次嚟無肉食已經係幾年前，水準依然keep到，可能因為多人幫襯食物新鮮，而且refill得算快。最有驚喜嘅係芝士撻🤩真係好好食。牛角包都好香，食完又食。珊瑚草亦係呢度比較特別嘅食物，味道清新，口感特別，有啲似蒟蒻但比蒟蒻爽口，印象中無喺其他餐廳食過。無肉食嘅炸物都好好食，完全不覺油膩或者厚粉，平時不愛吃煎炸嘢嘅我都忍唔住食咗幾件😋比較不推嘅係碗仔翅😗因為好鍾意食碗仔翅無論幾飽都會試，但呢度嘅碗仔翅比較杰身，感覺似拎咗餸嘅芡嚟食咁，可能唔係咁啱我口味啦～總括而言無肉食旺角分店食物種類多，味道走清新路線唔會好似舊式素食咁重口味，好適合平時食太多太滯嘅都市人嚟清腸胃(*´∇｀*)…Read More

曾經成日幫襯外賣，餃子店老闆都好好態度，但原來員工落錯單餃子店老闆就態度惡劣重鬧返客轉頭。今日lunch堂食，同枱友人本身嗌海鮮餃（貴過其他餃）點知嚟咗雙拼，一同老闆反映佢第一個反應係話賣晒海鮮餃所以轉咗俾我朋友🤯。（首先好明顯係落錯單但老闆唔認，其次賣晒唔同我講就轉隻平啲嘅俾我可以咁做生意㗎咩？！）之後落單個員工又死口唔認落錯重話返我哋轉頭，老闆突然大大聲鬧我同我朋友「咁你哋想點呀！」😦落錯單重惡人先告狀原來所謂嘅💛良心小店係咁嘅。我忍唔住問下咁而家可以點。正常餐廳落錯單都會講聲對唔住然後提供解決方法，點知老闆繼續大大聲指住我朋友鬧：「咁你都食咗啦！」我問老闆唔食又點知嚟錯，佢竟然轉身大大聲話「咁我點知你想點！我好忙㗎。」老闆鬧咗我同我朋友幾次問我哋想點，首先唔明點解餐廳落錯單唔係餐廳提供解決方案要個客諗，唔通我講咩你都接受？平時出街食飯餐廳落錯單都會換返啱，但老闆竟然話到明已經食咗唔會補返啱果隻餃，咁即係得返退錢可以揀，咁點解重要狂鬧我哋。😡計返原來只係爭果幾蚊，老闆最後退返幾蚊，唔明點解我哋要因為餐廳自己落錯單俾人鬧，打工仔連食個飯都要受餐廳氣🤬🤬真係慘過食十舊屎。我同我朋友都😦明明我哋兩個女仔好好態度同老闆反映落錯單唔明點解要換來咁嘅待遇，老闆講咗好幾次我朋友食咗，我哋又唔係西客想唔俾錢，本身嗌到成枱食物都無晒胃口。🤮…Read More