RaymondSee's Profile

相信有睇到openrice呢間千羽堂嘅食評既朋友，會發現我喺尋日已經食咗呢間千羽堂嘅一餐午餐，估唔到今日又咁快就會再食一次😂🤣事源係我尋日食完之後，比咗尋日張相個同事睇嗰個海鮮丼個同事即刻話今日要去食，咁我就同佢去試下。再食梗係冇問題啦，有好嘢食係要同朋友分享㗎嘛🤣🤣咁今次佢就食嗰個海鮮丼而我梗係試其他嘢啦。今次我就唔食飯，食咗黑蒜厚切叉燒拉麵配凍檸茶少甜，估唔到個拉麵都一樣係好食嘅，個湯底都幾濃味，而叉燒亦都幾冧，如果有朋友仔行開呢一頭附近而有興趣嘅，可以嚟試下呢間👍🏻…Read More

今日去咗金鐘美國銀行大廈嗰邊做嘢，做完嘢之後咁啱又係午飯嘅時候，咁就喺嗰邊附近搵嘢食，見到有一間日本嘢食，望一望個餐牌，發現價錢又唔係話太貴，咁我就把心一橫試一試。其實都見到好多人喺度等位同埋排隊買嘢食 ，佢嘅格局就好似普通連鎖快餐店咁樣，一邊排隊買飛，另一邊就去攞嘢食。咁我睇咗一睇就決定食咗個雜錦寶石海鮮丼再加錢飲荔枝梳打，估唔到呢個海鮮丼嘅味道都幾好食，而佢個餐亦都有個前菜沙律，普普通通冇特別，反而係個荔枝梳打有d驚喜，飲落去有荔枝味加埋佢配咗一啲爆珠喺飲品入面，總括價錢唔算太貴味道唔錯，可以 encore。…Read More

小弟本身係天仁茗茶嘅die hard fans，基本上行街見到天仁茗茶都會飲一杯。今日行過波鞋街嗰間天仁茗茶亦都唔例外，但係今日竟然係我對天仁失望嘅初體驗，飲咁多次天仁茗茶，佢哋嘅份量水準其實都保持到好好嘅高質水平。今次我嗌返之前我飲開嘅鮮榨水果綠茶，一拎上手見到份量係爭一節嘅， 唔計佢打起既泡，成杯嘢只係得三分二杯，但都唔緊要 ，旨在口渴飲下嘢啫。但係一飲落去發現中咗伏，完全冇茶味不特止，佢嗰啲鮮果只係得橙汁，感覺就好似飲緊一杯綠色嘅橙汁。所以今次呢個完全係我對天仁茗茶好失望嘅一次經歷，但係咁樣都唔會影響我對佢嘅忠實程度，希望下次唔好再遇到咁嘅情況啦！…Read More

今日lunch同朋友出咗去食午餐，但係同啲朋友都冇乜心水食乜嘢，所以沿住灣仔駱克道一路行行行，行到去呢一間灣仔stadium。其實呢間之前都食過，佢地方唔算太大，不過入面全部都係好多大電視播一啲運動嘅賽事畀客人睇。佢本身係一間酒吧，但佢到午飯時間係會有一啲set lunch畀顧客，咁同啲同事就入去食啦，同之前一樣佢飲品係無限添飲嘅(酒精除外) 呢一樣係非常之吸引人，但係其實我每次食都係飲一杯就已經夠😅今次我嗌咗個set lunch係食香煎雞扒同埋腸仔煙肉洋蔥汁飯，味道都唔錯，份量都好足夠，加埋杯凍檸茶少甜係唔錯嘅。但係今日佢嘅餐湯係有啲特別，竟然係碗仔翅😂😂但係我唔記得咗影相😣碗仔翅冇乜特別，但唔好諗住有咩期望😅我感覺都係飲西湯好似match d。…Read More

今日收工同朋友去咗旺角波鞋街行一陣，行過又有啲餓，但係我哋又唔係話好餓。喺豉油街波鞋街交界，見到呢間豪大大雞扒，都有幾多人排隊，加上好似好耐冇食過豪大大，雖然自己有啲喉嚨痛😂但係都忍唔住去咗買嚟食。咁我就買一隻雞槌食，我朋友就買咗一袋半份嘅雞粒一齊share食。我哋選擇咗少少少少辣粉，因為本身都唔食得太辣，隻雞槌同啲雞粒都熱辣辣嘅，不過隻雞腿就略嫌細咗啲，而啲雞粒呢，發現佢啲粉搽得好厚，所以食落去好似成口都係嗰啲粉咁，而啲雞粒肉就少之又少。希望可以改善下啦，但係食完之後真係好熱氣，要隔一排先再可以食佢嚟。…Read More

今日又係放假嘅日子，冇嘢做去咗附近搵嘢食，最終又係去返呢間太興。雖然之前係有失望嘅感覺，但古語有云，人誰無過呀，點都要畀番機會人地既，不能一次定生死😂而且附近真係冇咩好嘢食😅😅但係今次吸取咗上次經驗之後，決定選擇其他嘢食，最終決定食返我之前曾經經常食嘅煙三文魚炒飯。今次再食返，發現飯既份量比之前多咗，味道亦都比之前好咗，而之前經常有嘅問題，就係食物唔夠熱亦都改善咗。而且今次嘅飲品，並不是冰鎮奶茶，因為之前試過實在太甜，今次叫返正常嘅凍奶茶少甜，味道確係唔錯，相信佢哋嘅茶係用一啲唔錯嘅茶葉去沖嘅。總括嚟講今次係算有少少洗底嘅感覺😂🤣…Read More

今日工作較忙，所以lunch嘅時候都打算買飯盒返去公司嗰度食，於是就去咗公司附近嘅大家樂，打算都係食返最穩陣嘅焗豬扒飯。點知俾我見到餐牌嗰度有呢個香蒜芝士海鮮焗飯，見到好似幾唔錯咁樣，同埋唔想次次都食焗豬扒飯，所以就試一試。買到返公司，一打開就好大陣香蒜味😋😋自己本身都好鍾意食蒜蓉，所以都有啲期待 。而個飯入面既海鮮，當然唔好有太大期望啦，但係味道都唔錯嘅，至於個飯底都係一如以往嘅炒飯底，而我飲嘅都係凍奶茶少甜 ，飲品冇特別。…Read More

今日同朋友喺銅鑼灣行完街，之後去搵嘢食，見好多地方都有唔少人排隊，行經呢間餃子店，其中一個朋友就話試過呢間既餃子都幾好味，咁我哋即管入去食下啦，雖然間舖入面冇咩人。。。我哋三個人就叫左幾樣嘢share一齊食，見到有個餃子好似幾特別，叫松茸雙拼餃子， 估唔到又真係幾好味，另外叫咗個雲耳椰菜豬肉餃同埋元貝豬肉餃子，皮蛋同埋四川涼麵。想不到個涼麵係幾好味，麵質夠煙韌，味道都幾好，仲有任食嘅蘿蔔。啲餃子味道啱啱好，加埋菜脯辣椒醬同埋黑醋就Very Good!…Read More

今日放假無咩嘢做，去搵朋友食tea吹水，行過太興見到冇乜人，於是就入去諗住食嘢吹水，坐低之後我就叫咗個煙燻鵝絲炆米 同飲凍奶茶。下午茶加埋凍飲要食53蚊，其實都算幾貴，咁但係太興應該算係咁啦，質素應該會唔錯。等咗一陣食物送嚟啦，份量足夠，亦都夠熱，但係奈何味道真係偏鹹，食咗三分二之後都冇再食。我就嗌咗杯凍奶茶，如果要叫少甜就一定係加冰，但如果你要冰鎮嘅一定係佢事先沖好嘅，咁我梗係飲冰鎮啦。。事先沖好嘅凍奶茶啦價錢都係一樣加三蚊。但係可能我自己飲慣咗小甜發現呢杯奶茶係非常之甜嘅，下次都係叫返少甜。。總括嚟講質素一般，下次要再考慮一下食唔食。…Read More

今日孤獨一人去食一個孤獨的午餐，自己一個行下行下見到龍鳳冰室，之前都有食過覺得幾好味，所以今日就去排隊食。雖然好多人等位，但係一個人等位唔需要等太耐就可以入座，入到去揀下揀下最終都係揀咗食雞髀蛋飯。隻炒蛋同之前一樣都係咁滑，啲汁都係咁好味，甜甜地咁，分量都算唔錯。但係今次最失望嘅就係嗰隻雞髀，隻雞髀乾到好似柴咁樣，食落去完全硬蹦蹦，乾爭爭，最終隻雞髀我只食咗三分一之後就唔食啦。飲品都係飲杯凍奶茶少甜，冇乜特別。但係今次食完之後覺得有啲失望，相信要一段時間之後先至會再食呢間龍鳳！…Read More

今日同同事去食午餐，同事介紹呢間金蘭花，佢話食過好好味，於是就同佢一齊上去食。上到去發現係唐樓入面鋪仔細細，但係有好多人排隊，仲要排到去樓梯。但幸好位同事已經用whatsapp訂咗位，所以我哋好快就有位坐，細問之下原來whatsapp訂位埋單有88折！！我同佢各自嗌咗一個菠蘿炒飯同一個海鮮炒河，另外職員仲推介個串燒豬鞍。。炒飯炒得幾好味份量足夠，反而個炒河就嫌佢有啲酸得滯。最意想不到嘅係個串燒豬鞍，食落真係幾好味， 最後提提大家記得whatsapp book位呀！…Read More

今日工作做到好攰，平時我每日都會飲一杯凍奶茶少甜，但係今日飲咗一杯凍奶茶都頂唔到周公係咁搵我。。於是去咗公司附近嘅pacific coffee買咗一杯咖啡飲，希望可以提一提神，平時自己都唔係成日飲咖啡，但係今日頂唔順，所以最終都係選擇咗一杯較為甜嘅咖啡焦糖latte ，希望可以頂到一下。。去到pacific coffee冇人，所以唔使排隊，一叫就有得拎杯咖啡，杯咖啡飲落又唔係話太苦亦都唔係話太甜，所以唔係飲得好甜可以選擇唔落糖。…Read More

今日約咗朋友食晏，但係之前嗰日太夜瞓唔知醒，於是轉咗食下午茶。呢個朋友係米線控，見親佢10次中有8次都係食米線。今次就去咗食米線陣，佢極力推介食個小食，就係大汗豬扒，我見個餐牌 都係有手指公嘅圖案，即係極力推介啦，之後我再嗌多個大汗雞扒。咁我望一望餐牌見到有個擔擔麵但有一個辣椒嘅圖案，而自己又唔係食得太辣，所以問咗個姐姐，姐姐就話唔會太辣嘅啫。於是就試一試啦，點知個米線送到嚟食落 出奇地意想不到地好味。。食落甜甜地少少辣，我唔食得辣嘅人都可以接受到。。。下次可以再食！…Read More

今日食晏，見大家樂無咩人排隊，於是就去買嘢食，睇個餐牌都冇乜好食，於是食番個最基本嘅燒味飯。。「叉燒燒肉飯」！再配返杯每一日都必飲嘅凍奶茶少甜。好耐冇喺大家樂食燒味飯， 但係今次食完之後，相信好耐都唔會再喺大家樂食呢個燒味飯。首先講一講我食既叉燒先， 一食落去啲肉好似梅梅爛爛咁淋bet bet ，燒肉望落去好似好新鮮咁，但唔知點解啲皮係唔脆嘅，最失望係嗰碗白飯，啲飯一pat pat，淋到都唔知點食好， 最後係杯凍奶茶，雖然係小甜但估唔到落完糖膠之後都仲係苦既。。 總括而言一段長時間都唔會再食大家樂！…Read More

今日放假，去搵個朋友食晏，個朋友係米線控，所以基本上我係唔需要諗食咩，因為一定係食米線😂🤣佢就食返佢最喜愛既豬潤牛肉豆卜清湯米線，我就叫左腩肉魚腐雞肉清湯米線，我地都叫左少米線，咁可以減一蚊，但其實少米線都多。。我地仲叫左食米線必叫既小食，土匪雞翼同尖椒皮蛋，我最鍾意就係將尖椒皮蛋既尖椒同辣油加入米線度吊一吊味😊土匪雞翼同尖椒皮蛋既質素真係唔會有太大分別，水準都保持到，米線今次唔錯，唔會太軟或太硬，唯獨米線份量叫左少米線都較多，埋單每人70蚊！…Read More