toyl's Profile

公司附近無乜餐廳，lunch唔知食乜好，有時有買九巴月票時都會搭兩個站去返眾安街、路德圍食飯。見到Openrice外賣自取有個滿$50-$10優惠碼，又見到呢間咁多好評，外賣自取又有75折，就試下搭去荃灣西站買返公司試下先！一睇返張單，原來連埋$10優惠碼，夾埋慳咗$28！呢個鹽酥雞，一睇就知唔ok，可能係翻炸所以過曬火。以精美程度嚟講係幾高分，仙草奶茶呢，甜度同冰不能自訂，好彩佢都係以微糖少少碎冰，飲落好啱我口味。總之一定有下次，不過價錢算係中高價，lunch就略嫌貴咗啲，堂食的話約朋友就可以嘅……等疫情緩和先再講…Read More

話說有一個初創公司訂飯盒去公司樓下智能櫃取的app，每日有不同餐廳團購。今日就見到有呢間餐廳台式便當可以食，見減咗15蚊之後卅幾蚊有個台式便當咁抵，就試一下！取餐果度唔太順利，不過呢個唔關食評事就唔詳述了。好不容易攞到個便當返上樓，打開一睇……真係好足料！首先講下個小菜：有拍青瓜同辣菜脯，青瓜爽口菜脯好辣，大熱天時啱曬，兩個都好好食。跟住到個滷排骨，味道足唔太鹹，份量都好多。到個飯……係珍珠米！飯都好多，夠曬飽！滷蛋、豆腐：夠曬滑，蛋黃都有DD流心，好嘢嚟！見咁正……即刻憑餐廳名響食環個持牌處所清單搵下究竟邊度嚟，搵到呢度再放上嚟分享下。遲下仲有機會的話或者轉咗去果頭返工的話可以再叫。…Read More

自從幾個月前轉到荃灣返工，必定食飽早餐先返工嘅我一定要有靚奶茶陪伴。試勻附近早餐，最好食都係呢度嘅丹麥多士奶茶！之前$34都算係正常價，仲好多人幫襯8點通常等位添，不過上兩個月可能成本問題丹多變返厚多士。今日一坐低就叫返呢個例牌，張單一嚟見到37蚊即刻醒曬眼都凸埋！再睇返餐牌，另一個直頭由$26加到$30，頓時領悟到物價飛升嘅感覺有幾可怕。消費券出爐，捱咗未死得嘅餐飲業一定會急起加價，務求賺返夠本！…Read More

十餘年前中六中七，午飯去過無數次金鳳/金加利，時至今日在淘大再遇上。雖然無睇過食評，但好應該再食一餐再回味一下。未睇餐牌都知食肉為主，睇埋餐牌先知有農夫包，可惜我哋夜晚九點才入座，農夫包已經賣晒。今次唔想食得太heavy，無叫鐵板，點了一個燒豬仔髀、一個兩款焗飯。餐包：唔見咗個籃……燒豬仔髀配薯菜(洋蔥汁) $68：只睇賣相已經係非常之吸引，鄰檯食客都一直望住我呢一碟菜 肉的份量值回票價，好入味，鹹味適中，well done!雞扒配豬頸肉焗飯(葡汁) $74：肉的份量一樣好足，炒飯底蛋和飯都好均勻，無乜油，葡汁好有味，加上芝士香味十足。想不到金加利水準依然，可能因為繁忙時間已過，客人開始無咁多，剛剛好唔洗等位，睇伴碟功夫都知師傅會做得有心機掛....下次有機會絕對會再翻尋味。…Read More

長沙灣廣場二樓不經不覺已經由只有一間酒樓，搖身一變多了麥當勞、另一間酒樓、對正麥當勞counter開多間KFC打對台，之後仲開多間譚仔！上一次中午來過一次，睇落好細間，不論堂食外賣都大排長龍，攞籌都要等廿個，中午一個鐘lunch time嚟食真係無可能唔遲到。結果當然放棄夜晚一個人再來，裡面大概有80個座位，但都幾乎滿座！呢度晚巿除咗打工仔之外都有唔少街坊，相信都吸引四小龍居民幫襯。落單後飲品都快到，但食品就等極都無，19:28開單，19:45米線先到！其他人催單，催乜鬼丫，仲遲過我落單，無廿分鐘都唔洗旨意有得食！原來滿座的原因，係因為廚房太慢，個個都等嘢食咁梗係滿座啦……米線到，乜都唔理就食啦，所以無影到相。米線份量：好似少咗DD腐竹唔夠淋，雞肉過熟，酸辣與其他分店差不多，都係鍾意呢隻多過三哥。總言而之：慢！附近麗新分店已經唔慢得去邊，好應該調返個熟手既過來煮米線啦！…Read More

基本上時間許可，而又好肚餓都會響度食埋早餐先返上寫字樓。(我經常性8:40先走入去，8:55已經走番出嚟！)能夠做得我既早餐場地，至少都要有杯令我滿意的熱奶茶，基本上所有熱飲我一定唔落糖。所以對我嚟講要呢個情況下好飲先叫合格！先講奶茶，呢度個茶王做得唔錯。茶葉都有用不同的茶葉溝過，茶膽只係沖兩三次就倒，出來的茶真的少一點苦澀味！奶同茶的比例都係講究的地方，有時沖得唔好，或者係茶王無開工由負責凍飲個靚仔沖既都係爭D，唔好似為班客飲唔出先得架.....好，講返早餐，其他餐唔係一般的牛油方包，係自家餐包，食落都幾飽。環境嘈就嘈少少，有電視睇住香港早晨，都係講清楚GIRL餐無失拖！唔知點解呢個餐有多士，粟米炒蛋，腸仔，番茄雞絲通粉，都係一樣價錢。食物就一般啦，不過好一個營養早餐，個番茄湯唔覺有味精，都係一個唔錯既選擇。早餐中西式飽餅都有，的確嚟得呢度都係熟客，好多都日日見到。除咗set之外，雙拼麵(中西式都係)連熱飲$20都係多人叫，另外就係散叫麵包再叫飲品，都佔唔少人。…Read More

金池徑食店向來同價，唯獨呢間最多人，加下加下已經貴過人兩蚊……下午茶其實比較多選擇，我個人最鍾意呢度既漢堡包。麵包係自家制，底面都有芝麻，漢堡扒睇得出係自己打出嚟，非一般質素。沙律份量都係偏少，我相信薯條份量都會差唔多，但係會等得耐少少。呢個餐配餐茶$23，其實比多$1已經有常餐有麵有奄列加飲品，所以都算係頗貴………Read More

晚餐廿幾蚊幾乎無乜可能，唔想食老麥飲汽水，自從發現呢間之後放工一個人都會去呢度食。熱豆漿真係超熱，甜味唔太過火，個杯熱到十幾分鐘之後飲仲係飲到我滿頭大汗……麵就普通，但係$18有5粒雲吞真係抵食架喇……淨食只係多一粒都要$16，要埋麵抵D……最欣賞就係有少少菜同埋雪菜伴住食，唔似得其他店剩係得主角同麵就係咁多！湯底因為有雪菜同雲吞，唔洗落味精齋滾都有味。點解搭多程車都去食？就係因為放工搭40去到譽港灣，食完再搭29M，八達通轉乘只係比多一毫，都仲平過搭一程地鐵，夠晒屈機！彩虹彩雲一帶晚餐真係無一間平得嚟有冷氣又廿零蚊有飲品！下次再試飯類和上海粗炒。…Read More

牛池灣向來都係無乜好食既茶餐廳，孖仔食過好幾次，今次就食下午茶。法包茶餐$17送熱飲或紅豆冰不過都係飲熱奶茶，不過正常份量似多奶，茶味不夠突出。麵包橫切面，好鬆軟夠香，今次選漢堡扒$17，2餸$19。豬扒包都係呢隻包$22，下次再試。呢間茶餐廳好睇落似係一班後生仔夾份開，唔知係唔係因為食物水準關係，開始多人幫襯 …Read More

本來去 IKEA Café，但係8:15-8:35都係搵唔到位，結果落樓下搵食。睇menu發覺以晚餐$45-$69一個set其實幾抵，主菜算係唔錯。蜆肉番茄意，味道不過不失，算係水準之作。焗飯有點驚喜。雖然細份，但係波菜汁味道好濃，連埋餐包女仔會夠飽。晚餐set有餐包，餐湯加冷熱飲，埋單$103再加一，其實同IKEA差唔多價錢。事後睇番呢度食評，其實都唔係咁差………Read More

次次星期六日去呢間麥當勞都肯定一肚氣，今次絕不例外！首先10:50入到門口已經好多人排隊 11:00準時轉menu，排到11:05先至到我落柯打！原本諗住食精選，諗下諗下不如比多$4食多兩塊熱香餅唔洗食仲好！叫完仲話等十分鐘，等最後一輪炸薯餅……$24.5的熱香餅早晨全餐個炒蛋算係大份，比之前食精選多一半！都好！食完相入面果啲已經好飽，個薯餅打包番屋企比阿媽食 …Read More