TastyStation's Profile

上網見到尖沙咀有依間收益唔貴,但又食到海鮮拼盤嘅餐廳,所以就特登黎食野。距離佐敦地鐵行10分鐘,唔算遠,但一定唔係貴鋪租位置,可能咁令到餐廳成本下降左,可以提供價錢相宜嘅野食。首先,叫左個田園沙律,份量好大,沙律配有黑醋,作為一碟開胃菜。跟住,叫左三款生蠔,係分別來自美國、南非同法國嘅蠔,平時我都唔係一個生蠔愛好者,但都覺得今日美國同法國都幾易入口,爽滑又帶有蠔香，但南非蠔就有少少腥味。試完生蠔,就試下炸蠔,炸蠔係無腥味,仲多左一種熟蠔香味,加上炸嘅關係,又熱又香口,而且一份有六件,都可以同幾個朋友一齊分享。燒海膽芝士多士,多士好脆好香,芝士份量好足。到主角啦,海鮮拼盤,有大磨菇、螺、扇貝、虎蝦同龍蝦。大菇好多汁,黑松露味好出但唔搶味,加埋芝士,幾重味道都好夾螺係用蒜蓉焗,清甜爽口扇貝本身新鮮,有扇貝甜味,而且用芝士焗都唔會好油龍蝦有完整一條，帶有龍蝦味,但煮得有少少老左,仲食到龍蝦膏,幾有咸香，最後食個鉗肉,完全係食食材本身嘅味道,幾重海水味,食一條龍蝦,有幾款味道,夠過癮。最後叫左杯梳打作結。餐廳都有酒水提供嘅,配海鮮又得配肉類都得。…Read More

餐廳地理位置十分方便，從炮台山地鐵站A出口步行4分鐘，會見到大大隻寫住"九份飽"，就到啦！餐廳嘅裝修好有台式小店嘅感覺，好似去左台灣食飯咁。採用左OPEN KITCHEN，可以見到員工沖野飲。落單會有一張紙寫哂所有飲品同野食，全部野食價錢都好平民，唔會好有負擔！因為價錢都好親民，所以我地叫左唔同款式同種類嘅食，包括主食、飲品同小菜。上菜速度非常之快，係15分鐘內，就上哂我地叫嘅食物。紅燒牛肉面份量好大碗，男仔都絕對會飽！湯底煮得非常之香！幼面條，面條偏軟身。牛展有肉有根，口感好好，煮得好腍，好入味！台南擔仔米粉同樣都份量都好多！上面嘅肉燥好香、好好味，米粉質感好爽口，吸哂D湯汁同肉燥味，令到成個面嘅味都融為一體！玉米起司蛋餅蛋餅煎到好煙un，好有咬口，撈埋上面D醬，唔會好乾，個醬個味甜甜酸酸咁，令人一口接一口咁食！滷青菜及滷味拼盤青菜煮得好入味，唔會有草青味，好易入口！滷味拼盤有四種，豆腐、牛展、豬耳及雞翼，四種都滷得好入味，唔會死鹹，唔會食得好口渴，特別豬耳好爽口！九份芋圓鮮草豆奶炎炎夏日，食返碗冰涷嘅甜品係最好架啦！即時消暑！呢個芋圓好特別，好少芋圓嘅甜品係配豆奶底，豆奶香純，好滑，D料比得好大方，啖啖都有佐料，唔會食到底淨返豆奶，芋圓好煙UN，仔細咁食，仲會食到淡淡既芋圓、蕃薯、紫薯既原材料味道。仙草好滑，可以滑落口。成個甜品好啱減肥嘅少女們，唔會太甜。黑糖珍珠牛奶飲到出係用鮮奶整，奶底好香好濃好滑，珍珠唔會好膠，好有咬口，仲要難得有甜度揀，唔會過份甜！另外，值得一讚係飲品係用杯裝，而唔係用膠杯裝，夠哂環保！…Read More

位置十分方便，從寶琳站A1出口，行過去對面，3分鐘到，就會見到大大個招牌。門口就有MEUN可以見到有咩食。呢間餐廳嘅食物種類可以話係應有盡有，唔係淨係得海南雞飯同泰國食，有唔同嘅湯河、撈檬、金邊粉，最驚訝嘅係竟然有意粉食，啱哂一大班人食飯，但各每個人都想食唔同野。仲有特別有一頁係咖啡MEUN，有各式各樣嘅咖啡，啱哂咖啡愛好者！下午荼時段都好似好抵食，揾日要黎試試！招牌去骨海南雞飯套餐呢個套餐非常抵食，$70蚊，就可以有海南雞飯、老火湯、上湯浸時蔬，加飲品半價，抵到爛好少套餐會跟大大碗菜，做到飲食均衡。海南雞飯肉質好滑，唔洗點咬就可以吞，好有雞味，好香;而飯都好值得一讚，事關佢一放低，我就聞到陣陣椰子香味，十足去左泰國咁;三個醬個人，最鐘意係甜鼓油，甜甜地，零舍開胃，而湯飲得出係有心機煲，蘿蔔湯亦好啱呢個季節飲。秘製潮式滷豬脾湯檬豬脾滷到好入味，個味道帶少少甜味，而家湯底有少少辣，兩者好夾，檬粉吸哂個湯底味，令到啖啖面都食到湯嘅精華，豬脾嘅份量比到好多，好似食極都食唔哂咁，就算係男仔食完一碗都會覺得飽！四川麻辣口水雞(例牌)肉質同海南雞一樣，都係咁滑，同埋認真夠辣，一放入口已經覺得好辣，無幾耐，麻開始出現，鐘意食辣嘅朋友仔推介你可以試下！麻辣腎片呢一道麻辣都係夠麻夠辣，腎片好爽口，作為小菜好正！愛在深秋愛在深秋其實係青檸梳打水，味道酸酸地，好開胃，加左梳打水為炎熱嘅夏季加左陣清涼嘅感覺，係炎炎夏日飲，認真消暑！呢杯野飲係無加糖，啱哂D想減肥瘦身嘅靚女！…Read More

平日係朗豪坊行,都好少係商埸食野,估唔到入面都有唔貴又好食嘅餐廳。餐廳提供幾款意粉,有唔同醬汁,肉類,海鮮同菜,毎款都好吸引,價錢最平88蚊就有。餐廳仲有三文治小食,睇落都幾健康咁。仲有啲特色啲嘅雪糕賣呢。買左餐後,店員比左個牌我,就可以入去搵位坐,店員會拎啲野食比我地。我點左個溫泉蛋卡邦尼意粉同餐前沙律食,成個餐盤攞設,有啲金銀色邊緣作裝飾,好靚,食野都食得開心啲。個蕃茄青瓜沙律,落左少少芝麻醬,幾開胃。麵包係牛奶白麵包,幾軟有奶味。意粉賣相都好靚,亦由唔同材料整成,有溫泉蛋,煙肉,各種磨菇。食落味道好濃牛奶,creamy,好好味,意粉唔會太淋,有咬口,加埋溫泉蛋,蛋味幾香,蛋白都增加左順滑嘅口感，而且仲有流心效果，超治呀。磨菇都帶左啲爽口感,整體上幾好食,口感都好好。食到最後有啲汁聚底,可能食嘅時候撈均勻一啲會好啲。…Read More

聽朋友講,尖沙咀The Capital有間cafe好大,一班人如果想坐耐啲食下野飲下野傾下計,可以去試下。今日星期一,去到都唔算多人,有得㨂坐大豆袋或暫木櫈,坐豆袋記得要除鞋啊。餐廳都好大,平日黎唔怕無位坐嘅。店內仲有啲精品賣,好多手工卡仔,吊飾賣,仲有一系列嘅柴犬公仔有得睇同影相,行下都唔錯呢。點餐方面,本身想食香蒜辣椒蟹肉意粉,可惜蟹肉賣哂啦,唯有下次再黎先食。最後點左真龍蝦肉蕃茄醬意粉同帶子蘆筍海膽汁意粉,兩個意粉都有驚喜喎。蕃茄意粉嘅蕃茄味道好出,比較濃味,龍蝦肉都拆左件,份量唔少,賣相都好靚。海膽汁意粉嘅汁真係有海膽味,第一次試依種汁,都幾中意,帶子有三粒,外面微脆,入面鮮嫩,好出色,仲好過有啲日本餐廳嘅水準。最後提提大家,食完野要自己收捨好啊,依到係顧客自己照顧自己政策呢。…Read More

餐廳嘅位置比較難揾，唔係係大街到，但黎到樓下，會有大大個招牌寫住。環境好有中式嘅感覺！餐廳老闆睇黎都係環保之士，餐廳貼左減膠嘅POSTER!MEUN都有好多野揀，鐘意食辣嘅人可以揀水煮系列、麻辣煲系列，唔鐘意食辣嘅人可以揀小菜又得！原味焗硯呢個係必食推介！蜆好鮮甜，餐廳比嘅份量好大方，蜆嘅數量係佈滿成個蒸籠，粒粒蜆都好大隻，粒粒蜆都有飽滿嘅蜆肉，唔會有D淨係得個殼係到，濫於充數。麻辣煲日本桶蠔呢個如果食得辣嘅人就會食得好過癮，非常之夠辣，日本桶蠔好大隻，用筷子夾都淨D夾唔超，蠔肉好飽滿，大大隻，食起黎好過癮，蠔肉好鮮美，食到海鮮嘅鮮甜。煲底放在薯條同青瓜，吸哂D味，係成煲嘅精華，但食到最後會有D太辣。呢個煲餐廳會有個火烘住，確保食全程都係熱辣辣，但如果食到最後覺得好辣，都可以叫店員熄左個火佢。上湯時菜現代人飲食習慣成日都多肉少菜，出街食飯要叫個菜，感覺會健康D！呢個菜絕對值回票價，上湯好鮮甜，D菜吸哂D味，唔怕會有青草味覺得難食。流沙包呢個流沙包又係第二樣好值得叫嘅菜，見到佢嘅造型已經殺左唔少菲林，可愛嘅豬仔造型，一上枱，令到一眾少女尖叫聲四起，POST上IG呃LIKE一流。佢絕對唔係得個樣，無實力！一MEET開個包，入面嘅奶皇餡即刻流出黎，半體狀，超好食！入面應該放左鹹蛋，帶到成個包香味。聽老闆講，呢個包係佢地手工做架！高力紅豆第一次食高力，即油炸蛋白，上菜時，侍應會好貼心幫你剪開，佢係好鬆軟，可以比美而家好紅嘅梳芙理PANCAKE，入面嘅紅豆餡唔係好甜，好啱係呢個甜點，因為佢出面已經灑左糖粉。但我個人覺得可能揀奶皇會好D，因為剪開果時，紅豆會甩出黎，令皮同餡分開。沙參燉雞湯品好清，唔會有油膩嘅雞油，沙參唔會好似人參咁個味嘅咁重，同埋有一陣獨特嘅風味。結言:CP值高，份量比得大，食物質素高，適合一大班食，例如莊聚。…Read More

係深水埗行完黃金,係後面搵到間日本餐廳,見佢啲壽司同甜品都好吸引,就決定入去食啦。點左一個壽司盛同甜品拼盤,每道料理都有好多食材,滿足到想試唔同野嘅我。送左一碗好優秀嘅湯,唔會太咸且非常鮮味,因為用左三文魚去煲,湯入面仲可以食到三文魚肉同皮脂,大讚。壽司盛一共有11款壽司；火炙三文魚好食,充滿三文魚油脂香；牛肉都有好濃牛味,一入口就爆發出來,可惜有少少筋,但味道上有驚喜；最震撼嘅一福卷係由吞拿魚蓉,海膽,三文魚子,蔥,紫菜飯組成,不論口感定對味蕾嘅衝擊都好豐富，蔥增加左爽口感同香味，魚蓉好順滑；主角海膽都鮮甜,唔腥；三文魚子給予咸鮮味；每一啖咀嚼都有唔同味道,唔捨得咁快吞。甜品多樣性都好高,有五大款。白桃雪糕好好食,有甜甜嘅桃味,仲有乳酪嘅酸味,兩者好夾,亦都打開左食甜品嘅胃口心太軟好靚,入面係朱古力同阿華田嘅熱漿,配啲外層蛋糕食,好滿足。其實同一兩個朋友黎食甜品都係唔錯嘅選擇。最後㨂左枝消茶飲,完結依一個膳食。…Read More

位置十分方便，係登龍街V POINT隔離。日喜樓嘅LOBBY製修得好靚，有成個花花牆，女仔最愛，可以呃LIKE。仲有靚靚SOFA可以比人坐係到等。入面有好多張大枱，啱哂一家人黎食！餐廳與時並進，而家已經用IPAD睇MENU！餐廳用嘅餐具好靚，好有設計感！杞子花雕彫醉雞我平時就唔鐘意食酒味好重嘅花彫雞，呢道做得酒味唔重，雞肉好滑好嫩，非常好食！北京烤鴨好少係香港食到唔錯嘅北京烤鴨，係到就可以食到，北京烤鴨嘅份量比得好大方，我覺得半隻鴨就夠全家人食，呢到都有片皮鴨，配料就有餅皮、青瓜、洋蔥及甜醬，片皮鴨燒到個皮脆卜卜，好好食，仲有層脂肪附左係到，咬落去食到啖啖油香，但唔會好油膩，肉亦唔會燒到好老，仲保留到肉汁，甜醬係呢道菜嘅靈魂，甜甜地，帶到鴨味。加多$78，就可以有第二種食法。爆汁牛肉餡餅小心小心，食呢個餅果時真係要小心，因為佢真係會爆汁，佢個皮薄，入面有熱辣辣嘅湯汁。四喜臨門好特別，小籠包有四隻色，每隻色都有唔同味，包括:原味、蒜味、九層塔同茴香，小籠包皮薄餡靚，咬開爆開哂D湯汁出黎。茶樹菇、金菇高湯翡翠苗煮得好爽口，高湯好入味。鱈魚雪裏紅煨面面身煮得好有咬口，可以一試！…Read More

今日係旺角睇完戲，勁肚餓，想食好多野醫肚，所以㨂左放題黎食。一入到餐廳，見到嘅店員都好好態度，一開始就提醒我地咩枱號，又會主動收走空碟，收之前又會問我地仲要唔要，仲好好笑容。真係好耐無見過咁好服務態度嘅餐廳。咁野食方面又點呢？鹽燒牛舌；食落好香有肉汁，啲調味好足，孜然味且鹽味好出，岩哂重口味嘅我。芝麻雞翼同吉列蠔；雞翼好出色，食落香口，勁多芝麻，雞又唔會好乾，一定要食依個!蠔嘅味道都唔錯，我一直都中意吉列蠔多過生蠔，覺得炸過嘅蠔更加香，依種蠔嘅size比較細，但放題可以食多好多隻，一樣咁滿足。吉蝦蝦、蟹捧、南瓜同炸鮮奶；頭三樣嘅味道同粉量都正常。炸鮮奶幾好食，奶味好重好香，帶有啲甜味，當係甜品食都唔錯。雞軟骨串；我一直都好中意食軟骨，佢依個都燒得唔錯，香口有孜然味，食落脆口好過癮，之後仲加多左兩串比自己，哈哈。焗帶子，燒蕃薯、菠蘿；帶子係用沙律醬去焗，但個人覺得油左啲。燒菠蘿就真係無得輸，又甜又多汁，唔會太乾身，諗起都想再食啊。野菜牛乳鍋；個湯頭好濃好香，同埋啲爽甜嘅菜一齊食，好舒服，即時覺得好健康，仲有啲豆腐，好滑好有豆味，足哂料。 萄撻；細細個，味道都唔錯，但有少少乾。鵝肝帶子壽司；依個好好食，帶子本身好新鮮有味，加埋鵝肝，入口個香味就出哂黎，幾出色。瑤柱海鮮粥；個粥好有鮮味，口感都幾綿，仲有兩隻蝦，新鮮爽口蝦味重。最後仲有各款甜品，勝在款式夠多選擇。而且仲有夾糖，童年回憶翻晒黎呀！依間可以再戰!…Read More

呢間cafe嘅地理位置有D難揾，係油麻地站A1出口，向前行，行到登士打街轉入去，見到一間食日本丼飯嘅餐廳(鐵X堂)，隔離有條巷仔(唔好懷疑)，轉入去，行約一米就會見到恆威大廈嘅入口，上到18樓，就係呢間CAFE嘅所在地。大大個NEON LOGO掛左係門口有一張搖搖掎放行門口，令你可以重拾童真。CAFE座位間非常闊，約上黎講是非隔離位都唔會聽到！店主一睇就知係好有ART SENSE嘅人，CAFE周圍都放滿左唔同嘅油畫，最特別嘅係天花板畫左一大片天空上去，香港人生活咁繁忙，幾時可以得閒望下個咁藍嘅天空。個MENU好得意，大大本，食物種類亦有好多，令到有選擇困難症嘅我都唔知點揀好！店主對於餐桌佈置亦好講究，枱上放一個小小假蠟燭，好有情調，帶另一半上黎食絕對唔失禮！餐具亦配合主題油上左藍色。紅菜頭甘荀濃湯我第一次飲紅菜頭湯，老實講，以前對紅菜頭嘅印象唔好，覺得個味實好青，但個湯飲黎好CREAMY，好好飲，令我愛上左紅菜頭湯！跟湯嘅法包焗得好脆，點湯食一流。小貝柱海鮮湯呢個海鮮湯非常足料，但個人黎講就有D偏鹹。黑松露燴意大利飯正宗嘅意大利飯係香港好少食到，大部份都會整到林PAT PAT，呢個意大利飯按傳統方法烹調，整到外硬內軟，好有咬口。另外，黑松露嘅香氣透到成個飯都係，每一啖黑松露嘅香氣都會係你口入面擴散開去，CAFE仲好不惜工本，係上面放左一大大PAT嘅黑松露醬， 黑松露FANS唔好錯過！法式燒牛柳配自家製紅菜頭莎莎醬牛柳七成熟，牛柳煮到粉紅，好滑！紅菜頭莎莎醬好特別，配合牛柳食更突出到牛柳味！青檸薄荷梳打青檸酸酸甜甜好開胃，薄荷清涼怠好醒神！後記:待應服務十分殷勤！另外，比起其他CAFE，LITTLE FRESH更加注重食物嘅質素，食得出係好用心準備食物，而且對整野食好有HEART，亦堅持用傳統方式煮野食，平時出街食親都係連鎖餐廳，食黎食去都係同一個味，好少可以食到真係用心整嘅食物，係香港呢個社會，慶幸仲有人會有團火，去出走屬於自己嘅路！…Read More

餐廳位置好容易揾，就係一蘭隔離。餐廳製湟好別緻，好台灣CAFE風格，令人覺得可以係香港呢個繁忙嘅都市入面揾到少少喘息嘅空間。牆上掛左唔同分店嘅相，同埋仲有好有藝術風格嘅塗鴉。值得一讚嘅係枱椅唔會擺到好近，令到坐嘅位好逼，佢地位同位之間嘅空間好闊，坐得好舒服，亦唔會聽到隔離枱講咩，有反D私隠。MEUN上面有9款唔同口味嘅火鍋揀，每款都只係$88蚊非常化算，包粉絲/飯，加$12蚊仲可以升級至魯肉飯，套餐仲包一杯飲品，非常多野食。招牌臭臭鍋名符其實嘅臭臭鍋，真係夠臭，同時又好惹味，推薦食入面嘅腐竹，吸哂湯D味，好好食。台式麻辣鍋呢個鍋入面本身已經有泡面，所以加埋佢送嘅主食會好飽，麻辣鍋係台灣名物，係呢到一樣食到台灣味道，推介食鴨血，鴨血同麻辣鍋係PREFECT MATCH!鹽酥雞同台灣腸鹽酥雞炸得十分香脆，調味好夠，好惹味!台灣腸有一種甜味，好令人一口接一口食！巨峰提子梳打&奶蓋烏龍茶飲品係用飲品鋪嘅杯入，令人好似係飲品鋪飲嘅咁，巨峰提子梳打唔會死甜，唔會好似飲汽水咁，果味十足！奶蓋烏龍茶個奶蓋好CREAMY，正！烏龍茶烏龍荼係額外加嘅，所以特別大杯，有茶甘味，清清地好好。餐廳十分貼心，外面有充電借，好貼心！…Read More

土耳其，我未去過 ; 土耳其菜，我更加未試過。由友人口中得知，原來香港有主打土耳其菜餐廳，就毫不猶豫黎試下。未開餐前，店家先送上一杯薄荷茶，感覺好清新。而小玻璃杯更有特色圖案，好有土耳其風情呢。沙律，有番茄仔、青瓜、蘿蔔，調味簡單，入口非常清爽，作為前菜剛剛好。另外，店家上菜時會放係木板上，好有特色。土耳其小食，之前都有食過烤餅，但都係點不同類型既醬汁食，而今次配上薯條食。薯條唔係炸到好脆身，反而偏向軟身，食落薯味十足。而醬汁份量唔會過量，所以都唔會蓋過薯味。三文魚扒拌薯蓉，三文魚扒外層十分香脆，入口卜卜脆，好似食緊炸魚皮咁。而三文魚用上黑椒調味，調味方面有點重，搶咗三文魚既味。不得不提，三文魚扒旁既薯蓉，薯蓉唔似平時西餐食開，會加上大量牛油、忌廉調味，反而係好單純既薯味，呢點非常吸引我，而且薯蓉入口唔會好散，而係少少黏口，個人而言，非常中意呢個口感。甜品，一直以為龍鬚糖係香港特色小食，原來土耳其都有好類似既食物。土耳其龍鬚糖，由好多糖絲組成，所以入口即化，糖度都幾高，食完再飲返啖薄荷茶，就啱啱好。…Read More

周未，最好揾一間Cafe，同三五知己食下野、傾下計，令心情放鬆一下，為自己叉叉電，準備迎接新既一周。Cafe Paradise有幾間唔同分店，太子分店比較近大家，所以今晚相約係到聚餐。Cafe外形好亮眼，純白色既外牆﹐加上大大個店名﹐好易揾到。店內的空間唔算好大﹐座位與座位之間好近。食物方面﹐可以點Dinner Set或者散叫都可以。我見食物的份量都幾大份﹐所以就點咗一份Dinner Set加散叫主食﹐兩個人Share黎食。店員推介香脆豬手﹐我地就點咗一客試試。上枱時﹐豬手仲係熱辣辣﹐切開中間﹐仲有微微煙冒出﹐而且份量好大份﹐Share食就啱啱好。豬手外皮好香脆﹐肉味都好香﹐整體黎講﹐唔會好油膩﹐同調味控制得好好﹐唔會太咸﹐非常惹味呢。另外﹐我地散叫咗一客西藺花雞肉意大利粉。意粉彈牙﹐唔會煮得太腍。而白汁烹調得好好﹐汁既份量好適中﹐入口感覺唔會好Heavy。但若果多啲雞肉會仲正啲。而餐飲就點咗榛子牛奶﹐牛奶入口順滑﹐帶有淡淡既榛子味﹐但又唔會搶咗主角牛奶既味道，配得啱啱好。…Read More

餐廳位於旺角，店家裝潢好有特色，模擬一個街場的環境，可見店家在餐廳佈置方面都花上了不少的心思。我與友人於中午時間到，除了定食外，還有邊爐。邊爐先選擇肉類，再㨂湯㡳，及三款配料。配料有好多款，如鴨血、芝心丸、梛菜餃、水餃等等，有成二、三十款，實會找到款適合。我一向喜愛吃海鮮，見到有海鮮邊爐，二話不說，馬上選擇。邊爐還有多不同醬料，供客人自行調味。海鮮爐邊，十分足料，有超大隻的海蝦、鮮味十足的大蜆、厚身的魚片。大蝦勁彈牙，大蜆同魚片都鮮味十足，非常美味。海鮮的份量好多，淨食海鮮，都飽咗大半。真係好大隻海蝦！而友人則揀咗西班牙黑豚肉，肉味好濃，都非常好味呢。另外，每個邊爐都會配上蔬菜、番茄、菇等配料。仲可以選擇配白飯、烏冬、紅薯粉。而我今次則揀咗番茄濃湯，茄味極濃郁，湯㡳仲有片片番茄，真材實材。店家仲非常細心，見我地個爐無晒火，主動幫手換火，同埋會為我地個邊爐加湯，好抵讚。…Read More

一周工作辛苦，周未最好約好友到Cafe食下野，輕鬆下。今日黎到旺角樓上Cafe，同好友相聚同食晚餐。美味故事的晚餐時份有不同的Dinner Set供選擇，有安格斯牛、慢煮三文魚、芝士咖菇、意粉等等。我就揀咗慢煮羊後膝。㨂完主菜之後，仲可以自己揀埋沙律、餐前小食、餐飲及甜品。鮮果沙冰，是日係芒果沙冰，細細杯，作為餐前小飲啱啱好。磨菇濃湯，超級Creamy，而且仲今到粒粒磨菇，令整個濃湯多一份口感。温泉蛋蟹籽沙律，蟹籽好鮮，唔會只得死咸，而温泉蛋更有流心效果，可以撈埋沙律一齊食。紫菜雞捲，用上壽司包飯既概念，不過中間換上雞捲，感覺幾特別。雞肉好嫩滑，配埋照燒汁作調味，無得輸既配搭。慢煮羊後膝 配 酸忌廉焗薯，平時食羊都係食羊架多，今次都係第一次食羊後膝。餐廳以慢煮既方式烹調，令羊肉肉質特別嫩，而且唔會有好重的羊羶味，同埋入口有少少膠質黏口既感覺。羊後膝份量好大份，食完勁飽肚。份量十足既羊後膝。北海道奶凍，上面仲放著香甜紅豆粒，而奶奶味極之香濃，質地好滑溜。美味故事既野食都好大份，若果兩個女仔黎，可以點一個Dinner Set再加小食或飲品Share，只要每人消費不少於$100就可以。…Read More