五臟廟's Profile

好不容易過完受氣的一週，決定星期日慰勞下自己。之前見大家comment 幾好，就試下哩間餐廳。可能我哋比較晏，個餐廳唔算好爆，正適合一個悠閒舒適的周日。朋友叫左個黑毛豬鞍、我就叫左個羊鞍。先上沙律、麵包同周打魚湯。估唔到個湯嘅味道好有驚喜喎，仲有淡淡魚肉，真材實料。到主菜上場了。我同朋友一齊share。個羊鞍一啖咬落去，個肉好嫩，羊味恰到好處又唔會太騷，正。至於個黑毛豬鞍，更加特別，肥瘦相間，好有油香，仲有3塊，女仔來講一定食唔晒。估唔到個配菜都有驚喜喎，我平時唔鍾意食沙律菜，但係呢度嘅配菜我全部都食晒！由小處絕對可以看得出個廚師嘅心思，白蘿蔔清甜多汁，紫薯蓉甜而不利，連菜心都甜喎。最後仲有朱古力蛋糕，為豐富嘅一餐畫上完美嘅句號。總括來講，以呢個價錢可以食到咁嘅質素同埋咁嘅份量，真係物超所值！…Read More

Happy friday, 一啲都唔happy。打工仔咁辛苦都係為兩餐, OT到8、9點，諗住食返餐安樂茶飯，點知食咗一肚氣。兩個人叫左個無錫骨、香蒜萵筍土豆絲。上咗菜，其實個無錫骨個味道都唔差，係啲肉有少少‘鞋’，到咗個土豆絲就出事了。因為我同老公都唔食辣，但係原來所謂香蒜土豆絲係辣嘅，仲係好辣嗰隻。咁我哋就好禮貌叫個經理可唔可以轉第二個菜啦，點知佢一句駁返我地，話我地成碟都食晒（有圖有真相，真係每人食咗一啖咋），仲邊有得換呀，仲話‘香蒜’即係辣啦。可能我中文差，唔知‘蒜’和‘辣’是同意詞。最後佢都係唔肯換俾我哋，我地唯有放棄碟餸。其實呢間酒樓啲嘢食同其他夥計都唔錯，估唔到服務最差的係經理，可惜。食少一個菜，唔夠飽，經過7–11買咗個忌廉瑞士卷，反而有驚喜，好味…Read More

我成日係火炭出沒，不過又好少去工業區搵食，估唔到今日比我發現一間有驚喜嘅小店。經過小店見到有唔少人幫襯，我即管叫咗個雞便當加杯珍珠奶茶試下。估唔到連餐具都有design, 同個鋪頭名一樣幾特別，睇得出係擺咗心機落去。食物方面，個雞幾滑幾唔錯，杯珍珠奶茶大杯抵飲，個人覺得個套餐好超值，一定會再幫襯這間有heart 的小店。…Read More

打工仔返工搵錢要受氣，估唔到駛錢都要受氣。中午同同事嚟食飯，佢叫咗個冬陰公金邊粉，我就叫咗個清湯金邊粉。點知佢比錯咗個冬陰公金邊粉我，咁我好客氣咁樣同佢講話我唔食得辣，我頭先係要清湯金邊粉嘅。跟住有個疑似老闆娘嘅人就開始不停話我做咩落單嘅時候講得唔清楚，我就話我落單嘅時候講得好清楚㗎，咁佢又話佢覆單嘅時候我又唔講清楚。大佬呀，而家你落錯仲要我say sorry 啊？糾纏完一輪終於肯換俾我。雖然自知呢度唔係五星級酒店，唔會有五星級服務，但係都唔使差到咁。貼錢買難受，呢度我唔會再幫襯。…Read More