closetosea1103's Profile

喺附近上堂搵嘢食過嚟試吓，有驚喜，我食素，呢度嘅素車仔係我食過最足料最抵食，$42有幾個餸（冬菇、酸齋、豆卜、蘿卜、生菜）連埋豆漿，仲可以免費加冬菇汁同辣菜甫，去邊度搵⋯而且樣樣餸都好味，呢個價咁高質真係好難得，我自問唔細食都夠飽。同埋店家有禮貌，又唔會歧視我呢啲細單客，又唔會催你落單、催你埋單，等我呢啲社恐可以冇壓力慢慢食。真係素食者恩物、良心小店，加上上菜又快，以後如果經開都會想再嚟，祝生意興隆。…Read More

一直認為鐵板燒只係「綽頭」。如要追求鑊氣或風味點解唔支持我哋本土嘅大排檔。只因一位對日本飲食文化素有研究嘅朋友多年來不厭其煩地推介，盛情難卻下來到席前。今餐飯令我諗起朋友經常提到日本人嘅「料理美學」、用「五感」品嘗「五味五色五法」，講究由食物烹調到呈現，同時又代表著一種飲食文化。味道、烹調手法多樣化，小菜搭配同擺盤美學等等，每個細節都令我對鐵板燒日本料理有所改觀。對於仍然「受人二分四，做到索哂氣」嘅我來講，滿足三兩小時口福之慾盛惠二千並不合符個人理財哲學，唯有當做買一趟難忘嘅文化體驗！以「生」「鮮」為主，欣賞食皿。熬過嘅醬汁味道較濃郁，從咸香中帶出食材鮮甜。先淡嚐一口龍蝦原味，再以蝦膏汁入麵意外美味。雙法烹調，魚肉蒸，魚皮炸，難忘咬到一口魚脂香，再將魚肉伴入花屑忌廉汁同吃。除海鮮以外肉類我都不沾，只好交朋友代嚐。朋友導賞講解呢道係和食文化中嘅〝食事〞，意味餐宴步入終點，同步打破我「飯吃七分飽」嘅養生大原則。望著經過鐵板上一番格鬥嘅飯粒由濕潤纏綿變得堅挺而自帶鑊氣，我先喝下幾啖海鮮味噌湯，繼而將醃菜及炒飯交替一口接一口地送到胃腑去，炒飯捨棄「別有用心」嘅調味，未知是否想讓原材料自行向味蕾交代。最後的最後係一瓣清甜蜜瓜。未有熱情殷勤嘅招待，取而代之嘅係輕鬆不拘謹嘅款待，離開前迎來謙厚總廚嘅鞠躬道謝完滿作結。…Read More