amyxoxo的个人专页

同朋友weekday dinner喺Cafe Paradise食，要預先book位，8 點入到去係full嘅。餐廳個環境都唔錯，今次叫咗個Paradise Full就108送埋橙汁, 未計加一。啲料都好足，所以一個人未必食得哂，好彩有朋友幫我食啲...... 咁多樣入面覺得薯餅係最好味，唔會炸到好油好膩，漢堡亦都唔錯。大家去食呢間一定要book位，walk-in好大機會摸門釘。同埋dinner好似有最低消費100蚊。…查看更多

 今次要大力推介嘅係水見地瓜球嘅皇牌手工地瓜球，當日係有2個職員，舖面唔大但係服務態度、等候時間等等嘅安排都非常好。老闆超級好人同搞笑，學生只要show張學生證就可以有8折，原價28蚊嘅大份地瓜球變做22蚊絕對超值。啲野食係真係即叫即整，唔係放喺到一段時間，一拎到手已經聞到好香嘅味道，咬落去有好香濃嘅地瓜味，一啲都唔覺得油膩。大份嘅地瓜球一共有12粒，今次地瓜球有4粒紫色、8粒黃色，老細話好多人都會灑上青梅粉，味道一流。希望有更多人支持年青人開嘅小店，食咗呢到嘅地瓜球算係彌補以前去台灣冇食到地瓜豉嘅遺憾。…查看更多

同朋友喺北河街體育館行過去西九龍中心food court搵野食，上到去好多人、亦有好多餐廳揀。最吸引到卵地係呢間印度餐廳，老實講，餐牌上面好多樣餸都好似好好食咁! 因為想識啲平時少食嘅野食，最後揀咗Curry Corner嘅南印度餡餅($45)，等咗5-10分鐘就有得食，啲份量有啲嚇人。第一下咬落個餡餅到就知幾足料，餡餅上面加咗層蛋，所以食落去更加滋味，同埋碟野附送醬汁、有薄荷醬嘅菜同湯，令味道唔會太膩。真係好抵食啊!下次再嚟會想試吓素食set，希望水準都係咁好。…查看更多

觀塘駱駝漆大廈一向有好多野食同買，今次其實係去另一間餐廳食Lunch，不過食完之後行吓見翻Holam Bakery。係第二次食Holam Bakery嘅千層蛋糕，我地下午2點到，但係個櫃已經得翻3件蛋糕(2件奶蓋黑糖、1件抹茶牛乳)，好誇張.....已經唔記得上一次食係幾耐之前，不過佢嘅食物質素依然係咁好，個蛋糕唔會好膩，個甜味好出! 希望遲啲有機會再食唔同口味嘅千層蛋糕。冇記錯間舖頭12點就開，如果大家想即場食到唔同味嘅千層蛋糕就最好1點或之前到。…查看更多

因為餐廳較細，而且係星期六食，所以要等一陣先有位。店員做野好快手同有禮貌，食物等大概10分鐘就有。店舖格居好有特色，牆物擺滿唔同日本酒品牌的盒，不規則咁排又幾靚。食物方面，如果冇記錯，Lunch set (定食)全部都係$53，有主菜、飯、麵豉湯同埋沙律。中間果個醬係專配芝士雞柳嘅，雞柳入面真係有好濃嘅芝士味，加醬同唔加係兩種完全唔同嘅味，建議大家兩個食法都試吓。不過唯一要改善嘅係飯量，略嫌少咗啲，一般男仔食量應該唔夠飽。…查看更多

間餐廳應該係長期唔夠人手，喺舖面嘅5隻手指數得哂，收銀嘅有時做埋其他野。座位安排方面，就算叫到我，佢地都未搵到位比我地坐，企住喺到等。同埋我地洗完碗筷同留底嘅大盤、點心籠同埋碟都長期冇人清理，成張枱變得好逼。聽到附近食客想要碟辣椒醬，但係過咗好耐都冇人拎比佢......食物方面，我地叫咗個Lunch set($98)，佢可以揀兩個指定嘅飯/粥/腸粉+兩份點心+菜。今次叫咗鳳爪排骨飯+農家肉餅飯+京式小籠包+酥皮叉燒包+白灼時蔬，連埋茶錢，冇加一，就總共$112 。份量係夠嘅，但味道好普通，唯一叫做好食嘅可能係個酥皮叉燒包，不過略嫌佢太甜。雖然地理位置好方便，但係論服務態度同食物質素真係唔多ok，如無意外，下次唔會再嚟呢間餐廳。希望間餐廳可以改善吓。…查看更多

有openrice account以來第一次開Post。黃大仙區嘅黃店唔算多，呢日同朋友中午大約1點半去刀鋒寶貝食lunch，呢間餐廳應該係開咗冇幾耐，咁啱唔洗等位。我地order兩個餐，我叫咗蔥油手撕雞飯+龍眼蜂蜜($48)，而朋友就食台式牛肉麵+黑糖薑母茶($48)。個人認為好抵食，手撕雞好好食，份量係夠食嘅。喺出面食飯好少有呢啲免費嘅特飲，平時食開嘅都係得奶茶咖啡檸茶檸水。員工做野快手，同埋有禮貌。由落單到有野食10分鐘就有，唔洗等好耐。唯一要改善嘅係啲飯唔夠熱，其他野都做得好好! …查看更多