Keresawong.L.S's Profile

集合肉店、雜貨店同埋英式餐飲嘅餐廳, 主張引入農場直送優質食材, 供應不含激素、抗生素同埋生長刺激劑肉類, 令食客食得放心又健康。每日推出不同優惠, 而今次星期二到店, 即享有T Bone半價優惠!! 餐廳劃分三個區域, 分別為用餐區、肉類選購區同埋調味品離貨區。用餐區環境氣氛高級格調有如置身外國似的, 而且平日晚入座率依然高, 確實係人氣之店。入座後先到肉類選購區挑選心水嘅T Bone, 再揀配料同埋調味汁醬, 由店員直接送到廚房烹煮。餐廳除了供應肉類, 當然仲有多款特色美食、小吃、酒類飲品等…【生牛肉他他】HK$178粉嫩手切牛肉中混入了煙黨制紅椒粉、佛手柑、Parmesan芝士凍同埋蛋黃, 頗有黏滑感, 肉質嫩滑冇筋, 味道平和, 送酒一流。【T Bone】HK$560 (半價折實價)自選medium rare, 生熟度掌握得唔錯, 嫩紅肉質盡顯新鮮, 肉味香濃, 配上自選嘅青胡椒醬汁, 確令人回味。配菜分開上:【千層芝士焗薯】HK$78賣相非一般, 表面加上了香濃Giruycre芝士, 焗薯口感幼滑, 配搭芝士, 美味絕配!!【芝士通心粉(小)】HK$78通心粉要趁熱食, 否則口感偏硬少少, 芝士味突出, 細嘅份量都夠哂兩個人share。【燒粟米】HK $78粟米燒得有微微焦, 淋上了味噌牛油醬汁再加了Ricotta芝士碎, 粟米清甜多汁, 沾埋醬汁食, 有一點鹹香。【CAMPARI & SODA】HK$98酒杯中自行加入Soda水, 可自行控制酒精濃度, 入口有少少少澀, 在口中停留一陣, 滲出甜甜的。【STRAWBERRY & MINT FIZZ】HK$68士多啤梨梳打加薄荷葉, 感覺好fresh。…Read More

北京道一號為高質食肆集中地之一, 而最頂層呢間主打PIZZA BAR嘅餐廳絕不例外, 性價比高, 而且環境開揚, 高處欣賞維港日夜景色, 美酒佳餚夠哂chill。呢度有齊cocktail & mocktail, 款款別具特色, 打卡一流!【YEUNG JI GUM LO】HK$138以中式飯碗盛裝上檯, 由柚子、西柚同埋椰奶混合而成, 柚味極為突出, 自行加入冧酒整成嘅西米, 味道更有層次。【BO LO BAO】HK$98面層好似個菠蘿包, 口感如忌廉般軟滑, 富有牛油香, 經牛油層深入嘅再飲到菠蘿椰子味梳打, 清新好飲。食物方面, 多款特色PIZZA任君選擇, 其中人氣推介就係呢個中西合璧嘅片皮鴨PIZZA!!【The Ducky】HK$168傳統燶邊薄批, 上面加上了自家製烤鴨、片皮鴨肉、芝士同埋浸完甜麵醬仲係爽脆嘅白菜, 每件PIZZA上都平均放有一片片皮鴨肉, 烤鴨皮油香十足, 肉嫩散發著獨有嘅鴨香, 調味醬汁味道恰度好處, 令人回味。【TUNA TARTARE】HK$118牛油果醬墊底, 放上了切粒嘅藍鰭吞拿魚, 撈咗地中海醬, 肉嫩美味又清新, 正!【FRITTO MISTO】HK$118兩款炸海鮮分別魷魚鬚同埋大蝦, 炸得外層酥脆而不油, 而且兩款海鮮口感非常爽口彈牙, 沾上檸檬蒜泥蛋黃醬, 味道更提升。【PANUOZZO-LOBSTER】HK$198包面被烘得脆口, 夾住了大量爽口龍蝦肉、茅屋芝士、蕃茄、龍蝦汁同埋火箭菜, 個醬好creamy, 感覺味道清新不膩。甜品方面:【PIZZAMISU】HK$98估唔到連甜品都有pizza, pizza餅底微微煙韌口感, 面層為軟滑、濃郁而不澀嘅Tiramisu醬, 唔會太甜, 不錯!【PINEAPPLE CARPACCIO WITH COCOUNT SORBERT】HK$78菠蘿切成薄片, 香甜多汁, 口感爽脆, 內藏椰子雪葩, 入口即溶, 甜酸解膩, 岩哂做飯後甜品。…Read More

主打多款壽司, 當中包括了火灸、軍艦、手卷、卷物, 另有小食、炸物供應。「特上升級」嘅壽司仲包含了大拖羅、海膽、鮑魚、和牛等嘅高級食材,經QR code所點嘅都上得好齊, 壽司飯量冇因為想填飽你個肚而整得大大舊。建議先點冷盤小食, 例如芝麻八爪魚同埋辣味螺肉, 上檯最快, 可以把握時間邊食邊等。壽司壽司款式種類多, 單睇賣相, 質素都有返咁上下, 對比某集團嘅連鎖外賣壽司黎講, 呢度水準確實好得多! 魚生都幾厚切, 食多幾件藍鰭吞拿魚中拖羅壽司、大拖羅壽司、甜蝦壽司同海膽軍艦, 已經大大提升回本率! 中拖大拖羅雖然兩者未至於肥美到魚油勁爆兼入口即溶, 但唔腥同食到少少魚香, 對於放題任食黎講確實罕見!平時係坊間食嘅帆立貝壽司, 呢度同樣係大大粒, 肥美鮮甜。軍艦方面, 每款食材都係滿滿地, 整件入口, 絕對能滿足口感。火炙壽司方面, 經火灸後, 迫出少量魚油, 令口感更軟嫩, 配搭不同調味配料, 味蕾上都有驚喜。軟殼蟹手卷: 確係即叫即整, 接過手入口, 紫菜仲係脆, 軟殼蟹熱熱地仲好香脆, 好有誠意!迷你蟹肉膏杯:  梳梳蟹肉、蟹鉗同埋蟹籽, 每啖甘香鮮味。迷你三色魚生杯: 集合了甜蝦、三文魚、吞拿魚蓉同埋三文魚籽, 配上少少飯, 口感有層次, 每啖都食到魚油鮮香。一品料理:鐵板牛油帶子: 鐵板熱辣辣上檯, 散發陣陣牛油香氣, 帶子偏林但好入味。雞軟骨粒: 炸得香脆而不油, 點沙律醬食更滋味。飲品自助形式取, 除酒類飲品需額外加錢升級任飲, 其他嘅都係任飲! 款式都幾多。…Read More

太古坊上班族又有新飯堂聚腳點!! 鰂魚涌新開西餐廳「UURO」,午市供應多款西式美食, 晚市轉推扒房semi-buffet, 提供豬、牛、羊三款扒, 無限refill麵包同埋即炸薯條。 餐廳環境光鮮, 店員親善好客, 晚市只有一個menu為霸氣戰斧牛扒套餐, 分別係戰斧牛扒(12oz)、香草羊扒(三件)、及豬鞍。配有沙律同埋無限refill麵包同埋即炸薯條。雖然食物款式小, 但性格比高, 質素味道好!Order後先送上沙律,  清新醒胃蒜味意大利夏巴塔:麵包極為軟熟, 搽上牛油一齊食, 非常絕配。帶皮酥脆薯條:薯條亦非常有誠意, 即叫即炸, 香脆而不油。麵包同薯條可以無限refill, 上菜速度都幾快。主食方面, 我地揀咗一個牛同埋一個羊share食, 兩款都可以自選生熟度。【戰斧牛扒(12oz)】HK$198選擇了三成熟, 牛扒切件上檯, 可見扒嘅中心位依然keep得色澤嫩紅, 肉質偏林有肉汁, 沾上香草醬食, 平衡到餘下嘅油膩感。【香草羊扒(三件) 】HK$198選擇了七成熟, 入口軟淋多肉汁, 有些少羊肉羶味, 但絕對可以接受, 而且易入口。套餐不包餐湯同飲品, 需要額外order:+$16追加【熱情果蜂蜜特飲(凍)】果香味濃, 仲有好幾粒熱情果籽, 香甜好飲!+$16追加【檸檬薄荷蜂蜜特飲】檸檬同埋蜂蜜味突出, 滲出少少薄荷味, 冰涼透心, 清新解渴。當晚做緊promote, 即時upload食物相上facebook/IG/小紅書, 送熔岩提拉米蘇一份, 奶蓋鹹甜香滑, 提拉米蘇鬆軟滲出淡淡冧酒香, 超正!!…Read More

舅父移民返港探親, 當然要請佢食好野! 一行四人去咗西貢食海鮮, 選址呢間距離碼頭比較入少少, 連續幾年榮獲米之蓮, 牌面絕不失禮。果然今晚吃後令人讚口不絕!餐廳全室內座位, 設樓上雅座, 坐得舒服。除了散點時價海鮮, 仲有明碼實價全包宴海鮮餐, 非常抵食! 性價比高!我地揀咗---4人海鮮C餐 HK$3288 (全包宴)椒鹽奇脆豆腐: 豆腐外層不油又超鬆化, 內裡豆腐超嫩滑, 表面加咗極少椒鹽調味, 幾正。薑蔥炒蟶子皇: 超得好有穫氣, 份量足, 蟶子皇肥美爽滑又鮮甜, 火喉掌握得勁好, 沒有把蟶子炒得過熟而韌, 夾集蔥般一齊食, 更為香口。椒鹽焗鮑魚: 鮑魚厚肉而且大隻, 表面稍為泡過油, 薄薄一層炸漿鎖住了原本肉汁, 椒鹽提鮮更加鮮味無窮。天婦羅桶蠔生菜包: 桶蠔超大隻又肥美, 天婦羅做得勁為鬆化而不油, 外脆內嫩, 桶蠔keep到原本肉汁, 蠔味重, 用爽脆生菜包住食, 再加埋沙律醬, 滋味到極點。上湯開邊龍蝦伊麵: 開邊龍蝦都幾大隻, 肉質爽彈鮮甜, 伊麵底盡吸滑溜鮮味上湯茨汁, 正!鮮菠蘿生炒骨: 生炒骨甜酸解膩, 肉質札實有肉香。米湯浸時蔬: 蔬菜浸於米湯中, 更顯清甜。 最後送上甜品---椰青糕,椰青糕清甜無比, 夾集了椰肉, 椰香味十足。…Read More

太古坊上班族放工想搵間餐廳食野chill下同朋友閒聊, 選擇了沿海鯉景灣一帶餐廳, 呢間主打泰國菜餐廳, 勝在人流唔多, 冇限時用餐, 可以慢慢relax食個dinner。餐廳開揚, 面向海景, 稍有些少微風, 感覺更寫意。【冬蔭功湯with seafood】HK$118非常豐富足料, 大量海鮮, 包括有大大隻虎蝦、青口、半刺身口感嘅帶子、好爽口嘅墨魚鬚, 配上泰式香料, 令整個冬蔭功湯更昇華, 味道濃郁, 甜酸帶辣, 惹味開胃, 兩個人share岩岩好。【串燒沙爹】HK $138分別有齊豬、牛、雞各兩串, 每串都幾厚肉幾大串, 表面燒得香口keep到肉汁, 其中雞較為出色, 肉質嫩滑, 另外牛同埋豬都幾有肉香, 沾上沙爹醬食, 正啊!【泰式黃咖哩炒蟹】HK$548大大盤黃咖哩幾乎覆蓋了整隻蟹, 蟹切件而且泡過油, 更易掛上黃咖哩汁, 蟹肉偏林, 但最出色係個黃咖哩, 香甜濃郁兼富有蛋香味, 絕對要order個蒜蓉包/叫個飯黎撈汁食, 簡直一流! 【蒜蓉包】HK $58烘得鬆脆, 沾上了蒜蓉, 香口惹味。【Vanilla Shake】HK$48意為係奶昔, 但原來係杯沙冰, 雲呢拿味偏淡。…Read More

應朋友約, 今晚到了這間位於旺中帶靜嘅白布街日料小店食dinner。呢間餐廳什有人氣, 晚市7點後全場坐滿, 串燒幾乎冇停過。吧檯位置更可見到串燒師傅處理串燒。小店除供應串燒, 仲有少量刺身壽司、小食等…【安格斯牛肉他他燒】HK$148安格斯牛肉只係邊位經火炙, 大部份肉質為刺身, 肉質鮮嫩冇筋, 沾蛋汁食, 口感黏滑, 還配有炸蒜片、蔥粒平衡濃郁肉味。【塩燒厚切牛舌芯】HK$58牛舌芯果然厚切, 表面燒得帶點焦黃, 依然keep到肉汁, 口感爽彈, 加咗鹽吊味, 味道同口感同樣一流, 值得推介!【雞胸脆骨】HK$26口感非常爽脆, 連帶些少雞肉, 加咗七味粉, 香口惹味。【雞軟骨 (兩串) 】HK$28沒有雞肉連帶, 口感更為爽脆, 同樣香口惹味。【紫蘇葉雞皮蝦串】HK$48外層雞皮燒得金黃微脆而不油, 入面隻蝦爽彈, 夾住紫蘇葉食, 平衡到雞皮謹有嘅膩, 再多一份紫蘇葉獨有嘅清香。【日本燒蕃薯】HK$36厚切日本蕃薯烤後暖暖的, 很香甜。【鵝肝多士】HK$68鵝肝煎得外微脆內軟, 脂香味很重, 內裡近乎入口化開, 伴有松露醬先行沾點, 味道更昇華, 配上多士同埋沙律平衡油膩, 令人回味。【挪威三文魚壽司五味】HK$88分別有三文魚、火炙三文魚、火炙芝士三文魚、三文魚軍艦同埋花之戀, 每款手握壽司握得唔會太實, 口感唔錯。【和風燒飯團】HK$32飯團表面燒得金黃焦脆, 入面軟淋不乾身, 咸咸香香幾惹味。…Read More

話咁快又一年, 前排同家人到「鍾廚」品嚐過佢地嘅菜式後都讚口不絕, 今次二訪發現已經率先推出了大閘蟹宴, 而且價錢唔貴, 性價比極高!! 絕對值得分享+推介!!!餐廳裝潢偏中式, 設有圓檯、長檯, 適合大小家庭聚會用餐。 大閘蟹宴 HK$398/位瑪卡螺頭燉湯: 原盅燉湯上檯, 非常足料, 有瑪卡、螺片、雞腳、瘦肉等…濃郁滋潤養顏。三款冷盤:沙薑豬手: 口感爽滑, 伴有些少沙薑作調味, 清爽美味。拍蒜青瓜: 超級爽脆多汁宮廷蘿蔔: 同樣多汁爽脆, 酸辣開胃。大澳海山骨: 炸得酥脆不油, 帶有肉汁, 而且滲出鹹香濃郁嘅蝦醬味。大閘蟹:每位均享有三隻大閘蟹, 分別為兩乸一公。大閘蟹熱辣辣上檯, size都幾大隻, 而且每隻蟹膏都不少, 鮮橙黃色蟹膏甘香鮮味, 令人食指大動。油鹽水石斑件:石斑超嫩滑有鮮味, 下層放有南瓜片, 吸咗石斑精華, 鮮味十足。香芋糯米飯:糯米飯色澤望落淺色, 但味道很正! 飯質軟熟唔硬, 加入了蝦米、臘味粒、芋頭粒、蔥粒, 口感同味道都很有層次。鮮茄珍菌泡菜苗:濃湯味道香甜, 油麥菜、珍菌、蕃茄盡吸湯汁, 清甜美味。圓肉薑茶: 加入了圓肉同埋杞子, 融入了辛辣薑茶中, 飲落即時感覺喉嚨像火燒般, 驅寒一流!…Read More

二次到訪尖沙咀K11 Art Mall呢間有現場音樂表演嘅西式餐廳, 可惜今晚沒有LIVE show表演, 但環境裝潢舒適優雅, 同樣可以同朋友舒適閒聊嘆美食。美酒佳餚嘅menu中, 原來仲推出了數款新菜式。 【法國伯爵朱古力】HK$108朱古力味濃郁, 細咪有淡淡伯爵茶香氣, 面層放上兩粒表面經火灸過嘅棉花糖, 大人小朋友都喜歡。【黑松露薯條】HK$138份量令人驚喜, 薯條平均沾上了黑松露, 香氣十足, 沾上芝士粉沙律醬食, 送酒一流!【韓國松葉蟹肉酥皮龍蝦湯】HK$148酥皮焗得金黃香脆, 一匙舀吉入脆得chok一聲, 龍蝦湯味道甘香極濃, 湯中仲有絲絲松葉蟹肉同埋彈牙蝦肉, 啖啖鮮味有層次, 將酥皮浸湯食, 滿足感爆燈! 【夢王牛肉他他】HK$128嫩紅生牛肉碎中混入了酸青瓜碎, 配有生蛋黃, 將蛋汁平均撈起, 多一點黏滑, 生牛肉肉質彈牙, 夾集酸青瓜碎, 搭配埋脆片一齊食, 口感更有層次。【蘋果菠菜沙律】HK$48菠菜配搭甜脆蘋果片, 感覺清新, 再搭配埋咸香羊奶芝士碎, 清新中增添微微羊羶香。【紅莓煙肉法邊豆】HK$48爽脆法邊豆配上帶有口感嘅煙肉粒同埋酸甜紅莓肉, 清新開胃又健康。【手工芝士烤雞卷】HK$288烤雞卷內釀了芝士, 雞皮烤得微脆肉嫩, 芝士令食起上黎更creamy而且多一點鹹鮮, 沾上蘑菇汁食, 味道更提升。伴碟嘅薯蓉口感綿密, 仲有爽脆嘅蘿蔔條同埋意大利黃瓜條, 非常滿足!!…Read More

放假訓到自然醒, 同家人去咗花園街買花, 順道係附近搵食醫肚。經過呢條人流較靜嘅花園街, 見到呢間泰菜餐廳, 細看門外menu款式多, 價錢合理, 就入去試試。【泰式生蝦】午市特價HK$98選用肥美開邊虎蝦做生蝦刺身, 生蝦口感爽彈, 夾集蒜片同辣椒片, 再點上泰式酸辣計, 惹味提鮮, 超推介!!餐廳同時供應午餐同埋下午茶, 款式多, 價錢實惠, 每個份量都唔少, 性價比高。【酸辣鳳爪】HK$48無骨鳳爪帶有爽脆軟筋, 酸酸辣辣, 開胃解膩。【冬蔭公湯河】HK$68冬蔭公湯酸辣剛好, 唔會太重口味, 河粉稍為吸咗湯汁, 啖啖酸辣開胃, 配有爽口蝦、大大隻青口、魷魚、秀珍菇等…豐富美味, 驚喜好味。【菠蘿炒飯】HK$68菠蘿炒飯就稍為有D失望, 唔算有穫氣, 菠蘿味不太突出, 內藏兩隻爽口蝦、提子乾、肉鬆同埋雜菜粒。【原個蜜瓜沙冰】HK$78以原個蜜瓜打成嘅沙冰, 再有蜜瓜果肉襯托, 賣相吸引岩哂打卡之餘, 更適合炎炎夏日降溫解膩, 每啖飲出蜜瓜果甜。【Tea Set For 2 Person】HK$238集泰式人氣小食嘅層架下午茶, 上層有柚子沙律, 下層有春卷、蝦餅、雞翼、雞卷, 每款炸物脆而不油, 另配有芒果糯米飯同埋自選泰式飲品兩杯。芒果香甜多汁, 黏笠軟糯口感嘅糯米飯以椰漿調味, 甜甜地又帶些少鹹香; 而自選嘅泰奶口感香滑。…Read More

隔咗一排, 終於有時間同屋企人食LUNCH, 又再去咗我地嘅抵食飯堂「大師傅」, 呢度價錢親民, 而且份量足, 可說是性價比過。餐廳環境光鮮企理, 全日堂食不設加一, 吸引不少附近街坊幫襯。供應多款粥品、腸粉, 油物等….價錢抵過買料自己煮。【艇仔粥】HK$26 (+$4 追加豬紅)粥底綿密滾熱辣, 食材豐富又足料, 包括有瘦肉絲、爽口魷魚、豬皮、牛肉碎, 粥底綿密熱辣辣, 啖啖粥都食到配料, 好有層次, 而追加嘅豬紅, 口感彈滑。【豬紅粥】HK$23 (+$4 追加碎牛)錦密粥底配上彈滑豬紅, 再追加了碎牛, 增加點點肉香。【蝦米腸】HK$17蝦米腸滑嫩柔軟, 稍吸了些少豉油, 配搭蝦米、蔥粒食, 增添一點香口。【蝦米炸兩】HK$20蝦米腸包住了香脆油炸鬼, 自行加咗芝麻醬、甜醬同埋芝麻, 內脆外軟又美味。【炒麵】HK$15炒麵炒得好香, 不會過於油, 大大碟, 好抵食。【白糖糕】HK$5白糖糕口感帶點濕潤, 甜甜地, 不錯的甜品。…Read More

唔洗北上, 在港都可以食到內地人氣順德菜「大榕樹下」, 位於銅鑼灣希慎廣場樓上, 地鐵直達, 交通方便。餐廳光鮮企理, 設有多個卡位, 座位舒適。提供多款順德菜選擇。【順德釀鯪魚】HK$128鯪魚外層被煎過, 將魚肉拆骨後混入了香蔥、馬蹄同埋紅蘿蔔幼粒, 食到鯪魚嘅鮮甜魚香同時又食到配料嘅層次口感, 淋上茨汁, 美味無窮, 不過食嘅時候要小心有細骨。【老廣臘味煲仔飯】HK$79煲仔飯未至於熱得滋滋聲上檯, 不過煲底內依然刮到焦濃脆卜卜飯焦, 飯底軟熟, 佈上大量臘腸片同埋臘肉粒, 自行加入蔥粒同埋豉油, 美味無窮。【雙菇爆鵝腸】HK$78炒得幾有穫氣, 鵝腸爽彈, 沒有太多肥油連帶, 配搭了秀珍菇同埋本菇, 爽脆美味。【順德豉味碌鵝(上莊) 】HK$128鵝肉未算嫩, 不過肉味濃郁, 茨汁鹹甜易掛汁。【低糖紫米豆漿】HK$19味道偏淡, 健康有益。…Read More

颱風迫近, 歸家前極速係附近食個Dinner, 去咗呢間主打牛舌嘅小店, 食過後令我一直回味這間餐廳嘅---- 牛舌芯!!!呢度供應各款不同部位嘅牛舌, 配搭扒類套餐, 自選升級套餐。【鐵板 牛舌芯】HK$148+$38 零糖可樂, 温泉蛋牛舌筋, 湯, 薯條.自選了黑椒汁, 鐵板熱辣辣上檯, 隨即淋上黑椒汁, 鐵板滋滋聲, 香氣四溢;  牛舌芯表面帶微微焦, 但內裡keep到粉嫩肉質, 爽口彈牙有肉汁, 沾上黑椒汁, 惹味無窮!!! 牛舌筋炆得好林而且入味, 口感有d 似牛腩, 仲有一篤即穿嘅溫泉蛋, 蛋汁撈飯食, 更加黏滑。【咖哩 牛小排配牛舌尖配飯】HK$178+$28 零糖可樂, 湯, 薯條.同樣係鐵板餐, 本身已跟飯, 再加$28有埋可樂, 湯同薯條。牛小排鮮嫩, 連帶些少油脂, 肉質有點咬口; 牛舌尖都幾厚身, 爽口唔韌, 配埋咖哩汁, 撈飯食一流。 加配嘅洋蔥湯, 足料清甜, 有助解膩。此為兩個set嘅薯條, 加咗紫菜粉, 薯條脆而不油。…Read More

得知屋企附近「京都大酒樓」推出了一蚊菜式做招來, 趁住颱風假就同丫媽去酒樓食個晚飯。酒樓環境開揚, 座位唔算好迫。酒樓除了推出「一蚊」自選菜式, 仲有海鮮套餐同埋各款小炒。【脆皮飛天雞】HK$1原本對一蚊貨式不抱期望, 估唔到竟然係全晚最驚喜嘅一個菜式! 原燒隻雞棟篤企已經非常吸晴, 酒樓提供手套自行撕出肉食。燒雞燒至金黃帶點油光, 雞皮酥脆, 撕開雞肉, 豐富肉汁、黃油𣊬間傾瀉, 絕對可以用肉嫩多汁去形容! 雖然細隻, 不過都幾厚肉, 兩個人share食, 定必滿足。【上湯西澳龍蝦伊面】HK$328原隻開邊龍蝦盡顯份量, 上湯茨汁鮮甜美味, 伊面份量多, 盡吸湯汁精華, 不過龍蝦肉質偏林, 唔係爽彈果種口感。【豉油王煎焗海生蝦】HK$108（例）海蝦表面平均有鹹甜豉油汁醬包住, 部份蝦肉質爽彈, 配上汁醬一齊食, 鹹甜惹味。酒樓仲有好幾款中式甜品供選擇, 味道唔錯, 唔會太甜。【桂花糕】HK$28味道清甜, 散發淡淡桂花清新香氣。【椰汁紅豆糕】HK$28椰汁味突出, 夾集嘅紅豆口感綿密。…Read More

平時食放題得個幾鐘食, 急急食hur到爆, 而呢間位於海逸君綽酒店內嘅一間中菜廳, 推出150分鐘任食點心放題, 絕對係夠時間可以慢慢嘆, 而且點心質素有咁上下, 蒸出黎熱辣辣, 最緊要係全程冇漏單, 而且落地大窗可以近距離欣賞維港海景同埋酒店泳池景, 中式裝潢再加上樓底高, 確實幾chill幾寫意。入座隨即送上熱茶同埋數款小食, click order紙落單。入座每位送限定: 養生湯+葡汁焗鮑魚併海參一客是日養生湯為眉豆湯, 香甜滋潤; 鮑魚切粒加以葡汁焗, 特色美味, 而海參非常厚切, 爽口彈滑。至於食物類別都幾齊, 一般傳統酒樓最常見嘅點心都有, 點心有齊蒸、煎、炸、焗, 腸粉, 主食有粥、麵、菜, 有數款冷頭盤同埋多款中日甜品。海蜇青瓜: 海蜇超爽口彈牙, 平時去飲都係分得幾條, 宜家可以大大啖當麵食, 豪啊!燒腩仔: 皮燒得金黃脆口, 肥瘦比例平均, 有油香又唔會過於膩。鮮蝦腸粉: 原隻蝦從腸粉皮透出, 可見皮唔會好厚, 而且好滑, 蝦就好爽彈!鮮蝦韭王腐皮卷: 腐皮卷又薄又脆, 味道香口。炸鮮奶: 外層脆口, 內有淡淡鮮奶甜。芝麻蝦多士: 面層佈滿大量芝麻, 極為香口, 不過就唔太食出蝦嘅味道。鹹水角: 皮鹹甜鬆脆XO醬蘿蔔糕: 蘿蔔糕表面煎得微微焦香, 夾集了些少蘿蔔肉, 既有口感, 又食到蘿蔔清甜, 配上XO醬, 惹味!蝦餃皇: 蝦餃足料飽滿, 皮薄, 餡料鮮香美味, 多食幾粒都好易回本。上海鮮蝦水餃: 皮同樣薄, 吸了些少湯汁, 更顯清甜; 內有蝦肉、木耳絲, 很有層次。蒸包嘅就試咗蜜汁叉燒包、奶皇包同埋馬拉糕, 質地鬆軟。甜品款式同樣多, 其中芝麻卷熱辣辣蒸起, 幾有誠意, 甜甜地, 不過芝麻味就偏淡。椰汁紫米露: 椰汁味偏重, 層次感豐富。薑汁豆腐花: 薑汁清清地, 唔會太重口味太辣, 豆腐花幾滑, 加黃糖食, 幾有傳統味道。…Read More