Wong Bryant's Profile

兆康景峰 留白居酒屋 21 Feb 2023 晚市今日黎到兆康景峰既留白居酒屋試下佢晚市既野食，點左份海鮮炒飯，然後五份串燒，仲叫左條時令既燒魚定食，再叫左一Jar啤酒。整體黎講呢一間居酒屋既食物質素幾好，對得住佢既價錢，估唔到每一項都頗有驚喜，接下來逐項點評一下！先係上左一碟海鮮炒飯，炒得好入味，好有鑊氣好香，但又唔會太鹹，本身都好驚細舖頭既炒飯同埋啲海鮮碎會冇味，但完全冇呢個問題，高質。然後到串燒拼盤，醬燒鮑魚唔腥，鮑汁濃郁；牛舌咬感適中，唔會太硬或太軟，調味做得幾好；豬頸肉有驚喜，用豬頸肉卷住車厘茄，估唔到味道出奇地夾，一咬落去，同時可以品嘗到車厘茄既清新味道同埋豬頸肉既鮮嫩肉質，呢個設計幾吸引；至於火雞腎同雞脖子肉就不過不失。到最後仲有一條時令烤魚($128)，我見店員都幾有心機烤左五個字，都幾大條魚，好多魚肉，唔會有好多骨，而且肉質好鮮嫩，醬汁調得好入味，唔會過鹹，上述幾道食物份量好足，真係食到幾飽幾滿足。大家如果入到屯門，不妨黎景峰呢間舖頭試下，晚市埋單$648，但絕對係對得上食物既質素。…Read More

今日去到太子呢間叫做「食包」既新開張手工漢堡專門店，呢間鋪頭以外賣為主，設有4個座位，由於最近疫情較嚴重，都係選擇外賣自取拎番屋企食。我同朋友各自叫左份WB豬牛薯堡，加18蚊分別配以甜蕃薯條同埋洋蔥圈同埋飲品，我覺得整體黎講都幾高質。首先佢個豬牛薯堡餡料非常豐富同大份，我把口自問都算大都係一口咬唔到成個包！有豬肉漢堡扒同牛肉漢堡扒，肉質好鮮嫩，層次豐富，口感非常好，醬汁酸中帶甜又唔會過於喧賓奪主，驚喜係仲會有我最喜愛既流心蛋，正呀！另外，甜蕃薯條都值得一讚，熱辣辣得黎又好甜，呢幾樣配飲可樂真係一流！…Read More

今日去左呢間位於旺角金雞廣場新開業既樓上舖，點左佢呢度一份首本名菜，有意想唔到既驚喜。主要係覺得佢價錢唔太貴，又岩岩開業，估唔到佢塊豬扒同雞扒烹調得幾有水準！1. 「西班牙無骨黑毛豬柳扒」 配 意粉 及 蜂蜜柚子茶豬柳扒好大塊，外皮爽脆，咬落去肉質就非常細嫩，肉汁好多而且好香，脂肪分佈好平均，恰到好處，唔會覺得好瘦好硬，亦唔會覺得太油膩！唔會太肥亦唔會太瘦，呢個真係抵讚，百五蚊比較難搵到高質既豬扒，烹調手法睇得出係下過心思。2. 「香煎美國醉香雞扒」配 薯條 及 柑桔話梅蜜雞扒亦唔執輸，皮脆得黎亦有輕微醉雞汁做點缀，Perfect match，九十幾蚊黎講算係好抵，柑桔話梅蜜亦有驚喜，唔會太甜，食左咁多油膩肉類飲番杯，感覺好好多。最後，估唔到佢個甜品咁好食！我平時真係唔多鐘意食朱古力，但佢呢個朱古力心太軟真係幾高質，個皮好脆，一挖入去熱騰騰既朱古力醬即刻流哂出黎，暖透心扉。順帶一提係，間餐廳啲佈置都幾有心思別緻，充滿聖誕氣氛，空間又比較寬敞，坐得幾舒服，我都幾鐘意，會再食！…Read More

今日同朋友黎到兆康景峰呢間留白居酒屋，去到門口已經見到佈置非常精緻，內籠充滿日式休閒愜意風格。係呢個冬天寒冷既季節，坐係BAR枱近門口既位置，感受住涼風以及日曬既餘暉，非常寫意、舒服。我地分別點左份和風牛肉飯同埋日式滑蛋吉列豬扒飯，隨飯伴上沙律與味增湯，味增湯非常足料，唔會太鹹，新鮮味美，呢一點有驚喜！到主菜，牛肉飯方面，肥牛好新鮮，肉質好香，咬入口唔會太硬，用料睇得出係有心思揀過，烹調手法有下過功夫；吉列豬扒外皮異常爽脆，少量燒汁既點綴恰到好處，出奇地夾，意想不到地揉合出豐富既化學反應！埋單八十蚊以內，性價比頗高，好快會再番黎再食過！…Read More

今日黎到觀塘呢間小明珠，試下佢既川菜麵，點左一份上海酸辣湯韮菜餃子麵，食落覺得冇咩特別，辣湯只係FEEL到啲酸味同埋辣味，冇咩「上海酸辣湯」揉合而來既香味。餃子都冇咩特別，普普通通，$50黎講算係咁吧，一分錢一分貨，如果想食平價酸辣米線，唔介意食物質素一般既話，可以來試試！…Read More

今日係萬聖節正日，玩到興起，當然係要玩樂完之後來到尖沙咀附近既甜品舖充下電啦！呢間座落於「尖沙咀美食街」厚福街既中心位置，其實都非常出名，開左好多年，仍然有KEEP住客似雲來，必然有佢既優勝之處！首先，佢既空間非常闊大、燈光光猛、地板乾淨唔會濕漉漉或者好油膩，比食客一行入去就感覺到舒適、正面既感覺！然後，我同女朋友點左份蜜瓜牛乳刨冰，都算係呢間野既首本名菜，真係見到枱枱都點呢個，賣相幾靚，啲圓碌碌既蜜瓜非常新鮮、潤滑，牛奶刨冰既質感非常爽脫，加埋塗係蜜瓜邊既鍊奶，揉合起來既絲滑感覺非常深刻！建議大家去到，如果係兩個人既話，就點一份試下！一個人係肯定食唔哂架。…Read More

樓下商場有一間專食住家飯既舖頭，叫做家餸小廚。驟眼睇佢舖面啲食物其實幾吸引，整體環境都幾乾淨，店員都好好禮貌，而且啲姨姨好親和友善，比到我個FEEL真係好似我呀媽為我煮住家餸咁！唔係為講而講，我真係有呢種感覺！食物方面，望落賣相都幾新鮮，有我最鐘意食既蒸水蛋、咕嚕肉、肉碎炒四季豆，我覺得住家餸黎講就不過不失啦，味道同佢地應有既味道一樣，一般般吧，唔好有太大預期囉。畢竟又唔係貴，但佢份量都算多，好飽，我一個食咁多野既大男人都覺得啲飯同餸太多。…Read More

入冬都係鐘意食打邊爐，作為一個稱職既香港人，點可以唔去食火鍋？我同朋友點左兩個火鍋，分別係四川麻辣湯底、蕃茄湯底，兩個湯底都不過不失，都有佢地應有既味道，僅此而已。配料非常豐富，肥牛兩份、貢丸、魚皮、豆卜、粟米、芽菜、牛肉，$80黎講真係幾豐富，而且非常飽肚，不過質素當然冇平時果啲咁好食，但老實講，食放題$200~$300都係食呢啲，我食大家樂火鍋，$80都係飽肚，其實真係為左果小小可以任食既滿足感而食放題真係唔多抵食！…Read More

我點左一份啫啫滑雞煲仔飯，見佢個賣相好似幾吸引，就試下啦。點知，食落去真係平平無奇。啲雞啲鬆軟太淋，而雞冇咩味；啲飯太濕太多水，一啲都唔乾爽，亦冇飯焦；成個煲亦都冇煲仔飯應有既香味、煲味，有少少失望，不過係勝在平，都冇辦法既，食得平野，都預左！個茶就正常，食煲仔飯佢驚我地太油膩故意送茶比我地解膩，呢一點幾有趣幾貼心，算係少少既加分位吧。…Read More

今日再次黎到好叉好味再試下佢個柚香叉雞雙拼，上次試完辛辣，覺得麻麻地，反而柚香應該係最好食果款，香甜得黎，啲濃郁既柚子味滲入雞件及叉燒入面，非常入味，啲叉燒非常軟口，雞扒外皮脆得黎內裡肉質又柔軟，非常高質，埋單$64，唔太貴，抵食！順帶一提，記得用網上平台、手機落單，先可以享有八五折！今次蠢左，隨心Walk in行入去，冇預先落訂，慳少左十幾廿蚊。…Read More

最近留意到PIZZA HUT推出左新優惠，大部份大批及普通批都有五折優惠，大批$97.5、普通批$74一個！筆者最喜歡既超級至尊都有呢個優惠。所以今日放工之後，梗係忍唔住收工後打定電話去點個外賣自取，點知打極佢個分店同埋總店外賣熱線，甚至送外賣既熱線都打過，都係打唔通......搞到我以為PIZZA HUT已經執左，線路可能極度繁忙，建議提早起馬半個鐘打去，但都應該打唔通，我打左20幾次都係冇人聽，電話熱線已經廢左；穩陣起見既話，建議大家可以係佢官網度落訂，可以選擇到付現金，唔洗用信用卡都得！我地點左一份普通批既芝心超級至尊、一份普通批既千島海鮮。我覺得PIZZA HUT最好食既兩款就係呢兩款，超級至尊啲煙肉同埋雞肉非常香噴噴，蕃茄醬同埋芝士恰到好處，作點綴實在係錦上添花，幾種配料揉合係埋一齊產生奇妙既化學作用！另外，推介大家一定要加$19轉芝心厚底，好食好多！買兩個普通批埋單都係$184！汽水自己去超市買定雪藏，唔洗係PIZZA HUT度買，貴十幾廿蚊。原味雞翼如果加買8隻要$60至70，相比起老麥或者雞記都唔係特別好食，所以就走左去麥記買左8隻，又可以平番廿幾三十蚊！…Read More

德記茶餐廳，佢每個禮拜既餐單都唔一樣，今日啲餸特別吸引！有椒鹽雞翼、土魷蒸肉餅同埋芹菜炒牛肉，全部都係我最鐘意食既野。雞翼脆扑扑而且好重椒鹽味，肉餅新鮮，牛肉鑊氣好重，正！而三個餸，一湯都只係50蚊！所以去德記食，最緊要問佢拎下個禮拜既餐單，因為好唔好食真係睇佢果日有啲咩野食。建議打定電話去落單，去到就即刻有得拎！如果平時忙既話，去到先至買既話，可能要等到搭五先拎到飯，拎到番去都已經搭七！…Read More

今日去左少沙咀舊K11試下商場入面既餐廳，見到有一間係做自助大板燒，我地叫左份單點就夠，其實叫兩份，兩個人食，都已經夠飽。因為佢啲醬料好油膩，好飽肚，叫自助好似好曬錢！我地分別點左1份1 CM厚切加拿大自然豬腩肉同埋雞牛豬炒麵，佢其餘果啲款式其實都係萬變不離其中，都係大板燒，我地想兩款食物都試下，就試下叫個炒麵，但諗番起其實唔抵同埋唔應該！個炒麵同平時係茶記既冇咩分別，仲要自己比貴啲錢去自己炒......味道方面就毋須要評價吧，畢竟都係自己炒，自己落配料及醬汁。1. 1 CM厚切加拿大自然豬腩肉 8/10呢份豬腩肉質素頗佳，新鮮味美，幾有肉地，幾好咬口，我幾鐘意！大板醬同食材中規中矩，比得呢個價錢，預左佢個味道同啲小食舖其實相差不遠，但真係感受下自己既個人參與度同埋同朋友既互動，志在參與！2. 炒麵 5/10自製乾炒牛河，冇咩特別，自己洗多一百蚊比自己去煮，好似好傻。建議大家唔好去到點呢一個。…Read More

"今日同朋友去Party Room玩，用Delivery叫左個KFC四人餐，非常豐富，有蘑菇飯、雞皇飯、12件炸雞、10隻雞翼、3份栗米、3份薯蓉，咁多野食加埋都靜係70蚊人均消費！非常之抵，而且Party Room入面又有野飲，所以都唔洗特登買野飲，好開心！我覺得叫KFC，一定要食佢個雞翼，比麥當勞惹味且爽脆！今日掛住玩，唔記得影低啲相，得閑再補番！"…Read More

中午去左公司樓下既川菜南北小聚共進午餐，點左份水煮魚同埋酸菜魚，兩個既湯底都好濃郁且鮮甜，但係就犯左最普遍既弊病，啲魚冇味，呢點係唯一婉惜既地方。因為撤除呢一樣，佢既份量非常豐富、魚塊非常多，配料亦充足，只係缺魚既質量。除此之外，我地特登點多一份蒜泥白肉黎試試佢既質量，發現佢個醬料都幾香幾有味，但啲肉反而就冇咩味，同埋有啲硬。另外，十二點九前埋單離開，仲可以享有85折！兩個食左$170，到最後只係比$140左右，即係人均消費只係$70蚊左右，非常抵！…Read More