Chinery's Profile

有日帶左媽咪去蓮香棧整返一盅兩件飲杯茶食個包。呢間茶樓仲有姐姐推蒸爐車、煎點心車、糖水車、甜品車，真係咩回憶都返曬黎！最搞笑嘅係D點心姐姐會以類似譚仔話咁唱賣點心，fing 找排吉飯～ 行咦肉扁飯～🤣🤣🤣得兩個人飲茶食得唔多嘢，只好重點揀d最想食嘅。而炸芋角係必點‼️呢間茶樓嘅炸芋角係非常好食🤤外面鬆脆輕盈，中層芋泥綿滑濃郁，最入面包住惹味嘅五香韭菜肉碎，好好食啊💃🏻💃🏻💃🏻另外我最期待嘅係煎點心車嘅煎魚餅，味道唔係好突出，但係係我嘅童年回憶😌細個唔可以成日食煎炸嘢，唯獨是去飲茶可以係煎點心車度揀一樣，個一刻望住架車推近埋黎，我對眼係發曬光咁🤩通常我都會揀煎魚餅，兩張雲吞皮夾住魚肉粟米，煎到兩邊金黃脆卜卜，成架車嘅選擇入面煎得最脆口就係呢樣😝…Read More

早兩日去左南昌站上蓋嘅V Walk行嗰圈，見到間食船麵嘅鋪頭，掛念泰國嘅我地梗係去試下啦😋佢地都有set好左嘅船麵，細細碗版本嘅船麵，同埋自由配搭嘅船麵，自己揀餸麵湯。我地今次想自己揀試下唔同嘅料餸。我地叫左牛腱、牛柏葉、牛丸、豬肉丸、牛肚、魚肚。炆煮嘅食物都夠淋夠入味，牛肉濃湯都夠味。本來以為今次食左當去左會成功，誰不知係我食最後一啖豬肉丸個陣，出事喇！酸臭嘅🙈🙈🙈可能係解凍儲存得唔好，壞左啦🙅🏻‍♀️…Read More

老老實實，新餐肉都Hit左一排，今次都係第一次食🤣自從減肥之後都無食過午餐肉，今日經過McCafe見到有新嘢，係用新餐肉做嘅pizza，用植物做嘅餐肉應該無咁肥嘅🤟🏻😎個pizza size適中加埋杯嘢飲，女仔食量就一定夠飽。Pizza上面d芝士都好多，仲有少少拉絲😋講返個主角新餐肉，焗得好乾身，但係唔柴亦唔鹹，有炸午餐肉嘅感覺🤤整體都滿意嘅，想食pizza但係又唔想咁heavy嘅話，新餐肉pizza係個唔錯嘅選擇👍🏻…Read More

係上環食lunch又中伏☹️星期五又自己出去食lunch透透氣。有日經過一條後巷見到間東南亞麵店，門面幾有型，地點又隱蔽，以為發掘到咩隱世小店啦，點知⋯⋯我叫左碗喇沙，一黎到見到d顏色咁黯淡，又無椰奶咁，嗰心沉左一下。試下隻蝦先，OMG😨霉霉地bor，心知不妙😰飲淡湯，苦嘅？定係我係office自閉得耐嗰口有陣怪味咋？再試多啖，唔係喎！係苦苦地，咁奇怪嘅？我估係熬蝦湯d蝦殼唔夠新鮮，或者煎燶左🤯試下d魚蛋魚片睇下有無得補救啦，普通到極點喎🤷🏻‍♀️碗粉用米粉加油麵兩溝，米粉煮到散曬🤦🏻‍♀️成碗嘢一個優點都搵唔到！你知唔知最嬲係咩？佢份量得好少，我食完都唔飽，埋單加10%要$108，嗚～…Read More

星期五無帶飯，放lunch打算自己一個去覓食，行過荷李活道見到一條樓梯嘅盡頭一間幾有feel嘅餐廳，又唔使等位喎，所以就入左去。可惜食物比起佢嘅外表爭好遠好遠🙈我事前無做功課睇下人地d食評，原來佢地餃子係出名嘅，但係我叫左蘿蔔炆牛腩飯😂結果係⋯⋯牛腩鞋烚烚，牛筋韌。蘿蔔係完全無同牛腩炆過，白雪雪嘅，最過分係勁多渣，我咬左一啖就完全無食過，同食蔗係無分別。連碗白飯都可以出問題，係生米。碗所謂美顏骨膠魚湯係好似水咁淡，完全飲唔到魚味，莫講話d膠，唔知膠左去邊😆不過佢話無味精都應該係嘅。我知我知，去一間食餃子嘅餐廳叫飯食係我蠢左，但係都無理由會差到咁樣下嘛🙈…Read More

繼續食左當去左，好掛住泰國啊😫😫😫呢間泰國餐廳真係好抵食，四人餐$398任揀5樣主菜，碟碟都份量十足，味道仲幾好😋食完唔夠喉加多左個芒果糯米飯🥭，大滿足😌👉🏻生菜包：我鍾意食夠酸嘅生菜包，食完會feel到係咁流口水，加埋少少辣味夠開胃👉🏻泰式小吃拼盤：有炸雞翼、蝦餅、春捲、串燒，花樣都幾多，炸物串燒都唔會整到乾爭爭，唔錯唔錯👉🏻明爐烏頭：套餐黎講有咁大條魚都好驚喜，足足有我前臂咁長。平時散叫一條都要$180左右，呢度係套餐包埋，真係好抵👍🏻魚肉新鮮，魚湯浸住d粉絲同菇菇索曬d鮮味，好好食❤️👉🏻軟殼蟹黃咖喱：炸得鬆脆嘅軟殼蟹+充滿蛋汁嘅黃咖哩+厚厚嘅麵包，唔使講咁多淨係撈汁都KO曬個包喇😆👉🏻豬頸肉馬拉盞炒椰菜苗：馬拉盞夠味，椰菜苗新鮮，豬頸肉唔係馬馬虎虎咁掉幾塊肉片去炒，而係調好味燒好切片再拎去炒菜，讚讚👏🏻👉🏻芒果糯米飯：呢個就唔係套餐包㗎喇。可能芒果未係當造，唔夠香唔夠甜。糯米飯可以再挺身d，略嫌煮得太爛。椰漿調味好好，鹹甜適中，而且佢地毫不吝嗇咁淋勁多係糯米飯上面，用椰漿彌補芒果同糯米飯嘅不足都ok嘅👌🏻除左大件夾抵食之外仲要讚嘅係服務好好，個個員工都好nice，今餐食得好開心啊🥳…Read More

生日中出潮州夜😙男朋友鍾意揀西式餐廳慶祝大時大節，我卻鍾意揀中菜或者亞洲菜慶祝。潮州菜算係佢小時候嘅回憶，特登搵左一間好多人大讚嘅潮州私房菜。餐廳全名為香港中華出入口商會會所潮家宴，簡稱中出會所😂去呢度食飯要預約，食飯前兩日餐廳會send個menu俾你睇睇先，有d繁複嘅嘢要預訂，簡單嘅就可以即場散叫。其中一樣出名而要預訂嘅係紅燒翅，但係基於愛護鯊魚嘅關係就無叫到。我地兩個人叫左六碟餸，碟碟都好好食，個姨姨開頭質疑我地食唔食得曬，到佢收碟嘅時候細細聲講左句，哇！乜真係食得曬😳梗係啦，我地特登唔食lunch去食㗎😂👉🏻鹹蛋王魚皮熱辣辣脆卜卜好乾身，唔會有太多鹹蛋黃搶左魚皮嘅味道，絕對會令你不能自拔地食曬成碟👉🏻滷水鵝拼盤非常入味，滷水嘅鹹香混和鵝脂，點少少蒜醋，好好食啊❤️墊底嘅豆腐係另一個重點，豆味濃，豆腐皮唔會滷到有苦味，大讚👍🏻👉🏻凍馬友呢個要預留嘅，記得whatsapp問定姨姨有咩魚，佢地仲可以揀凍龍蝦/凍蟹，不過我怕太毒都係食魚算喇。條馬友都幾大條，有我前臂咁長。蒸得啱啱好無過火，肉質幼滑，魚味香濃，油脂豐富，你見d黃油流曬出黎就知，點埋個普寧豆醬，正啊😋👉🏻胡椒豬肚湯呢個都係要預留！食得出係新鮮豬肚煲嘅，完全無怪味好鮮甜！如果你鍾意胡椒味濃嘅，呢個湯一定唔會令你失望。男朋友唔受得飲到出曬汗，我就非常之欣賞😆👉🏻鹹肉炒芥蘭芥蘭條條無渣，無苦澀味，仲有淡淡薑味tim！👉🏻糖醋麵呢個不得了喇！賣飛佛😙佢地嘅火候控制得好出色，一邊煎得香脆，另一邊保持少少濕潤仲有韭黃香氣，趁熱淋上陳醋灑上砂糖，好味到要彈上天花板大叫好好味啊😍😍😍呢間中出會所絕對可以encore，因為仲有好多嘢都想試啊！😝…Read More

涌美呢間泰國菜真心覺得唔錯！想當年每年都返泰國食玩揼。依家已經唔記得有幾耐無嘆過4 part 瘋狂按摩。唯有食下泰國嘢懷念美好時光😭泰國豬手飯係我其中一樣最最最懷念嘅食物。可惜係香港好食嘅豬手飯真係少之又少。誰不知近近地係青衣已經搵到間滿意嘅豬手飯😍香到我求其影完相就嗱嗱聲起筷🥢豬手入味，豬皮嫩滑不在話下，連肉都係好鬆化。重點係嗰醬，同我係泰國食嘅有9成似。超級感動，食落肚嘅係幸福啊🥲另外叫左明爐烏頭。魚肉新鮮，湯頭有大量香料肉碎，非常鮮甜。條魚好大條，絕對係性價比之選，兩個人幾乎食唔曬。傾下食下卒之用左一個鐘先KO條魚。推介呢間小店，唔好睇佢鋪仔細細，好多人幫襯，外賣單源源不絕。街坊價錢，泰國質素，解鄉愁一流👍🏻…Read More

Sensory Zero 好近地鐵站，非常容易搵。落地玻璃夠光猛，樓底高夠開揚，咁啱嗰個時間唔多人，可以靜靜地食住飯傾下計。地點同環境都唔錯👍🏻叫左豬軟骨溫泉蛋飯同埋浦燒鰻魚滑蛋飯。佢地標榜米飯係來自日本並且經過鑑定，雞蛋都係日本蛋，但係我覺得都係一般，無太大驚喜。豬軟骨夠淋夠入味，鰻魚質素都幾好。總括而言，食物質素雖然無驚喜，但係都不過不失。…Read More

呢間型格黑色主題嘅cafe，基本上80%你可見嘅嘢都係黑色，雖然裝潢餐具看似黑沈沈好冰冷，但係服務卻好溫暖😌飲品食物質素還好，無驚喜但係絕對唔會失望。座位間隔闊落，唔會聽到隔離枱傾緊咩😂…Read More

今晚食自己，一條友去左近期好紅嘅段純貞牛肉麵試下係唔係真係咁好食。六點半入座未見人龍，一坐低叫完嘢食再望出去已經排緊隊了，好彩早左一步✌🏻睇嚟熱潮仲未減退。叫左碗經典紅燒牛肉麵同埋桂圓杞子薑母茶。上菜都算快，可能係因為佢地用餐時間只係得45分鐘😅紅燒牛肉麵湯頭濃郁，唔算太油膩。牛腱薄切，唔會散亦唔韌，份量都算多。我揀左細麵，賣點係麵上有好多氣孔，可以吸滿湯汁。湯汁掛麵嘅程度唔錯，就咁食麵都已經索到d湯，壞處就係好快淋，慢食嘅朋友把口要咬快d吞快d同時間競賽喇😬桂圓杞子薑母茶就麻麻地，比較甜同埋唔夠薑。可能我中女怕甜又怕寒啦🙈整體來講如果要排隊食就唔建議喇🙅🏻‍♀️唔係難食嘅，但係未至於要等咁耐去食囉。…Read More

係尖沙嘴工作三年，多數帶飯嘅我好少出去食lunch。臨別秋波，我決定周圍睇下附近有咩好食。經過厚福街同加拿分道交界，見到有間台灣餐廳叫臺坊，半個台灣魂二話不說就坐低試試佢。小店一間，座位得8個左右，做外賣生意居多。店員態度有禮親切👍🏻叫左個鹽酥雞肉燥拌麵同熱冬瓜茶。鹽酥雞很脆，味道夠，無多餘油脂。肉燥就有d失望，味道似蠔油炆肉粒。可能係台灣魂嘅標準比較高，呢間嘅肉燥未至於唔好食嘅。D麵有好多，女仔食量就一定食唔曬。…Read More

慶祝白色情人節，男朋友揀左間秘魯菜餐廳，我地之前都無食過秘魯菜，以為會食d粟米薯仔嘅糊，或者薄餅點汁汁嘅嘢（完全俾印度咖哩薄餅洗腦🤪）點知完全唔係個回事🙃前菜有五樣，其中最吸睛嘅一定係噴曬煙嘅炸魷魚圈配檸檬汁醃吞拿魚Ceviche。見到menu上面寫住有Tiger’s milk，以為wild到有老虎奶飲，原來係指佢個好酸嘅醃汁，唔建議就咁飲d汁，因為真係酸到面容扭曲😖然而佢唔係只得個樣，炸魷魚圈嘅鬆脆夾埋清新嘅半生熟吞拿魚口感豐富，酸酸的好醒胃👍🏻另一個值得一提嘅係慢煮豬肉Taco。Taco餅皮用紫色粟米粉整，比較少見好特別。慢煮豬肉好juicy，配搭烤過嘅牛油果同埋濃濃番茄汁，好好食啊😋其他前菜有烤三文魚、炸蝦、炸雞，味道都唔錯，但係不至於有太大驚喜。主菜方面，我地揀左慢煮豬肋骨同燒雞。慢煮豬肋骨我覺得一般，就唔花筆墨形容喇。不過燒雞好好食，香料味濃郁，唔會燒得過火，雞胸都係滑嘅，幾好幾好👍🏻👍🏻最後係個甜品，雖然唔特別出色但係見到一大盤色彩繽紛嘅生果sherbet同蛋糕，已經好開心，可以慢慢食住傾下計都唔錯。整體而言，呢間餐廳無論環境同食物質素都屬於中上，加上香港少有秘魯菜餐廳，可以一試，係幾得意嘅😋…Read More

繼續臨別秋波係佐敦/尖沙嘴附近覓食😋好多人都介紹過Cafe Revol，位置靜中帶旺，係繁忙嘅彌敦道轉入德成街，頓時寧靜清幽，即刻relax左😌經過幾次都見到lunch time要排隊，所以提早少少「鼠」出去，等左15分鐘左右就可以入座，都算快👍🏻大部分人都讚呢度嘅Carbonara好好食，我二話不說就即刻order左。佢地嘅Carbonara唔係好多cream嗰種，但係味道更濃郁，我更喜歡😚佢地唔係用普通煙肉，而係用厚切風乾豬面肉，油脂豐富充滿鹹香，唔係得死鹹，而且煎到金黃得黎又唔會變豬肉乾，份量仲幾多添。出面多數cafe都唔會落咁重本用靚食材，證明佢地好著重食物嘅品質💯另外就係意粉上面嗰生蛋黃，趁麵仲熱快快手撈勻佢，蛋香加埋豬油香仲有芝士粉，你幻想下係咩味道🤤最後要讚嘅係嗰意粉，硬度適中。我好怕食到太軟太爛嘅意粉，有少少彈牙就最好，即係義大利佬會講嘅Al Dente🇮🇹🤌🏻今餐好滿意，非常滿意，絕對可以encore，掌聲鼓勵鼓勵👏🏻👏🏻👏🏻…Read More

不囉嗦，先來總結，好食抵食👍🏻今日約左舊同事係佐敦Let’s Jam食早餐。早餐一份$40，我揀左自選果醬厚多士+細細碗蘑菇忌廉湯火腿通粉+飲品一杯。自選果醬我揀左玫瑰花蘋果。果醬無奇怪嘅色素亦無香精，係好天然嘅感覺。聞一聞，花香撲鼻。舔一舔，蘋果清甜，仲食到一粒粒果肉。厚多士炕得啱啱好，表面金黃香脆，入面仲係軟綿綿。甜甜的澱粉質有種魔力會令你莫名其妙感到幸福🥰蘑菇忌廉湯火腿通粉雖然個味道好似用金寶湯整嘅，不過就算係都好啦，佢地都無揸流攤溝勁多水慳成本，個湯係濃郁仲食到蘑菇粒。係佐敦尖沙嘴區以$40來講食到呢個質素嘅早餐，只可以講佢地係用良心做生意。仲要係有良心得來認真做餐飲。撐小店，加油💪🏻…Read More