MelodySo1579's Profile

餐廳離太和站約7分鐘距離，步行會途經林村河，黃昏時分都幾幽靜。太和的美食不少，但可以坐得耐又舒服既餐廳唔算多。今日約左朋友聚舊，就揀左呢間星馬菜試下。內裡環境頗寬敞，坐得舒服，裝飾都有東亞特色。Menu選擇不少，飯、麵、湯、菜、小食，應有盡有，價錢仲好親民，出面郁下八九十蚊既海南雞飯，呢度64蚊就有交易。果子無骨海南雞飯 $64名符其實既招牌菜，湯、油飯、醬料、湯，樣樣有齊。雞滑唔洗講，油飯香口，粒粒分明。平時出面好淡既湯，呢度煮得好濃郁。海鮮喇沙摻摻 $64好足料！略嫌麵太多，一個人未必食得曬～馬拉盞炒通菜 $50照舊大份，唔會辣，但食慣重口味既我，會想香料再重手d。馬來西亞肉骨茶煲 $84配料好夠，撈飯一流！鮮檸天葵梳打 $16 （跟餐價）叫既時候連天葵係咩都唔知🤣只係感覺幾健康就叫左！來到時候見到大大杯又漸變色，檸檬粒好幾層，有𡁻口，幾有驚喜！…Read More

Super amazing! 66蚊有得食麻辣烤魚，雖然醬料一般，但配菜超多，兩個人食都得，真心抵！加12蚊有珍珠奶茶，味道都正常。值得一讚既係枱上有tissue，唔洗比錢買pocket tissue, 貼心～…Read More

平時lunchtime門外總係大排長龍，於是一路無機會試，但次次提起同事都讚不絕口，今日難得早放工，就襯下午茶時段去幫襯。店舖位於佐敦同柯士甸站之間，空間唔算大，甚至有少少逼，但裝修幾有越南feel。下午茶同午餐既menu都有得嗌，下午餐平到有少少surprised,38蚊包檬粉/扎肉包+小食+飲品，真心食到飽。午餐貴少少但都經濟實惠，加十蚊可以加小食。新年慰勞下自己，於是叫左一枱餸。食物到既時候立即後悔！因為太大份！叫左三餸麵，其中一個餸係蘿蔔，竟然有五舊蘿蔔omg 真係一d都唔慳料。米紙卷味道恰到好處，粉絲細條分明，非常開胃。鳳爪又係大大份，爽得黎唔會太酸。最後馬拉盞炒通菜，賣24蚊真心抵，份量無減，但略嫌有d濃味。…Read More

餐廳係炮台山地鐵站行5分鐘倒到，見到幾多人等，應該有質素保證，就試一試佢。等左五分鐘左右，七點半就有得入座。鋪面唔大，座位有d逼峽，但冷氣夠，整體亦乾淨。睇得出裝修有心思，牆上有少女風牆畫。餐牌選擇唔少，小菜、湯麵、炒粉炒飯、小菜都有。叫飯仲送細盅燉湯。奈何今日想食烏冬，下次先試佢個湯。香茅雞翼炒烏冬 $48上枱熱辣辣，雞翼皮仲係脆既，香茅醃得幾入味。烏冬略鹹，但生菜都中和到既。滷水鳳爪滷得幾入味，咁既價錢有4隻都算唔錯，如果再煮耐d、腍d就Perfect池了！…Read More

深水埗多嘢食到數唔曬，要搵間裝修靚又坐得舒服嘅都未必咁易。見到有朋友嚟過打卡，黎開呢頭，就黎試下。近九點黎到，唔洗等位就入得。環境方面，完全台灣夜市feel，燈牌路牌都台味十足，打卡都全無破綻，飛唔到，都可以黎過下癮。加埋d掛牆漫畫，不得不讚讚裝修設計既認真。食物選擇都算係咁，common既台灣飲品、小吃、主食都有，仲有得自由揀飯麵或湯定撈，選擇困難症又出黎了!食物好快到啦～《滷水大腸麻辣拌麵》比想像中大份同多大腸，青瓜、紅姜同醃蘿蔔配菜，顏色幾sharp醒。但麻辣醬相對淡口，芝麻味重，但辣味不足，好彩枱上有醃炸菜，加埋一齊惹味不少。《綜合肉圓湯》估佢唔到，原來隻湯甜甜地，幾開胃。花枝丸幾足料，唔錯～《朱古力珍珠奶茶》主食加配飲品可以減10蚊，就試下個朱古力加奶茶既combination，味道唔係特別突出，兩隻味未算好夾，但勝在夠大杯，食辣麵都可以解解辣。最後食到好飽飽，埋單200唔洗。食物質素未算好傑出，但台風設計絕對誠意十足，值得一去！…Read More

Running燒位置比較隱閉，要係Popcorn一樓Popfood搭lift上，就咁行街未必會察覺。平日食燒肉食開漢X或炑X，今次試下Running燒先～環境方面幾別緻有feel既～燈泡裝飾搞到好似置身韓國咁，最大既重點係電視長期loop MIRROR同ERROR MV！絕對係深得我心呀<3一坐低都係刷QR code，data限緊速，好彩有Wi-Fi用。有唔同生肉、海鮮、熟食點。出面都好多野拎，蔬菜、涼菜、中湯、醬料、甜品、野飲，糖都有！？真係花多眼亂又滿足呀～最驚喜係連牛油粟米都有得燒Order既野食到啦！原來叫一份真係只黎一件，對於獨食既我都係好事，咩都試下之餘，都唔會太飽。醃左辣既肉對我來講有點兒too much，但其他都係高質既，推介羊肉片、生蠔同帶子！燒生蠔時唔太sure要燒幾耐，職員都會幫手。最後埋單$284，雖然唔算平，但環境舒服同選擇之多，都真係值得呢個價錢。搵日再戰！…Read More

平時都比較少黎呢頭，咁岩去完將軍澳政府綜合大樓，就近近地黎到隔離既明德商場覓食。春嬌裝修幾有越南風情，唔洗等位，價錢又相宜，就咁決定啦！用QR code落單，選擇都算多，仲有唔同特飲揀。<椰青> $34新鮮，多果肉，椰汁水甜甜爽爽，正！<牛頂湯蘿蔔浸小棠菜>$48好大份，牛湯幾濃，如果蘿蔔再熟D入味D就好啦！<春嬌豬肉粉包> $34本時食開D粉包都係菜多海鮮多，今次試呢款爆曬豬肉碎，都幾特別！<菠蘿肉鬆炒飯> $78超大份呀！三個人食都夠，絕對係窮人恩物。炒飯粒粒分明，幾鍾意佢加左豆角，口感好豐富，係菠蘿少左D。試左咁多樣野，飽到抱肚，但最後埋單200蚊都唔洗，侍應又有禮貌，食物質素都唔錯，黎開政府綜合大樓呢頭都絕對值得試下！…Read More

韓國街成日黎，呢間都係第一次試，六點幾到唔洗等位，樓上既環境都幾大，視察過廁所都係乾淨既～坐低有QR code自己睇menu落單，Data慢既都有Wi-Fi可以用，手機有D lag 侍應都樂意幫手。 辣五花肉醃得入味，唔會太辣。包埋生菜、蒜頭、加D拌菜食真係好滋味。想特別提下拌菜，有驚喜！完全唔係出面D hea底小菜，沙律既醬酸酸甜甜勁開胃，泡菜都好濃蒜加薑既味，唔似超市D急凍pack。貪得意試埋個生牛肉拌飯，幾新鮮同juicy，生牛肉有D似魚生既口感，醃得甜甜味，同石鍋拌飯既feel完全唔同。個飯有D太甜，加埋爐邊蛋中和下就 perfect！  一個人埋單二百幾，唔算平，但唔得等、坐得舒服、食物水平、服務都唔錯，已經比好多overpriced韓國餐廳好！最後仲送喉糖，太貼心！睇真D原來係officially同念慈菴collab出既，加分…Read More

新都城新開既台灣餐廳都有幾間，但要講食品款式多，一定係四季良晨。飯、麵、燉湯、小菜咩都有，選擇超多，就係飲品都已經佔左三頁，即刻有選擇困難（笑）餐廳既設計都好有心思，氣氛溫馨，仲可以拎書睇～有時間可以慢慢chill同家姐黎食晚市，樣樣都叫左d試下。特別推薦養生清燉牛腩麵，湯頭好甘甜，藥膳味十足，岩曬我依個湯底控，狂飲湯頭。料都好足，大大舊牛腩，大滿足！煲仔。塔香三杯雞定食都好豐富，包上湯娃娃菜同原盅蟲草花雞湯。三杯雞略嫌有點乾，湯清甜、足料。兩個小食都唔錯。桂花醬甜甜地點雞翼新奇得黎唔會太怪，味道幾驚喜。手工餡餅大大塊，好飽肚，咬落去幾爆汁。飲品揀左芝士奶蓋桂花烏龍茶，唔記得左叫半糖，但turn out唔會太甜，組合幾新鮮🤔…Read More

鋪頭係銅鑼灣廣場一期九樓，要係一樓搭lift上去，由天橋過到二樓要落一層。可能因為差唔多九點，加上我又自己一個人，好快就入到座。幾得意既一樣野就係佢唔似其他放題鋪咁要填好多紙仔去落單，而係有個QR code咁你掃，然後自己用電話落單加單，環保又快捷。款式方面同普通放題鋪差唔多，都係刺身、壽司、炸物、煮物等等。落完單之後出去睇下有咩野食夾，見到有幾多熟食，又有沙律吧、水果吧，仲有得夾糖。淨係飲品都有熱飲凍飲超多款，又有好多雪條雪糕、細細既糕點甜品。食物好快就上枱，水準都唔錯！刺身好新鮮，壽司好mini但入口即融，全部野食份量都係細細份，包你唔會滯，可以試足咁多款。烏冬夠彈牙，湯底有淡淡既海苔味，滿足到我依個烏冬控。值得一讚既係伙記收碟既速度夠快，唔會搞到成枱都係。最後埋單都係二百五左右，但試足咁多野，都算抵。…Read More

餐廳位置W Square二樓，由lift口一出已經見到裝修好有泰國風味，氣氛幽靜。樓上鋪就係夠大，唔會好似地鋪咁坐得咁逼，每枱都有曬自己空間，梳化凳亦坐得舒服，幾適合三五知己黎慢慢聚舊傾計。餐牌既option亦好多，飲品、小食、肉、咖哩、海鮮、飯麵、甜品各有起碼十款揀，仲有唔少平時少見既款式。前菜方面要左個生蝦，生蝦夠曬厚度，食落肥美新鮮，連埋酸辣汁、蒜頭同檸汁一樣食，味道豐富，超級開胃。平時好難係街外食到貴妃苗，今次難得見到，當然要試一試。炸蒜同蒜頭將苗炒得好香，有少少鹽調味，味道剛好，唔會太重。一碟份量雖然多，但因為炒得好爽口，就算食好多都唔覺滯。最後仲叫左個奄列海鮮炒飯，填填肚。碟飯既外形幾精緻，入面既海鮮亦都好夠，夠曬咖哩味。炒飯既油膩感比蕃茄仔同炒飯中和返。最後埋單差不多要300蚊，價錢包括唔算係特別平，但如果考慮埋環境同食物質素，都係值既。…Read More

平時係跑馬地返工，食銅鑼灣地鋪都食到厭，最近試試發掘樓上鋪，咁岩見到依間台灣野既評價唔錯，琴日放工就黎試試。裝潢幾有心機，入餐廳前要先穿過石級小巷。我入座時，岩岩七點，雖然個場都爆爆地，但因為我一位，所以侍應好快就安排到座位比我。望望餐牌，原本都expect佢只係會有傳統魚蛋紫菜湯牛肉麵呀魯肉飯果類野，但估唔到選擇超級多，小食、麵、飯、湯、甜品、飲品樣樣都好多款式揀，仲有好多味餸都無點聽過，好想試下。五味透抽要睇睇英文解釋先知原來係以五個sauce配魷魚片，個sauce食落甜甜地，有好濃濃既蒜味，除左魷魚片仲有d芽菜同青瓜絲，爽口開胃。湯我就揀左無試過既排骨酥冬瓜湯，湯料超足，五六件大大舊既排骨，冬瓜亦煮得好夠淋，個湯清甜入味，撈飯一流。另外仲叫左杯黑糖珍珠奶茶，又唔貴，22蚊，平過好多飲品鋪。甜度適中，多珍珠。走既時候，八點左右，雖然係閒日，但已經有人龍排隊，所以如果多人去食既話，建議book左位先。…Read More

食慣銅鑼灣地鋪，同朋友上去樓上餐廳試試食野。尚鮮係百樂中心八樓，同MTR時代廣場只係唔夠五分鐘既距離。餐廳既感覺好cozy, 燈光暗暗地，環境又幾靜，幾適合同三五知己聚會。一坐低店員已經好熱情介紹招牌美食，同埋時令推介海鮮。望一望餐牌先知原來7:30前離座或者21:30後入座都有八折優惠，生啤亦都做緊promo。火鍋配料同湯底既選擇都好多，同朋友諗左好耐都傾唔掂數，決定叫個星級之選套餐，咩都食下咁。又叫左個時令鯛魚試下。平時都好少係餐廳食到鯛魚，今次真係一試難忘，除左好新鮮之外，口感亦都好輕盈，入口即融。火鍋湯底叫左姬松茸冬瓜同雜菜湯，兩邊都相當足料，好鮮味，淡淡地唔會搶左配料既味。店員好貼心，知我地唔食豬內臟，轉左豬肉片比我地，牛肉同豬肉片都片片厚薄分明，肥瘦岩岩好。丸同雲吞都係手做，外表精緻又足料。海鮮拼盤同樣好新鮮，淥一淥d鮮味出曬黎。價錢雖然唔算特別平，但食物好高質，絕對係超值，特別推薦刺身同海鮮拼盤！…Read More

食厭左新城市既野食，又同朋友行過黎沙田河畔覓食。當時都已經九點幾，但好多食肆都未關，朋友係日食控，又見到和氣食堂既餐牌厚一厚，大把野揀，於是入黎試試新野。餐廳細細地，日式裝飾，燈光柔黃，氣氛幾溫馨，亦都坐得舒服。同朋友岩岩考完試，決定盡情叫野，慰勞下自己。刺身盤首先上枱，全部都好新鮮，廣島甜蝦大大隻，相當抵食。值得一提既係配既醬汁酸酸甜甜，好開胃。除左生蠔，都叫左兩隻燒蠔，一隻芝士燒一隻蒜燒，大大隻之餘蒜味十足。天婦羅唔會太油，炸粉薄薄一朕，蕃薯同南瓜都夠曬甜🥰另外仲要左個黑豚肩燒丼，黑豚厚厚地，好多片，燒得剛剛好，仲係好juicy。個汁好岩撈飯，加埋配上既泡菜，好快就清空d飯。比起其他日本餐廳價錢真係唔貴，但水準好夠，下次再黎食！…Read More

最近口痕想食雞煲，加上見到依間鋪promo 7:30前埋單，配料同小吃有半價，就上呢度試試。一上到黎即刻比佢個巨型魚缸震懾到，除左酒樓都真係好少見有餐廳有個魚缸，望住d魚食飯都真係幾賞心悅目。因為時間比較早，餐廳唔算太full, 我同朋友可以坐靠窗位，望住個街景。雞煲同火鍋湯底都幾多選擇，我地唔想食得太油膩就揀左個螺片花膠雞煲，另外加左烏冬、飯同生菜。Menu上配料既價錢都唔算平，但半價左之後真係超值，可以放心嗌。個雞煲相當真材實料，螺片花膠同雞樣樣都好足料，奶白色既湯底食得出燉左好耐，相當入味，但唔會太濃，淡淡地撈飯撈烏冬，或者就咁飲都好得。雖則係半價，但飯同生菜都大大份，烏冬亦係超彈牙讚歧烏冬。最後我同朋友都食得超飽，仲淨少少飯添，建議可以三四個人share一個雞煲，再嗌多d配料就岩岩好。…Read More