chuyigugu's Profile

今次係我地隔左好耐再黎食嘅餐廳，都無令我地失望！ 我地今次主要叫左啲燒物食- 三文魚冷麵：
呢個三文魚冷麵好新鮮，佢係用三文用作為冷麵，所以喱個菜式係無麵的。芝士蟹肉甲羅燒：
甲羅燒內含蟹肉、芝士、魚籽和鵪鶉蛋，煮的過程中就能聞到蟹香。味道非常濃郁，蟹肉的鮮味和芝士的濃香相互融合，而蟹膏的鮮味更是出色。黑松露蟹肉甲羅燒：
比起芝士，呢個就結合咗黑松露同鮮美嘅蟹肉，燒烤之後散發出黑松露嘅獨特香氣，同蟹肉嘅鮮甜完美融合。我超級鐘意食呢個啊，絕對係超級推薦！我個人比較鍾意黑松露味！鮑魚同大蝦殼燒：
鮑魚經過磯燒的烹調方式，保持了鮑魚的鮮嫩口感。每一啖都可以品味到鮑魚的原汁原味，完全食到鮑魚嘅爽甜同彈牙口感。啲飽魚都好有份量，好大隻，同好新鮮，攞落燒網時仲見到佢地好生猛咁郁。而大蝦味道就正常，對比之下，鮑魚比較出色。松葉蟹膏/ 海膽帆立貝殼燒：
呢個菜結合咗松葉蟹膏同帆立貝，燒烤之後帆立貝嘅鮮甜同松葉蟹膏嘅滑順口感好出色。同啲蟹膏真係好香好出色！
而海膽味同常見既帆立貝燒唔同，海膽嘅鮮甜同帆立貝嘅鮮嫩一齊食，都好特別。不過味道上唔算好惹味。但美中不足嘅係兩個殼燒上嘅蔬菜有少少苦。香蔥和牛炒飯：
呢個炒飯以香蔥同和牛炒成，飯粒嘅香氣同和牛完美結合，非常香，大推。洋梨燒酎：
呢個洋梨燒酎嘅酒精度適中，口感清爽順口。值得一提係上菜時間好快，建議可以慢慢食慢慢嗌。…Read More

今日去左紅磡食呢間韓國菜。我地叫左野食後好快就有四個小菜，包括泡菜，醃蘿蔔，甜薯仔同波菜。四個小菜都幾好味，我尤其鍾意薯仔！我地叫左一隻醬油蟹，咁啱做緊優惠，所以都好抵食。個醬油蟹食得出好新鮮，真係不得了，鮮甜惹味，食完仲想食！浸喺特製嘅醬油度醃製，蟹肉鮮嫩多汁，醬油嘅鹹香同蟹肉嘅鮮甜完美融合。 我地叫左韓國燒肉set C，喱到既韓國燒肉就用全碟拼盤上，夠哂方便。燒肉拼盤包含肥牛、牛仔骨、豬肉和雞肉，同各種配菜。值得一提係呢到既牛肉肉質鮮美，口感豐富，夠哂油份。 我地仲Order左支啤酒試下，與其他國家啤酒相比，韓國啤酒苦味更淡，甜味更重，泡沫更豐富，爽啊！ 喱到個老闆娘仲會同客人傾下計，相當有人情味，令到整餐飯更好味。…Read More

前幾日慶祝，見呢一間餐廳嘅食評好正面，所以特登黎試。一入去就覺得呢一間餐廳好有日本嘅風味。我哋被安排坐和式座位。店員幫我哋拉落簾隔開左和式座位同普通餐桌座位，更有私隱度。我哋點咗以下菜式：首先就係京都味噌青瓜。呢個配搭真係好新鮮，青瓜好鮮甜，而味噌味都好濃郁，兩樣嘢夾埋一齊又唔會有違和感，真係好開胃！接下嚟就係滿滿海膽杯。海膽好鮮甜，份量好多，仲配埋三文魚同三文魚子，口感好豐富。對於海膽愛好者嚟講，呢道菜絕對係一個唔能夠錯過嘅選擇。然後就係牛油果山葵漬。牛油果配以醬汁，同有少少山葵，係可以開胃嘅前菜。牛油果嘅滑順口感同醬汁嘅味道相互襯托，帶嚟一種新鮮同和諧嘅風味。只為有山葵漬，所以食多幾舊牛油果都唔膩。三文魚層層疊係將三文魚卷上面鋪滿三文魚刺身，食之前仲要用火燒，更加香口，好推介大家點呢一道菜。而蟹味噌甲羅燒配多士個蟹膏好濃郁，配埋多士食啱啱好。明太子醬厚燒玉子好嫩滑，但偏鹹。牡蠣の清酒蒸有6隻蠔，啲蠔正常size，有一兩隻手掌咁大，調味惹味。而八爪魚天婦羅汁味道正常。至於嘢飲方面極度推介大家點冰菠蘿梳打，非常有驚喜，真係好好飲。個梳打完全唔係用糖漿溝出嚟嗰啲，感覺到真材實料，仲配咗一大嚿冰菠蘿，食飽之後飲真係好爽！…Read More

今日同朋友去咗鮨月食omakase，呢度嘅環境非常好，好有日本特色，我哋今晚可以坐到吧枱，見着廚師點樣去為我地準備食物。刺身:真鯛呢個魚切得薄薄地，口感幾爽幾煙韌，配上淡淡嘅柚子胡椒，係好唔錯嘅開胃菜，而且好新鮮！北海道岸蠔呢隻生蠔係日本直送，即叫即開。食落仲有淡淡嘅海水味，亦有日本蠔嘅嗰種鮮甜。唯一美中不足就係唔算太大隻。粒貝刺身個粒貝非常新鮮，配上自家磨製嘅wasabi，超級鮮甜，而仲有一個裙邊，係預先燒過嘅，比較煙韌，亦都好好味。吞拿魚拖羅蓉配下面呑拿魚赤身，真係唔捨得一啖食曬，配啲蔥花同埋芝麻蓉，調味剛剛好，呢個亦都好出色。呢個叫冰頭漬，即係三文魚嘅咀再用醋醃咗，食壽司之前，用呢個清清個味蕾，真係超級開胃。壽司：有五款壽司，分別係魴鮄，青羽太，蓮子鯛，赤蝦同大拖羅。每一個壽司都配唔同嘅醬料，好似魴鮄就配梅子蓉，青羽太配柚子胡椒，蓮子鯛配辣蘿蔔蓉。呢三個魚嘅味由淡食到濃，都非常新鮮。赤蝦壽司上面配埋一啲海葡萄同埋松業蟹膏，勁好食！其中最吸引嘅係大拖羅 。望落去已經勁肥美，放落口真係入口即溶！！最後當然仲有天婦羅，個炸皮非常薄，非常出色。仲有燒雞泡魚，無骨啖啖肉，都幾好食，送酒一流。如果燒鮑魚又好彈牙，又非常新鮮。加埋嗰個甜品最中餅，即係花形餅乾，入邊係士多啤梨雪糕同紅豆蓉，勁好食，用黎做ending真係perfect!!!…Read More

今日同左男朋友過嚟灣仔嗰邊，就去咗喺囍帖街附近嘅劉一手嗰度打邊爐。呢度嘅湯底都幾多選擇，而且好有特色，有超過10款。最後我哋揀咗個鴛鴦湯底，一個呢就係皮蛋芫西湯，比較清熱，一個呢就係麻辣湯底，因為呢度好似都出名食辣！個皮蛋芫荽湯都幾清甜，唔似落味精，而且好多皮蛋同芫荽，我個人就唔鍾意食芫荽，男朋友就好鍾意食，佢話啲芫荽都好新鮮，我就食皮蛋都覺得幾好味同好大舊，而且個湯底仲可以飲，感覺上好清熱，而且真係好充料。而麻辣湯底都好過癮，食落真係好麻，而且非常夠味，鍾意食重口味同埋辣嘅揀呢個 湯底簡直一流，我最鍾意用呢個湯底淥烏冬同埋牛肉，真係相當唔錯。因為我同男朋友都好鍾意食牛肉，所以揀咗一個398牛肉拼盤盛，有牛小排，肥牛，牛頸脊，啲牛肉好有雪花，睇落去勁正，食落都好鮮味，而且一啲都唔韌，我比較鍾意配麻辣火鍋湯底，好好味。牛嗰一方面，我哋仲叫咗個極品牛骨髓，呢個似係我第一次食牛骨髓，估唔到咁好食，食落好香嘅牛味，但係一啲都唔蘇，而且佢又唔係好似豬腦咁樣好林，個質感好難形容，但係好好食。我哋仲叫咗個珍寶帶子，我個人就非常鍾意食帶子，呢個帶子一上枱都覺得幾大粒，而且食落好鮮甜，我帶子就比較鍾意落芫荽湯底，原汁原味。另外，我哋仲叫咗個羽衣甘藍豬肉餃子，呢個亦都係我第一次食嘅羽衣甘藍餃子，估唔到比想像之中好食，聽講羽衣甘藍係好健康嘅食物，本身以為係好草青味，但佢一啲都唔係咁，佢有啲小小似薺菜，好味！我哋仲叫咗個讚岐手打烏冬，碌落去麻辣湯底一流！人均消費$500左右，食到咁靚嘅牛肉，我覺得都值得嘅。…Read More

今晚同男朋友去咗灣仔附近嘅Ember到食晚餐，呢度都有幾多選擇，最後我哋叫咗兩個main set ， 再轉左個龍蝦湯同埋加咗一個鵝肝，份量都好多，食到好飽。是日餐湯：是日餐湯係芫荽湯，呢個湯好特別，因為平時啲西餐廳好少會飲到，通常中菜先會有呢個湯，對於一個本身唔鍾意食芫荽嘅人，本身係好抗拒，但係食咗一啖又覺得幾好飲，佢芫荽味唔算話真係好重，而且個湯又好creamy ，食落好夾，呢個湯值得推薦。龍蝦湯：我哋加咗$35換咗個龍蝦湯，個龍蝦湯好濃郁嘅龍蝦味，而且都幾creamy，但係偏鹹，配埋個麵包食啱啱好。個湯都好味，但我會比較鍾意芫荽湯多啲。香煎鵝肝：我哋加咗$58 ，換咗個香煎鵝肝。我想講真係好值得，因為呢一個香煎鵝肝好好味，食落一啲都唔酥，反而勁香口，而且配埋個煎香嘅麵包食簡直一流，勁鍾意呢一個鵝肝。海膽三文魚子檸檬忌廉汁寬條麵：呢個寬條麵好好食，佢啲海膽好新鮮，好鮮甜，一啲都唔腥，而個三文魚子亦都好甜，配埋一齊食好清新，我最欣賞嘅佢就係有檸檬汁，令到啲忌廉醬食落去唔膩，個寬條麵硬度都啱啱好，係一個好味嘅main course。烤阿根延草飼肉眼牛扒9安士：我哋最鍾意就係食牛扒，所以就叫左呢個肉眼扒，叫咗五成熟，呢個熟度啱啱好，唔會太生，亦都保持到佢嘅肉汁，一啲都唔韌，仲好香牛味添。而啲配菜都唔錯。我地仲叫左兩杯野飲， 其中一杯係long Island，味道正正常常。我最欣賞呢間餐廳嘅就係有live Band，唱得好好聽，個氣氛非常chill，最啱就係gathering或者情侶喺呢度拍拖，可以慢慢坐慢慢傾計，仲有得聽歌，真係好好feel。…Read More

今日同左朋友去佐敦嗰邊食飯,去左呢間多國菜餐會食，呢度環境好舒服,靜靜地而且燈光號暗暗地,最啱情侶或者朋友來呢一度輕輕鬆鬆食下飯傾吓計！ 我見個餐牌都有幾多嘢食，嚟到呢度梗係要食呢度嘅Pizza。Cantonese favorite pizza一見到呢個名就想揀呢款Pizza，佢係廣東式pizza，係有千島醬挪威煙三文魚配菠蘿芝士。呢一個Pizza係薄批，所以唔算食到好飽。個味道我就非常鍾意，因為個人比較鍾意千島醬汁，而且好多芝士，啲菠蘿都係新鮮菠蘿，食得出唔係罐頭菠蘿，配埋一齊食唔會膩，而且個味道非常好。我個人就好鍾意呢一個Pizza，亦都值得推介。Butter chicken with Garlic Naan我見呢度嘅咖喱好似都幾好味，所以就叫咗個牛油雞，呢個牛油雞係唔辣嘅，佢個樣似係紅咖哩，而個雞肉一啲都唔硬，仲幾滑！另外，跟咖哩仲配一個薄餅，我哋就揀咗蒜頭味，薄餅一上枱，佢個味就勁香，勁似蒜蓉包，包上面有好多蒜蓉，單獨食個包已經好夠味，配埋啲咖喱一齊食就更加濃味，所以我諗下次我會揀芝士味或者原味。Fresh Young coconut 嘢飲方面我哋叫咗個椰青，個椰青好鮮甜，而且冇up味，佢個size都幾大，啱晒兩個人share，仲可以食啲嘢肉，啲嘢都淋淋地，真係好飲。人均消費大概$172, 價錢都ok !…Read More

今日同朋友去咗尖沙咀嗰邊食日本野，之前行過一直都想食下，今日終於有機會。入到去成間餐廳係勁香，因為呢度會食呢一個嘅甲羅燒，亦會燒海鮮，所以好香嘅燒嘢食味。而且呢度嘅氣氛就好似去咗日本嗰啲居酒屋咁樣，裝修得都好靚，坐得又舒服。睇餐牌都幾多選擇，我哋就叫咗幾樣野。麻醬蕃茄豆腐沙律一開始我哋就點左個沙律，呢度嘅蕃茄真係好新鮮，勁鮮甜，而個豆腐又有豆味，又一啲都唔硬，一齊食真係好清新，前菜一流呀。刺身五盛食日本野點小的食刺身，我哋叫咗個刺身五盛，分別有三文魚，帶子，吞拿魚，海膽同埋油甘魚。每款刺身都好鮮甜，而我最欣賞嘅係帶子同埋海膽，因為真係好甜美，而且一啲都唔腥！甜蝦刺身除咗刺身五盛外 我哋仲叫多咗個甜蝦刺身，啲甜蝦好大隻，都好鮮甜，食落亦都唔會覺得漿住個口，好味。甲羅燒聽講呢度啲甲羅燒好出名，所以我哋叫咗兩隻味，一個就蟹味噌甲羅燒，一個係黑松露蟹肉甲羅燒，兩個嘅味道都好好食，勁香蟹膏味。佢有啲青瓜俾你配，食落唔會膩。個黑松露味，聞就非常之香，食物呢有淡淡的黑松露味，如果有啲麵包配就好，因為好濃味。燒鮑魚同帶子除咗甲羅燒之外，我哋仲叫咗鮑魚同埋帶子黎燒，兩款海鮮都好新鮮，我仲見到有個岡就係養鮑魚嘅，啲鮑魚上枱嗰陣時仲識郁，真係好新鮮。個鮑魚好鮮甜同好彈牙，而帶子亦都非常甜，而且佢哋就唔會落重味粉嘅，俾你食到就食海鮮嘅原汁原味！蠔鍋飯個蠔鍋飯都幾足料，有成四隻蠔，每隻都幾大，佢有啲洋蔥青椒做配料，食落甜甜地，都算OK。巨峰提子乳酸同蜜桃梳打嘢飲方面呢兩款都好飲，而我哋就比較鍾意飲蜜桃梳打，因為好香蜜桃味之餘，飲梳打又有氣，配埋啲燒嘢食一齊食可以解膩。…Read More

今日去開觀塘嗰邊，又發覺樓上有間餐廳，所以就決定去食晚餐，一上到黎呢度都幾好feel喎，環境又大，唔會太擠迫，最後我哋就坐咗幾喺卡位，有沙發坐，都幾舒服，而且呢度啲餐具都好靚，係雲石。聽職員講喱到可以包場，應該都幾正。見到餐牌都幾多嘢食，而且聽講呢度啲蠔唔錯，所以我哋就叫咗兩款生蠔嚟食。Saldanha bay 呢款生蠔就比較creamy ，我哋每人食左兩隻，個生蠔好新鮮同埋都幾大隻，食落好飽滿，而且一啲都唔腥，海水味唔會過重。Deesse Blanche 呢一款生蠔比啱啱嘅saldanha bay大隻少少，喱款就海水味比較重啲，食落偏鹹，但係都係好新鮮同埋鮮甜嘅。但我哋就比較鍾意食creamy 嘅saldanha bay 多啲。聖子刺身呢個聖子刺身都超好味，我個人好似係第一次食聖子刺身，食落一啲都唔腥，而且好鮮甜，佢個質感食落啲似帶子，佢條邊就比較有咬口，值得再叫！而且都幾大隻。我哋最後揀咗個set dinner，個set都幾多野食。Parma ham 楊桃沙律呢個沙律都幾好食，佢個沙律醋調得啱啱好，夠味又唔會太酸，而且個楊桃係甜嘅，個Parma ham 都唔會酥，整體來講都非常高質魔鬼蝦球牛油果醬脆多士喱個都超級好食！個魔鬼蝦好彈牙，而且佢用咗嗰啲味粉調味，食落去好惹味，配埋牛油果醬食，可以解膩，而且個多士都唔會太硬，三者配合得非常好，係一個非常高質嘅前菜。是日餐湯是日餐湯係一個菜湯，佢係有打爛咗嘅唔同蔬菜煮成嘅，我食到有西蘭花，而且仲保留左好細粒嘅蔬菜粒，食落唔會太寡。而且個湯都幾creamy ，佢個味有少少似某間餐廳嘅蔬菜餅，真係好飲。北海道帶子麵包蟹寬條麵伴壓縮俄羅斯魚子醬喱個寬條麵都非常非常好食，入面有勁多蟹肉，個醬汁又好creamy ，而且個味都好濃郁，食落一啲都唔會覺得寡，本身我個人都麻麻哋食寬條麵，但係呢個麵真係好有水準。粒帶子勁新鮮，又甜，好似食緊帶子刺身咁！火山石燒澳洲M6和牛牛腹扒配爆谷川香燒汁喱個和牛亦都非常好食，肉質鮮嫩，表皮煎到脆，入面生生地，保持到佢嘅肉汁，但牛味唔算好濃郁，佢個醬亦都調得好好，有味得黎又唔會蓋過左牛味！是日甜品今日嘅甜品係布甸，佢上面應該係提子味嘅啫喱，下面就係牛奶味嘅布甸，隔離有啲鮮芒果粒，呢個布甸真係好好食。佢個牛奶味好濃郁，加埋生果味嘅啫喱一齊食更Fresh，而啲芒果粒都好甜！人均消費連加一$500左右，我哋食咗咁多正嘢，而呢度啲嘢食有咁高質，其實都幾抵食。下次都會再黎食飯，我會係星期一或三黎食，因為主菜買一送一，會更抵！…Read More

今日同屋企人去咗銅鑼灣嗰邊，知道SOGO樓上有一間西餐廳La Serene cafe ，所以就去食dinner 啦，呢度坐得都幾舒服。我哋最後叫咗四個main。煎澳洲黑安格斯牛肉眼配燒汁我哋勁鍾意食牛，所以就叫咗兩個牛扒，呢個我牛肉眼扒入邊肉質都幾鮮嫩，因為我哋有小朋友我哋都唔敢叫到太生，佢肉眼扒保持到佢嘅肉汁，食落一啲都唔鞋，而個面就煎到好香，佢仲有配一啲類似芥茉嘅醬汁一齊食，好食。煎美國安格斯西冷配辣根醬燒汁一個西冷扒都好好食，同樣地都係肉質鮮嫩！外皮煎到好香，入面又保持到佢嘅肉汁，雖然佢個汁叫做辣根醬，但一啲都唔辣，個醬都有少似芥茉醬，呢個西冷扒同肉眼扒同樣都好好食！龍蝦膏鮮蝦意粉呢個蝦膏意粉嘅蝦膏味唔算好出，但係個調味都唔錯，個意粉唔會太硬亦都唔會太淋，煮得啱啱好，而一碟入邊都有幾隻蝦，啲蝦都好彈牙。蒜香帶子黑魚籽天使麵個人就非常鍾意食呢個天使麵，粒帶子又新鮮又唔會太熟，配埋啲黑魚籽一齊食，個麵有淡淡的蒜香味，我會推薦喱一個天使麵，真係幾好味，佢比意粉幼身！跟餐我哋仲加咗$38叫多個沙律，但係呢個沙律嘅醬汁就偏酸。甜品方面我哋就叫咗日本牛油蛋糕，朱古力忌廉蛋糕同埋日式芝士蛋糕。佢喱三個甜品都唔算好大份，但係每樣都好好食，我就最鍾意嗰個朱古力忌廉蛋糕，好濃朱古力味，食落又好creamy，唔會太晏。而我屋企人就比較鍾意食日式芝士蛋糕，因為個芝士味好重。人均消費$280左右。…Read More

今日同男朋友去咗佐敦嗰邊搵嘢食，就去咗呢間studio caffeine食晚餐，喱到有唔同種類嘅咖啡同埋一啲輕食嘅，仲有意粉比大家選擇。我最後就揀咗個monster all day breakfast 同埋一個蟹肉配意大利奶油芝士醬扁意粉。個Monster all day breakfast 好豐富，有煙肉啊，腸仔，炒蛋，薯蓉，茄汁豆，沙律等，當中我覺得最有驚喜係個沙律同埋薯蓉，我沙律醋咁咪好開胃，又唔算太酸，啲蕃茄仔又好甜。而薯蓉調味都好好，有淡淡的黑松露味。個蘑菇仲好多汁，都幾好食。個蟹肉扁意粉都好好食，蟹肉嘅份量都幾多，而調味呢有好香，重芝士味，食落啲扁意粉嘅質地啱啱好，唔會太硬，配埋成個醬食都真係幾好味！野飲我地叫左杯crème brûlée latte 同埋hazelnut chocolate ，兩杯都相當唔錯，而我最鍾意係hazelnut choco, 佢個拉花又拉得好靚，味道又好濃，推介！ 而個咖啡又唔太甜，都好飲！…Read More

今日同朋友去咗位於中環皇后大道中嗰邊食dinner，見到有間樓上好似都唔錯，叫the balcony。呢度嘅環境都幾好，座位唔算多，如果唔怕熱仲可以出坐喺個露台出邊食，都幾有feel。我哋兩個人叫咗一個set。首先上嘅係沙律，啲菜都新鮮，配埋啲沙律醋食都開胃。最特別嘅係有啲辣肉腸，個樣好似臘腸，食落又幾好食，仲有啲芒果粒。今日餐湯係龍蝦湯，個味好濃，但偏咸。個前菜就好有驚喜，我地叫左法式焗田螺，佢係配啲黑松露醬，食落淡淡香，唔算好重味，另外仲有啲日式芥末味，個田螺好新鮮ok彈牙，我就最鍾意個薯蓉，因為好香同好夠味。另外一個前菜係煎北海道帶子配波蘭汁，佢係一粒帶子下邊有啲蘿蔔蓉，隔離有啲黑啡色嘅醬汁。個帶子勁新鮮同彈牙，啲蘿蔔蓉都好正，吸晒帶子的鮮味，正！而波蘭汁唔係好重味，配埋一齊食真係好好食。我地主菜叫左澳洲肉眼扒，佢都好大份，夠晒兩個人食，個肉眼扒煎得好香，我哋叫咗三成熟，嗰邊就煎得好靚，入邊啲肉就唔算太熟，食落仲保持到佢嘅肉汁，呢個真係好食。配菜有南瓜同埋薯仔，都相當唔錯。最後個甜品都相當有驚喜，最特別嘅係薑汁雪糕，我哋都係第一次食薑汁雪糕，個薑味好濃，而且仲食落好Fresh，呢個真係好好食。另外仲有一個榛子慕絲，佢有啲榛子粒喺度，又唔算太甜，都好味。仲有士多啤梨。人均消費$300左右，食到咁好味嘅嘢食都算抵。…Read More

今日同朋友去左大圍果邊，見到有amplifer 餐廳，之前係另一間分店食過都好味，所以今次就去大圍分店食dinner ! 我地都幾早去到，一入到發覺喱到都好好feel 喎，啲燈光又暗又有情調。最正嘅係呢度有live Band，我哋食緊嗰陣時就有人吹sexphone，真係好浪漫。聽講逢星期三顧客可以上台唱歌，唱完仲有八折添，但我歌喉就麻麻，所以應該都唔會唱，但係有八折真係好抵。睇到個餐牌花多眼亂，最後揀左個amplifier set for two ,咩都有又比較扺！水牛城雞翼因為我哋都比較鍾意食雞翼，所以就揀咗呢個水牛城雞，喱個雞翼好多醬汁，而且偏辣，同埋重口味少少， 會比較適合啲鍾意食辣嘅朋友。香煎鵝肝配沙律個鵝肝就非常之香，配埋少少醬汁食，入口即溶，食完個香味仲比留係個口到，而沙律就正正常常，配埋沙律醋一齊食都幾開胃。大蝦闊條麵配松子羅勒醬羅勒醬即係一啲香草醬，成個面都係青色，食落去都幾Fresh，呢個麵同樣地都係好多醬汁，所以好夠味，但係有少少偏鹹，正正常常。個大蝦就都幾彈牙。美國優質安格斯牛肉眼扒因為我哋都好鍾意食肉嘅，所以就必定揀呢一個牛扒啦，個扒比想像之中大份，食落唔會太韌，而且都幾juicy 同好多肉汁，配埋個牛扒汁食，都好夠味，正！是日甜品最後到甜品啦，有朱古力布甸， brownies同埋一個拿破崙，朱古力布甸個味就比較淡啲，都幾好味，如果Brownies就太甜啦。最好味嘅係個拿破崙，好鬆脆。人均消費330左右，個價位都抵。…Read More

今日同朋友去左大圍果邊，見到有amplifer 餐廳，之前係另一間分店食過都好味，所以今次就去大圍分店食dinner ! 我地都幾早去到，一入到發覺喱到都好好feel 喎，啲燈光又暗又有情調。最正嘅係呢度有live Band，我哋食緊嗰陣時就有人吹sexphone，真係好浪漫。聽講逢星期四顧客可以上台唱歌，唱完仲有八折添，但我歌喉就麻麻，所以應該都唔會唱，但係有八折真係好抵。睇到個餐牌花多眼亂，最後揀左個amplifier set for two ,咩都有又比較扺！水牛城雞翼因為我哋都比較鍾意食雞野，所以就揀咗呢個水牛城雞，喱個雞翼好多醬汁，而且偏辣，同埋重口味少少， 會比較適合啲鍾意食辣嘅朋友。香煎鵝肝配沙律個鵝肝就非常之香，配埋少少醬汁食，入口即溶，食完個香味仲比留係個口到，而沙律就正正常常，配埋沙律醋一齊食都幾開胃。大蝦闊條麵配松子羅勒醬羅勒醬即係一啲香草醬，成個面都係青色，食落去都幾Fresh，呢個麵同樣地都係好多醬汁，所以好夠味，但係有少少偏鹹，正正常常。個大蝦就都幾彈牙。美國優質安格斯牛肉眼扒因為我哋都好鍾意食肉嘅，所以就必定揀呢一個牛扒啦，個扒比想像之中大份，食落唔會太韌，而且都幾juicy 同好多肉汁，配埋個牛扒汁食，都好夠味，正！是日甜品最後到甜品啦，有朱古力布甸， brownies同埋一個拿破崙，朱古力布甸個味就比較淡啲，都幾好味，如果Brownies就太甜啦。最好味嘅係個拿破崙，好鬆脆。人均消費330左右，個價位都抵。…Read More

今日同朋友去到上環嘅湯煲私房菜到打邊爐，一入去環境都幾舒服，雖然唔算好大。我哋睇到Menu ,都睇到有幾多選擇，連湯底都有八九個，仲有啲好有特色嘅，但係最後我哋就揀返我哋最鍾意嘅皮蛋芫茜湯底。一上個湯底都幾足料，有好多皮蛋同芫茜，我見隔離枱叫咗個雞湯煲，更加豐富，入邊有幾多舊雞。食落個味都OK，應該都好足料，唔似落味精。我地兩個人叫左半份安格斯肥牛，一上枱就覺得一定好好食，因爲肥瘦均勻，而且每一塊都幾厚身，食落好有牛味，又有口感，而且食完個是仲有陣濃郁嘅午牛味，正！另外，仲叫左黑柏葉，喱個好爽脆，淥幾分鐘就食得，而且唔韌，好味，份量兩個人食都夠 。自製牛丸同墨魚魚都好味，夠哂彈牙，我覺得個牛肉入邊都有肉汁，推薦推薦！我地仲叫左個菇拼盤，有冬菇、金針菇、雞脾菇，都幾好味，新鮮。全場令我最有驚喜係個牛肉同牛丸，推薦大家叫。而且喱到嘅職員服務態度都好好！…Read More