piveggie的個人專頁

上年去過灣仔本店食，燒雞即叫即炸，一來到熱辣辣皮脆肉滑又juicy，所以見到元朗開左即去幫襯！可惜事與願違，我地QR code 一落完單 ，個雞就即時比到我地，堂食嘅我地，以為可以食到鮮炸嘅雞啦，點知個雞皮凍嘅… 灣仔嘅係戴住手套撕雞都熱到辣手架… 而元朗依間，好明顯雞是一早炸定，而且都放左出來幾耐下，無保溫。雞皮韌而不脆，只有油沒肉汁，加十蚊要嘅薯條仲離譜，係又凍又硬架！ 其實咁樣收我$88，我無諗過水準會咁差，差過一般茶記，人地至少食隻炸髀都會熱，而佢同大家樂大快活嘅做法一樣，一早炸好晒夾比你… 但人地起碼薯條唔會無保溫擺到掉得嘅程度都夠膽$10賣比人，性價比好低哦！我就一定唔會再幫襯，元朗太多好嘢食啦，搞到我亦都唔敢試其他薔紅嘅分店，伏一次永記於心，食炸嘢quota 有限呀，不想隨意浪費……查看更多

荃灣又多一間高質麵包店，店面整體簡潔亮麗， 麵包係由店員夾比客人，大大提升衛生保障👍🏻不斷有麵包出爐，店內的麵包外型走歐陸風，價錢走親民路線今次買左以下麵包：💛鹽可頌: 👍🏻 會再買，鹽香濃郁 ❤️士多啤梨吉士酥 ：走crispy 路線，夠脆同輕身，士多啤梨好香，酥皮不是走buttery 路線，所以無油膩感🤎桂花鐵觀音bagel: 茶味香濃（偏向大人口味，因為茶味帶點回甘），有桂花點綴，茶葉係同天仁茗茶聯乘，係真正嘅bagel 質感，唔似得坊間麵包店成日整個圓形圈麵包扮bagel …查看更多

今日11點去排隊食山本家，食第一轉，排半小時可入座， 先來左天婦羅蝦，皮厚，夠熱，但天婦羅汁無味無蘿蔔溶，不正宗。 然後來烏冬，聽講是手打的，我是專程過來一試，在openrice 見到差評較多，但都想比次機會，話晒咩百年老店，又有朋友話好食。好啦，入返正題，叫左親子味增烏冬， 一夾入去， 完全無一條烏冬係長過2cm 嘅 ，成碗都係碎烏冬，同痴埋一舊舊嘅烏冬，完美演繹左貓砂沾濕左成結塊嘅形狀。口感好粉好硬，成碗烏冬眾多小結塊我真係第一次食，唔好話日本店，去茶記食最多痴埋一舊但會搞得散開。亦都唔會成碗無數小結塊咁啦！ 個雞肉，雪藏味勁重，好硬好鞋，我好後悔一早來排隊食，亦唔知點解佢會成為排隊店。另一碗咖哩牛肉烏冬，得2.5塊牛肉，湯底味道正常，是烏冬結塊混合烏冬麵條，比我果碗正常返少少，但絕對唔係一間日本百年老店應有嘅品質囉！如果我唔係11:30就入去食，我會覺得自己食緊人地食剩嘅烏冬碎！而個炸豆腐， 咩事，果pat 醬完全唔知咩來，豆腐無味，又係唔知自己食緊咩…個炸菇算是正常但唔駛咁樣排隊食啦！…查看更多

見到荃灣開左 ，一直想去試 ，酸湯好似好有特色 ，就搵左朋友陪我去 。店內好迫 ，又好旺場 ，我大住個肚入去 ，打側都差唔多過唔到，行得好辛苦 ，仲要地下油油的 ，每行一步都要打醒十二分精神， 我先到左，朋友未到，因為多人waitress 要拼枱 ，我被通知要轉枱去到一個好迫嘅位坐下。不過算啦，打算食完就快快走人。講返食物，我個四鳥酸湯檬，正常多料同埋都快上，個蝦多士有油益味，都幾難食。朋友個生牛河就出事了，湯只係微溫，所以牛肉點浸都唔熟，仲要生到咬唔開果隻，個粉上面仲要勁多烏蠅仔死屍，我問朋友駛唔駛同waiter 反映，但佢見我差唔多食完，我大住個肚，果度又嘈又污糟，就息事寧人埋單走了，好唔好彩地我地離開左一陣，朋友就肚痛了，佢其實只係食左兩啖咋，我超級內疚，亦寫左依篇食評，希望餐廳會改善下啦！身體較弱嘅老人家，小朋友或孕婦就自己小心點，去間衛生環境較好的餐廳吧…查看更多

兩個女仔叫左兩個餐，份量好大，有湯有沙律，有小食，我地仲加錢叫左飲品，飲品份量有大啤酒杯咁多，質素是港式味道。炸魚炸漿不錯，但魚肉鬆散及無味，應是廉價鯰魚，選擇炸雞會較好。本來滿心歡喜支持黄店，但食唔夠到一小時，不停被告知好多人等位，講左三次左右啦！講真份量咁大，要45分鐘食晒真係做唔到，我知你想賺盡做兩轉，但要客人極速倒食物飲品入口去滿足你賺多啲，真心接受唔到，最後杯嘢飲未飲完就走人，無下次啦，lunch 食超過100蚊per head 仲收加一，要趕頭趕命消化不良，為咩呢？…查看更多

先講重點！唔好中伏！咩都好難食！諗住食個快飯去上堂 叫左個蕃茄牛肋意粉加熱檸水，心諗咁基本嘅食物唔會伏掛，點個知伏到我覺得自己唔自愛，食埋d 垃圾入肚，亦覺得自己成為唔尊重食物嘅幫兇！杯熱檸水佢用小紙杯上，唔環保之餘仲要水有怪味！個意粉仲出人意表，一個碗盛放用水煮好嘅意粉，完全零調味，基本是白烚，走油鹽！個蕃茄牛肋仲經典，牛是用水烚好，又係走油鹽，仲要走埋牛味！ 蕃茄汁如水，之後倒上去嘅，完全無同牛肉一齊煮過，個蕃茄呢，亦無同個汁一齊煮，是生切兩舊放入去，個底仲有d 雪藏薯仔！嘩，食個車仔麵，每樣餸都有自己嘅調味丫，你個意粉，同車仔麵一樣分開煮，之後擺埋就夠膽比客仔，仲要全部野無味架！收70蚊，你收我30蚊我都唔食呀！簡直是侮辱茶餐廳同冰室，你咁嘅食物，同外國唐人街d chinese food 都不如呀！！去超級市場買個幾餸飯都無咁嬲呀！…查看更多

之前到青衣的長康村，探望外婆的時候，都會幫襯這小店，這小店的麵包蛋糕出品，水準非常高！麵包及蛋糕，很好吃，很實在，不會像連鎖店，食完，一陣風咁！但這小店的麵包，吃得出，有用優質材料，及用心去做！就算麵包，蛋糕，早一天買，到第日朝早先食，都一樣咁好味！ 想不到在人口老化的長康村會有 hidden gem 存在！希望這小店能一直做下去，加油！想不到我是第一個留言呢，可能沒有人會看小小麵包店的評語，但我，希望小店員工能看到呢！…查看更多