dingbaocase's Profile

假扮觀塘老店康和車仔麵。中午入去食，煮野嗰個人都未返，得個清潔阿婆煮（佢自己一邊食飯一邊煮）。個冷氣開左等於冇開，仲熱過出面。落單張野設計有問題，個阿婆有一半睇錯我哋選的餸。個車仔面既湯，真係宇宙最難食，淡到水咁。雞翼/豬手 唔知浸左幾耐，已經熟到溶哂夾唔起。仲有墨丸，佢係用清水烚比你分開上。三個人食百幾蚊，比二百蚊都話冇錢找。真係未見過咁痴線嘅食店。…Read More

幾年前去食過，果陣刺身質素係唔錯的。今日再去，點知失望而回。1）環境：今日都未去到最熱的日子，點解會食到出汗架，就算我去第二度食火鍋，都冇食到出汗啦。佢係連通風都唔夠，好似上左架剛開冷氣的巴士。2）服務：成個場得兩三個侍應，去到兩點幾追單直頭好難搵人。佢地有逐枱問有冇野未上，我有野要追但佢就偏偏 skip 左我果枱。3）食物種類：普普通通。我見其他大喜屋都有咖喱蟹，炒鱔。點知呢間兩樣都冇。4）漏單：成個場只開左一半, 其中唔少人係叫定食，所以唔覺得係超多人。十二點半落羊架，比目魚，點半都未黎。再落單再追，先出返補單果啲。之後再落羊架，又係等一個鐘都未出，又要追。唔知佢係咪要堅持儲夠某個數量先肯燒。可能少人叫就永遠唔洗食。花膠都好似要等三十分鐘以上，又係要追單。5）燒物質素：記得幾年前佢的羊架都乾乾地，今次仲有過之而無不及，我夠膽講係燒到最少有二十成熟（可能真係燒左成個鐘？），咁的質素唔怪得冇咩人叫。第二round 都一樣係燒到咁乾。燒比目魚：一樣可以燒到變炭。6）刺身質素：大赤蝦係唔錯的，算幾大隻。甜蝦就普通。赤貝 ok。象拔蚌冇味仲有少少腥。油甘魚係中下，顏色唔靚完全冇魚味。三文魚好普通，其中一轉直頭係中下級，完全係零魚味。除左質素，刺身 cut 份量都非常嚴重。四個人，每 round 無論你剔幾多，最多大約只會比四隻赤蝦，八隻甜蝦，四件三文，四件油甘。食過咁多次放題，都好少試過會比人 cut 三文魚... 依家連裝刺身個盤（大碗?）都縮細哂，只係放得落上面講的份量。想放多幾片魚都唔會放得落。每 round 刺身大約廿幾分鐘以上先出到。以全場人數黎講算出得比較慢。7）其他熟食質素：芝麻雞翼，炸蠔果啲都好正常。其中有個蒜香骨（中式）就非常好食，肉唔太肥，夠淋又夠入味。好食過好多茶記/酒樓。同樣的既價錢出面真係有好多更好的選擇。短期內唔會再返去食，除非以上的都有所改善。…Read More

Food court 黎講價錢偏貴。有啲 wrap 的餐去到八九十蚊。第一次去，就係想試下個咖哩先。叫左個 $48 咖哩雞飯。一打開個盒，心知不妙。個所謂咖哩，只係一啲黃色的水，聞落同食落都冇咖喱味，好明顯佢係買現成醬料但又冇再自己調味。其實去超市買現成咖哩汁都好食過佢。雞肉，三件細細的烚急凍雞肉。冇用調味料yip 過，都幾健康。最重要係冇任何配菜。去大x樂都有塊薯仔，點解所謂印度餐廳可以咩都冇。48 蚊比粒薯仔都得掛？…Read More

酸菜魚。伏到冇得再伏，其實仲可唔可以叫做酸菜魚。 堂食，都係比兩層膠盒裝住。幾片魚，鞋過湯渣。冇任何配菜，冇酸菜。個湯冇麻冇辣。盛惠六十蚊。六十蚊過隔離食扒冇咁嬲。…Read More

唔食牛，又想食辣, LUNCH 叫左個辣泡菜豬肉湯。黎到真係只見到一兜湯。用筷子撩下，剩係見到幾片浸到淋哂的菜（唔似係泡菜。如果真係泡菜比佢咁樣整法佢都幾失敗）。同埋一粒仔豆付。撩極都冇其它野，最後搵到兩三片，片到好薄好細粒的肥豬肉。乜配菜都冇，冇蘿蔔絲冇金菇冇芽菜。觀塘上樓餐廳，$70 就係食呢兜連湯渣都不如的野。食過大大小小有平有貴的韓國餐廳，都未試過食到咁冇引。相都冇影，影出黎只會見到兜菜水！！！…Read More