紫牛's Profile

上星期六同太太去咗屯門置樂呢間聚福樓度食個下午茶，之前試過食晚餐，食物質素都唔錯，今次就試吓去食下午茶，我哋叫咗兩個Brunch set，分別係巴馬火腿班尼廸蛋（$138）同埋菠蘿芝士牛肉漢堡配番薯條（$188）。先講過班尼廸蛋，味道都唔錯半熟蛋加上配料份量十足，同埋沙律菜都幾多，都幾值得推介！至於個菠蘿芝士牛肉漢堡配番薯條，牛肉味道都幾濃厚，肉汁鮮嫩，配上份量都唔少嘅番薯條，再加上沙律菜。另外再包埋兩杯價值$38嘅飲品，性價比都算唔錯，值得下次再幫襯。…Read More

早兩晚帶埋亞女出去長沙灣接太太放工，俾個驚喜佢，夜晚諗唔到去邊度食，就去咗啲D2嗰邊行吓，搵吓有咩好食，結果就去咗呢間酷廚度食。先講裝修方面，基本上可以話係冇咩裝修，水泥地白色牆，冇咩特別，不過坐落都算幾舒服。我哋一家三口好，叫咗三個晚餐，包括：青咖喱雞飯、法式羊架同埋帶子龍蝦汁扁意粉，先講青咖喱雞飯，個咖喱汁味道唔錯，但啲雞就比較鞋口。龍蝦汁扁意粉味道都唔錯，份量就一般。至於法式羊架就真係一般般，羊架冇乜味道，而且都煮得太過熟，令到質感變差，總括來講食物質素一般，下次未必會再幫襯。…Read More

早兩日去咗又一居探朋友一家，夜晚諗唔到食咩好，朋友介紹下就去咗呢間女青年會既Cafe度食晚餐，呢間餐廳係只招待會員。（因朋友既囡囡有去女青年會度上興趣班，所以先可以去食）先講餐廳環境方面，裝修一般簡單，座位數目亦唔多，價錢方面亦都同一般西餐廳差不多。我哋四個大人兩個小朋友，一共叫咗兩客意粉同一客紅酒會牛尾，以及一客羊架。我哋叫咗牛尾配白飯，牛尾質素同口感都唔錯，但係配嗰個白飯就真係少到有點兒誇張。至於羊架方面，份量唔錯，一共有四條，羊味亦好濃厚，值得推薦！總括來講，價錢同食物質素都成正比，下次可以再去過。…Read More

今日朝早放假，同朋友兩個人去咗置樂嗰間天悅度飲茶吹下水，朋友話佢既食物都唔錯，就咁就去試下佢啦！先講食物方面，最驚喜嘅係朋友介紹試吓食嘅燕麥粗糧糕，呢款糕都幾特別，唔係度度有得食佢係甜點黎既，口感都幾特別，咬落嚥嚥韌韌咁，都幾值得一試。我地另外叫既都係D大路嘢，就係叉燒包、腐乳通菜、牛肉球同滑雞飯，腐乳通菜夠晒多腐乳，叉燒包質素都唔錯夠鬆軟餡料又多。我哋總共叫咗五樣食物，埋單價錢係$136.5，價錢都算正常。需要另外一提嘅，就係通道方面嘅問題，由於我哋坐近門口，察覺到通往酒樓門口既路就需要經過三級樓梯，對於行動唔方便嘅人來講都幾麻煩，例如坐輪椅嘅人士、老人家同埋推住BB車既人黎講都幾唔方便，希望酒樓可以想辦法去改善一下。…Read More

今日天陰陰，最啱去食下啲醒胃野，落樓下買咗個譚仔外賣，叫咗個過橋米線，果然夠足料，豬潤墨丸腩肉樣樣齊，份量方面足夠兩個人食。不過今晚得我自己一個人食，根本食唔晒，唯有留返聽朝再煮麵加送食。因為第一次叫外賣，唔知道佢係分開兩個碗上，雖然唔係咁環保，但麵既質感就得以保存。食物質素方面，豬膶都幾滑，墨魚丸就夠新鮮，最衰每樣丸都只係得一粒，感覺有啲唔夠喉。總括而言，過橋米線嘅性價比都算唔錯， 50幾蚊分兩餐食，都算幾底下，下次可以再幫襯。…Read More

今日一家三口👨‍👩‍👧經過市中心呢間咖啡☕️甜品🍮店，本身都冇打算食佢（因為價錢真係唔算平），但阿囡在甜品櫃見到件狐狸🦊造型既蛋糕🍰，立即雙眼放光～作為好爸爸既我自然心軟下來，買左兩款蛋糕返屋企慢慢品嚐。我地買左赤狐仙景（$52）同幸福橘子（$46）兩款蛋糕，阿囡話見到隻狐狸🦊真係唔忍心食左佢落肚～講返味道方面，幸福橘子🍊好有橙味，而且肥大肉厚，質感亦十分鬆軟。赤狐仙景就有濃厚既梨味，隻狐狸🦊就真係吸引晒d小朋友既注目，蛋糕亦十分鬆軟。總括而言，價錢雖然唔算平，但性價比亦不差，值得下次再試～…Read More