id0081406's Profile

今次黎食壽司豐嘅午市 omakase，揀咗個$1280嘅套餐。 前菜係栗子南瓜配日式蒸蛋，栗子南瓜嘅口感軟滑香甜帶有栗子味，甜過普通日本南瓜好多。 日式蒸蛋非常之嫩滑，食落口好似飲緊雞湯咁，入面仲有魚塊增加鮮味。第二道菜係日本蠔上面有少少蔥花同柚子啫喱，蠔身肥美蠔味濃郁，喺口腔停留蠔嘅鮮味久久不散！緊接落嚟嘅係刺身，首先係深海池魚同埋帶子刺身，師傅就建議食咗帶子先，因為帶子比較淡口，帶子食落爽口鮮味。深海池魚好厚肉食落有淡淡嘅魚味滲出嚟，越食越有魚味。 食完淡口嘅刺身就到濃味啲嘅刺身，分別係劍魚刺身同大拖羅。 第一次食劍魚刺身，雖然冇拖羅咁肥美，但係食落有絲絲嘅魚油香。大拖羅可以話係呢一餐嘅重頭戲，可以見到油脂分佈均勻就好似頂級嘅和牛，食落口係入口即化，魚油香充滿著成個口腔！ 完咗刺身環節就到壽司環節， 原本壽司得五件(魷魚，𩶘魚，左口魚，醬油漬深海池魚同埋海膽手卷)，不過師傅就送多咗我哋一件火炙大拖羅壽司！ 壽司入面以魷魚壽司同埋海膽手卷比較出色，魷魚食落係漿口相當之鮮味而海膽亦同樣新鮮，當然最矚目嘅係師傅送嘅嗰件火炙大拖羅壽司，係再一次品嚐到入口即化又帶有少少燒烤香味嘅魚油香。 無論口腔定肚皮都相當滿足！ 然後仲有一道熱食係宮崎A5和牛，呢道和牛就略為遜色，同之前嘅魚油香比較，和牛反而無咁香口同埋有少少根。最後就係以麵豉湯同埋甜品作結，甜品可以揀蛋糕或者咖啡，我哋揀咗黑糖蛋糕，唔會太甜，為呢餐畫上完美嘅句號。…Read More

呢間炙·宴喺鑽石山荷里活廣場開左無耐，見好多人排隊就諗住試下，不過又真係等幾耐，都等左差唔多成30分鐘先入到去。炙·宴係主打北海道嘅豚肉丼飯，我就叫左月見豬腩肉丼，配一粒日本蛋。 賣相已經相當吸睛，燒豬腩肉嘅份量非常之多擺滿左成個飯面， 燒豬腩肉相當香口配埋日本燒汁香而不肥膩，而蛋汁嘅香同日本燒汁嘅甜撈飯一齊食亦別有一番風味。 一啖柔軟多汁嘅燒豬腩肉一啖燒汁蛋汁飯簡直送飯一流，食到停唔到口， 啱曬冬天嚟食。…Read More

原本諗住同囡囡去食lunch，不過見未夠鐘就睇下附近有冇cafe坐下，行行下就見到呢間J. Co，見入邊又唔係好多人就入去睇下。入到去就覺得環境非常之舒服，令人覺得係可以嘆下午茶嘅地方。飲品嘅價錢好似就平過Starbucks同Pacific coffee少少囉，不過最吸睛嘅地方係佢有個好大嘅櫃有好多唔同種類嘅 doughnut。 咁我地就叫左杯熱紅茶配兩件 doughnut，分別係 Crunchy Crunchy 同 Royal Tea。Crunchy Crunchy 就略為普通左啲，得啲脆脆係上面，而Royal Tea 就好夾杯熱紅茶。 整體嚟講係好適合嘆杯茶/coffee食件doughnut。…Read More

呢間爆丼屋之前bookmark 左好耐，聽講佢地嘅魚生丼同海膽丼好足料，今日一試果然又好食又飽肚。 今次叫左兩個丼飯：三色海膽盛丼 and 夢之丼夢之丼樣樣都有啲，三文魚，油甘魚，拖羅，帶子，甜蝦，三文魚子，基本上所有魚生都好新鮮，一次品嚐5款鮮味三色海膽丼用左三款不同的海膽🤤分別有兩款日本海膽和一款韓國海膽，可以見到海膽嘅份量一啲都唔少👍🏻入口鮮甜又creamy，撈飯食一流💓…Read More

呢間餐廳環境舒適，一入去就feel到好有格調同設計感，依度除咗食嘢，仲有得按摩💆‍♂️!好啱平時做完嘢黎放鬆一下。我哋今次試左佢哋嘅二人tea set加每人15min massage.首先會去按摩，按摩師會先問你想按嘅位置然後重點按，過程好舒服，如果按長啲時間會更好🤤。之後就到二人tea set時間，包兩杯飲品，1 set 甜點，1 set 鹹點，同兩杯Purple Lagoon氣酒。飲品可以揀咖啡，茶或者果汁，我哋就叫左Caramel Latte 同石榴汁。首先我哋試左scone，因為個scone仲係熱嘅，拎上手唔會成手油，食落鬆脆有香甜奶味，點埋jam一齊仲好食，好有水準。鹹點方面我哋覺得相當不錯，4款鹹點都好好食。水牛芝士吐司配日曬蕃茄乾，係一塊濃縮嘅一口pizza，相當嘢味。凍蝦配柚子檸檬汁，上面係橄欖油，下面係柚子醬，食落清新而凍蝦又彈牙。煙三文魚蒔蘿忌廉芝士卷，一啖咬落去就充滿芝士，之後有陣陣煙三文魚同魚子醬味，好夾味。牛油果他他配金肉沙律，雖然蟹味唔出，但係牛油果唔少，都係幾好食。其他甜品就正常發揮，有芝士餅，果撻，馬卡龍，卷蛋，但值得一提係都唔會太漏，份量兩個人食啱啱好另外，職員都好細心，同好有禮貌，整體用餐體驗一流，好chill!…Read More