ms123's Profile

第二次幫襯呢間紅爆嘅手工意粉店，上次喺中環Basehall food court食覺得都幾好，所以今次專登去試佢哋正式嘅餐廳，環境同座位都舒服好多～為免煩惱就叫咗「Take me to Nocino」，廚師發辦套餐真係好似開盲盒咁過癮😆前菜牛肉他他：牛肉加埋脆卜卜嘅薯絲，招牌菜果然最好食小牛舌吞拿魚醬：呢款同另一間連鎖手工意粉店嘅吞拿魚醬小牛肉有九成相似，意式吞拿魚醬味道濃郁，小牛舌質地更加嫩滑意式醃魚拼盤：鯷魚夠鹹香，仲有甜甜哋嘅醃葡萄，幾特別主菜煙燻鴨腿蜜桃寬麵：煙燻味幾重手，冇食開唔係幾慣辣肉腸波浪粉：呢款麵質更加煙韌，微微辣更加惹味甜品蒙布朗蛋糕好有心思，栗子蓉+黑加侖子+芝士蛋糕，三種味道一啖食晒！比起之前喺food court逼住食，而家坐得舒服仲可以慢慢歎。開咗分店之後冇以前咁難book，值得再訪～…Read More

琴晚六點九去到呢間燒味店，門口已經有條人龍排隊，好彩算郁得快，七點已可入座。伙記就話燒鵝剩返好少，我哋即刻嗌咗個茅台醬油雞燒鵝飯，同埋蘭王煎蛋叉燒飯。點知落單唔夠五分鐘，就聽到廚房嗌「燒鵝賣晒喇！」，食咗15分鐘左右，連招牌叉燒都賣晒！個叉燒雙蛋飯真係冇得彈，啲叉燒半肥瘦啱啱好，篤穿隻流心蛋撈飯真係正到爆。茅台醬油雞酒香入味，又香又滑每碟飯都會送碗老火湯，幾有家的味道，飲落應該冇落味精鵝汁時蔬用咗上價嘅西蘭花苗，呢啲細節可以睇得出店家對食材嘅追求講真呢間燒味係做得幾出色，不過想食燒鵝同叉燒就要早啲嚟啦～…Read More

和牛及鵝肝配長法包侍應即席喺面前用火槍燒，內裏嘅鵝肝就會溶化到好creamy，配搭埋和牛同埋好似脆餅嘅法包，油香四溢酸汁醃帶子配牛油果及香蔥醬新鮮帶子配上creamy牛油果，加上脆香蔥醬，惹味香口卡邦尼墨魚寬扁麵以為係普通嘅卡邦尼意粉配墨魚，但原來係用墨魚整成嘅扁麵！西班牙風味，烤三文治配芝士、伊比利亞火腿及黑松露火腿嘅鹹香配上香爆嘅黑松露，經典惹味傳統西班牙奄列（薯仔及洋蔥）貌似簡單但內有乾坤，軟嫩嘅薯仔洋蔥軟嫩配上濃郁嘅蛋香，有啲似豐富嘅日式玉子燒傳統華倫西亞雞肉、迷失香配青豆及雅竹燴飯大大份嘅西班牙飯係佢哋嘅招牌，呢款口味同平時食過嘅意大利飯唔一樣，最中意底下嘅飯焦，滿足埋想食煲仔飯嘅心…Read More

阿爸阿媽結婚周年紀念話想食海鮮，朋友之前介紹過呢間六福好食，上網search完一輪之後仲發現佢係米芝蓮一星，所以就決定一家人去六福慶祝。佢哋嘅散嗌餐牌好大，又有來料海鮮加工嗰啲，但我哋睇過之後決定揀套餐，一個價錢包晒所有嘢，又唔使驚海鮮價俾人呃，最緊要係啲嘢食望落都好啱食👍🏻首先嚟嘅前菜叫椒鹽奇脆豆腐，佢最奇趣嘅位係雖然外層粉薄但真係好脆，入邊嘅豆腐又夠嫩滑，一開餐已經展現星級水準薑蔥蟶子王份量夠晒壯觀，蟶子王彈口鮮甜，好食到伴碟嘅薑蔥蒜頭都比我哋清晒椒鹽焗鮑魚嘅鮑魚，超級大隻有成隻手掌中心咁大，我覺得佢有四頭咁大，而且最緊要係超級新鮮，咬落去係爽脆，不愧為呢度嘅名物生炒骨用上咗鮮菠蘿，而且鄰近骨邊嘅肉會比淨肉更加好食，雖然市面上有好多類同出品，但食過就知呢碟絕對有水準天婦羅桶蠔衣薄脆不油膩，桶蠔大大隻啖啖肉，用生菜包住再加啲沙律醬，送酒一流上湯龍蝦伊麵好食到一個點，龍蝦大隻到有成支叉咁長，食完半隻都差唔多飽咗一半，但最重要係佢底下嘅伊麵吸收晒龍蝦汁嘅精華，係成世人食過最好食嘅上湯龍蝦伊麵尾聲仲有米湯浸時蔬同埋甜品椰汁西米糕，都好精彩，米湯夠鮮甜又養胃，椰汁西米糕出面買少見少，平時可能去泰國餐廳先有機會有得嗌嚟食吓，估唔到呢度食海鮮菜都食到，成餐飯都喜出望外！…Read More

呢間行宮廷風嘅印度菜，有Dining City promotion嘅時候已經好想試，估唔到環境靚之外，食物一樣都咁正！雖然價錢偏貴，但係份量夠大又足料。好適合想舒舒服服地食一餐華麗異國菜嘅人。特別推薦佢哋嘅Naan，配上黑松露好香好好味同埋一定要試佢哋嘅birayani，出面嗰層酥皮，簡直係全場嘅hidden gem，一啲都唔油，又酥又脆，外脆內軟。Mango lassi亦都係食印度菜，必須要飲嘅名物，呢度嘅味道都好正宗，一啲都唔會假…Read More

去完北歐之後好想喺香港食返餐北歐菜，上網搵到呢間係中環嘅北歐餐廳，而且又有最鍾意食嘅手工意粉，食完整體嚟講都算係一次幾特別嘅飲食體驗。🐟 Norwegian Fish Soup 挪威海鮮湯湯底幾清爽，同記憶中北歐濃郁嘅風味有啲唔同，可能係為咗迎合本地口味調整過，材料都有齊三文魚同白魚🍝 Pesto Cream Chicken Handmade Dusilli 青醬奶油雞肉手工螺旋麵手工麵口感有嚼勁，青醬味道都幾突出，搭配松子，加添咗啲堅果香🍗 Sous Vide Whole U.U. Chicken 低溫慢煮全雞雞肉用慢煮方式會比較嫩，但亦都有啲生，見紅都有少少驚，不過以$228嘅價錢嚟講，份量真係幾抵食…Read More

呢間餐廳係阿媽喺網上見到人哋介紹之後主動話想去，咁就梗係去試吓先🫶🏻餐廳位置位於海濱側邊，原來餐廳場地好大，仲有室外嘅位置，整得都好靚，幾啱開party😍～前菜～·松露野菌湯一上枱就聞到超香嘅黑松露味！湯打得超綿密，每口都喝得到野菌碎碎，濃郁但不膩口，黑松露醬全部隱藏住喺湯嘅中間，份量多，如果有麵包沾著吃呢個絕配就好啦·法式香草牛油薯蓉焗田螺呢碟田螺比想像中驚艷！甚至可以話係食過最好食嘅田螺！田螺QQ的好似高級版螺肉，而且有好多好多粒，多到食極都仲有咁😍而底下薯泥根本是主角～超級爆炸綿密，仲配搭咗啲菠菜，側邊烤過嘅麵包脆脆令成碟都加晒分～主菜～·燒焗肉眼扒配燒汁菜單寫係肉眼扒，但比較似係西冷，不過勝在佢都幾大嚿，差唔多跌出碟外😂·墨魚汁鮮魷魚扁意粉呢碟最驚喜嘅係真係用咗新鮮嘅魷魚仔，新鮮嘅海鮮真係完全冇腥味，扁意粉吸滿晒蒜香墨魚汁，每條都充分包裹醬汁好夠味，食完個嘴黑鼆鼆可以去Halloween😆～飲品～·柚子檸檬蝶豆花梳打杯嘢飲嘅漸變色好靚，一層藍一層透明再加一層黃咁，超級靚，飲落都好味·利賓納荔枝乳酸梳打利賓納係兒時嘅回憶，入邊仲有兩大粒荔枝，提子嘅甜再加微微嘅乳酪酸，呢款都好味…Read More

冇諗過中環除咗蘭桂坊之外，樓上舖都有氣氛正環境chill嘅酒吧餐廳AKAGAI 用上鮮甜嘅赤貝包住爽甜蘆筍，食起嚟清新又開胃。 SHREDDED CELTUCE SALAD萵筍絲上面鋪住蘿蔔蓉同埋三文魚子，再配上鰹魚乾湯底，混合食落清甜, 散發清香。CARAMELIZED PUMPKIN焦糖南瓜，以脆脆嘅焦糖模仿南瓜皮，南瓜軟熟而不爛，口感一流。CHARCOAL GRILLED EEL喺上菜嘅時候用熱炭即場燒鰻魚皮，夠晒視覺效果之餘，仲確保鰻魚皮夠晒香脆，而且十足炭火香味，魚肉鮮甜，而烹調煮法保護住魚肉嘅鮮嫩，鎖住肉汁。 A4 WAGYU CUTLET CHARCOAL SANDO 一定要趁熱食！竹炭麵包包住吉烈A4和牛，和牛充滿油香，夠晒Juicy，麵包外脆內軟，為和牛解膩。最後以抹苶芝士蛋糕及紅豆大福做甜品作結，配上兩杯mocktail, 摸著杯底過左個美好嘅夜晚。…Read More

見到呢間居酒屋有喺日本東京大熱嘅龍珠卷，仲要價錢一啲都唔貴，所以就專程食去試吓！海膽龍珠卷係毋庸置疑地令人感到驚艷，鮮甜嘅海膽配上吞拿魚蓉，加上大大粒醬油漬蛋黃，上面再加啲金箔，一咬落去爆曬汁，各種鮮甜韻妙地融合溶化喺口中😋 特選刺身盛有各種新鮮嘅魚生，厚切大大嚿，赤蝦仲要爆曬膏！汁燒免治雞軟骨棒充滿炭燒的香味，雞軟骨令到肉串帶少少的嚼勁與多汁，再配上生蛋黃及濃郁的醬汁，口感味道一流。鹽燒鰝鰺魚頭鮫外皮微脆，肉質鮮美，都超級好食。…Read More

香梨伯爵茶戚風蛋糕🎂去攞蛋糕嗰時咁啱見到店主默默喺後面整緊蛋糕，感受到嘅已經唔單止係每日新鮮即製咁簡單，而係店主嘅個份整好每個蛋糕嘅心機！一打開個盒，蛋糕香氣撲鼻，切落去係feel到裏面嘅戚風蛋糕好鬆軟！外層嘅忌廉都超幼滑，淡淡嘅伯爵茶味配上梨香，兩者嘅平衡拿捏得好好，一啲都唔會太甜太膩。而且又可以買細細個蛋糕，兩個人share食啱啱好😋見到好多人推薦佢哋嘅曲奇都好好食，打算下次試吓佢哋嘅曲奇。…Read More

呢間唔係一般嘅印度菜，更加刷新咗我對印度菜嘅既定味蕾！有冇諗過naan 🫓 但變身成pizza 🍕 ；butter chicken 但配上pasta 🍝 ？ 🇮🇳 X  🇮🇹 fusion既新穎又出奇地配搭，而且西式做法令到傳統嘅印度名菜相對更加易入口，好值得一試。Chicken Tikka naanza厚批、薄批、酸種批底都食過，但係印度薄餅就真係未試過！呢個饢披薩係用上咗naan做批底，再將佢烤到酥脆，撒上咗印式調味嘅雞肉同埋各種蔬菜，醬汁微辣但係超級濃郁。Prawn masala Fettuccine呢款印度式意粉就用上咗印度好出名嘅馬薩拉醬，蝦肉份量可以用海量嚟形容，基本上每一啖意粉，都可以配上到兩三隻蝦。但係可能因為佢哋加上咗辣椒碎，所以都有少少辣，怕辣嘅人士可以喺落單之前講聲唔好再加辣椒，又或者嗌另一款Butter Chicken pasta。另外食印度菜又點可以唔嗌Mango Lassi！呢款嘢飲好似得係印度餐廳有得飲，味道就好似楊枝甘露但係冇晒啲配料，有啲似芒果沙冰。最特別嘅係佢哋加上咗新鮮嘅芒果粒同埋小小嘅開心果碎，所以飲到最後仲有果肉同埋脆卜卜嘅口感添！食到最後，我哋仲額外加在一份naan去沾啲醬汁食，最後食到一滴醬都冇剩🤌🏻…Read More

朋友最近有啲感情失意，所以就搵咗間可以一邊聽歌，又可以一邊同朋友暢談嘅餐廳相聚。嚟到先知原來呢度唔止有歌聽，就連食物都係超級健康，唔單止所有營養標籤都列晒出嚟，仲好細心咁樣將每一款食物分類好晒，例如係增肌/減脂/多纖維，啱晒我哋呢啲要維持身材嘅女人，又或者要增肌嘅男人🤣海膽意大利飯睇過黑白大廚都知道整意大利飯好考功夫，呢度嘅意大利飯就整得好al dente，海膽份量都比得好慷慨，海膽醬汁超級香濃，完全係令人欲罷不能咁一啖接一啖食🤤焗龍蝦配牛板腱牛板腱喺香港之前引起一陣熱潮，係增肌減脂嘅超級好選擇，仲配埋焗龍蝦，有半大隻，而且仲有膏添！暮光森林呢杯奶昔混合咗不同莓類同埋脫脂奶，莓類嘅水果有抗氧功能，仲可以幫助消化同排毒。飲落去超級新鮮，仲會食到粒粒嘅籽，超級清新。赤丹緋紅相比暮光森林，呢款混合咗士多啤梨，車厘茄，同埋香蕉。因為加咗香蕉，所以更加有甜味，好好飲！…Read More

呢間炸雞店剛剛進駐香港嘅時候曾經引起一陣騷動，每逢食飯時間排隊嘅人龍長到不得了。估唔到時間飛快，原來佢哋奧海城呢間分店都已經開業一周年，終於搵到去食呢間韓國炸雞界嘅名牌店。呢度最出名食炸雞，雖然得兩個人，但係為咗試多啲味道，都嗌咗兩份半半炸雞，一次過試晒四款味道！🤣有醬汁嘅炸雞分別嗌咗秘製黑炸雞同埋辣卡邦尼年糕炸雞。黑醬油味係佢哋嘅招牌，鹹鹹甜甜嘅味道平衡得好好，而且仲配上咗香脆嘅炸蒜片，香脆嘅口感係口中爆發；辣卡邦尼年糕炸雞可以一次過滿足咗食年糕同埋炸雞嘅願望，而且韓國辣醬配卡邦尼汁不嬲係韓國食品嘅招牌醬汁，卡邦尼汁大大降低咗辣度，所以小小辣味但又夠惹味！乾身嘅炸雞就嗌咗Corn so amazing，呢款我覺得最好食，香甜嘅粟米粉令到炸雞同埋粟米嘅味道昇華到另外一個層次，而且因為係調味粉嘅關係，所以炸雞仲係keep住好香脆，唔會俾啲醬汁浸到腍咗；另外一款就嗌咗紫菜脆脆炸雞，呢一款仲有一片片韓國好出名嘅紫菜脆片，韓味十足。整體嚟講呢度嘅雞脂肪含量比較少，所以一啲都唔肥膩，而且用咗鮮焗後炸嘅方法，所以外皮係超級香脆，不過與此同時可能因為煮嘅工序多咗，就會偏乾少少，不過撈埋啲醬汁一齊食，就balance返晒👌🏻同埋好值得一讚佢哋嘅職員都好好，又面帶笑容，好值得一讚👍🏻…Read More

呢間生煎包早排好Hit，一直都好想試。我哋兩個人嗌咗兩份午市套餐，再加多咗一份上海炸排骨，同埋兩隻蟹黃生煎包。豆漿可以任飲。蟹黃生煎包蟹粉味都幾濃，一咬落去爆曬汁，睇圖片中枱上面嘅汁😅麻醬手撕雞絲粉皮加生煎包配凍豆漿呢度所有服務都好貼心，醬汁可以揀多醬，又可以另上。粉皮彈口，雞絲同青瓜份量都好多。蔥油雞扒菜飯加生煎包配豆漿雞扒啖啖肉都好厚肉，上面配咗炸香咗嘅蔥油，菜飯味道好香。另外嗌嘅秘製上海炸排骨，粉漿都幾薄，呢點幾好，不過略嫌排骨冇骨，同埋肉比較薄。…Read More

最近好想去地中海旅行，諗到可以嘗試吓食地中海菜，就上網search咗一下香港有邊度可以食🤤跟住就無意中發掘到呢間隱世中東菜，唔單止食材新鮮食物好味，環境仲裝修到好似入咗地中海出名嘅洞穴一樣😍嗰晚我哋8:30左右先到都要等好一段時間先入到座，果然好嘅餐廳都係低調地已經人氣爆燈🤤鷹嘴豆泥伴羊肉鷹嘴豆泥打得超級細滑，加埋熱辣辣烘起嘅中東包，小小嘅麵包可以沾滿多多嘅醬，再配上咗粒粒炭燒羊肉，超級好食超級滿足鐵板煎著名中東鹹香芝芝士經過烤製之後更加有風味，同平時食開嘅芝士唔同，中東芝士嘅芝士味道唔重，而質地同豆腐十分相似，再配上咗鮮甜嘅甜椒醬，唔單止色彩鮮艷，更加可以提升本身芝士嘅鮮味，鹹鹹甜甜越食越上癮有機藍青口 新鮮嘅材料果然係最重要，藍青口粒粒鮮甜肥美，再配以簡單嘅橄欖油、海鹽、檸檬同埋蒜頭烹調，真係好有衝動嗌多啲包沾埋啲醬汁食埋佢手工製土耳其牛肉腸意粉好欣賞呢度嘅食材好多都十分罕有，所以喺靠餐廳自己手工製造而成，尤其是呢度嘅手工制土耳其牛肉腸，用咗較少脂肪嘅免治牛肉，再配搭啲香草同埋香料以傳統嘅方式發酵而成，完全同平時食開嘅現成腸仔完全唔一樣，呢款手工制牛肉腸係超級好食阿拉伯乳香膠雲呢嗱雪糕配開心果碎除咗呢度嘅人氣甜品Knafeh之外，呢款阿拉伯雪糕配開心果碎其實更有驚喜！雲呢拿雪糕外層裹着粒粒脆卜卜嘅開心果碎，果仁香味點綴咗平凡嘅雲呢拿雪糕，而且口感層次更豐富…Read More